Рубрикатор

Молодежная политика «Инеркав» якасть 700 ламо од ломанть
«Инеркав» якасть 700 ламо од ломанть

2017 иестэ «Инерка» раськеютконь од ломантнень образовательной форумось ютавтовсь уш кавксоцеде. Тедеде сонзэ участникекс кармасть 700 ламо од ломанть 14 иестэ саезь 30 иес. Ютксост од ломанень вейсэндявкстнэнь лидертнэ, проектной ды исследовательской группатнес, профессиональной сообществатнес ды аволь коммерческой организациятнес совицятне, од ломанень парламенттнэнь ды волонтёронь организациятнень представительтне.

Те иестэнть од ломанень образовательной форумось ютавтовсь «Форум Российского движения школьников» ды «Форум Молодёжных инициатив» ёнкстнэнь коряс.

 

Июлень 12-це чистэ форумонть содавтызе Мордовия Республикань Прявтонь тевтнень нурька шкас топавтыцясь Владимир Волков. Сон ваннынзе зярыя площадкатнень важодемаст. Экскурсиясь-презентациясь ушодовсь «Российское движение школьников» ёнксстонть, козо совить «Поиск» ды «Юнармия» отрядтнэнь боецтнэ, движениянь лидертнэ, Од Кулибинтнэ, школань СМИ-нь прявттнэ. Седе тов инжетне кортасть «Студенческое самоуправление», «Политика» ды «Од ломанень инициативатне» сменатнень участниктнень марто.

МР-нь Прявтонь тевтнень нурька шкас топавтыцясь Владимир Волков ульнесь экспертэкс грант лангс проекттнэнь идемасонть ды ёвтась зярыя арсемат, конат лездыть разработкатнень вадрялгавтомасонть. Мордовиянь аволь коммерческой организациятнень представительтне невтсть зярыя эрявикс проектт патриотической воспитаниянь, туристической ёнксонь, велень хозяйствань областтнесэ.

В.Д.Волков тешкстызе велень хозяйствань отраслянть касомань-виевгавтомань эрявиксчинть. Мордовиянть туртов те ёнксось ашти прявтокс. «Агропромышленной комплексэнть касомась-кепетемась республикань прявттнэнь туртов ашти важодеманть прявт тевекс. Сонзэ эрявиксчизэ а ёми икеле иетнестэяк. Вадря важодеманть, од технологиятнень тевс нолдамонть эйстэ ашти ломантнень вандынь чист. Секскак те отраслясонть инновациянь проекттнэ пек эрявикст весе масторонть келес», – тешкстызе Владимир Волков.

«Волонтёры чемпионата» площадкасонть региононь руководителесь вастовсь 2018 иень Футболонь коряс чемпионатонь Саранскоень ошонь-организаторонь посолонть, футболонь комментаторонть Илья Казаков марто. Тесэ жо волонтёртнэнь марто кортамсто Владимир Волков тешкстызе, мундиалень читнестэ сынст важодеманть эйстэ карми аштеме пек ламось, теке марто, сеяк, кодат мельть-арсемат лиядыть томбалень инжетнень минек республиканть эйстэ.

«Эряви аволь ансяк вадрясто вастомс и нжетнень, истя жо арсемс сынст туртов культурань мельстуиця программа. Тень туртов эряви пек парсте содамс омбо масторонь кельтнень, – мерсь Владимир Волков. – Саранскоев сыть малав 100 тыщат ломанть. Секскак весементь арсема педе-пес. Кадык инжетнень мельс Саранскоесь кадови кода инжень вечкиця ды лия ёнов а молиця ош».

Седе тов «Инерка ТV» од ломанень каналонь импровизированной студиясонть Владимир Волков макссь каршо вал «ИНТВ» проектэнь ветицянть Олеся Клюевань кевкстематнень лангс. Кортамсто сон тешкстызе, форумонь площадкатнесэ эряви теемс истямо важодемань лув, штобу эрьва участникесь апак тално ёвтавлинзе весе арсеманзо. «Те лагерьсэнть пурнавсть ёроков од ломанть, конат анокт невтемс эсь разработкатнень. Минь свал карматано лездамо истятнэнень вадря ды эрявикс проекттнэнь топавтомасонть. Теке марто а эряви стувтнемс, весе шкатнестэ сехте покш сюпавчикс аштить свалшкань тевтне: вадря образованиясь, патриоти ческой ды трудонь воспитаниясь, – мерсь В.Д.Волков. – Цифровой экономикань шкастонть эрявикс весе се, мезе тень марто сюлмавозь: научно-технической ёрокчись, IT-сферась ды ламо мезесь лиясь. Прявтось – кода анокстазь ломанесь. Тентеме минь а тейтяно эскелькст икелев ды а карматано конкурировамо лиятнень марто».

