Рубрикатор

Молодежная политика Шукшпрянь ванськавтомась
Шукшпрянь ванськавтомась

Содазь, 2017 иесь РФ-нь Президентэнть В.В.Путинэнь Указонзо коряс лемдезь Экологиянь иекс. Сонзэ прявт смустезэ – экологиянь безопасностень топавтомась ды Россиянь лия ёнов а молиця пертьпельксэнть ванстомась. Экологиянь иенть лувсо арсеви топавтомс покш тевть, ютксост: пертьпельксэнь ванстомань технологиятнень тевс нолдамось, регионтнэнь экологиянь невтевкстнэнь вадрялгавтомась, отходтнэнь видестэ пурнамось, ведень, вирень ды модапотмонь сюпавчитнень ванстомась, заповедниктнень виевгавтомась.

Мордовиясо ламо тееви пертьпельксэнть ванстомга, экологиянь невтевкстнэнь виевгавтомга. Ансяк улить стакачитькак, конат талновтыть республикань весе эрицятнень. Вейкесь эйстэст – аволь закононь коряс шукшпрятнень теемась. Тень коряс виев важодема ветить Мордовия Республикасо Общероссийской народной фронтонь региононь отделениянь активисттнэ. Топавтови «Генеральная уборка» проектэсь, сонзэ лувсо теезь «Шукшпрятнень интерактивной картась». 

 Ванстомасост ламо колавкст

Ютазь недлясто ОНФ-нь активисттнэ ваннызь Ромодановань райононь полигононть. Ванкшноманть лувсо редязельть зярыя пшти коламот.

Кода редизь ОНФ-нь эксперттнэ, тесэ а топавтовить отходтнэнь вачкамонь ды ванстомань условиятне. Башка-башка апак явше шукшпрятне ёртозь санитарной-ванстомань зонантень. Полиэтиленэнь рудазов пакеттнэнь ды тапардамонь лия материалтнэнь вармась салы маласо аштиця паксятнес, тень вельде кандови покш зыян пертьпельксэнтень ды ломантнень шумбрачинтень.

– Ромодановань районсо полигонось санкционированной, тень лангс апак вано, шукшпрянь интерактивной картантень понгсь васенцетнень ютксо ды вадрякс сон кодаяк а лемдеви. Те объектэсь панжозь умок, те шканть перть полавтовсть сонзэ вадрялгавтоманть коряс вешематне. Санитарной норматнень коряс, невтемга, шукшпрястонть ардыця автотранспортонть чарытненень эряви теемс дезинфекция. Тень апак тее, чарытнес пурнавить пек ламо микроорганизмат ды веществат, конат кандыть зыян ломантнень шумбрачист туртов, ды усксевить весе райононть келес, – тешкстызе Мордовиясо «Генеральнай уборка» ОНФ-нь проектэнь ветицясь Иван Сидорин.

Кода пачтясь «Коммунальник» МУП-нь прявтось, полигононть вадрялгавтомс явозь 320 тёжат целковойть. Тедеде арсеви пирямс те тарканть, озавтомс чувтт ды путомс бетононь ванна автотранспортонь чарытнень дезинфекциянть туртов.

Эрицятнень пеняцямост коряс ОНФ-нь активисттнэ ванкшнызь зярыя шукшпрятнень. Отходонь таштавкстнэ теевсть Ленинэнь, Степан Разинэнь ды Рабочая ульцятнесэ эрямо кудотнень ваксс. Ромодановань райононь администрациянь прявтонть валонзо коряс, стакачись сеньсэ, частной секторсо малав 70% эрицятнень арась мелест тешкстамс договорт шукшпрятнень усксеманть коряс ды пандомс те услуганть кисэ.

Светотехстроень паркось

паролгадсь

ОНФ-нь региононь отделениянь активисттнэ поладыть важодеме шукшпрятнень марто стакачитнень витеманть коряс. Истя, неть читнестэ «Генеральная уборка» проектэнть лувсо ванськавтозель Саранск ошонь Пролетарской райононь виресь. Эйкакштне пурнызь ёртнезь конёвтнень, пластикень ды суликань бутулкатнень, пакеттнэнь ды лия шукштнэнь, конатнень кадызь  ванькс коштсо оймсеме вечкицятне.

Субботникенть лувсо пурназельть шукш марто 80 ламо кескавт. Тарканть ванськавтомадонзо мейле эйкакштне понгавтнесть сёрмадовкст, конатнесэ энялдсть ванстомс ваньксчинть.

– Неень шкане минек планетанть рудазкавтомась кармась экологиянь прявт стакачитнестэ вейкекс. Статистикась невти, эрьва чистэ ламолгадыть шукшонь ёртома таркатне. Ды те канды покш зыян ломантень шумбрачинтень ды пертьпельксэнтень. Эдь башка отходтнэ ванстовить мода потсо зярыя сядот иеть. Пек берянь, ламот ломантне тень а чарькодить, – толковизе Мордовиясо «Генеральная уборка» ОНФ-нь проектэнь ветицясь Иван Сидорин.

