Рубрикатор

Правительство РМ Волков Орданьбуесэль
Волков Орданьбуесэль

Мордовиянь Прявтонь тевтнень нурька шкас топавтыцясь Владимир Волков августонь 27-це чистэ якась Орданьбуе ёнксов. Республикань руководителесь ульнесь ЗАГС-нть ды Культурань виевгавтомань куншкакуронть панжомасо – Орданьбуень эрицятнень туртов куватьс учозь объекттнэнь.

ЗАГС-нть туртов педе-пев витнезель зданиясь, конась канды историянь сюпавчи: Орданьбуень сехте кезэрень строявкстнэнь эйстэ вейкесь, 1,5 пингень историянть перть тесэ важодсть эрьва кодамо учрежденият, 19 пингенть прядовомсто – земской управа. Ней те алкуксонь дворец, конань лангс ванозь, сельмест сявадыть прявт ошонь эрицятненьгак.

ЗАГС-нть панжомо пурнавкшность ламо ломанть. Владимир Волков ёвтась ошонь эрицятненень поздоровт те покш тевенть кувалма.

Владимир Волков истя жо ульнесь Культурань виевгавтомань куншкакуронть панжомасо. Зданиясь мазый ды неень шкань вешематненень ладиця, тесэ теезь 350 таркас кинозал, хореографиянь зал, эрьва кодамо занятиятнень туртов нупальть. Кода тешкстызе республикань лидерэсь, Орданьбуесь – культурань покш сюпавчи марто ош. Те масторлангонь келес содавикс скульпторонть Степан Эрьзянь чачома тарказо, тесэ течинь чис важоди раськень театра – Мордовиясо сехте умонсетнестэ вейкесь. Республиканть томбалеяк содавикст те ёнксонь кедьчелькев ломантнень теевксэст.

«Кеман, те дворецэсь карми Орданьбуе ёнксонь культурань эрямонь куншкакурокс, тесэ топавтовить шкинемань весе бажамотне», – мерсь Владимир Волков.

Республикань руководителесь максызе од зданиянть эйстэ панжоманть «Ладушки» райононь эйкакшонь ансамблянтень, конась ютазь иестэ кармась «Шумбрат, Мордовия!» республикань фестивалень лауреатокс.

Владимир Волков истя жо вастовкшнось Орданьбуе ёнксонь эрицятнень марто, конат пшкадсть республикань руководителентень од энялдома ды кевкстема марто. Ломантне покш мель марто учить 250 таркас эйдень кужонь панжоманть – сы иестэ, кода алтась Мордовиянь лидерэсь, сон максови. Эштё вейке прявт кевкстемась – Орданьбуень 1№ школантень пристроень теемась. Ледстясынек, школань зданиясь педе-пев витнезель 2012 иестэ, тонавтницятне ламолгадыть, школантень весе а кельгстявить. Бути 2012 иестэ тесэ васенце классос мольсть 40 эйкакшт, 2017 иестэ – 60.

Орданьбуень эрицятне истя жо пшкадсть энялдома марто витнемс райононь больницянь поликлиниканть, строямс ФАП Турдаковасо ды прядомс Орозбуесэ понань кемень музеень строямонть. Владимир Волков алтась лездамс неть кевкстематнесэ.

«Меельце вете иетнень перть райононь экономикантень путозь 2 миллиардт целковойде ламо инвестицият, строязь эрямо таркань 34 тёжат кавонзазь метрат, 40 вайгельбеде ламо ведень сеть. Те важодеманть минь поладсынек», – мерсь Мордовиянь лидерэсь.

Райононь виевгадомадо кортамось поладозель Тургенева посёлкасонть, косо Владимир Волков ванызе Орданьбуень Светотехникань заводонть ды кортась предприятиянь важодицятнень марто. Посёлкань весе эрицятнень пельде республикань руководителентень ёвтазь сюкпря Луговая ульцясонть кинь витнеманть кисэ. Ней, эрицятнень валост коряс, пштистэ ашти ванськавтомань сооружениятнень строямодо кевкстемась. Владимир Волков тешкстызе, сон соды те стакачиденть. «Минь а кадтано тынк посёлканть вановттомо, – мерсь республикань лидерэсь. – Минек туртов прявтокс ульнесь ванстомс заводонть. Явинек тензэ покш лезкс, ней заводось важоди вадрясто, ды те сехте прявтось. Сы иестэ минь ушодтано ванськавтомань сооружениятнень коряс кевкстеманть решамо».

