Рубрикатор

Вай, «Афган», тон, «Афган»

«Вася ульнесь весемеде паро эйкакшокс»

Ушось потмура, менеленть ланга прок боцька ловцо валсть, секс чинть марто кодат-бути тамашань тевть кармасть лиснеме – косто кепетевкшни сон, козонь валгони – те зярдояк а чарькодевкшни. Латонть алдо чинь перть ансяк вейке музыка марят – петь-петь-петь ды петь-петь-петь. Те истя сёксень пиземесь апак лотксе «важоди» – истякояк ведтенть копком, пешксе моданть седеяк пек начты.

 

– Варштака мезе сась! – укстась Екатерина Филипповна, Пучкинтнэнь кудонь азоравась. – Истят апарот ансяк Васянь калмамо-ледстямо читнестэ ульнесть…

Екатерина Филипповнань ды сонзэ мирдензэ – Николай Васильевичень ульнесть кото эйкакшост. Весемеде покшось – Настя, чачсь 1952 иестэнть, омбоцесь, Иван, – 1955, Вера – 1956, Вася – 1960, Евдокия (кудосо тензэ Оля мерсть) – 1963 иестэ.

Сехте малавиксэкс авась ловсь Васянь. Сон ульнесь сэтьме, кунсолыця. Весемеде паро эйкакшокс, келя, ульнесь!

Екатерина Филипповнань марто вемельс прыть весе сетне, кить парсте содылизь Васянь. Вана эйстэст кой-конатне.

 

Настя ды Вера – Васянь патянзо

– Советской властенть пингстэ «Путь Ильича» минек колхозсонть ламбамо якстерькайденть виднесть пек ламо – малав 400 гектарт, – ледстнесть сынь. – Неть гектартнэнь явнылизь звенасо важодицятнень ланга. Эрьва ломаньс яла сатыль байтяк. Васянень сестэ ульнесть косо-бути 14-15 иеть. Сон яла сыль школасто, саилизе мотыганзо ды чииль паксяв.

– Те, тон, ков истя позда сыргить, – пшкадилинек тензэ, – курок уш чопотеме карми!

Сон каршонок, келя, кавто икелькст панян – сеяк аванень покш лезкс!

Молинек мартонзо лавкав карсемапелень рамамо. Тосо тенек макссть котат, конатнень питнест ульнесть кемгавксово целковойть. Сон неть котатнень эзинзе сае. Келя, тетям-авам косто зняро ярмактнень добовасызь? Ды кочкась колмо целковойде седе дёшоват.

Школанть прядызе вадрясто. Ульнесь ансяк вейке «колмозо». Лия отметканзо – ансяк «нилеть» ды «вететь». Минь тензэ – бути ули мелеть теевемс инженерэкс-строителекс, сестэ азё тонавтнеме университетэв!

Сон каршонок: «Арась, вузов зярс а молян. Вете иеть тосо тонавтнемс эряви. Семиянтень стака ули. Сонзэ мон прядса заочна. Васня молян тонавтнеме Ковылкинань техникумов».

Ковылкинасо тонавтнемстэ раминек тензэ нумолонь шапка. Сестэ од ломантнень ютксо сынь моднойть ульнесть. Ковонь ютазь сась кудов, прясонзо таго цыгейкань ташто шапкась.

Кевкстнетяно – косо одось? Сон, виздезь: «Молинь Ковылкинань баняв, тосто салызь».

Адя, мертяно, базаров, лия раматано. Арась, келя, а молян, цыгейкансесэнть карман якамо.

Техникумсо тонавтнемань васенце курсонть прядовома ёнов кандсть армияв тердемань повестка. Тень кувалма весе малавиксэнзэ, шабранзо, оянзо пурнавсть минек кудос, а вандынь солдатось арась. Тетям-авам, ялаксонок, сазоронок, весе семиясь талнозевинек, минь а содылинек, ков молемс, мезе теемс. Арсинек, паряк, мартонзо мезеяк лиссь? Ансяк зярыя часонь ютазь «ёмаськесь», окойники, совась кудос. Каявинек сонзэ ёнов, кевкстнетяно – косо те шкас ульнить?

Сон ёвтнизе тенек – келя, Ковылкинасо кирдевсь покш зыянонть кувалма – ютазь вестэнть техникумонь общежитиясонть ялганзо «вачкодизе» инсульт ды сон кулось. Эрявсь сонзэ ускомс тиринь велев. Зярдо техникумонь преподавательтне кевкстизь тонавтницятнень – кие моли ялгаст меельце килангов ильтямо? Икелев эскельдясь ансяк Василий Пучкин.