Площадкатнень ванномадо мейле покш инжетне ульнесть торжественной пелькссэнть. Тесэ форумонь сехте ёроков участниктненень максовсть казнеть ды премият.

«Республиканть туртов ашти прявтокс, што истят форумтнень шкасто од ломантне кастыть эсь содамочитнень, муить од ялгат. Сонзэ важодемань результатокс жо ашти се, эрьвась эйстэнк теи эскелькс икелев. Тыненк эряви путомс эсь икеленк задачат ды топавтомс сынст, минь жо тейсынек весементь, штобу тынь получавлиде эрявикс содамочить ды кармавлиде эсь масторонь алкуксонь патриотокс»,  – тешкстызе Владимир Волков.

Торжественной мероприятиясонть истя жо ульнесть Од ломанень тевтнень коряс федеральной агентствань региональной взаимодействиянь Управлениянь прявтось Кирилл Литвицкий, РФ-нь Общественной палатань членэсь, «Российский союз сельской молодёжи» Весероссиянь од ломанень общественной организациянь Центральной Советэнь председателесь Юлия Оглоблина, Мордовиянь законодательной ды исполнительной властень органтнэнь важодицятне, МР-нь Общественной палатань члентнэ.

Теке марто, те чистэнть МР-нь Государственной Собраниянть юрсо Од ломанень общественной  палатань члентнэ ютавтсть «Молодые политики» дискуссиянь клубонь промкс, конань лувсо пурназель вастовома МР-нь Государственной Собраниянь Председателенть Владимир Чибиркин марто.

Ю.Еремина

 

Новости

Путин казизе Волковонь Александр Невскоень орденсэ

Россиянь Президентэсь Владимир Путин тешкстась Указ «О награждении государственными наградами Российской Федерации». Зярыя кементь фамилиятнень ютксо Мордовиянь Прявтось Владимир Волков. Государствань руководителенть Указонзо коряс сонензэ максови Александр Невскоень орденэсь.

Подробнее ...
 
Кулят мэриясто

Ошонь Администрациясо ютась промкс, кона ушодовсь коммунальной техниканть телентень анокстамодо кевкстематнестэ. РФ-нь МЧС-нь ГУ-нь МР-нь представительтне пачтясть, маласо читнестэ Саранскойсэ температурась валги -5 градусос, чить термометрась невти +1, +2 градуст. Карми прамо начко лов. Ошонь прявтось Пётр Тултаев тешкстызе, машинань ветницятне чарыст зярс эзизь полавто. ГИБДД-нь важодицятне мерсть, ветницятненень ютавтыть профилактической кортамот. «Чуваронь-салонь почодыця машинатне телень шкане улест весе зыянов таркатнесэ, сэдтнень вакссо, пандопряв молиця килангтнесэ. Ошонь хозяйствань департаментэнь важодицятне кадык стувтсызь оймсема читнень. Субутась тынк туртов – важодемань чи», – мерсь Пётр Тултаев.

Подробнее ...
 
Литературанть марто вейсэ

А.С.Пушкин лемсэ республикань Национальной библиотекасо ютась «Литература и природа – рука об руку» эрьва иень акциясь. Сон юты колмоцеде ды тедеде алтавсь Экологиянь иентень. Сонзэ ютавтыцятне – Ицялбуень куншкакуронь библиотекась, «Смольный» национальной паркось ды А.С. Пушкин лемсэ библиотекась.

Подробнее ...
 
Сюкпрянь валт

Мордовия Республикань Прявтонть Владимир Волковонь лемс сась благодарность Адмирал Ушаков эскадрань миноносецэнь командирэнть Игорь Никитинэнь пельде. Мордовия Республикань подшефной миноносецэнь экипажонь прявтось республикань руководителентень ёвтась сюкпрянь валт военной моряктнень эрямост ды бытэст коряс мелявтоманть кисэ.

Подробнее ...
 
Сайсть медальть

Аволь умок Московсо ютавтозель «Сырнень сёксь» 19-це весероссиянь агропромышленной выставкась. Тосо эсь продукцияст невтизь Мордовиянь комсте ламо велень хозяйствань предприятиятне. Вана «Хорошее дело» агрогруппась тов усксесь «Мечта» ды «Юбилейное» кавто предприятиятнень продукцияст.

Подробнее ...