Теде башка, кода пачтясь Владимир Волков, посёлкась совавтозь «Комплексное развитие моногородов» программантень, ды 2018 иестэ тесэ ушодови сывороткань переработкань коряс инвестициянь проектэнть топавтомась, сонзэ питнезэ 256 млн. целковойть, теевить важодемань 50 таркат.

Мордовиянь лидерэсь истя жо ульнесь Баеньбуесэ – Степан Эрьзянь чачома таркасонзо. Ютазь иестэ ине скульпторонть чачома чистэнзэ 140 иетнень топодемга велень территориятнень устойчивой виевгавтомань программанть лувсо Баеньбуентень теезь покш казне: панжозь 55 таркас эйдень кужо, витнезь Культурань кудось, ютавтозь вадрялгавтомань тевть – весемезэ явозь 90 млн. целковойде ламо.

Владимир Волков ваннызе педе-пев витнезь Эрьзянь Кудонть-музеенть, истя жо ульнесь ине скульпторонть важодевкстнэнь 3D-копиятнень экспозициятнень марто выставкань залсонть. Те программанть топавтомс лездась Мордовия Республиканть пельде Федерациянь Советэнь членэсь Владимир Литюшкин. Ней эсест сельмсэ неемс мастерэнть важодевксэнзэ, кадык 3D-копиясо, мереви те ёнксонь весе эрицятненень ды инжетненень, те пек эрявикс скульпторонть шкинеманзо седеяк содавиксэкс теемга, вишкинетнень художественной содамочист кастомга. С.Д.Эрьзянь лемсэ Изобразительной искусствань республикань музеень прявтось Людмила Нарбекова ёвтнесь Владимир Волковнень «По пути великого Эрьзи» туристэнь маршрутонть теемадонзо.

          В.Автайкин

 

Новости

Предложенный ЕР законопроект о зачислении в ПФР конфискованных средств коррупционеров принят Госдумой в первом чтении

Госдума приняла в первом чтении законопроект, позволяющий перечислять в Пенсионный фонд Российской Федерации средства от реализации конфискованного имущества коррупционеров. С данным предложением ранее, 20 августа, на совместном заседании Генерального совета Партии и Совета руководителей фракций «Единой России» выступил секретарь Генерального совета Партии, вице-спикер Совета Федерации Андрей Турчак.

Подробнее ...
 
А.С.Пушкин лемсэ библиотекась тешкстызе чачома чинзэ

Сентябрянь 14-це чистэ Мордовия Республикань А.С.Пушкин лемсэ Национальной библиотекантень топодсть 119 иеть. Кенярксчинть кувалма библиотекань важодицятненень поздоровт ёвтась МР-нь Культурань, национальной политикань, туризмань ды архивень тевень министрась Анатолий Чушкин. Сон ёвтась покш сюкпря топавтовиця важодеманть кисэ, арсесь библиотекантень ансяк касомс-кепетемс ды муемс седе ламо од ловныцят.

Подробнее ...
 
Госдума приняла в первом чтении президентский законопроект о защите людей предпенсионного возраста

Рассматриваемый в Госдуме президентский законопроект, которым устанавливается уголовная ответственность за необоснованный отказ в приеме на работу или необоснованное увольнение лица по мотивам достижения им предпенсионного возраста, призван изменить отношение работодателей к сотрудникам старшего возраста. Об этом заявил первый заместитель руководителя фракции «Единой России» Андрей Исаев в ходе рассмотрения Госдумой законопроекта в первом чтении 13 сентября.

Подробнее ...
 
Лиседе чиеме!

Сентябрянь 15-це чистэ Саранскойсэ, Советской площадьсэ, ютавтови «Кросс-нации – 2018» Чиемань весероссиянь чись. Те  мероприятиясь карми молеме «Спорт против терроризма» девизэнть ало. Те тердеманть ало шожда атлетикань стартс лисить малав 4500 ломанть, юткозост совить шабра регионтнэстэ сазь инжетнеяк.

Подробнее ...
 
Ванстынк прянк грипптенть

Республикасонть ушодовсь грипптенть иммунизациясь. Кода пачтясть Роспотребнадзоронь региональной управлениясо, неть тевтнес нолдавить минсенек масторсо нолдазь вакцинатне, конатне ванкшнозельть парочинть ды зыяновчинть коряс. Неть: «Совигрипп» покштнень туртов ды «Совигрипп», конасонть арасть консервантт, эйкакштнень ды пешксесэ аватнень туртов. Вакцинатнень составс совить гриппень вирустнэнь актуальной штаммтне.

Подробнее ...