Рубрикатор

Правительство РМ Мордовиясь кочкась Россиянь Президент
Мордовиясь кочкась Россиянь Президент

Мартонь 18-це чистэ Мордовиянь эрицятне вейсэ масторонть марто кочкасть Российской Федерациянь Президент. Минек республикасо кочкамотне ютасть эрязасто ды теке шкасто сэтьместэ. Кода республикань оштнесэ, истя велетнесэяк ломантне валскестэ саезь чокшнес ютасть кочкамонь участкатнес вайгелест максомо.

Обед шкане Рузонь драмань театрав, косо ульнесь 557 номер кочкамонь участкась, вейсэ нинзэ ды цёранзо марто сась Мордовия Республикань Прявтось В.Д.Волков. Вайгелензэ максомадо мейле СМИ-нть вельде сон пшкадсь республикань ломантненень ды мерсь Мордовиянь эрицятненень самс ды максомс вайгеленть Россиянть ды республиканть вандынь чист кисэ.

– Мордовиянть туртов те пек эрявикс тев, – мерсь МР-нь Прявтось. – Минь свал вайгеленек макстано се ёнксонть кисэ, конань вельде региононок седе виевгады. Меельце иетне невтизь, минек ёнкссо теезь пек ламо. Эряви теемс весементь, икелепелевгак паролгадовольть Саранскоесь, райононь куншкакуротне, велетне, касовольть промышленностьсэ невтевкстнэ. Вейсэ ванстомат неть изнявкстнэнь, конат минек улить. Тень туртов эрьвантень эряви самс ды топавтомс эсензэ гражданской долгонзо – максомс вайгелензэ.

Истя жо Рузонь драмань театрасо, теке жо 557 номер кочкамонь участкасонть, вайгелензэ максызе Саранск ошонь округонь Администрациянь прявтось П.Н.Тултаев.

МР-нь Правительствань Председателесь В.Ф.Сушков вайгелензэ максызе 569 номер кочкамонь участкасонть. Журналисттнэнь кевкстемаст лангс каршо валонь ёвтамсто мерсь:

– Мон вайгелем максыя Россиянть вандынь чинзэ кисэ,  масторось эрьва иестэ пурнаволь кода экономикань, истя жо оборонань вийть. Ды, нама, мон максыя вайгелем тиринь Мордовиянть вандынь чинзэ кисэ, конась Россиянть пельксэзэ, косо виевстэ ветявить тевтне. Кочкицятнень покш активностест толковаса сеньсэ, Президентэнь кочкамось – те пек эрявикс политической события ды ломантнень ули мелест участвовамс эсест сы шканть ды семиянть паролгавтомасо.

* * *

Саранск ошонь башка предметэнь седе домкасто тонавтнемань общеобразовательной 38 № школасонть Россиянь Федерациянь Президентэнь кочкамонь чистэнть ульнесть кочкамонь колмо участкат: 633, 649, 650 номертнэ.

Валске марто тов эрязасто капшасть Пролетарской ёнксонь эрицятне. Кавксо чассто саезь школантень кармасть само ламо ломанть. Тов совамсто вастовинек тонавтнемань те заведениянь прявтонть С.И.Лазарев марто. Сергей Иванович пачтясь тенек, колмонест участкатнесэ те чистэнть важодсь те школань коллективесь. Те образовательной учреждениясонть неень шкане важодить 64 ломанть, седе ламотне юткстост од тонавтыцят.

Алкукскак, тонавтыцятне тевест топавтсть парсте, сынь куроксто кочкицятнень спискатнестэ мусть тенст эрьва пшкадицянть лемензэ ды паспортонь невтемадо мейле макссть вайгелень максомань бюллетенть. Ламот кочкицятнестэ эрязасто ютасть шаршавтнень экшс ды, кувать тосо апак кирдеве, каясть урнатнес бюллетентнень. Весемева неявсь, сынь умок арсизь, кинь кисэ течи макссызь вайгелест. Веенст сыцятнень ютксто капшазь тусть эсь тевгаст, омбонстнэ валгсть школань столовоентень. Тосо кочкицятненень анокстасть ламо эрьва кодат паневкст «Феникс-групп» ООО-нь важодицятне. «Агрофирма «Октябрьская» акционерной обществась истя жо келейстэ невтизе сынст предприятиясонть теевть продукциянть. Мезе ансяк арасель сынст лавсятнень лангсо. Кода пачтясь тенек В.В.Сутугина микшницясь, весе продукциясь паро качествань ды тантей. Книгань вечкицятнень истя жо кенярдовтсь эйкакшонь ды тонавтомань литературась.