Теде икеле экологиянь субботникть ютавтовсть республикань весе районтнэсэ. Сынст прявт смустест – кепедемс ломантнень мелест эсест кудотнень маласо таркатнень ванськавтомантень, вадрялгавтомс оштнесэ ды велетнесэ экологиянь обстановканть. 30 тёжадо ламо ломанть ванськавтызь таштавозь шукпрятнень эйстэ парктнень, сквертнэнь, кудотнень икеле таркатнень, вирьтнень, лей чиретнень.

Республикань ламот эрицятне содыть, «шукшпрянь интерактивной картасонть» эрьвантень мереви тешкстамс зыянов таркатнень.

«Кругловой столь»

Июнень 29-це чистэ Мордовиянь прявтошсонть Общероссийской народной фронтонь региононь отделениясонть ютавтовсь «кругловой столь», конань лувсо мольсь кортамо республикасонть экологиянь тевтнеде. Вастовомась ютавтовсь ОНФ-нь регионъютконь экологиянь конференциянть лувсо, конась ветявсь Кировсо.

«Кругловой столентень» пурнавозетне башка мель явсть «Шукшпрянь интерактивной картантень», конань вельде ветяви пшти ваннома регионсонть санитарной «ёжонть» мельга. Течи Мордовиянь «интерактивной картасонть» тешкстазь 53 шукшпрят, 26-тне – уш ванськавтозь, меельцетнень коряс истя жо ветяви важодема.

МР-нь Жилищно-коммунальной хозяйствань министерствань важодицятне ёвтнесь отходтнэнь марто важодемань территориянь схематнень тевс нолдамодост. Мордовиясо сынь кемекстазь уш ютазь иень октябрясто. Отходтнэнь арсевить ванстомс ТКО-нь санкционированной 12 полигонтнэсэ, конат теезь Орданьбуень, Отяжбуень, Дубёнкань, Инсаронь, Ицялонь, Кочкуровань, Лямбирень, Ромодановань, Рузаевкань, Ташто Шайговань, Торбеевань, Чаунзань районтнэсэ. ОНФ-нь эксперттнэ тешкстызь, шукшпрятнень таштамось канды экологиянь ды социальной покш зыян.

Башка кортамо ветявсь шукшпрятнень башка-башка пурнамодонть. Саранскойсэ тень туртов теезь весе эрявиксэсь. Кудотнень маласо путозь картононь ды пленкань пурнамонь 520 контейнерт, башка аштить контейнерт пластикенть туртов. Сынсь путомадост мейле уш васенце читнестэ ошонь эрицятне кармасть явшеме шукшпрятнень эрявикс контейнертнэва. Вастовомантень пурнавозетне тешкстызь, эряви путомс весе вийтнень сень коряс, шукшонть башка-башка пурнамось улезэ тонадозь тевекс кода ошонь, истя жо велень эрицятнень туртов.

Теде мейле «кругловой столентень» пурнавозетне конференц-связенть вельде вейсэндявсть экологиянь проекттнэнь коряс кортамонтень, конась ветявсь Экологиянь регионъютконь конференциянть лувсо.

 

Т.Аксенова

 

Новости

Инжетне содавтовить эрзятнень эрямо коест марто

Мордовия Республикасо Эрзянь культурань ды ремеслань куншкакуронь теемань коряс дизайнерэнь арсемань объектэкс кармась Отяжелесэ пичень чочксто чапозь сокицянь-видицянь семиянь кудось. Сонзэ вакссо анок уш баняськак, кона уштови «раужосто», тунда путневить эмеж марто пандяткак.

Подробнее ...
 
Саранскойсэ панжови приют

Саранскойсэ панжови приют азортомо ракшатнень туртов. Кода пачтясть ошонь администрациясто, ней уш ули тень туртов таркаяк. Панжома шкась – те иень июнь ковс.  Приютонтень кармить кельгеме 100 каткат ды 300 кискат.

Подробнее ...
 
Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...
 
Мордовиянь сехте вадря сувенирт

Декабрянь 22-це чистэ яволявтозельть «Мордовия Республикань туристической сувенир» конкурсонь изницятнень лемест. Истямо пелькстамонть ютавтсть МР-нь Культурань, национальной политикань, туризмань ды архивень тевень министерствась, Туристэнь-информациянь куншкакурось. Конкурсонть вельде эрявсть муемс сувенирэнь сехте вадря продукциянть, тешкстамс производительтнень, кочкамс лия ёнов а молиця сувениртнэнь ды невтемс сынст FIFA-нь болельщикень фестивальсэ.

Подробнее ...