Рубрикатор

Демография Н.А.Котлова: «Кедьстэст ули мезес тонавтнемс»
Н.А.Котлова: «Кедьстэст ули мезес тонавтнемс»

Виде валмеревксэсь: ломанесь уцяскав сестэ, зярдо сон седейшкава моли важодеме, седеяк покш мельспарозо – кудов самось. Паро, бути тосо учить сехте малавикс ломанензэ, конат свал анокт кенярдозь вастомс. Те уцяскась эрси ков седе покш, косо ояксчисэ трявить-кастовить ламо эйкакшт. Кода эрси эрямосонть, ламо эйкакшонь триця семиясо касыть аволь кольницят, тетяст-аваст мелень ваныцят. Сынь бажить эрьва тевсэ лездамс малавиксэст туртов, анокт явомс леляст-сазорост марто сень, мезесь сынст туртов эрси сехте питнеекс.

 

Минек республикасо покш мель явови ламо эйкакшонь триця семиятненень. Кеменьшка иеде икеле кемекстазельть ламо эйкакшонь триця авань I, II ды III степенень Почётонь дипломт. Кенярксчитнестэ сынь тердевить Республикань Кудов, косо тенст максовить Почётонь дипломт ды питней казнеть. Кемень иень перть дипломт ды ярмаконь премият максозельть 400 ламо эйкакшонь триця аватненень, косо трявить-кастовить вете ды седе ламо эйкакшт. Истямо промкстнэсэ ламо эйкакшонь триця аватне видьстэ ёвтнить стакачидест, а виздить кевкстемс сехте эрявикстэнть. Истя, ламот сынст ютксто паролгавтызь эрямо таркаст, тенст максовсть автомобильть, ёроков эйкакштненень – музыкальной инструментт. Ламо эйкакшонь трицятне покш мельспаросо вастызь семиянь койтнень-кирдатнень ванстомаст, паро эйкакшонь кастомаст кисэ «За заслуги в воспитании детей» МР-нь Прявтонь Почётонь дипломонть кемекстамонзо.

Комсь иеде теде икеле Мордовиясо теезель «Семья» ламо эйкакшонь трицянь вейсэндявксось, конань прявтсо кармась Н.А.Котлова. Тешкстасынек, сон истя жо ламо эйкакшонь триця-кастыця ава. Течи Надежда Алексеевна – минек редакциянь инже.

Надежда Алексеевна, инескеть, пачтядо, течи зяро семият совить тынк вейсэндявксонтень ды кодат ульнесть васенце эскелькстнэ?

– Васенце эскелькстнэ ульнесть пек стакат, минек вейсэндявксонть пурнамось прась вейксэньгеменце иетнес. Кода содатано, се шкане ломантне цидярдсть покш стакачить, нама, сехте пек майсесть ламо эйкакшонь трицятне. Паряк, неть стакачитне кармавтызь се шкане ламотнень совамс «Семья» вейсэндявксонтень. Васня сон ульнесь ошонь, шкань ютазь, вийтнень пурназь, теевинек республиканскоекс. Тенень тувталось – кармасть тенек пшкалеме лезкс мельга аволь ансяк Саранск ошонь эрицятне, седеяк пек районтнэсэ ды велетнесэ эрицятне.

Ледстневи, пурнавтано вейсэ ды арсетяно, кие карми весень туртов кшинь панеме. Вишкалгадозь оршамопельтнень ды карсемапельтнень вейке-вейкенень максомо тонадынек васень иестэнть. Койсэнь, ламо эйкакшонь триця семиятнень пельде свал ули мезес тонавтнемс. Течи минек вейсэндявкссонть котосядто ламо истямо семият. Тень лангс апак вано, улить ламо семият, конат а совить вейсэндявксонтень,  лезкс мельга жо пшкалить свал.

Надежда Алексеевна, республикань кодамо районтнэсэ ламо эйкакшонь триця семиятнеде седе ламо?

