|
Саранскоень мэрэнть кедьсэ промкссонть кудотнень уштоманть коряс кевкстемась кармась сехте пштикс. Администрациянь прявтонь васень полавтыцянть, Ошонь хозяйствань департаментэнь директоронть Алексей Егорычевень валонзо коряс, Саранскойсэ ламо квартирас весе кудотнесэ ули лембесь. Ансяк улить мелявкст зярыя стояктнень коряс, кевкстемась решави.
Ленинской райононь прявтось Александр Юткин пачтясь, ошонь Куншкакуронь ды Юго-западонь районтнэсэ кудотнес ды социальной объекттнэс лембенть максоманзо мельга ваныть пштистэ. Теке марто те районсонть «СаранскТеплоТранс» ОАО-сь весе роботатнень эзинзе прядо ды течинь чис коммуникациятнень перька латкот чувозь 16 таркава.
Уштома сезононть ушодовомсто Северо-западонь райононь эрицятнень пельде састь 3500 пеняцямот. Пролетарской райононь прявтось Александр Кузьмин мерсь, Светотехстройсэ мелявкст кото пункттнэва, конат максыть лембе ламо квартирас 110 кудотнес. Неть кудотнестэ седе ламотне аштить Веселовскоень куросонть. Прявт тувталось – сеттнесэ а кирдеви давлениянь параметрась. Ресурсоснабжающей организациясонть алтасть весе кевкстематнень решамс. Теке марто те районсонть 14 таркава чувозь латкот.
Октябрьской районсо 25000 стояктнень эйстэ мелявкст улить 79-тнень коряс. Тесэ сеттне чувнозь 21 таркасто. Теке марто Ремзаводсо од теплопунктс кудонть ютавтомсто «СаранскТеплоТранс» ОАО-сь эзинзе топавто роботатнень шкастонзо ды тевентень кундасть ансяк ней.
Течинь чинтень лембесь ули эйдень весе кужотнесэ ды школатнесэ.
«Зярдо ютавтовить вастовомат ресурсоснабжающей организациянь важодицятнень марто, эряви кортамс мелявкстнэде: косо чувозь латкотне, невтемс а маштовиця стояктнень ды лия тувталтнэнь. Лисни жо, сынст пингстэ тынь чатьмонтядо талновтыця кевкстематнеде. Паро, ломантне пеняцить. Роботамс эряви эрязасто ды шкастонзо!» – мерсь пурнавозтненень Пётр Тултаев.
|
Кода уштовить кудотне?
