Рубрикатор

Происшествия Зыянов тевтнень киртямга
Зыянов тевтнень киртямга

Неть читнестэ МР-со МВД-сэнть ютавтовсь МР-со УФСИН-нь ды Мордовиянь Внутренней тевень министерстванть вейсэнь пресс-конференциясь. Тесэ ёвтнесть сеть зыянов тевтнеде, конатнень теить тюрьмасо аштицятне сотовой связенть ды интернетэнть вельде.

 

 МР-со МВД-нь «К» отделэнь прявтонь полавтыцясь Н.Н.Суняйкин ёвтнесь, Мордовиянь колониясо аштицясь, конась чачсь Московонь областень Дмитров ошсо, мобильной телефононть вельде полады манчемань тевтнень. Тень коряс панжозельть 7 уголовной тевть. Зубова-Полянань райононь судсонть цёрась ёвтазель чумокс ды пачтязель исправительной колонияв. Тосо сон одс тейсь мошенничествань тевть. Сон манизе мартонзо аштицянть, алтась тензэ миемс сотовой телефон. Тень вельде манинзе мартонзо аштицянть малавиксэнзэ ярмаконзо.

МР-со МВД-нь Уголовной розыскень управлениянь организованной преступностенть каршо бороцямонь межрайононь отделэнь прявтонь полавтыцясь Ф.А.Волгаев ёвтнесь журналисттнэнень уголовной тевенть ванкшномадо, конась ушодозь Краснодар ошсо чачозенть коряс, сон ней ашти Мордовиянь вейке колониясонть. 50 иесэ цёрась телефононть ды интернетэнть вельде манчи ськамост эриця аватнень, содавиксэкс тейнемань туртов Интернет-сайтс совсицятнень. Ванкшноматнень ютавтомадо мейле сонзэ коряс ушодозь 5 уголовной тевть. Сон манчесь Московонь ды Ленинградонь областень, истя жо Калининград ды Новороссийск ошонь эрицятнень. Интернетэнть вельде лия лем ало совсесь содавиксэкс теевемань туртов сайттнэс, ды анкетатнень ванкшномаст-тонавтнемаст вельде вешнесь эстензэ жертват. Неть ульнесть 45-65 иесэ ават, конат бажасть муемс цера семиянь тееманть туртов. Пачтямотнень кучномадост ды гайневтематнень вельде, сон манчесь эйсэст. Веенстнэнень ёвтылизе прянзо мазычинь теемань салононь сюпав азорокс. Ёвтыль, эсь бизнесэнть вети Московсо, ансяк чачсь Сочисэ. Аватненень сон алтыль каземс квартира ды максомс важодемань вадря тарка. Шкань ютазь сон вешиль пельдест ярмакт 40-80 целковоень покшолмасо, конатне эрявить Московов эрямо туеманть туртов. Тень пингстэ кармавтыль а макснемс кевкстемат ды педе-пев топавтомс весе кармавтоманзо.

Лиятненень жо цёрась ёвтнесь: сон тейсь преступления ломанень идемга. Зярдо аватне кармильть жалямонзо, пачтиль: маласо шкастонть сонзэ нолдасызь. Шкань ютазь ёвтыль: Краснодар ошонь вейке банконть счётсо сонзэ улить пек ламо ярмаконзо, конатнень анок пачтямс од содавиксэнть туртов, штобу тона якаволь церанть сыре аванзо мельга, рамаволь эрямо тарка ды весе эрявиксэнть сонзэ олякстоманть туртов. Мейле сон кармиль кортамо стакачис понгомадо (лия колонияс ветямодо, косо пек берянть условиятне, ФСИН-нь сотрудниктнень аволь закононь коряс тевдеемадост ды лиядо), стакачитнень витемс вешсь кучомс ярмакт 40-80 тёжат целковоень покшолмасо.

Пресс-конференциянь ютавтыцятне мерсть, истямо тевтнестэ эряви улемс пек мелень явицякс, а капшамс явомс ярмактнень марто.

МР-со УФСИН-нь оперативной отделэнь прявтось П.В.Ломакин ёвтнесь, кодамо важодема ветяви а меревиця предметтнэнь, истя жо мобильной телефонтнэнь УФСИН-нь учреждениятнес пачтямонь каналтнэнь редямост коряс.

Т.Аксенова

 

Новости

«Маска» АРТ-кафесэнть – кулинаронь-футболонь матчт

 Мейсэ Мордовиясь карми андомо ды дивавтомо 2018 иень Футболонь коряс масторлангонь чемпионатонь инжетнень? Неть салавачитнень панжомга «Маска» АРТ-кафесь ютавты кулинаронь-футболонь матчт. Кафень инжетнень туртов тесэ пидевить-паневить чемпионатонь мастортнэнь-участницатнень раськень ярсамопельть. Сынст варчамодост мейле эряви максомс вайгель вечкевикс ярсамопеленть кисэ ды анокстамс-пурнамс 2018 иень Футболонь коряс масторлангонь чемпионатонь ваныцятнень ды эсенк туртов меню.

Подробнее ...
 
Инжетненень невтема национальной культуранть мазычинзэ

Мордовиянь Прявтось Владимир Волков неть читнестэ вастневсь «Ассоциация финно-угорских народов» общественной вейсэндявксонь председателенть, Саранск ошонь администрациянь прявтонть Пётр Тултаев, ды эрзя-мокшонь раськетнень регионъютконь общественной вейсэндявксонь исполкомонь председателенть Александр Лузгин марто.

Подробнее ...
 
Кулят Ошонь Администрациясто

Пондельникстэ, мартонь 26-це чистэ, ошонь Администрациясо ютась оперативной совещания, конань ветясь ошонь округонь прявтось Петр Тултаев. Промксось ушодовсь Кемерова ошсо чавовозтнень коряс чатьмонемань минутасто. Саранскоень мэрэсь тешкстызе: «Объекттнэнь эксплуатацияс совавтомга вешематнень эрявить полавтомс. Минек ошсояк, койсэнь, микшнемань ламо комплекстнэ кандыть зыян. Саемга, ульнинь «Киномакс-Победа» кинотеатрасо ды сеансто мейле дивазевинь, лисема таркась вейке! Бути мезеяк тееви, арседе тынсь, мезе карми! Икелень шкатнестэ тосо ульнесть совамонь-лисемань кавто таркат. Сестэ строительтне арсесть зыяндо ванстоманть коряс. Паряк эряви анокстамс законодательной инициатива, проектно-сметной документациясь ютаволь экспертиза безопасностень лувтнень коряс».

Подробнее ...
 
Шумбрачинь чи

Эйзюрковонь 3-це чистэ Саранскойсэ ютавтови ошонь Шумбрачинь чи. Ленинской ды Пролетарской райононь парктнесэ, Экопарксонть ды конькасо кирякстнема таркатнесэ (Коваленконь, Гожувской куротнесэ ды «Саранск» стадионсонть) 11.00 чассто ушодовить концерттнэ, 12.00 чассто – спортонь пелькстамотне. Ленинской районсо арсевить «Тетям, авам, мон – спортонь семия» стартось, эрьва кодат пелькстамот ды квестт.

Подробнее ...
 
Чемпионатонть шкасто транспортонть ды общественной таркатнень важодемадо

Ошонь мэрэнтень эрицятнень пельде сеедьстэ максовить кевкстемат, кода Футболонь коряс масторлангонь чемпионатонь шкастонть кармить важодеме общественной транспортось, рынкатне ды микшнемань лия таркатне.

Подробнее ...