Рубрикатор

Бигачев энергетикесь

Ламот Саранскоень эрицятнестэ некшнизь ошонть велькссэ валдонть, конась седе пек неяви чокшне ды, келя, космосстояк. Сон мазылгавты менеленть ожо тюссо ды ошонтень ардомсто неяви пек васолдо. Социальной сеттнесэ кие мезе ансяк те валдодонть эзь сёрмале, ней жо весе уш содыть – те дивань тевесь моли «Тепличное» МР-нь ГУП-нь теплицатнень эйстэ. Течи минь эште содавттадызь се ломаненть марто, конась валдомты минек республикань прявт ошонь менеленть малав комсь част. Уледе содавикст – Александр Андреевич Бигачев, «Тепличноень» прявт энергетикесь, конась ваны сень мельга, кода моли лембесь теплицатнес ды максови электроэнергиясь те предприятиянть эсензэ энергоцентрасто.

Валдось менелентень моли сеть теплицатнестэ, конатнесэ эмежтне кастовить «светокультурань» технологиянть вельде. Мезе те истямось? Истямо лувсо роботыця теплицатнесэ эмежтне кастовить цела ие, тельняяк-тундаяк. Светокультурань теплицатне чинек-венек эждевить специальной лампасо ды урожаесь колмоксть седе ламо ташто лувсо роботыця теплицатнень коряс. Бути лиятнесэ пурныть, невтемакс, вейке кавонзазь метрастонть 55 килограммат куярт, светокультурань теплицатнестэ – малав 150. Течинь чис валдомтыця системанть марто теплицатнень алов саезь 9,2 гектарт 29 гектартнэстэ, ансяк те тевесь поладови седе товгак. Васняяк светокультуранть вельде кастовсть ансяк куярт, тедеде васенцеде тейсть эксперимент ды озавтсть помидорткак. Урожаенть арсить пурнамс Од иентень. Кода кортыть содыця ломантне, истямо лувсо кастозь куяртнэ, помидортнэ мейсэяк а явовить теплицань лия «ялгаст» эйстэ.
Ансяк ули вейке тамаша, энергиядонть сынст кастомс эряви пек ламо ды рамамс сонзэ костояк веёндо – эмежтнень питнест касоволь бу менельс. Секскак, кода ёвтни Александр Андреевич, «Тепличное» МР-нь ГУП-нь прявтось А.М.Живаев сайсь мель строямс эсест предприятиянь энергоцентра. Ламо сестэ савсь роботамс Бигачевненьгак, ардтнемс командировкава, ванкшномс истямо центрат омбо мастортнэва, ловномс специальной литература, прядомс эште вейке специализация – «Экономика и управление аграрным производством». Вейсэнь вийсэ стявтозель васенце энергоцентрась, кода мерить, пробноесь. Сонзэ вийсэ варчазель кастомс светокультурань васенце эмежтнень 2012 иестэ. Мейле строязель седе покш энергоцентра, конась ней валдомты ды эжди весе предприятиянть.
Александр Андреевичень, кода прявт энергетикенть, тевезэ пек ответственной, ды сон ломанеськак истямо, чить ды веть роботасо. Эдь теплицань эмежтнень мельга сави ваномс пек пштистэ, лембесь ды валдось сынст туртов васенце таркасот. Бигачев, нама, аволь сеске аравтозель те покш тевенть прявтс, савсь тензэ ютамс карьерань весе кузтеминетнень. Истямо ломантнеде кортыть – сонсь эсь прянзо кастызе, ды те алкукскак. Арасельть Бигачевонь «тулкадицянзо», ульнесть ансяк превензэ ды мелезэ – парсте важодемс ды содамс таго-мезе од.
Александр Андреевич чачсь-кассь Саранск ошсо. Тетязо ды авазо – эрзянь ломанть, састь ошов важодеме Кочкурбуень Сурвелестэ ды Покш Березникень Дягилевкасто. Тесэ вастовсть, налксесть свадьба, чачтсть эйкакшт. Александр, кода лиятнеяк, прядызе школанзо, тусь тонавтнеме Н.П.Огарёв лемсэ университетэнь Механикань ды энергетикань институтов. Практикань ютамо понгсь «Тепличноев», тесэ тензэ вечкевсь, мусь ялгат-оят, ансяк самс важодеме эзь саво – саизь од цёранть армияв. Вейке ие Бигачев служась связень отделениянь командирэкс внутренней войскасо ды велявтсь мекев тиринь ёнксов. Мелесь молемс важодеме «Тепличноев» эзь ёма, ды 1998 иестэ Александр сась тей важодеме васняяк панжадо грунтонь цехень мастерэкс-наладчикекс. Шкань ютазь путызь 1-це цехень инженерэкс-теплотехникекс, мейле ютась 3-це цехс. 2009 иестэ саезь аравтозель 4-це цехень прявтокс, конасонть мейле ушодозельгак светокультурань эмежтнень кастомась. Те тевенть топавтоманть кисэ Бигачевнень максозель Мордовия Республикань велень хозяйствань заслуженной роботникень лемесь. Прявт энергетикекс Александр Андреевич кармась кавто иеде теде икеле, сонзэ, кода мерить, вановтонзо ало 56 ломанть: электриктне, сантехниктне, котельноень важодицятне ды КИПИА-нь службась. Ней Бигачевонь ды целанек «Тепличноень» роботыцятнень икелев путозь од вешемат – топавтомс эште вейке покш проект – теемс реконструкцият 1-це ды 2-це цехтнес. Сестэ светокультурань технологиянть вельде тосо кармить кастовомо эмежть эште 16 гектартнэнь лангсо. Минек менелесь жо седеяк валдомгады-мазылгады, ды, паряк, Саранскоенть историяс совить Санкт-Петербургонь кондямо «ашо чокшнеть».
Марина Девятова

 

Новости

«СЯТКО» ДЫ «МОКША» журналтнэнень – 90!

Неть читнестэ МР-нь Пресс-центрасо ютась промкс, кона алтавсь «Сятко» ды «Мокша» журналтнэнь 90 иень топодемантень. Мокшонь кельсэ «Валда ян» журналось лиссь Пензасо, эрзянь «Сяткось» – Самарасо. Самай неть изданиятнесэ лиснесть минек ушодыця поэттнэнь ды писательтнень произведенияст.

Подробнее ...
 
Инжетне содавтовить эрзятнень эрямо коест марто

Мордовия Республикасо Эрзянь культурань ды ремеслань куншкакуронь теемань коряс дизайнерэнь арсемань объектэкс кармась Отяжелесэ пичень чочксто чапозь сокицянь-видицянь семиянь кудось. Сонзэ вакссо анок уш баняськак, кона уштови «раужосто», тунда путневить эмеж марто пандяткак.

Подробнее ...
 
Саранскойсэ панжови приют

Саранскойсэ панжови приют азортомо ракшатнень туртов. Кода пачтясть ошонь администрациясто, ней уш ули тень туртов таркаяк. Панжома шкась – те иень июнь ковс.  Приютонтень кармить кельгеме 100 каткат ды 300 кискат.

Подробнее ...
 
Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...