Рубрикатор

Молодежная политика Кода анокстыть Саранскоень волонтёртнэ чемпионатонтень
Кода анокстыть Саранскоень волонтёртнэ чемпионатонтень

Ниле ковдо цють седе ламо кадовсь FIFA 2018™ Футболонь коряс масторлангонь чемпионатонть ушодовомантень. 2010 иестэ Саранск ошонтень максозель права ютавтомс тесэ зярыя матчт. Ней минь уш содатано, Мордовиянь прявтошов сыть пек виев командат кавксо масторсто: Португалиясто, Тунисстэ, Нигериясто, Колумбиясто, Перусто, Даниясто, Ирансто ды Япониясто. Кармить ютавтозь ниле налксемат, ды весе чарькодить, зярыя инжеть сыть минек а покшке ошонтень. Те шкастонть пек покш кемемась карми республикань волонтёртнэнь лангс. Вейкеяк истямо покш мероприятия а юты сынст лездамовтомо. Кода анокстыть Саранскоень волонтёртнэ Футболонь коряс масторлангонь чемпионатонтень, теде миненек ёвтнесь FIFA 2018™ Футболонь коряс масторлангонь чемпионатонь ошонь Волонтёртнэнь анокстамонь центрань прявтось Кирилл Комаров.

 

– Саранск ошонь волонтёртнэнь туртов те мероприятиясь, арсян, кадови мельс весе эрямонть перть, эдь FIFA 2018™ Футболонь коряс масторлангонь чемпионатось – те покштояк покш события. Россиясо истямо мероприятиясь юты васенцеде! Минек масторов сыть 32 виевдеяк виев футболонь сборнойть, налксевить 64 матчт. Футболонь чемпионатонтень анокстыть 11 ошт-организаторт ды зярыя тёжат волонтёрт. Саранскоентень эрявить малав 2 тёжат волонтёрт, зярс максозь малав 4 тёжат анкетат, сынь каявить мартонь 1-це чис. Волонтёрокс саевить ломанть кемготово иестэ саезь, англань эли лия омбо масторонь келень содыцят. Минек улить участникенек, конатненень уш 50-80 иеде седе ламо, сынст минь лемдинек «сиянь волонтёрокс». Саранскоесь саи омбоце тарка яволявтомань максомань коряс, васенце таркасо зярс Самарась.

Волонтёртнэнь эйстэ ашти пек ламось: сынь васенцекс вастыть инжетнень, бажить шождалгавтомс сынст эрямост турниртнэнь шкасто, содавтыть ломантнень ошонть, республиканть коензэ-кирданзо марто.

Минек ошонь волонтёртнэ кармить топавтомо вейксэ функцият: сынст лангсо карми информациянь-туризмань службась, транспортось, навигациясь, Болельщикень фестивалесь, медицинась, «Меельце милясь», культурной ды оймсемань программась, объекттнэнь ды сынсест, волонтёртнэнь, лангсо управлениясь.

Болельщикень фестиваленть шкасто ошканть тейневить башка площадкат, косо волонтёртнэ инжетнень марто ютавтыть эрьва кодат мероприятият. «Меельце милясь» юты стадиононть вакссо, косо волонтёртнэ кармить вастомо ломантнень, ильтясызь сынст ванома таркатнес ды теке марто кармить тееме весементь инжетнень ёжомарямост паролгавтоманть ды кенярксчинь атмосферань кастоманть-кемекстамонть туртов. Истя жо минек лангсо транспортонь объекттнэ: аэропортось, чугункань кинь вокзалось, стадиононть вакссо вастомань-ильтямонь зонась ды кой-кона парковкатне. Эште вейке тевесь – лездамс те шкастонть медиктнень туртов. Волонтёртнэнь васенце задачаст – вастомс ошонь инжетнень, ёвтнемс тенст, кода пачкодемс те эли тона объектэнтень, косо тенст седе паро ярсамс, оймсемс, кува яксемс ошонь достопримечательносттнень ванкшномо. Меельце ёнксонть коряс кармить важодеме информациянь-туризмань пунктт, косо инжетнень истя жо вастсызь минек волонтёртнэ. «Шумбрат! Ты – мой брат!» валрисьмесь карми вастомань васенце валонок! Арсян, весе сыця инжетне тонавтнесызь те валмеревксэнть!

