Рубрикатор

Правительство РМ Кемекстызь Республикань Правительстванть
Кемекстызь Республикань Правительстванть

Сентябрянь 22-це чистэ МР-нь Госсобраниянь депутаттнэ пурнавкшность котоце тердемань кемготовоце сессиянтень. Важодемасонть примась участия МР-нь Прявтось В.Д.Волков. Истя жо райононь прявттнэ, министерствань ды ведомствань прявттнэ, правань ванстомань органонь важодицятне ды лият. Сессиянть панжизе ды ветясь МР-нь Госсобраниянь Председателесь В.В.Чибиркин. Чинь повесткантень совавтозельть кемголмово кевкстемат. Прявт кевкстемакс кармасть МР-нь Правительствань Председателенть, сонзэ васенце полавтыцятнень ды полавтыцятнень кемекстамось, Мордовия Республикасо Ломантнень праваст коряс уполномоченноенть аравтомась.

В.Д.Волков, депутаттнэнь икеле кортамсто, тешкстызе, меельце иетнестэ ламо теезь сень туртов, республикань властесь улезэ седеяк лезэвекс ды панжадокс.

– Те ёнкссонть минек изнявкстнэ тешкстазь Россиянь Правительствасо, Экономикань развитиянь министерствасонть. Исполнительной властень региононь органтнэнь лезэв тевдееманть коряс Мордовиясь кавто иень перть совась масторонь икеле молиця регионтнэнь юткс, – мерсь Мордовиянь Прявтось. – Течи минь муинек чарькодема федеральной центранть пельде республикань виевгавтоманть коряс кевкстематнень топавтомасо. Ансяк шкась а ашти таркасонзо. Минек икелев путовить од, седеяк стака тевть. Сынст лезэвстэ топавтомась ашти сень эйстэ, кода куроксто, видестэ ды превейстэ кармить важодеме министерстватнень ды исполнительной властень государственной лия органтнэнь прявттнэ ды должностной ломантне.

Ёвтасынек, тешкстазь Мордовия Республикань государственной властень исполнительной органтнэнь структурасо полавтоматнень совавтомадо Указось. Сонзэ коряс сынь киртявить 21-с (ульнесть – 30).

Кадовить 16 министерстват, кавто госкомитетт ды кавто республикань службат, истя жо Россиянь Федерациянь Президентэнть юрсо республикань Свалшкань представительствась.

Киртязь министерстватнень ды ведомстватнень тевест кармить топавтомо властень лия органтнэ. Истя, сисем министерстватне одкстомтовить, лиятненень максовить од лемть. Неть: Мордовия Республикань Жилищно-коммунальной хозяйствань, энергетикань ды эрицятнень гражданской защитань министерствась; Экономикань, торговлянь ды предпринимательствань министерствась; Эрицятнень социальной защитань, важодемань ды занятостень министерствась; Культурань, национальной политикань, туризмань ды архивень тевень министерствась; Мордовия Республикань Строительствань, транспортонь ды килангонь хозяйствань министерствась; Велень хозяйствань ды продовольствиянь министерствась; Мордовия Республикань Юстициянь министерствась.

Теде башка, республикасонть тееви Тарифтнень коряс республикань од службась ды «Региональный центр торгов» государственной казённой учреждениясь.

Исполнительной властень 13 органтнэсэ полавтомат а улить. Неть: Финансонь министерствась; Образованиянь министерствась; Здравоохранениянь министерствась; Целевой программатнень министерствась; Промышленностень, наукань ды од технологиятнень министерствась; Вирень, охотямонь хозяйствань ды природопользованиянь министерствась; Информатизациянь ды связень министерствась; Печатень ды кулянь министерствась; Спортонь ды физической культурань министерствась; Од ломантнень тевест коряс госкомитетэсь; Мордовия Республикань Ули-паронь ды модань отношениятнень  государственной комитетэсь; Республикань ветеринарной службась; истя жо Московсо Постпредствась.

Весе министерстватнесэ ды ведомстватнесэ тееви од структура, од лувсо ладявить прявт тевтне ды функциятне.

Весемезэ арсевить киртямс 80 должностть (сынст ютксо 6 госдолжностть ды исполнительной властень органтнэнь прявтонь 5 должностть, сынь а кандовить Правительствань члентнэнень).

В.Д.Волковонь валонзо коряс, республикань руководстванть, правительстванть туртов тешкстазь прявт тевтне, конатнень лангсо эряви важодемс маласо вете иетнень перть. Анокстазь Важодемань программа. 

– Миненек эряви путомс талика сонзэ топавтомантень. Эрьвантень эсензэ таркасо эряви важодемс видестэ ды лезэвстэ, кода эряви. Ды сестэ минь сайтяно покш изнявкст, – тешкстызе В.Д.Волков.

Депутаттнэ кирдизь кандидаттнэнь, конатнень ёвтынзе МР-нь Прявтось. Мордовия Республикань Правительствань Председателекс кемекстызь Владимир Фёдорович Сушковонь кандидатуранть. В.Д.Волков тешкстызе сонзэ, кода виев управленецэнть. Ёвтызе, В.Ф.Сушковонь прявтсо Правительствась аволь вейке ие лезэвстэ важоди путозь тевтнень топавтомаст лангсо.

Мордовия Республикань Правительствань Председателень Васенце полавтыцякс – Экономикань, торговлянь ды предпринимательствань министракс аравтозь Владимир Николаевич Мазов, Мордовия Республикань Правительствань Председателень Васенце полавтыцякс – Велень хозяйствань ды продовольствиянь министракс – Владимир Николаевич Сидоров.

