Рубрикатор

Правительство РМ Т.Н.Полозова: «Прявт тевекс ашти – вадрялгавтомс ломантнень эрямост»
Т.Н.Полозова: «Прявт тевекс ашти – вадрялгавтомс ломантнень эрямост»

Покш Игнатбуень муниципальной районось Мордовиянь васоло ёнкстнэстэ вейкесь. Сон содавикс эрзянь культурань памятниктнесэ. Андреледенть аволь васоло ванстовсть XI-XII пингень калмавкстнэ. Колмо иес весть Чукало веленть маласо ютавтневи «Раськень Озкс» эрзянь раськень покш кенярксчись, конантень пурнавкшныть ламо инжеть аволь ансяк Мордовиясто, истя жо сонзэ томбальде. Те ёнкссонть эрить важодеме вечкиця, инжень вастомо маштыця, панжадо ойме ломанть. Велень эрицятне кастыть эйкакшт, видить-сокить пиреть, паксят, строить кудот ды кить, явить мель спортонтень. Те ёнкссонть арасть покш производстват. Ламо кемемат сюлмавозь Покш Игнатбуесэ теплицань покш комплексэнь строямонть марто. Сонзэ покшолмазо карми 17 гектарт, панжоманзо марто теевить важодемань 250 ламо таркат. Сонзэ строямонтень ушодксонть ютазь иень августсто путызе МР-нь Прявтось В.Д.Волков.

Покш Игнатбуень ёнкссо молиця тевтнеде, сы шкантень арсематнеде неть читнестэ кортынек муниципальной райононь Администрациянь прявтонть Т.Н.Полозова марто.

 

– Татьяна Николаевна, экономикасо кодамо невтевкс марто прядынк ютазь иенть?

– 2017 иестэ топавтозь покш важодема эсенек доходтнэнь вельде райононь казнанть пештямонть, расходонь пельксэнть лезэвчинзэ кастоманть коряс. Ютазь иень бюджетэнь доходонь пельксэнть покшолмазо весемезэ кармась малав 162949,3 тёжат целковойть, ютксост эсенек доходтнэ саить 15,2%. Налогонь ды аволь налогонь доходтнэнь топавтомань аравтлувось кармась 97,4%. Бюджетэнь расходтнэ – малав 162966,1 тёжат целковойть. Ярмактне ютавтозь образованиянть, культуранть, социальной политиканть, жилищно-коммунальной хозяйстванть лангс.

Бюджетэнь топавтомасонть башка мель явозь прявт тевтненень: зарплатань, социальной выплататнень, коммунальной услугатнень пандомантень. Районсонть целанек топавтозь тевтне зарплатань кастоманть коряс, конат тешкстазь РФ-нь Президентэнть 2012 иень маень указтнэсэ. Истя, 2017 иестэ педагогтнень средней зарплатаст кармась 23,2 тёжат целковойть. Покш Игнатбуень важодицятнень средней зарплатаст – 16,3 тёжат целковойть (икеле иенть коряс кассь 1,7%).

– Кода молить тевтне велень хозяйствасонть ды строительствасонть?

– Покш Игнатбуе ёнксось – велень хозяйствань. Васенце таркасо свал аштесь ды ашти велень хозяйствась. Сон топавты аволь ансяк производствань безопасностенть, истя жо тешксты райононь социальной лувонть, агропромышленной комплекссэ важодиця ломантнень эрямонь уровенест.

Велень хозяйствасо важодицятнень эрьва чинь стака тевест вельде 2017 иень невтевкстнэнь коряс Покш Игнатбуе ёнксонтень максозь покш казне – тикшень-сюронь кастомасо покш невтевкстнэнь саемаст кисэ диплом. Берянь пертьпельксэнть лангс апак вано, мелят саезь сюронь вадря урожай – малав 30 тёжат тоннат. Тесэ эряви тешкстамс истят хозяйстватнень, кода: «8-ое Марта», «Воля» ООО-тне, «Октябрь» СПК-сь, «Кабаев В.Ю.» КФХ-сь. Эрьва гектарсто саезь 21,4 центнерт.

Саинек ламбамо якстерькаень вадря урожай – эрьва гектарсто пурназь 322,7 центнерт. Весемезэ лиссь малав 60 тёжат тоннат. Кенярдовтыть невтевксэнек сывелень, ловсонь производстванть коряс. Тедеде икеленек прявт тевекс ашти – кастомс ловсонь потявтоманть 7645 тоннас, эрьва скалонть пельде саемс 4455 килограммат.