 

МЕЗЕ УЧИ

ВОЛОНТЁРТНЭНЬ?

Эрьва волонтёрось, васняяк, васты пек ламо од ялгат, пурны покш содамочить ды карми истямо грандиозной событиянь участникекс. Теке марто а эряви стувтнемс, волонтёрось – истямо жо ломань ды сонзэ туртов анокставить зярыя мелень витиця тевть. Од ломантне ды, нама, «сиянь волонтёртнэяк» оршавить лия ёнов а молиця оршамопельсэ, сменатнень шкасто сынст питневтеме андсызь-симдьсызь. Весе кармить ардтнеме общественной транспортсо питневтеме ды сыненст казевить зярыя мазый сувенирт.

Ошонь волонтёрокс кандидатось юты кочкамонь зярыя пелькстамот. Васняяк – регистрация, мейле максы ниле тестт омбо масторонь келень содамонь, эсь прянь содамонь, интеллектэнь коряс. 2018 иень омбоце кварталсто кочказь кандидаттнэ ютыть тонавтнемань курсат, майстэ тенст максови аккредитация, форма, ды икелев – чемпионатов!

 

КОРПОРАТИВНОЙ ВОЛОНТЁРТ – КИТЬ СЫНЬ?

Аволь умок ошонь Волонтёронь анокстамонь центрась ютавтсь вастовомат минек республикань предприятиятнень корпоративной волонтёртнэнь марто. Неть ломантне – тосонь сотрудникть, ды сынь сайсть мель лездамс Чемпионатонть ютавтомсто. «Корпоративной волонтёртнэ – минек масторонь волонтёртнэнь движениянь пельксэсь», – тешкстызе вастовомасонть Кирилл Комаров.

Юлия Аршинова роботы вейке компаниясо пиар-менеджерэкс ды арси, волонтёронь тевесь аволь ансяк тонавтницятнень ды студенттнэнь туртов. Те кись панжадо весенень, иетнень ды социальной статусонть лангс апак вано.

Корпоративной волонтёртнэ истя жо ютыть тонавтнемань курсат ды невтьсызь эсь пряст Чемпионатонть шкасто.

М.ДЕВЯТОВА

 

Новости

Инжетне содавтовить эрзятнень эрямо коест марто

Мордовия Республикасо Эрзянь культурань ды ремеслань куншкакуронь теемань коряс дизайнерэнь арсемань объектэкс кармась Отяжелесэ пичень чочксто чапозь сокицянь-видицянь семиянь кудось. Сонзэ вакссо анок уш баняськак, кона уштови «раужосто», тунда путневить эмеж марто пандяткак.

Подробнее ...
 
Саранскойсэ панжови приют

Саранскойсэ панжови приют азортомо ракшатнень туртов. Кода пачтясть ошонь администрациясто, ней уш ули тень туртов таркаяк. Панжома шкась – те иень июнь ковс.  Приютонтень кармить кельгеме 100 каткат ды 300 кискат.

Подробнее ...
 
Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...
 
Мордовиянь сехте вадря сувенирт

Декабрянь 22-це чистэ яволявтозельть «Мордовия Республикань туристической сувенир» конкурсонь изницятнень лемест. Истямо пелькстамонть ютавтсть МР-нь Культурань, национальной политикань, туризмань ды архивень тевень министерствась, Туристэнь-информациянь куншкакурось. Конкурсонть вельде эрявсть муемс сувенирэнь сехте вадря продукциянть, тешкстамс производительтнень, кочкамс лия ёнов а молиця сувениртнэнь ды невтемс сынст FIFA-нь болельщикень фестивальсэ.

Подробнее ...