– 2017 иень ванкшноматнень коряс, республикасонок лововить 5604 ламо эйкакшонь триця семият. Покш семият эрить Саранскойсэ, Рузаевкасо, Зубова-Полянасо, Ковылкинасо. Сехте покш семиясь, косо трявить-кастовить 19 эйкакшт, Темникова ёнкссо, 13 юткстост – саезь. Те семиясь  – Александр ды Елена Висюлькинтнэнь. Минь аволь весть содавтынек сонзэ. Эйкакштне малав весе ёроковт, аволь весть лиснесть изницякс райононь ды республикань эрьва кодамо пелькстамотнесэ. Кода а ледстямс Орданьбуесэ эриця Володинтнэнь семиянть, косо эсест эйкакштнень марто истя жо улить трямс саезь эйкакшт. Сынь свал невтить ёрокчист республикань «Шумбрат, Мордовия!» фестивальсэнть.  Аваст, Надежда Ильинична, машты парсте кодамо, викшнеме ды ламо лия тевень тееме, мезес  тонавты весе эйкакшонзо.

Надежда Алексеевна, Тынк вановтонк коряс, сатышка-аволь лезкс максови минек республикасо ламо эйкакшонь триця семиятненень?

– Койсэнь, минек республикасо ламо эйкакшонь триця семиятненень аволь вишкине мель явови. Теевсь коекс, эрьва иестэ Инечиде икеле семиятненень, конат печтить стакачить, явови ярмаконь лезкс. Сеть семиятненень, косо трявить-кастовить ниле ды седе ламо эйкакшт, истя жо ськамост эйкакшонь триця аватненень эрьва эйкакшонть лемс максови 800 целковоень покшолмасо вешкань пособия. Минек республикасо истямо семиятнеде 1400. Истя жо Од иень кенярксчинтень явовить казнеть эйкакштненень. Тонавтнемань од иенть ушодовомсто тагояк максови материальной лезкс сеть семиятненень, косо трявить-кастовить ламо эйкакшт. Истя, сентябрянь 1-це чиденть икеле МР-нь Прявтонть пельде ламо эйкакшонь триця семиятненень эрьва эйкакшонтень явови омбоце пель тёжат целковойть школав якицятнень туртов сехте эрявиксэнть рамамс.

Мордовиясо тевс нолдави республикань авань капиталось, конась максови колмоце ды седе ламо эйкакшонь чачомсто. Сонзэ покшолмазо эрьва иестэ кастови. Неень шкане 125 тёжат целковойть максовить колмоце эйкакшонь чачтомань эли трямс саеманть кисэ, 150 тёжат – нилеце, 187 тёжат – ветеце ды седе ламо эйкакштнень кисэ. Тень пингстэ авань капиталось пандови чачозь эрьва эйкакшонтень.

Содазь, ламо эйкакшонь триця семиятненень стака эрси эрямо таркань коряс, сынст а свал сатыть ярмакост седе покш квартирань идемс. Сеедьстэ-аволь тынк вейсэндявксос пшкалить истямо кевкстема марто?

– Алкукскак, сеть семиятнесэ, косо вешкасто трявить-кастовить колмо ды седе ламо эйкакшт, аволь весенень ули сатышка тарка. Лия тев, зярдо покштне венчить-урьвакстыть, а вишкинетне эрить эште тетяст-аваст марто. Нама, сестэяк, покш семиясо касозь-кепетезь, эйкакштнень а свал улить ярмакост эсест эрямо таркань рамамс. Миненек, «Семья» ламо эйкакшонь триця вейсэндявксонтень, сеедьстэ пшкалить эрямо таркань рамамс эли кудонь путомс безвозмездной субсидиянь коряс. Вейсэ мартост анокстатано весе эрявикс документтнэнь, сёрмадтано сёрмат республикань прявттнэнень. Паро, минек энялдоматнень вановттомо а кадныть. Тень кисэ покш сюкпря ёвтатано МР-нь Прявтонь тевтнень нурька шкас топавтыцянтень В.Д.Волковнень ды МР-нь Правительствань Председателентень В.Ф.Сушковнень.

Койсэнек, Мордовиясо шкастонзо максозель ламо эйкакшонь трицятненень эрямонь условияст паролгавтомань лезксэсь. Сонзэ пингстэ эрямо таркань идемс колмоце эйкакшонть чачомсто уликс кредитэнть  эйстэ 30 проценттнэ пандовить, нилеценть – весемесь.

– Неень шкане эрямось а шожда, ды а мезть сёпомс, зярс эште улить истямо покш семият, косо тетятне-аватне чалгасть нолажа килангс, истямотненень лезкс макстадо?