Истя жо Мордовия Республикань Правительствань Председателень полавтыцякс аравтозь Геннадий Петрович Комусов ды Галина Алексеевна Лотванова. Мордовия Республикань Правительствань Председателень полавтыцякс – Целевой программатнень министракс ёвтазь Алексей Николаевич Меркушкин; Мордовия Республикань Правительствань Председателень полавтыцякс – Промышленностень, наукань ды од технологиятнень министракс – Александр Иванович Седов; Мордовия Республикань Правительствань Председателень полавтыцякс – Финансонь министракс – Алексей Юрьевич Симонов; Мордовия Республикань Правительствань Председателень полавтыцякс – Строительствань, транспортонь ды килангонь хозяйствань министракс – Виктор Владимирович Цыганов; Мордовия Республикань Правительствань Председателень полавтыцякс – Жилищно-коммунальной хозяйствань, энергетикань ды эрицятнень гражданской защитань министракс – Игорь Анатольевич Чадов.

Депутаттнэ кортасть эрьва кандидатуранть коряс, тешкстызь сынст профессионализмаст, эсь тевень вечкемаст ды ответственностест.

МР-со Ломантнень праваст коряс уполномоченноекс депутаттнэ аравтызь Валерий Лёвинэнь, те таркасонть сон полавтызе Юрий Ястребцевень. Сессиянть лувсо од Уполномоченноесь примась присяга, теде мейле сонензэ максозь удостоверения.

Сессияс пурнавозтне ваннызь  «2017 иес ды, аравтлувонть мельс саезь, 2018 ды 2019 иетнес Мордовия Республикань бюджетс полавтоматнень совавтомадо» МР-нь законопроектэнть.

А.Ю.Симоновонь валонзо коряс, республикань бюджетс полавтоматнень совавтомась сюлмавозь федеральной бюджетстэ ярмактнень явомаст марто.

– Финансонь лезксэсь покшолгавтовсь 89 млн. целковойс, сынст эйстэ 77 млн. целковойтне – Россиянь Федерациянь Президентэнь резервань фондстонть. 50 млн. целковойть максовить республикань инфекционной больницянь корпусонть, 27 млн. целковойть – Саранскойсэ 2№ эйкакшонь поликлиниканть педе-пев витнемантень, 10 млн. целковойть – инвалид-эйкакштненень лецямопельтнень ды лецямонь ярсамопелень рамамс, – толковизе А.Ю.Симонов.

Законопроектэнть вельде покшолгавтозь государственной политикань прявт ёнкстнэнь финансированиясь. Те топавтови алкоголень продукциянть лангс акцизтнэнь пурнамонть вельде.

Покшолгавтозь государственной учреждениятнень кирдемаст лангс расходтнэ – 218 млн. целковойс, истя жо важодемань кисэ пандомась – 66 млн. целковойть, госдолгонь обслуживаниясь – 31 млн. целковойть, эрицятнень социальной обеспечениясь – 54 млн. целковойть, муниципальной образованиятненень финансонь лезксэнь явомась – 106 млн. целковойть.

Полавтоматнень мельс саезь, республикань бюджетэнь доходонь пельксэсь ули 43 млрд. 294 млн. целковойть, расходонь – 45 млрд. 495 млн. целковойть. Бюджетэнь дефицитэсь эзь полавтово ды кадовсь 2 млрд. 201 млн. целковойть.

МР-нь Счётной палатань аудиторокс депутаттнэ кочкизь Игорь Сафоновонь кандидатуранть, те таркасонть тевтнень сон карми топавтомо вете иеть.

Сессиясонть истя жо ванкшновсть лия кевкстематкак.

Т.Аксенова

 

Новости

Конституциясь – прявт закон

Исяк, декабрянь 12-це чистэ, тешкставсь Россиянь Федерациянь Конституциянь чись – минек масторонь государственной прявт кенярксчитнестэ вейкесь.

1993 иень те чистэнть минек масторсо кемекстазель РФ-нь Конституциясь. Весе текстэсь максозель «Российская газета» изданиясонть 1993 иень декабрянь 25-це чистэ. 1994 иестэ, Россиянь Президентэнть Указонзо коряс, декабрянь 12-це чись ёвтазель государственной кенярксчикс. Зярыя иень перть те чись ульнесь официальной оймсема чикс. Ансяк 2004 иень декабрясто Госдумась совавтсь полавтомат РФ-нь Трудонь кодексэнтень. Оймсема чись полавтовсь, а сонсь кенярксчись кандозь Россиянь ледстнемань читнень юткс.

Подробнее ...
 
Косто рамамс куз?

Декабрянь 15-це чистэнть республикасонть панжовить кузтнэнь ды пичетнень микшнемань базартнэ. Саранскойсэ тень туртов кемекстасть 22 площадкат (микшнема таркатнеде жо весемезэ 77).

Подробнее ...
 
Краснослободскойсэ – од прявт

Ноябрянь 29-це чистэ Краснослободскоень муниципальной районсо ютась Депутатонь райононь советэнь 13-це  сессиясь. Мордовиянь Прявтонть В.Д.Волковонь кармавтоманзо коряс сессиянть роботасо примась участия Мордовиянь Правительствань Председателесь В.Ф.Сушков. Чинь повесткасонть ульнесь вейке кевкстема: райононь од прявтонть кочкамось.

Подробнее ...
 
Фан-зона

Саранскойсэ Футболонь коряс масторлангонь чемпионатонть ютавтомсто прявт ошонь куншкакуросо карми улеме фан-зона.

Подробнее ...
 
Кочкадо сехте мазый район

Саранскойсэ ютавтови онлайн-вайгелень максома, сонзэ вельде редяви, ошонь кона районось весемеде мазыйстэ наряжазь Од иень кенярксчитнес. Теде пачтясть ошонь Администрациясто.

Подробнее ...