Рубрикатор

Правительство РМ Якась Игнатбуев ды Ицялов
Якась Игнатбуев ды Ицялов

Августонь 20-це чистэ Мордовиянь Прявтонь тевтнень нурька шкас топавтыцясь В.Д.Волков якась Покш Игнатбуев ды Ицялов. Васняяк Игнатовасо сон ваннызе Вармазейка велесэ В.Ю.Кабаевень крестьянонь-фермерэнь хозяйстванзо. Эсь тевенть сон ушодызе вете скалсто, ней предпринимателенть 600 ламо ракшанзо, эйстэст малав 300 потявтыця скалт.

Фермерэсь ёвтнесь Владимир Дмитриевичнень, меельце вете иетнестэ КФХ-нь лездамонь программатнень вельде сонензэ удалась виевгавтомс велень хозяйствань производстванть. 2016 иень невтевкстнэнь коряс вейке скалонть пельде потявтозь 6,2 тёжат кг ловсо, тедеде арсить лисемс 6,5 тёжат килограммас. КФХ-нть теезь важодемань 48 таркат, касы зарплатась, скалонь потявтыцятненень пандовить малав 25 тёжат целковойть.

Мордовиянь Прявтонь тевтнень нурька шкас топавтыцясь тешкстызе фермерэнь хозяйстванть важодемань лезэвчинзэ ды кирдизе предпринимателенть бажамонзо келейгавтомс производстванть. В.Д.Волков тешкстызе, тесэ строяви 400 скалс ловсонь од комплекс. Ёвтызе, те проектэнть топавтомась пек эрявикс Покш Игнатовань ёнксонть туртов. Те лезды панжомс важодемань од таркат, мезесь пек эрявикс велень эрицятнень туртов. Мордовиянь Прявтонь тевтнень нурька шкас топавтыцясь кармавтсь анокстамс проектэнь-сметань документация. Тешкстызе, свал важодиця предприятиясь эрявикс райононь экономиканть кемекстамонтень ды велетнень ванстомантень.

Седе тов В.Д.Волков макссь ушодкс Покш Игнатовасо куяронь кастомань теплицань покш комплексэнь строямонтень. Сонзэ покшолмазо 17 гектарт, тесэ теевить важодемань 250 ламо таркат.

 – Течи минь ушодынек пек покш тев аволь ансяк Покш Игнатовань ёнксонть, истя жо весе республиканть туртов, – тешкстызе Мордовиянь Прявтонь тевтнень нурька шкас топавтыцясь. – Минь куватьс вешнинек тей инвестор, ютавтынек ламо вастовомат ды, мельспарос, весемесь лиссь. Теемс од производстват аволь ансяк Саранскойсэ, истя жо велетнесэ – те минек прявт тевенек. Маласо вете иетнестэ республикань райононь куншкакуротнесэ ды покш велетнесэ строявить малав 30 предприятият.

11 гектаронь покшолмасо теплицань комплексэнь васенце очередесь нолдави уш сы иестэ. Предприятиянь прявтось алтась, 2018 иень сёксня тесэ пурнави васенце урожаесь. Омбоце очереденть нолдасызь 2019 иестэ. Предприятиянь проектэнь виесь – иезэнзэ 20 тёжат тоннат куярт. Проектэнть питнезэ – малав 5 миллиард целковойть.

Сы шкань теплицань площадкасонть В.Д.Волков ютавтсь строямонь прявт кевкстематнень коряс промкс. Кортамось мольсь инженерэнь сеттнень ды тов пачкодемань китнень теемадост. Нурька шкас арсеви витемс анокстамонь весе кевкстематнень ды сентябрясто кундамс строямонь-монтажонь тевтнес.

Покш Игнатовасо улемстэ В.Д.Волков истя жо кортнесь те ёнксонь эрицятнень марто, кунсолынзе сынст энялдомаст. Тешкстазель, вете иетнень перть районсонть стявтозь эрямо таркат малав 9 тёжат кавонзазь метрас, теезь 24 вайгельпеде ламо кить, Киржеман, Кучкаева ды Горка велетнесэ панжозь фельдшерэнь-акушерэнь пунктт, витнезь те ёнксонь малав весе школатне ды эйдень кужотне. Сы иестэ ушодови Андреевка велесэ, мейле Протасовасо ФАП-нь строямось.

Ламо кевкстемат максозельть китнень строямост ды витнемаст коряс. Ютазь иестэ Покш Игнатовасо витнезь китне Советская ды Гагаринэнь ульцятнева, одкстомтозь Киржеман велень сэдесь. Вадрялгавтовить Покш Игнатовань Советская куросонть кудотнень перька таркатне. 2017 иестэ арсеви строямс ки Юношевень ульцясонть ды витнемс кинть Од ломанень ульцясонть.

Теке жо чистэнть В.Д.Волков якась Ицялонь ёнксов, тосо вастовкшнось эрицятнень марто ды ваннынзе велень хозяйствань ды перерабатывающей промышленностень зярыя предприятиятнень.