 

Л.Д.Володькина, кона тонавтнесь Вася марто вейке классо

– Минек классо тонавтнесть колоньгемень вейксэ эйкакшт. Эйстэст комстне цёрынельть. Вася прязон чаповсь вана мезень коряс – сон валдо ойме ломанель, лиятнень лангсо зярдояк а пеедькшниль. Обуцянь неть ёнкстнэ вечкевильтькак тейтерькатненень…

Е.Г.Годяева тонавтыцясь

– Классось, косо тонавтнесь Василий, ульнесь васенцекс, косо мон ульнинь классонь руководителекс. Тесэ весе цёрынетне сэреельть, виев рунгольть. Вася свал ульнесь ваньксстэ оршазь, прянзо ветясь парсте. Монень вадрясто помнявсть валдо-сэнь нусманя сельмензэ. Лангс ваномс сон мольсь ангел ёнов.

 

Армиясо службась ушодовсь

Отяжелень военкоматсто Васянь васня ускизь Саратовав, мейле – Венгрияв. Те масторсонтькак кувать служамс эзь саво, сынст таго озавтызь транспортс. Ков ардыть – теде кияк тенек эзь ёвта.

Ламот кенярдозевсть – келя, паряк, «Союзов» (истя солдаттнэ нурькинестэ яла лемдилизь Советской Союзонть) пачтьсамизь!

Зярыя чинь ютазь, окойники, пачкодсть эрявикс таркантень. Цёратне кирнявтнесть масторов. Вансызь, пильгест ало моданть таркас – кевть, чувар, машинатнень чарыст юткова метьказт чийнить, коштканть паксятастат ливтнить. Тесэ солдаттнэ кармасть содамо – те аволь «Союзось», те Афганистан.

Службань од таркасонть командиртнэ ванкшнызь Васянь конёвонзо-документэнзэ ды мерсть тензэ, келя, миненек строительть эрявить. «Тесэ кармат важодеме эсь профессиянь коряс. Те карми теть паро практикакс!»

Ансяк вана эсь валост эзизь топавто – мастероконь таркас макссть тензэ автомат, путызь отделениянь командирэкс ды кучизь служамо мотострелковой частьс, сеть афганецтнэнь каршо тюреме, конат эзть вечке тесэнь правительстванть. Ды ушодовсть пурдаведте, леднемадо, верде пештязь недлят.

Боевой часттнестэ вейкестэнть сынст отделениянтень макссть приказ озамс вертолётс ды маштомс косо-бути пандотнень ютксо кекшнезь афганецтнэнь. Ливтясть ков эряви, солдаттнэ кирнявтсть кевсэ ды пульсэ-чуварсо вельтязь моданть лангс. Афганецтнэ прок учость эйсэст, кепедсть каршост автоматсто, пулемётсто леднемань давол.

Советской солдаттнэстэ сетне, кить ульнесть икеле, – Пучкин ды украинец ялгазо – сеске прасть масторов. Живстэ кадовозь солдаттнэ эзизь кадо ледезтнень – кундызь кавто ёндо кавалалдо ды кепедизь-совавтызь вертолётс.

 

«Раужо тюльпанстонть» валгстызь, паряк, аволь Васянь?»

Ледстнить Настя ды Вера патянзо

– Миненек гайневтсть военкоматсто ды яволявтсть – ялаксонк чавовсь, эряви ардомс мельганзо. Кандолазтнэнь уловонть марто аэродромов пачтизь чавовомадонзо мейле ансяк кевейкее чинь ютазь. Кевкстинек военнойтнень – те мекс истя кувать усксть эйсэнзэ?

Сынь каршонок, келя, учинек, зярдо «Раужо тюльпанось» пешкеди…

Пумбрав пачкодемадо мейле кандолазтнэнь совавтызь минек кудос. Тесэ седе парсте ванкшнынек сынст. Кандолазтнэнь пес теезель вишкине вальмине. Варштынек те вальминеванть – сонзэ удало кодамояк ломанень чачо эзь неяво. Редявсь ансяк цёрань кирьгапарь, секс кавтолдозевинек – паряк, аволь Васянь тенек ускизь?

Теде мейле арсинек-теинек ды сынек мельс кандолазтнэнь панжомс. Ансяк кода тень тейсак, бути пряпесэнть почётной караулсо автомат марто кавто солдатт стядо аштить?

Теемс тень удалась ансяк калмолангсо. Тесэ кепединек кандолазтнэнь латонть, варштынек ды вайкстынек – те ульнесь Вася.