Велень хозяйствасо рамазь од техника, тевс нолдазь ламбамо якстерькаень ды сюронь кастомань ды пурнамонь, модань сокамонь-изамонь од технологиятне.

Минек ёнкссо эрязасто виевгадыть фермерэнь хозяйстватне ды семиянь ферматне. Мелят фермертнэ кастсть 5,5 тёжат тоннат сюро, потявтсть 2 тёжадо ламо тоннат ловсо. Покш Игнатбуе ёнксось совавтозь «Поддержка начинающих фермеров в РМ на 2015-2017 годы и на период до 2020 года» ды «Развитие семейных животноводческих ферм на базе крестьянских (фермерских) хозяйств в РМ на 2015-2017 годы и на период до 2020 года» программатнес. Неть иетнень перть эсь тевест ушодызь 16 ломанть. «Ушодыця фермер» программанть коряс 2017 иестэ 1400 тёжат целковоень покшолмасо грант максозь 1 фермерэнтень. Тедеде те ёнксонть коряс важодемась поладови.

Мордовиясо нолдазь тевс од специалисттнэнень лезксэнь максомань программась. Минек ёнкссо «8-ое Марта» ООО-нь вейке специалистэнтень явовить компенсация ды эрьва ковонь пандомат, истя жо сисем студенттнэнень, конат тонавтнемадост мейле кармить важодеме велень хозяйствань специальносттнень коряс, пандовить стипендият федеральной ды республикань бюджетстэ.

Покш кемемат сюлмавозь «Агрисовгаз Теплицы» ООО-нть марто. Ютазь иестэ топавтозь покш важодема теплицань строямонь коряс проектэнь-сметань документациянть анокстамга. Маласо шкастонть ушодови инвестициянь проектэнть топавтомась.

Бути кортамс строямодонть, ютазь иестэ максозь эрямо таркань 631 кавонзазь метра. Колмо семият вадрялгавтызь эрямонь условияст «Обеспечение жильём молодых семей» программанть коряс, кавто семият – «Устойчивое развитие сельских территорий» программанть лувсо, максозь эрямо тарка вейке уроз эйкакшонтень. 2018 иестэ кото семиятненень явозь ярмакт эрямо таркань вадрялгавтомс «Устойчивое развитие сельских территорий» программанть коряс.

Тень коряс эштё эряви теемс пек ламо. Васняяк, эряви стявтомс од эрямо таркат, кода од семиятненень, истя жо уроз ды тетяст-аваст вановттомо кадовозь эйкакштнень туртов. Зярс неть программатне топавтовить аволь истя вадрясто, кода бу эряволь, а сатыть бюджетэнь ярмактне.

Ютазь иестэ теезь налксемань площадкат Кучкаева ды Ташто Чамза велетнесэ. Витнезь Покш Игнатбуесэ Школьная куросонть ламо квартирас эрямо кудонь латось. Тедеде арсеви ушодомс «Аврора» кинотеатранть райононь Культурань кудокс тееманть.

Ютазь иестэ строязь ки Покш Игнатбуень Юношевень ульцясонть ды витнезь кись Молодежной ульцясонть. Китнень вадрялгавтомань тевтне поладовить сы иестэяк. Витнезь кудотнень перька таркатне Покш Игнатбуень Советская куросонть, проектэнть коряс теезь кить, тротуарт, оймсемань таркат, валдомтозь кудонть перька таркатне.

–  Татьяна Николаевна, кодат тевтне Покш Игнатбуесэ образованиянть, медицинанть ды культуранть коряс?

– Ёнкссонок важодить вете школат, конатнесэ тонавтнить 490 эйкакшт. Минек тонавтницятне лиснить изницякс республикань олимпиадатнесэ. Ёроков од ломантнень ютксто школасо кото тонавтницятненень максозь Покш Игнатбуень прявтонь премият. 11-це классо тонавтницянтень Вдовина Кристинанень – Мордовия Республикань Прявтонь премия.

Покш тевекс минек туртов кармась 2016 иестэ Покш Игнатбуесэ одкстомтозь школанть панжомась. Пек кенярдовты, сон совась Мордовиянь 10 сехте вадря ды Россиянь 300 сехте вадря школатнень юткс.

Минек ёнкссо ютавтневить ламо эрьва кодат культурань мероприятият. Ютазь иестэ «Велень Озкс» раськень фольклоронь кенярксчинтень пурнавкшность малав 1,5 тёжат ломанть.