Владимир Дмитриевич ёвтынзе Ицялонь вадрясто важодиця предприятиятнень. Неть: «Агро-Мир» ды «Дружба» ООО-тне – васенцеть ловсонь потявтоманть коряс (иезэнзэ вейке скалонть пельде потявтыть 11 тёжадо ламо килограмма), сырань теемань комбинатось, мясокомбинатось, спиртзаводось.

Райононь эрицятне ёвтасть сюкпрянь валт республикань руководителентень сынст ёнксонтень мелень явоманть кисэ, Кемлянь эрицятне аштить покш мельспаросо тосо бассейна марто эйдень кужонть тееманзо кувалма, сон панжозь мелят. Вастовомасонть тешкстазель, те ёнкссонть стявтовить эрямо таркат, ацавить од кить. Меельце иетнестэ Рождественна, Смольной, Ульянка велетнесэ панжозь фельдшерэнь-акушерэнь пунктт. Ютазь иестэ строязь ФАП Кергуды велесэ, маласо шкастонть од ФАП панжови Ладасо.

Велень эрицятне ёвтасть Мордовиянь Прявтонь тевтнень нурька шкас топавтыцянтень ламо пшкадемат, редявикс пельксэсь эйстэст – китнень теемадост, истя жо эрицятнень талновты Интернетэнть беряньстэ кундамось. Рождественна велень школань прявтось мельспарсо кортась Саранскойсэ эйкакшонь технопарконть теемадонзо. Тешкстызе, вадряль бу теемс сонзэ филиал сынст школанть юрсояк. Республикань Прявтонь тевтнень нурька шкас топавтыцясь тешкстызе, истят филиалт теевить республикань эрьва районсонть.

Те ёнкссонть улемстэ В.Д.Волков якась Кергуды велентень, тесэ ваннызе «Дружба» велень хозяйствань предприятиясонть тёжа скалс ловсонь эштё вейке комплексэнь строямонть. Проектэнть питнезэ 750 миллионт целковойть, тесэ арсеви панжомс важодемань 40 таркат.

Владимир Дмитриевич истя жо якась «Протеин» од предприятиянтень, конась аволь умок кармась важодеме Ицялонь сырань теемань комбинатонть юрсо. Те  – сывороткань протеинтнэнь нолдамонь коряс завод, неень шкане сон масторсонть вейкине. В.Д.Волков ваннынзе производствань площадкатнень, кортнесь предприятиянь важодицятнень марто ды варчизе од продуктонть.

В.Д.Волковнень истя жо невтизь сырань керсемань од линиянть. Тесэ сырась керсеви пельксэнь-пелькс ды пачтяви ярсамопелень микшнемань лавкатнес. Седе тов Мордовиянь лидерэсь кортась предприятиянь прявттнэнь марто сыродельной комбинатонть седе тов виевгавтомадонзо.

 

Новости

Сюкпрянь валт

Мордовия Республикань Прявтонть Владимир Волковонь лемс сась благодарность Адмирал Ушаков эскадрань миноносецэнь командирэнть Игорь Никитинэнь пельде. Мордовия Республикань подшефной миноносецэнь экипажонь прявтось республикань руководителентень ёвтась сюкпрянь валт военной моряктнень эрямост ды бытэст коряс мелявтоманть кисэ.

Подробнее ...
 
Сайсть медальть

Аволь умок Московсо ютавтозель «Сырнень сёксь» 19-це весероссиянь агропромышленной выставкась. Тосо эсь продукцияст невтизь Мордовиянь комсте ламо велень хозяйствань предприятиятне. Вана «Хорошее дело» агрогруппась тов усксесь «Мечта» ды «Юбилейное» кавто предприятиятнень продукцияст.

Подробнее ...
 
Апандыцятнень лангс – судс

Саранскойсэ поладовить важодематне жилищно-коммунальной услугатнень кис апандыцятнень марто. Сынст лангс каявить яволявтомат судс. Истя, ошонь Ленинской районсонть судс максозь 1160 искт 56 миллиондо ламо целковойс. Течинь чине эйстэст пандозь малав 2 миллионт целковойть. Кемекстазь 52 договорт долконь реструктуризациянть лангс. Теке марто 116 квартиратнесэ керязь электроэнергиясь.

Подробнее ...
 
Кода уштовить кудотне?

Саранскоень мэрэнть кедьсэ промкссонть кудотнень уштоманть коряс кевкстемась кармась сехте пштикс. Администрациянь прявтонь васень полавтыцянть, Ошонь хозяйствань департаментэнь директоронть Алексей Егорычевень валонзо коряс, Саранскойсэ ламо квартирас весе кудотнесэ ули лембесь. Ансяк улить мелявкст зярыя стояктнень коряс, кевкстемась решави.

Подробнее ...
 
Вадрятнень ютксо

Политикань ды экономикань коммуникациятнень агентствась нолдась РФ-нь субъекттнэнь прявттнэнь рейтинг. Сентябрянь цётамотнень коряс Мордовиянь Прявтось Владимир Волков совась вадря губернатортнэнь юткс ды саизе 19-це тарканть. Меельце ковонть перть сон кемекстызе те тарканть кавто пунктс.

Подробнее ...