Рубрикатор

Демография Эрямось – те аволь паксянь трокс ютамо…
Эрямось – те аволь паксянь трокс ютамо…

Надежда Васильевна Наумкинанень 89 иеть, чачсь сон Кочкурова ёнксонь Семилейсэ. Тесэ ютась вачочиде пешксе эйкакшпингезэ, тесэ вастовсь вечкевикс мирдензэ марто, чачсть вете эйкакшонзо, тесэ вастызе сыречинзэ. Семилейсэ кортыть, Надежда Васильевнань кондямо превей, кеме обуця, эрямонть содыця ава сынст велесэ ней уш эзь кадово, сон – «войнань эйкакш», ламо вийть путсь войнадо мейле масторонть кепедемантень, авась сон пек превей, эрьва кодамо тевс чарькодиця. Неть читнестэ минь якинек инжекс Надежда Васильевнанень. Сон покш мельсэ ёвтнесь тенек эрямо кидензэ, сеть кеняркстнэде ды стакачитнеде, конатнень савсь печтямс тензэ эрямонзо перть:

Мон чачинь 1928 иень июнень 13-це чистэ. Тетям, Василий Николаевич, ульнесь конюхокс, вейкеяк буква эзь сода. Авам жо, Акулина Сергеевна, вейке ие тонавтнесь попонь школасо. Сон пек превеель, эрямос чарькодицяль. Авам лиссь «середняконь» семиясто. Сонзэ ульнесть ниле братонзо, колмотне эйстэст прядсть институтт, важодсть математикань тонавтыцякс. Весе сынь маштовсть войнасо, – ёвтни семиядонзо Надежда Васильевна.

Састо мольсь велень эрямось. Василий Николаевич ды Акулина Сергеевна чачтсть вете эйкакшт, бажасть кастомс сынст алкуксонь ломанекс. Ансяк валдо мельтнень вандынь чинть коряс сезинзе войнась.

Июнень 22-це чистэ минь ялган марто ульнинек станциясо. Самай тосо маринек: кармась войнась. Куш ульнинек эйкакшокс, ялатеке чарькодинек те валонть зыяновчинзэ. Кудов сынек, авардтяно. Сестэ велесэнть арасель кодамояк радио. Кочкурвелестэ алаша лангсо ласте сась цёра ды ёвтась войнанть ушодовомадонзо. Ды уш кавто цёранень кандсь повесткат. Сынст саизь войнав валске ранаяк, – ледстни авась. – Тетям тусь фронтов 1941 иень сентябрянь 7-це чистэ. Сынь эдь а содыльтькак, кода ружиянть кирдемс. Роботасть сестэ паксясо-косо. Нейгак сельмень икеле ашти се чись, зярдо тетям тусь войнав. Кудозонок пурнавсть роднянок-раськенек, весе авардить... Тетям мерсь аванень: «Куля, эйкакштнень трить, илить максо эйкакшонь кудов, а Надя кадык тонавтни. Сонзэ эйстэ лиси пек паро ломань».

Акулина Сергеевна кадовсь ськамонзо вете эйкакш марто. Мирдензэ маштовомадо повесткась сась 1942 иень мартсто. Василий Николаевич чавовсь Смоленскоенть ало. Зяро ризкс савсь печтямс сеть иетнестэ: эйкакштне эзть сода пекень пешкедема, якасть пельсштапо ды пек учость Изнямонть.

Войнань иетнестэ авам зярыя иень перть важодсь почтальонкакс. Сон букватнень содылинзе, ловномо ды сёрмадомо маштыль. Се шкане аламонь кинь ульнесть истят содамочист. Авам саилимизь патянь марто кавто кедьпева ды истя мартонзо явшинек сёрмат. Кода соват кудонтень, эрьва ломанесь мери: «Дочам, инескеть, ловнык сёрманть». Пачтямонть ловнат: тосо раужо куля. Мон авардян-ранган мартост. Нейгак кирдян мельсэнь 1945 иень тундонь самонть, весе масторось пек кенярдсь войнасо изнямодо кулянть марямсто. Семилейсэ ютавтозель кенярксчинь парад. Монь кармавтымизь валонь ёвтамо. Се кортамосонть пачтинь весе ризксэнть ды талноматнень, конатнень савсь печтямс миненек, войнань эйкакштненень. Пек стакаль шкась, а ёвтавияк. Семилейстэ войнав тусть 429 ломанть, велявтсть – 188, чавовсь  241 ломань. Парадсо кортамом весень седейс токась.