Кода уш икеле ёвтынь, тедеде арсеви одкстомтомс «Аврора» кинотеатранть, 2019 иестэ – Андрелень Культурань кудонть. Сон карми ламо функциянь центракс, косо ютавтовить аволь ансяк концертт, истя жо выставкат, мастер-класст, вастовомат, конференцият.

Бути кортамс медицинанть коряс, райононь больницянть юрсо важоди поликлиника, 30 таркас чинь стационар ды 10 таркас паллиативной отделения. Меельце иетнестэ Киржеманы, Кучкаево ды Горки велетнесэ панжозь фельдшерэнь-акушерэнь пунктт. Ушодови Андреевка велесэ, мейле Протасовасо ФАП-нь строямось.

Нама, ломантнень ламо мезе талновты: важодема таркань муемась, эрямо таркатнень ды китнень строямось, медицинась ды истя седе тов. Весе виенек путсынек эрицятнень вешемаст топавтомантень. Эдь минек прявт тевенек – лездамс ломантненень, вадрялгавтомс эрямост, чарькодемс сынст талномаст-мелявксост, витемс сынст. Лиякс а кода.

Т.Аксенова

 

Новости

Повышение уровня занятости на селе – один из приоритетов «Единой России»
На XVIII Съезде «Единая Россия» предложила дать возможность расширения
рынков сбыта для личных подсобных хозяйств (ЛПХ).
 В рамках обсуждения на дискуссионной площадке XVIII Съезда Партии, 
посвященной вопросам сельского хозяйства, было предложено дать 
возможность применения добровольной патентной системы 
налогообложения для крупных личных подсобных хозяйств (ЛПХ). Тех, что 
намеренны выйти на более широкие рынки сбыта, нежели фермерские 
ярмарки.  «Но для этого им сейчас нужно оформляться в качестве 
фермерского хозяйства или индивидуального предпринимателя. Это уже 
другая отчетность и налогообложение.  подача деклараций и заполнение 
нескольких видов отчетностей. Мы предлагаем дать  возможность 
владельцам ЛПХ, которые этого захотят, приобрести патент. Если у вас есть 
личное подсобное хозяйство, вы реализуете излишки, и не планируете 
выходить на уровень более широкой торговой деятельности, то и 
приобретать патент не нужно», - пояснил заместитель Председателя
Госдумы, руководитель фракции «Единая Россия» Сергей Неверов.
Подробнее ...
 
Премьера!

Декабрянь 8-це чистэ 17:00 чассто Эрзянь ды мокшонь национальной драматической театрасо ваныцятнень учи премьера. Тесэ невтить М.Камолеттинь «Играем в дружную семью, или гарнир по-французски» од путовкс. Спектаклясь алтави МР-нь заслуженной артисткатнень Марина Аверкинань ды Галина Самаркинань юбилеень тешкстамонтень. Режиссёрось-путыцясь МР-нь заслуженной артисткась Л.Шахова.

 
Ардоманть кис питнетне яла касыть

Саранск ошонь общественной транспортонь частной предприятиятне бажить кепедемс ардоманть кис питнетнень декабрянь 25-це чистэ саезь. Теде сынь пачтясть ошонь администрацияв. 2, 5, 10, 15, 16, 18, 19, 21, 22, 24, 25, 28, 32, 35, 36, 37, 38, 40, 41, 44 ды 45№ маршурттнэсэ питнесь карми 25 целковойть (ней – 20). 23, 34 ды 66№ – 23 целковойть. Мэриясо пачтясть: неень шкане Саранскойсэ важодить кавто ООО-т («Сигнал С» ды «ПАТП»), конат усксить ломанть, истя жо индивидуальной кавксо предпринимательть. Частной усксицятнеде 35%.

Подробнее ...
 
Важоди Якшаматянь почта

Мордовиянь Главпочтамтсо декабрянть прядовомс карми важодеме Якшаматянь Почтась. Сёрмадомс ды нолдамс почтань ящикс телень прявт волшебникентень пачтямо мереви эрьвантень, иетнень лангс апак вано.

Подробнее ...
 
Партийцы ждут от Съезда конструктивных дискуссий

  - Именно в первый день  XVIII  Съезда Партии, который пройдет  7-8 декабря в Москве, состоится работа трех дискуссионных площадок «Обновление», «Открытость», «Партия и выборы», на которых мы сможем обсудить свои предложения и принять  решения, действительно позволяющие   наладить более эффективную и открытую работу партийных структур», -  сказал секретарь  Регионального отделения  «Единой России», Председатель Государственного Собрания республики Владимир Чибиркин.

Подробнее ...