Кочкамонь те кампаниясонть теезельть паро условият сетненень, кить вайгелест те чистэнть макссть аволь свалшкань эрямо таркасо. Невтемакс, Марина Пименова ды Мария Петрова сазортнэ эрить Мордовиянь томбале. Сынь икелепелев содасть, мартонь 18-це чистэ кармить улеме тиринь республикасо. Тень ловозь, госуслугань порталонть вельде пачтясть, кодамо кочкамонь участкасо кармить максомо вайгелест Мордовиясо. Вишка эйкакшост марто састь кочкамонь 649 участкантень масторонь прявтонь кочкамо, васняяк секс, мекс сыненст а ялатеке, кие карми улеме РФ-нь Президентэкс. Эдь теде ашти тиринь масторонть, ёнксонть, сынст эйкакштнень вандынь чист.

* * *

Саранск ошонь округонь васенце номер общеобразовательной школань зданиясонть теезь кочкамонь участкатнес ламотне истя жо кармасть само рана валске. Васенцетнень ютксо ульнесть Анатолий Николаевич ды Елизавета Александровна Исаевтне. Мирдть-полат ульнесть паро ёжомарямосо, те чистэнть Анатолий Николаевичень ульнесь чачома чизэ, сынь ламо иень перть эрить вейсэ покш ояксчисэ. Тешкстасынек, Елизавета Александровна важоди медицинасо 35 иеть, эйстэст 26 иеть – колмоце номер эйкакшонь поликлиникасо. Сон седейшкава ёвтнесь сынст медучреждениясо паро полавтоматнеде. Аволь умок панжозь од зданиянтень покш питне путсть аволь ансяк тов сыця эйкакштне ды тетяст-аваст, истя жо республикань ды масторонь прявттнэ. (Сонзэ панжомадо мейле тенст сакшнось РФ-нь здравоохранениянь министрась В.И.Скворцова).

Исаевтне вайгелест максызь республикань ды масторонь эйкакштнень шумбрачист кисэ, эдь  сынь вандынь чинек.

– Сындест алкукс мелявтозь карми Мордовиянть ды Россиянть кемечизэ ды нардевчизэ, – мерсть вейсэ мирдесь ды нись.

 

* * *

596 № кочкамонь участкась панжозель Саранск ошонь 11№ средней общеобразовательной школасонть. Кочкамонь комиссиянь председателенть Марина Валерьевна Железняковань валонзо коряс, участкасонть тешкстазь 2459 кочкицят. Вайгелень максомо ломантне кармасть ютамо кавксо чассто саезь, кочкамонь участканть панжомадо мейле сеске.  М.В.Железнякова тешкстызе, ломантне ютасть вадря ёжосо. Эрьвась эйстэст бажась максомс эсензэ вайгелензэ, чарькодсть, сынст кочкамост эйстэ ашти се, кода карми эрямо минек масторось седе тов, кода паролгавтови ломантнень эрямост. Кода ёвтызе кочкамонь комиссиянь председателесь, эсест вайгелест максомо сакшность участкань сехте сыре ломантнеяк.

596 № кочкамонь участкантень кандовить Т.Бибинань лемсэ од кудотнесэ эрицятне. Секскак кочкицятнень ютксо ульнесть пек ламо од семият.

Россиянь Федерациянь Президентэнть кочкамо весе вейсэ сась Арташкинтнэнь семиясь. Ольга ды Вячеслав кастыть кавто эйкакшт: Настянень 10 иеть, Ильянень – 2. Вайгелень максомо састь ниленест.

– Течи пек ответственной чи, – видькстасть мирдть-нить Арташкинтнэ. – Ды минь, нама, эзинек кадово веёно ды приминек участия минек масторонть туртов те пек эрявикс тевсэнть. Минек талновты се, кода карматано эрямо седе тов, кие карми ветямо масторонок. Нама, вайгеленек максынек аволь ансяк эсенек, истя жо эйкакшонок кисэ, сынь эряст виев масторсо.

Кочкамотнень закононь коряс ютавтомаст мельга пштистэ вансть общественной наблюдательтне.

* * *

Саранск ошонь Химмаш эрямонь микрорайонсонть теезельть Россиянь Президентэнь кочкамонь комиссиянь зярыя участкат. Сынь важодсть тесэнь школатнесэ. Вана 40№ школасонть важодсть 578, 579, 580 №№ ды истя седе тов кочкамонь комиссиянь участкатне.

… Минь 578 № кочкамонь комиссиянь участкасонть.

– Те участкасонть лововить 2610 кочкицят, – ёвтни прявтось Т.М.Кашкина. – Сынь эрить Химмаш микрорайононь Ярославской ульцясонть, Октябрянь 70 иетнень проспектсэнть, ниле ломантне кармить кочкамо васенцеде. Малав кавтосядт ломанть кочкамо састь аволь эсь пропискань коряс. Тень теемс сынь кандсть эрявикс документт. Мельганок кемекстазь 30 ломанть, кить эсь вийсэ а савить кочкамо. Минь мольтяно тенст кудос. Нурькинестэ меремс, вейкеяк кочкиця кадозь а ули.

