Рубрикатор

Государственное Собрание РМ Депутатось кочкицятнень мартоль
Депутатось кочкицятнень мартоль

Декабрянь 1-це чистэ Депутатонь чинть ютавтомсто Мордовия Республикань Государственной Собраниянь Председателесь В.В.Чибиркин вастневсь Саранск ошонь Пролетарской ёнксонь эрицятнень марто. Вастовомась алтазель «Единая Россия» партиянтень 16 иень топодемантень. Высшей законодательной органонь прявтось васняяк ульнесь Саранск ошонь округонь  омбоце номер поликлиникань (поликлиникань 3 номер отделениянь) Государствань бюджетэнь учреждениясонть. Тов якицятнеде 90 тёжат ломанть, панжозель сон вейксэньгеменце иетнестэ. Парламентэнь прявтось ванкшнызе поликлиникасо процедурань теемань кабинеттнэсэ уликс оборудованиянть, чинь стационаронть, кортнесь тов сыцятнень марто, кевкстнесь сынст мелест-арсемаст те учреждениядонть.

 

Те темась поладовсь поликлиникасо важодицятнень марто вастовомасонть. В.В.Чибиркин тешкстась, медицинань персоналось ламо теи эрицятнень шумбрачист витемань коряс. Мерезель, добовазенть лангс лоткамс а эряви, икелепелевгак бажама весе одонтень ды лезэвентень.

Сы шкань аравтлувдонть кортамсто, сон пачтясь, Россиянь Президентэнть «маень кармавтоматнень» мельс саезь, медицинасо важодицятнень кепедеви заработной платаст. Омбоце номер поликлиникань коллективесь, конань прявтсо тевензэ парсте содыця главной врачось В.С.Слугин, кемевтсь икелепелевгак тевс нолдамс лецямонь од ёнкстнэнь, информационной технологиятнень. Истя жо сынь ёвтасть сюкпрянь валт В.В.Чибиркиннэнь ды весе депутаттнэнень сынст медучреждениянтень мелень явоманть кисэ ды энялдсть одкстомтомс поликлиникасо уликс оборудованиянть, зданиянть ды паролгавтомс сонзэ перька территориянть. МР-нь Госсобраниянь Председателесь алтась кевкстематнестэ седе ламонть ванкшномс маласо шкастонть, кадовикстнэнь саемс мельс республикань  бюджетэнть кемекстамсто.

Седе тов В.В.Чибиркин «Луч» Культурань кудосо вастневсь Пролетарской ёнксонь эрицятнень марто. Владимир Васильевич икельце валсонзо тешкстызе культуранть покш таликанзо эрьва ломаненть эрямосо.

Те вастовомасонть кепедевсть истямо талновтыця кевкстематне, кода Пролетарской ёнксонь «Луч» Культурань кудонть витнемась, сыненст транспортонь максомась. Неть стакачитнень коряс, конатнеде кортасть тов пуромозтне, МР-нь высшей законодательной органонь прявтось алтась лездамс. Теде башка, сон ёвтась мель те ёнксонь эрицятненень молемс Эрьзянь лемсэ музеев ды ютамс Саранск ошонь мазый таркатнева, кенярдомс сеть паро полавкстнэнень, конат редявить Футболонь коряс масторлангонь чемпионатонь матчтненень анокстамсто Мордовиянь прявт ошсонть.

Теке жо вастовомасонть Пролетарской ёнксонь активисттнэнень, кить сеедьстэ эрсить эрьва кодамо мероприятиятнесэ, сон макссь казнеть.

Саранск ошонь 24 номер школасонть В.В.Чибиркин вастневсь тонавтыцятнень марто. Тосо кортамось ульнесь образованиясо паро полавтоматнеде ды ёроков од ломантненень лезксэнь максомадо.

Тонавтыцянь коллективесь пшкадсь высшей законодательной органонь прявтонтень школань зданиянть витнемадо ды трудонь уроктнес од оборудованиянь рамамга лездамодо.

Образованиясо тевтнеде кортамсто тонавтыцятне макссть истямо кевкстема, кода Мордовиянь вузтнэсэ технической специальностень коряс бюджетэнь таркатнень ламолгавтомадо. Арсемась паро, эдь неть специалисттнэ эрявить кода минек республиканть, истя жо весе масторонть туртов инновациянь экономиканть виевгавтомс. Вастовомасонть кепедевсть эште ламо лия кевкстемат, конат талновтыть те ёнксонь эрицятнень.

В.Юдина

 

Новости

Инжетне содавтовить эрзятнень эрямо коест марто

Мордовия Республикасо Эрзянь культурань ды ремеслань куншкакуронь теемань коряс дизайнерэнь арсемань объектэкс кармась Отяжелесэ пичень чочксто чапозь сокицянь-видицянь семиянь кудось. Сонзэ вакссо анок уш баняськак, кона уштови «раужосто», тунда путневить эмеж марто пандяткак.

Подробнее ...
 
Саранскойсэ панжови приют

Саранскойсэ панжови приют азортомо ракшатнень туртов. Кода пачтясть ошонь администрациясто, ней уш ули тень туртов таркаяк. Панжома шкась – те иень июнь ковс.  Приютонтень кармить кельгеме 100 каткат ды 300 кискат.

Подробнее ...
 
Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...
 
Мордовиянь сехте вадря сувенирт

Декабрянь 22-це чистэ яволявтозельть «Мордовия Республикань туристической сувенир» конкурсонь изницятнень лемест. Истямо пелькстамонть ютавтсть МР-нь Культурань, национальной политикань, туризмань ды архивень тевень министерствась, Туристэнь-информациянь куншкакурось. Конкурсонть вельде эрявсть муемс сувенирэнь сехте вадря продукциянть, тешкстамс производительтнень, кочкамс лия ёнов а молиця сувениртнэнь ды невтемс сынст FIFA-нь болельщикень фестивальсэ.

Подробнее ...