Рубрикатор

Молодежная политика Студотрядтнэ течи эрявикст
Студотрядтнэ течи эрявикст

Вана уш зярыя иень перть од ломанень тевтнень коряс Мордовиянь Госкомитетэсь ды од ломанень республикань центрась ветить ламо мероприятият одтнэнь туртов важодема таркань вешнеманть кувалма. Студентэнь отрядтнэ течи – те аволь ансяк робота, истя жо паро инструмент од ломантнень общественной эрямос совавтомантень.

Кизэнь перть сынь топавтыть эрьва кодат тевть. Неень шкане важодить 174 отрядт: 19 – велень хозяйствань, 12 – строямонь, 30 – педагогической, 83 – поисковой, 27 – волонтеронь, 2 – сервисэнь ды 1 спасателень. Весемезэ тезэ совить 3500 ламо од ломанть. Роботыть сынь аволь ансяк Мордовиясо, истя жо сонзэ томбалеяк. Кенярдовты, эрьва иестэ студотрядтнэс сыть ламо боецт. Сехте активнойтне жо бажить невтемс эсь пряст лия мероприятиятнесэяк. Яксить семинаров, анокстыть концертт ды пурнавкшныть вейс эсь тевтнеде-арсематнеде кортнеме. Эдь эште комсомолонь шкатнестэ студентэнь отрядтнэ лововсть сехте вадря од ломантнень вейсэндямонь таркакс.

Алкукскак, те специальностесь ней пек вешевикс, эдь Саранскойсэ ды республикань районтнэсэ стявтовить эрьва кодат объектт. Весемеде пек те редяви прявтошсо. Мордовиясь аноксты эрзя-мокшонь раськенть Россиянь лия раськетнень марто вейсэндявомань 1000 иетненень. Строямонь организациятне мельспаросо учить од ломантнень эстест важодеме. Кить топавтыть бетонной роботатнень, кить урядыть строямонь шукшпрятнень, кить анокстыть объектэнть эксплуатацияс максомантень. Чарькодеви, штукатурямось эли плиткань путнеме а эрьвась машты, кой-конатнень арасть неть тевтнесэ содамочист. Те асатыксэнть витемга вана уш зярыя иеть мельцек од ломанень центрась кучни студенттнэнь строямонь техникумс, косо ковонь курсатнень прядомадо мейле сыненст максови документ тонавтнезь специальностенть коряс. Теде мейле цератненень максовить покш роботаткак. Зарплатань покшолмаськак, нама, лия. Эдь од ломантне бажить лезэвстэ ютавтомс кизэнь каникулатнень. Неть ярмактне жо пек маштовить тонавтнема шкасто.

«Браво» строямонь отрядось важоди Орданьбуень «ПМК-1157 «Ардатовская» ООО-со. Те организациясь стявты стадион ды покш мельсэ эсь важодицятнень юткс саинзе Саранскоень од цератнень. Эряви меремс, ПМК-сь уш аволь вейке ие сайни роботамо студентт. Генеральной директоронь полавтыцянть И.Н.Бугуевень валонзо коряс, сюлмот мартост кармить кирдеме седе товгак.

– Цератне вадрят, эсь тевест бажить топавтомс парсте, ильведькстэме. Дисциплинань коряскак кодаткак асатыкст арасть, – тешксты Игорь Николаевич. – Студотрядтнэнь лезксэст вельде витнезельть больницянь вейке корпусось, Орданьбуень школась ды лия объектт.

«Браво» отрядонтень совить 12 ломанть. Эрить цератне Орданьбуень аграрной техникумонь общежитиясо. Весе боецтнэ – МГУ-нь архитектурно-строительной факультетэнь 4-це курсонь студентт. Ярмактнеде башка, объектэнь стявтомсто сынь получить паро практикаяк. Отрядонть прявтсо ашти командирэсь Барменков Алексей, оймсема шкатнень лезэвстэ ютавтоманть аноксты комиссарось Смирнов Игорь.

Курок Орданьбуень куншкакуросо стявтови мазый, неень шкань стадион. Ютамо тосо кармить эрьва кодат пелькстамот. Эрицятне, нама, умок учить районсост истямо объектэнть. Од цератнень тевс сови бетононь ацамось, бордюрань кевтнень артомась, арматурной сеткань ладямось, гидроизоляциясь. Пек стака тенст важодемс пси чинть ало. Теке марто виест сатыть эрьва мезес. Чокшне малав ютавтнить пелькстамот эли морсить морот гитарань коряс.

Строямонь отрядтнэ – те аволь ансяк церат. Улить тейтереньгак. «Тештине» отрядось, козонь совить 10 мазыйкат, важодить Коммунистической ульцясо эрямонь туртов стявтовиця кудосонть. Сынь шлить вальмат, урядыть вишка мусортнэнь. Эдь отделочной тевтне тосо прядовома лангсот, куроксто сыть эрицятне.

Л.Адмайкина

 

Новости

Инжетне содавтовить эрзятнень эрямо коест марто

Мордовия Республикасо Эрзянь культурань ды ремеслань куншкакуронь теемань коряс дизайнерэнь арсемань объектэкс кармась Отяжелесэ пичень чочксто чапозь сокицянь-видицянь семиянь кудось. Сонзэ вакссо анок уш баняськак, кона уштови «раужосто», тунда путневить эмеж марто пандяткак.

Подробнее ...
 
Саранскойсэ панжови приют

Саранскойсэ панжови приют азортомо ракшатнень туртов. Кода пачтясть ошонь администрациясто, ней уш ули тень туртов таркаяк. Панжома шкась – те иень июнь ковс.  Приютонтень кармить кельгеме 100 каткат ды 300 кискат.

Подробнее ...
 
Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...
 
Мордовиянь сехте вадря сувенирт

Декабрянь 22-це чистэ яволявтозельть «Мордовия Республикань туристической сувенир» конкурсонь изницятнень лемест. Истямо пелькстамонть ютавтсть МР-нь Культурань, национальной политикань, туризмань ды архивень тевень министерствась, Туристэнь-информациянь куншкакурось. Конкурсонть вельде эрявсть муемс сувенирэнь сехте вадря продукциянть, тешкстамс производительтнень, кочкамс лия ёнов а молиця сувениртнэнь ды невтемс сынст FIFA-нь болельщикень фестивальсэ.

Подробнее ...