– Алкукскак, трудонь вечкиця, ламос бажиця покш семиятнень вакссо улить истяткак, конат кодамо-бути эрямонь тувталонь коряс кармасть ветямо апаро эрямо. Кода ней тенст мерить, аволь благополучной семият. Сынь истя жо сакшныть тенек эрьва кодамо энялдома марто. Ков сатыть виенек, минь лездатано. Невтемакс, ули лавканок, ков сайтяно эрицятнень пельде кандтнезь оршамопельть, карсемапельть… Сынст питневтеме макстано нужасо эриця семиятненень.

Надежда Алексеевна, Тынь сеедьстэ яксетядо иневанькс таркатнева, кинь васняяк мартонк  сайтядо ды ков арсетядо молемс те иень кизна?

– Минек вейсэндявкссонть теевсь коекс иневанькс таркатнева якамось. Ютынек Мордовиянь малав весе монастыртнень, сеедьстэ эрсетяно Зубова-Полянань ёнкссо Покров Селища велесэ тейтерь-авань Свято-Варсонофиевской, Рузаевка ёнкссо Пайгармань Параскево-Вознесенской тейтерь-авань монастыртнесэ. Сайнетяно мартонок ламо эйкакшонь триця семиятнестэ весень, кинь ули мелезэ.

Минь аволь весть ардтнинек «Золотое кольцо» туристэнь маршрутканть, ульнинек Крымсэ, Санкт-Петербург ошсо, Свято-Успенской Псково-Печерской ды Свято-Троицкой Сканов тейтерь-авань монастыртнесэ. Маласо шкасто арсетяно молемс эсенек Мордовиясо уликс Санаксарской цёрань монастырев. Кемтяно, неть паро ушодкстнэ поладовить икелепелевгак.

 

В.Юдина

 

Новости

Сюкпрянь валт

Мордовия Республикань Прявтонть Владимир Волковонь лемс сась благодарность Адмирал Ушаков эскадрань миноносецэнь командирэнть Игорь Никитинэнь пельде. Мордовия Республикань подшефной миноносецэнь экипажонь прявтось республикань руководителентень ёвтась сюкпрянь валт военной моряктнень эрямост ды бытэст коряс мелявтоманть кисэ.

Подробнее ...
 
Сайсть медальть

Аволь умок Московсо ютавтозель «Сырнень сёксь» 19-це весероссиянь агропромышленной выставкась. Тосо эсь продукцияст невтизь Мордовиянь комсте ламо велень хозяйствань предприятиятне. Вана «Хорошее дело» агрогруппась тов усксесь «Мечта» ды «Юбилейное» кавто предприятиятнень продукцияст.

Подробнее ...
 
Апандыцятнень лангс – судс

Саранскойсэ поладовить важодематне жилищно-коммунальной услугатнень кис апандыцятнень марто. Сынст лангс каявить яволявтомат судс. Истя, ошонь Ленинской районсонть судс максозь 1160 искт 56 миллиондо ламо целковойс. Течинь чине эйстэст пандозь малав 2 миллионт целковойть. Кемекстазь 52 договорт долконь реструктуризациянть лангс. Теке марто 116 квартиратнесэ керязь электроэнергиясь.

Подробнее ...
 
Кода уштовить кудотне?

Саранскоень мэрэнть кедьсэ промкссонть кудотнень уштоманть коряс кевкстемась кармась сехте пштикс. Администрациянь прявтонь васень полавтыцянть, Ошонь хозяйствань департаментэнь директоронть Алексей Егорычевень валонзо коряс, Саранскойсэ ламо квартирас весе кудотнесэ ули лембесь. Ансяк улить мелявкст зярыя стояктнень коряс, кевкстемась решави.

Подробнее ...
 
Вадрятнень ютксо

Политикань ды экономикань коммуникациятнень агентствась нолдась РФ-нь субъекттнэнь прявттнэнь рейтинг. Сентябрянь цётамотнень коряс Мордовиянь Прявтось Владимир Волков совась вадря губернатортнэнь юткс ды саизе 19-це тарканть. Меельце ковонть перть сон кемекстызе те тарканть кавто пунктс.

Подробнее ...