Кемень класстнэнь прядомадо мейле Надежда Васильевна ниле иеть важодсь школасо, тонавтсь вишка классос якицятнень. Теке шкастонть ульнесь комсомолонь организациянь секретарекс.

Эрьва иестэ якилинек учителень конференцияв. Карминь тов пурнамо ды куш авардть: а мезе оршамс лангозон! Сюкпря эсенек велень авантень Федосия Егоровна Жданкинанень. Сон наряжимим прясто-пильгс: макссь тапочкат, платия, прязон мазый паця сюлмась ды ильтимим конференцияв.

Надежда Васильевнань покш путовксозо войнадо мейле иетнестэ безграмотностенть каршо бороцямосонть. Чить школасо важодсь вишкинетнень марто, чокшне жо пурнавильть од цёратне, урьвакстозь атятне, конат састь войнасто, грамотас жо а содыльть. Ды сон, од тейтерька, конась ансяк-ансяк прядсь кемень класст, тонавтсь сынст ловномо, сёрмадомо. Надежда Васильевна лембе вал марто ледстни эштё вейке превс путыцядонзо, конась пек лездась тензэ эрямосонть. Те – Нина Фёдоровна Орешкина.

– Войнань иетнестэ велезэнек сакшность беженецт. Кие соды косто састь. Аванок маштыль рузкс кортамо, секскак Орешкинтнэ сонзэ эйс педязь педясть. Свал чарасть кедьсэнек, авам мейсэ маштсь, лездась тенст. Вейкеяк якстерькаень лопаяк эзть ёмавто: «Акулинушка, арази можна истямо сюпавчи ёмавтомс?! Сонзэ эйстэ лиси пек тантей борщ». Ды кармасть авань марто якстерькаень ямонь пидеме. Нина Фёдоровна васняяк важодсь тонавтыцякс, мейле сонзэ аравтызь РОНО-нь прявтокс. Сон сеске мерсь: мон Надянь а кадса, свал карман тензэ лездамо. Валонзо кирдизе, мон васняяк важодинь школасо, мейле тосто киртимизь ды саимизь роботамо сельсоветэв. Путымизь колхозонь комсомолонь организациянь секретарекс. Мейле карминь тракторонь бригадань старшей учётчикекс. Пенсияв лисемс тосо роботынь.

Н.В.Наумкина ламоксть кочказель депутатокс Семилеень велень советс ды Кочкуровань райононь советс. Теде башка, Надежда Васильевна кемень иеде ламо важодсь райононь судсо народной заседателекс. Те кеме обуця авась свал аштесь видечинть кисэ.

Надежда Васильевна ламо иень перть ульнесь школасо тетянь-авань комитетэнь прявтокс, ламо кевкстемат ды стакачить савсь тензэ витнемс. Видькстась, вишкинестэ улемстэ свал бажась улемс юристэкс эли сёрмадыцякс. Судсо важодемадонть башка, муекшнесь шка сёрмадомантеньгак. Ламо иень перть ульнесь «Эрзянь правда» газетань аволь штатной корреспондентэкс. Сёрмадсь колхозсо молиця тевтнеде, районсо культурань эрямодонть ды ламо мезде лиядо. Ледстизе, васенце гонораронть лангс рамакшнось пальто. Кенярдомантень арасель пе!

Надежда Васильевнань покш путовксозо Кочкурова ёнксонь «Ледстнемань книганть» пурнамосо-анокстамосо.

Н.В.Наумкина комсь иень перть морсесь Семилеень народной ансамблясонть. Хоронть марто ардтнесть весе республиканть келес, кенярдовтсть кунсолыцятнень кода рузонь, истя жо эрзянь моротнесэ.

Надежда Васильевна – трудонь ветеран, казезь Материнствань II степенень орденсэ, Ине Изнямонь медальсэ...