Тесэ чарькодинек – мекс чачозо вальминеванть эзь неяво – кандолазтнэнь армиясо тейсть, маряви, вейке онксонь коряс – «средней ломань» алов. А вана минек ялаксось ульнесь пек седе сэрей, ды секс истя лисськак.

Мейле варштынек, ков ранизь минек Васянок. Кода тешкстазельгак сонзэ куломань конёвтнесэ, пулясь ютась прянзо пачк.

Оршазель ялаксонок од формасо. Зепестэнзэ муинек блокнотонзо. Те книгиненть лопатнестэ вейкесэнть Васянь кедьсэ сёрмадозель: «Маряви, кудов тестэ живстэ а велявтан…» Прок марясь цёранть седеезэ, мейсэ прядови сонзэ службась.

***

Тесэ эряви башка тешкстамс, Пучкинэнь велесь – Пумбрась – Отяжелень райононь паксятнесэ ашти аволь  ськамонзо – сон нежедсь Мордовия Республикань келес парсте содавикс эрзянь лия покш велентень – Сабанцелентень. Кезэрень пингестэ те шкас сынь эрить вейке омбоценень лездазь, ояксчисэ, теевсть роднякс-малавиксэкс, секс калмамо сась аволь вейке веле, кавто велеть. Секс Васянь меельце килангс ильтицятнеде пе-край арасель.

Меельцеде истят покш калмамот ульнесть 1941-1945 иетнестэ. Сеть шкатнестэ вере ёвтазь кавто велетнестэ чавовсть 350 ломанть. Ансяк вана сеть куломатне кода-бути чарькодевсть – ульнесь покш война, масторонть олячинзэ кис война. А вана кода перьгедемс эрямонть эйстэ 19 иесэ мирной шкасто?

Тень коряс пси мельтне-арсематне седеяк пек пидесть ломантнень седеест. Секс аватне калмамстонть верьга вайгельть лайшесть. Цёратне пацинесэ сельмест нардтнесть…

А.Тикшайкин.

Те зарисовкантень материалонь ды фотографиянь пурнамсто лездась тенек Сабанцелень школань учительницась Л.Д.Володькина. Сюкпря тензэ тень кисэ.

 

Новости

«Единая Россия» добилась принятия закона о защите животных

Закон о защите животных был принят Государственной Думой 19 декабря через 8 лет с момента внесения. В марте 2011 года он прошел первое чтение. Осенью 2016 года на важность его принятия обратил внимание Президент России и дал соответствующее поручение Правительству РФ.

Подробнее ...
 
Более 1500 заявок подано на участие в учебном модуле Высшей партийной школы «Политический лидер»

За 10 дней с момента старта Высшей партийной школы и первого учебного модуля «Политический лидер» из регионов подано более 1500 заявок на участие. Всего в этом году будет отобрано 150 участников, для которых в Москве пройдет недельное обучение. Об этом заявила первый заместитель секретаря Генерального совета «Единой России» Ольга Баталина.

Подробнее ...
 
Од иень ярмунка

Од иень кенярксчитнеде икеле, ацамковонь 22-це чистэ, Саранскойсэ ютавтови ярмунка, косо кармить микшневеме эрьва кодат товарт ды велень хозяйствань продукция.
Ярмункасонть кармить Мордовиянь микшнемань сферань, общественной питаниянь, перерабатывающей промышленностень ды велень хозяйствань предприятиятне.

Подробнее ...
 
Турчак: Власти компенсируют гражданам затраты на покупку приставок для цифрового ТВ

Правительство РФ и региональные власти предусмотрели исчерпывающий набор компенсирующих мероприятий при переходе с аналогового на цифровое телевещание для малозащищенных слоев населения. Также в региональных бюджетах предусмотрены денежные компенсации или закупка необходимого оборудования. Совет по развитию цифровой экономики при Совете Федерации представит на ПМЭФ-2019 свой рейтинг цифровизации регионов и предложит механизм поддержки лучших региональных практик. Об этом заявил вице-спикер Совета Федерации, секретарь Генерального совета «Единой России» Андрей Турчак по итогам второго заседания Совета по развитию цифровой экономики в Новосибирске.

Подробнее ...
 
Премьера!

Декабрянь 8-це чистэ 17:00 чассто Эрзянь ды мокшонь национальной драматической театрасо ваныцятнень учи премьера. Тесэ невтить М.Камолеттинь «Играем в дружную семью, или гарнир по-французски» од путовкс. Спектаклясь алтави МР-нь заслуженной артисткатнень Марина Аверкинань ды Галина Самаркинань юбилеень тешкстамонтень. Режиссёрось-путыцясь МР-нь заслуженной артисткась Л.Шахова.