Рубрикатор

Кие панды ушонть уштоманзо кисэ?

Саранск ошсо ды целанек республикасонть уштома сезонось ушодовсь ковдо икеле. Весе кизэнть перть жо коммунальщиктне ды, васняяк, сеть организациятне, конатнень тевест максомс эрицятненень лембе, анокстасть сеттнень ды систематнень телентень. Сентябрянтень, коммунальной службатнень пачтямост коряс, весемесь ульнесь анок. Ансяк вана кода свал эрси, роботатнень теизь эрязкадозь, ансяк бу кенеремс тешкстазь шкантень. Истя, апаротне састь апак учо. Ноябрянь 27-це чистэнть ошонь Администрациясо ютавтозь промкссонть пачтявсь, уштома шканть ушодовомсто (ковонть перть) Саранск ошонь Пролетарской районсо авариянь тевтнень коряс уштоманть лоткавтокшнызь 16-ксть, лембе ведень коряс лоткавтомат тешкстазь 28. Октябрьской районсо тешкстазь лембень лоткавтомань 10 тевть. Теньсэ тувталокс седе сеедьстэ ёвтавить теплотрассатнесэ колавкстнэ. Тесэ лиси кевкстема: кода жо неть трассатнень анокстасть? Эдь уштома сезононть ушодовомадо икеле весемесь ульнесь анок, теезь парсте. Кодаткак мелявкст ды кевкстемат арасельть. Лисни, теплотрассатне кольсть-каладсть вейке ковонь перть?! Теке марто ошонть келес течинь чис (моли декабря ковось) теплотрассатнень ды коммуникациятнень перька таркатне чувнозь. Кодаткак роботат ламотнень перька а ветявить. Чувизь ды кадызь. Мерят, киньгак тевезэ арась, киненьгак мезеяк а эряви.

Эште вейке покш мелявксось – ошонть келес ламот теплотрассатнень лангсо изоляциясь сезневсь ды трубатне овсе ушосот. Сайсынек ошонь Лесная куросонть аштиця «Лисма» котельноенть. Сеске тешкстаса, кандови сон «Т Плюс» ПАО-нь «Мордовский» филиалонтень. Истя, котельнойстэнть саезь ды весе теплотрассанть кувалт трубатнень ланга изоляциясь сезнезь, ламот таркатнева сынь овсе апак тапарда. Ды, эряви меремс, истя сынь аштить аволь ков-кавто ды, бульчом, аволь ие. Истямо трубатне тесэ уш зярыя иень перть. Зярыя иень перть уш неть трубатнень эйстэ ютыця лембесэнть уштови ушось, солавтови пертьпельга ловось. Ансяк вана лисни кевкстема. Кие панды ушонть уштоманзо кис? Лембень максыця компаниясь? Эли, паряк, седе видестэ меремс, тесэ аштиця кудотнень эрицятне? А те минь тынк марто. Паряк, тень коряс неть трубатнень лангс ламо иень перть кияк вановтонзо а кайси, кияк мель а яви лембень ванстомантень, изоляциянтень. Киненьгак арась тев.

Те кевкстеманть марто минь пшкадинек «Т Плюс» ПАО-нь «Мордовский» филиалонь стратегической коммуникациятнень региональной центрань прявтонтень Вадим Носовнень. Сон тешкстызе, теплотрассатнесэ роботатне ветявить: полавтневить трубатне, одкстомтови теплоизоляциянь вельтявксось, витневить-петневить колавкстнэ.

– Минь весе роботатнень тейтяно эсь ярмактнень лангс, ошонть пельде тень коряс кодамояк лезкс арась. Сайсынек «Лисма» котельноенть. Тесэ теплотрассанть минь свал витнетяно. Нейгак арсевить полавтомс трубатне, сынь путозь уш умок ды ламот таркатнева таштомсть. Тень коряс ней трубатнень лангсто изоляциянть а полавттанояк. Нама, весемесь тееви аволь истя куроксто, кода миненек бу эряволь. Тесэ улить лия мелявксткак.  Минек, кода ламот лия регионтнэсэяк, улить истямо ломанть, конатнень лемдить вандалокс. Сынь свалшкане бажить теемс мезеяк берянь. Те теплотрассанть коряскак истя. Неть трубатнень лангсто изоляциянть сезнекшнизь уш аволь весть, минь эрьва ие сонзэ снартнетяно витнемс. Ансяк вана неть ломантненень кодаяк а чарькодеви. Сынь поладыть эсь берянь тевтнень. Эрьва теплотрассанть малас эдь а ладявттано ванстыця ломань. Минек васень тевенек – максомс ломантненень лембе, теемс весементь авариятнень а нолдамга. Истя жо тешкстаса сеньгак, минек потребительтнень туртов трубатнень лангсо изоляциянь арасьчись а канды кодаткак ёмавкст. Эрицятне пандыть учётонь прибортнэнь максомаст коряс. Неть прибортнэ неень шкане улить весе кудотнесэ. Ды лембенть кис пандыть сень коряс, зяро гигакалорият уштоманть лангс ютавтсь кудось ковонть перть, –  тешкстызе Вадим Носов.

Карматано арсеме, «Т Плюс» ПАО-нь «Мордовский» филиалось алкукс теи  истя, кода сынь пачтить. Шкась невтьсы. Минь жо неть таркатнень содавтсынек зярыя шкань ютазь ды ванносынек, мезе те теплотрассасонть карми теезь-одкстомтозь.

Ю.Еремина

 

Новости

«СЯТКО» ДЫ «МОКША» журналтнэнень – 90!

Неть читнестэ МР-нь Пресс-центрасо ютась промкс, кона алтавсь «Сятко» ды «Мокша» журналтнэнь 90 иень топодемантень. Мокшонь кельсэ «Валда ян» журналось лиссь Пензасо, эрзянь «Сяткось» – Самарасо. Самай неть изданиятнесэ лиснесть минек ушодыця поэттнэнь ды писательтнень произведенияст.

Подробнее ...
 
Инжетне содавтовить эрзятнень эрямо коест марто

Мордовия Республикасо Эрзянь культурань ды ремеслань куншкакуронь теемань коряс дизайнерэнь арсемань объектэкс кармась Отяжелесэ пичень чочксто чапозь сокицянь-видицянь семиянь кудось. Сонзэ вакссо анок уш баняськак, кона уштови «раужосто», тунда путневить эмеж марто пандяткак.

Подробнее ...
 
Саранскойсэ панжови приют

Саранскойсэ панжови приют азортомо ракшатнень туртов. Кода пачтясть ошонь администрациясто, ней уш ули тень туртов таркаяк. Панжома шкась – те иень июнь ковс.  Приютонтень кармить кельгеме 100 каткат ды 300 кискат.

Подробнее ...
 
Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...