Рубрикатор

Правительство РМ Владимир Волков - Мордовия Республикань Прявт
Владимир Волков - Мордовия Республикань Прявт

Сентябрянь 19-це чистэ Республикань Культурань кудосонть ютавтовсь МР-нь Государственной Собраниянь котоце тердемань 15-це сессиясь, конань лувсо ютавтовсь Владимир Дмитриевич Волковонь Мордовия Республикань Прявтокс аравтомань торжественной церемониясь. Те кенярксчинтень республикантень сакшность покш инжеть: Равчирень федеральной округсо РФ-нь Президентэнь полномочной представителень полавтыцясь А.П.Сухов, РФ-нь Федеральной Собраниянь Федерациянь Советэнь члентнэ, Госдумань депутаттнэ, властень федеральной органтнэнь прявттнэ, РФ-нь субъектэнь представительтне – Самарань областень губернаторось Н.И.Меркушкин, Пензань областень губернаторось И.А.Белозерцев, Татарстан, Чувашия республикатнень, Саратовань областень делегациятне. Кенярксчинь промксонтень истя жо сакшность Россиянь содавикс ученойтне, минек масторонь покш компаниятнень прявттнэ, МР-нь Госсобраниянь депутаттнэ, МР-нь Правительствань Председателесь ды члентнэ ды ламот лият.

 

МР-нь Прявтонь кочкамонь итогтнень ёвтынзе МР-нь Центризбиркомонь председателесь Александр Косов. Сон пачтясь, сентябрянь 15-це чистэ ютавтовсь республикань кочкамонь комиссиянь промксось, итогнень коряс ве мельсэ кемекстазь ёвтамс 2017 иень сентябрянь 10-це чинь Мордовия Республикань Прявтонь кочкамотнень алкуксонь. В.Д.Волковонь кисэ вайгелест максызь 455 277 кочкицят эли 89,19%.

Кочкамонь итогтнень ёвтамодост мейле Мордовия Республикань Прявтось макссь эрицятненень, РФ-нь Конституциянтень ды МР-нь Конституциянтень видечиденть присяга. Теде мейле кенярксчинь лувсо В.Д.Волковнень максовсь государственной властень тешксэсь – Мордовия Республикань Прявтонь знакось.

Те покш кенярксчинть кувалма Мордовия Республикань Прявтонтень поздоровонь лембе валт кучсть Шувалов, Рогозин, Шойгу, Лавров, Пучков ды ламот лият. Тешкстазель, сонзэ виев изнямось невти кемемань покш смустенть, конань максызь тензэ РФ-нь Президентэсь ды республикань эрицятне.

– Вечкевикс оят! Покш ответственность ды благодарность марто мон кундан Мордовиянь Прявтонь тевтнень топавтомантень. Покш сюкпря республикань весе эрицятненень монень кемеманть кисэ. Миненек вейсэ удалась ламо теемс. Весе изнявкстнэнь юрсо – масторонь прявттнэнь лезксэст. Сюкпрянь башка валт ёвтан Президентэнтень В.В.Путиннэнь республикантень свалшкань мелень явоманть кисэ, – мерсь В.Д.Волков.

Владимир Дмитриевич пшкадсь весенень сюкпря марто сонзэ лемс паро валтнэнь ёвтамост кисэ.

– Минь вейсэ печтинек аволь аламо стакачить, саинек изнявкст экономикасо ды социальной сферасо, путынек вадря юр сы шкантень. Прявт важодемась жо эштё икеле. Мон тешкстынь эсень ды команданть туртов прявт тевтнень, конатнень лангсо важодема маласо вете иетнень перть. Анокстазь важодемань аравтлув. Мордовиянть эрязасто касоманть-виевгавтоманть юрокс ашти виев экономикась, конась нежеди од содамочитнень, инновациянь промышленностенть, икеле молиця технологиятнень тевс нолдамонть лангс. Республиканть седе тов виевгавтомась ашти минек конкурентоспособностенть эйстэ, эряви кастомс экспортонь ды инвестициянь потенциалонть, покшолгавтомс важодемань производительностенть. Эряви топавтомс покш технологиянь зярыя проектт промышленностьсэ, строительствасо, велень хозяйствасо. Теемс виев эскелькс наукоёмкой, цифровой экономиканть теемасо. Мон кеман, видеть сеть тевтне, конат топавтовить ломантнень мелест-арсемаст ванстозь. Мордовиянть виевгавтомась – те эрьва семиянть, эрьва ломаненть паро эрямось. Минь седе тов карматано вадрялгавтомо ломантнень эрямост, кастомо зарплататнень, тееме важодемань од таркат, виевгавтомо здравоохранениянть, образованиянть, явомо мель культурантень ды спортонтень. Башка мель явови ломантнень пшкадемаст топавтомантень: рамавиця эрямотаркатнень строямось, од китнень теемась, ЖКХ-нть вадрялгавтомась. Миненек сави ламо важодемс, эрьвантень путома тенень эсь таликанзо, эрьвась эсь таркасонзо топавтозо важодеманзо алкуксокс, сестэ минь добоватано изнявкст. А кавтолдан, миненек весемесь топавтови. Карматано кемеме эсь вийтнес, ютамо икелев. Вейсэ, эскельксэнь эскелькс, тееме седеяк вадрякс эрьванть эрямонзо!