– Эрямо кинть печтямс – те аволь паксянь трокс ютамс, – видькстась Надежда Васильевна. – Ламо стакачить савсь кирдемс. Якинек вачот, пельсштапот… Ней эрямось пек вадря, ёвксонь, ансяк уш иетне ютасть ды шумбрачись лавшомгадсь.

Надежда Васильевна мирдензэ Пётр Ильич марто трясть-кастсть вете эйкакшт. Весе эйкакштненень макссть высшей образования. Николай Петрович – Заслуженной учитель, эри Семилейсэ. Вера Петровна – пеень лециця врач, эри Крымсэ. Валентина Петровна – санитарной врач, эри Пермьсэ, Лидия Петровна важоди страховой компаниясо, эри Семилейсэ. Покш ризкс марто Надежда Васильевна корты Мария тейтерензэ ланга. Сон роботась Семилеень школасо завучокс, ансяк 41 иесэ апак учо сезевсь эрямозо.

Надежда Васильевнань 11 нуцьканзо ды 12 правнуцьканзо. «Сырнень покольнеть», – корты сынст ланга бабаст. Весе сынь превейнеть, вадрясто тонавтнить, паро ёндо невтить эсь пряст важодема таркасо. Сеедьстэ сакшныть инжекс бабаст туртов, лездыть кудоютконь тевтнесэ. Кенярдовтыть изнявкссост ды паро тевсэст!

Т.Аксенова

 

Новости

Плотников: Фермеры смогут жить на своей земле, а не ездить каждый день туда как на работу

 Госдума приняла в первом чтении законопроект, который разрешает фермерам строить дом для себя на своей земле сельскохозяйственного назначения. Законопроект меняет порядок строительства жилых домов в КФХ. Такое заявление сделал координатор партпроекта «Единой России» «Российское село», депутат Государственной Думы Владимир Плотников.

Подробнее ...
 
Андрей Макаров: Проект бюджета гарантирует выполнение государством всех социальных обязательств

    Внесенный Правительством РФ проект бюджета гарантирует выполнение государством всех социальных обязательств. Об этом заявил председатель комитета Госдумы по бюджету и налогам Андрей Макаров в ходе выступления от фракции «Единой России» на пленарном заседании нижней палаты парламента. 

     - Гарантированное выполнение государством всех социальных обязательств - это важнейшая задача бюджета, которую внесенный Правительством проект, безусловно, решает», - заявил Макаров, отметив, что «Единая Россия» вместе с Правительством РФ в рамках нулевого чтения прорабатывала проект бюджета, чтобы решить задачи, поставленные Президентом России Владимиром Путиным. 

        Он обратил внимание на то, что фактические доходы в 2019 году составили 19,969 трлн рублей, превысив прогноз на 22%. «Это показатель того, в каком состоянии находится наша экономика», - отметил парламентарий. 

Подробнее ...
 
Валдонть кисэ – социальной норма

Россиясо тагояк электричестванть кисэ арсеви совавтомс социальной норманть, зярдо кемекстазь лимитэнть велькска ютавтоматнень сави пандомс седе покш тарифень коряс. Минэнергонь ды Минэкономикань сентябрянь 19-це чистэ ютавтозь промкссонть те схеманть кемекстызе вице-премьерэсь Дмитрий Козак. Ведомстватненень жо документэнь проекттнэнь анокстамат 2019 иень якшамковонтень.

Подробнее ...
 
«Од Ривезесь» сы Саранскоев

Мордовиянь прявт ошсо, Саранскойсэ, карми молеме неень шкань хореографиянь «Новая Лиса – 2018» Раськеютконь VII фестивалень-конкурсонь Гала-концертэсь. Те мельстуиця мероприятиянть ютавтомс лезды РФ-нь Театральной деятелень вейсэндявксось.

Подробнее ...
 
Василий Пискарев принял участие в проведении тренировки по гражданской обороне

С 1 по 3 октября в соответствии с поручением Правительства РФ на территории всей страны прошли тренировки по гражданской обороне. Председатель Комитета Госдумы РФ по безопасности и противодействию коррупции Василий Пискарев в ходе региональной недели посетил завершающий третий этап Всероссийской тренировки, который прошел в мордовской столице.

Подробнее ...