…10 част. Саранск ошонь 40 № средней школав ломантне мольсть ды мольсть. Кой-кить семиянек. Теевинек содавиксэкс.

– Монь лемем Алексей Матяев. Россиянь Президентэнь кочкамо сынек Екатерина ним ды Маргарита тейтерем марто. Вайгеленек максынек Россиянть вандынь чинзэ кисэ, косо эрьва ломанесь, эрьва семиясь эряволь шумбрасто, вандынь чиде арсезь, эсь прянзо маряволь уцяскавокс. Республикасонок виевгадовольть промышленностесь, велень хозяйствась, строительствась.

– Минь Валентина ним марто кочкинек Россиянь Президентэкс сень, кие виевгавтсы Россиянть, кие мелявты Россиянь эрицятнеде, – видькстась велень хозяйствань наукань докторось, профессорось, МР-нь наукань заслуженной деятелесь А.П. Еряшев. – Монень кодгеменде ламо иеть. Арасель истямо кочкамо, штобу аволия максо эсь вайгелем те эли тона депутатокс эли Президентэкс кандидатонть кисэ.

… Сундерьгадсь. Школав молицят ней уш чуросто вастат. Кочкицятнестэ малав весе вайгелест максызь.

Кочкамонь участкатнесэ важодсть: В.Юдина, Т.Аксенова, П.Зиновьев

 

 

 

 

Новости

«Маска» АРТ-кафесэнть – кулинаронь-футболонь матчт

 Мейсэ Мордовиясь карми андомо ды дивавтомо 2018 иень Футболонь коряс масторлангонь чемпионатонь инжетнень? Неть салавачитнень панжомга «Маска» АРТ-кафесь ютавты кулинаронь-футболонь матчт. Кафень инжетнень туртов тесэ пидевить-паневить чемпионатонь мастортнэнь-участницатнень раськень ярсамопельть. Сынст варчамодост мейле эряви максомс вайгель вечкевикс ярсамопеленть кисэ ды анокстамс-пурнамс 2018 иень Футболонь коряс масторлангонь чемпионатонь ваныцятнень ды эсенк туртов меню.

Подробнее ...
 
Инжетненень невтема национальной культуранть мазычинзэ

Мордовиянь Прявтось Владимир Волков неть читнестэ вастневсь «Ассоциация финно-угорских народов» общественной вейсэндявксонь председателенть, Саранск ошонь администрациянь прявтонть Пётр Тултаев, ды эрзя-мокшонь раськетнень регионъютконь общественной вейсэндявксонь исполкомонь председателенть Александр Лузгин марто.

Подробнее ...
 
Кулят Ошонь Администрациясто

Пондельникстэ, мартонь 26-це чистэ, ошонь Администрациясо ютась оперативной совещания, конань ветясь ошонь округонь прявтось Петр Тултаев. Промксось ушодовсь Кемерова ошсо чавовозтнень коряс чатьмонемань минутасто. Саранскоень мэрэсь тешкстызе: «Объекттнэнь эксплуатацияс совавтомга вешематнень эрявить полавтомс. Минек ошсояк, койсэнь, микшнемань ламо комплекстнэ кандыть зыян. Саемга, ульнинь «Киномакс-Победа» кинотеатрасо ды сеансто мейле дивазевинь, лисема таркась вейке! Бути мезеяк тееви, арседе тынсь, мезе карми! Икелень шкатнестэ тосо ульнесть совамонь-лисемань кавто таркат. Сестэ строительтне арсесть зыяндо ванстоманть коряс. Паряк эряви анокстамс законодательной инициатива, проектно-сметной документациясь ютаволь экспертиза безопасностень лувтнень коряс».

Подробнее ...
 
Шумбрачинь чи

Эйзюрковонь 3-це чистэ Саранскойсэ ютавтови ошонь Шумбрачинь чи. Ленинской ды Пролетарской райононь парктнесэ, Экопарксонть ды конькасо кирякстнема таркатнесэ (Коваленконь, Гожувской куротнесэ ды «Саранск» стадионсонть) 11.00 чассто ушодовить концерттнэ, 12.00 чассто – спортонь пелькстамотне. Ленинской районсо арсевить «Тетям, авам, мон – спортонь семия» стартось, эрьва кодат пелькстамот ды квестт.

Подробнее ...
 
Чемпионатонть шкасто транспортонть ды общественной таркатнень важодемадо

Ошонь мэрэнтень эрицятнень пельде сеедьстэ максовить кевкстемат, кода Футболонь коряс масторлангонь чемпионатонь шкастонть кармить важодеме общественной транспортось, рынкатне ды микшнемань лия таркатне.

Подробнее ...