Т.Аксенова

 

 

 

Новости

«Маска» АРТ-кафесэнть – кулинаронь-футболонь матчт

 Мейсэ Мордовиясь карми андомо ды дивавтомо 2018 иень Футболонь коряс масторлангонь чемпионатонь инжетнень? Неть салавачитнень панжомга «Маска» АРТ-кафесь ютавты кулинаронь-футболонь матчт. Кафень инжетнень туртов тесэ пидевить-паневить чемпионатонь мастортнэнь-участницатнень раськень ярсамопельть. Сынст варчамодост мейле эряви максомс вайгель вечкевикс ярсамопеленть кисэ ды анокстамс-пурнамс 2018 иень Футболонь коряс масторлангонь чемпионатонь ваныцятнень ды эсенк туртов меню.

Подробнее ...
 
Инжетненень невтема национальной культуранть мазычинзэ

Мордовиянь Прявтось Владимир Волков неть читнестэ вастневсь «Ассоциация финно-угорских народов» общественной вейсэндявксонь председателенть, Саранск ошонь администрациянь прявтонть Пётр Тултаев, ды эрзя-мокшонь раськетнень регионъютконь общественной вейсэндявксонь исполкомонь председателенть Александр Лузгин марто.

Подробнее ...
 
Кулят Ошонь Администрациясто

Пондельникстэ, мартонь 26-це чистэ, ошонь Администрациясо ютась оперативной совещания, конань ветясь ошонь округонь прявтось Петр Тултаев. Промксось ушодовсь Кемерова ошсо чавовозтнень коряс чатьмонемань минутасто. Саранскоень мэрэсь тешкстызе: «Объекттнэнь эксплуатацияс совавтомга вешематнень эрявить полавтомс. Минек ошсояк, койсэнь, микшнемань ламо комплекстнэ кандыть зыян. Саемга, ульнинь «Киномакс-Победа» кинотеатрасо ды сеансто мейле дивазевинь, лисема таркась вейке! Бути мезеяк тееви, арседе тынсь, мезе карми! Икелень шкатнестэ тосо ульнесть совамонь-лисемань кавто таркат. Сестэ строительтне арсесть зыяндо ванстоманть коряс. Паряк эряви анокстамс законодательной инициатива, проектно-сметной документациясь ютаволь экспертиза безопасностень лувтнень коряс».

Подробнее ...
 
Шумбрачинь чи

Эйзюрковонь 3-це чистэ Саранскойсэ ютавтови ошонь Шумбрачинь чи. Ленинской ды Пролетарской райононь парктнесэ, Экопарксонть ды конькасо кирякстнема таркатнесэ (Коваленконь, Гожувской куротнесэ ды «Саранск» стадионсонть) 11.00 чассто ушодовить концерттнэ, 12.00 чассто – спортонь пелькстамотне. Ленинской районсо арсевить «Тетям, авам, мон – спортонь семия» стартось, эрьва кодат пелькстамот ды квестт.

Подробнее ...
 
Чемпионатонть шкасто транспортонть ды общественной таркатнень важодемадо

Ошонь мэрэнтень эрицятнень пельде сеедьстэ максовить кевкстемат, кода Футболонь коряс масторлангонь чемпионатонь шкастонть кармить важодеме общественной транспортось, рынкатне ды микшнемань лия таркатне.

Подробнее ...