Рубрикатор

Демография Карензэ содасызь масторонть келес
Карензэ содасызь масторонть келес

Покш Березник ёнксонь Дягилёвка велесэнть неень шкане эрить Ине Отечественной войнань кавто ветерант, вейкесь эйстэст – Николай Григорьевич Никитин. Тедеде сонензэ топодить 90 иеть.

 

– Мон чачинь Покш Березник ёнксонь Кузым велесэ. Семиянок покшоль. Вадрясто, сэтьместэ эринек войнадо икелень иетнестэ. Кияк эзь учо истямо покш зыян, конась сезинзе весе меленек-арсеманок вандынь чинть коряс. Ятонть эйстэ тиринь масторонть идеме туинь аволь тердемань, эсень мелем коряс. Лелям ульнесь лётчикекс, 1942 иестэ маштовсь. Кодамо ризкс кирдинек сонзэ коряс! Зяро сельведть валсь авам! Лелянь маштовомадонзо мейле монь чачсь покш бажамом улемс лётчикекс. Ансяк тень туртов эрявсь тонавтнемс. Тетянь-авань пельде салава (сынь эзть кунсолояк эйсэнь) туинь  Куйбышевань областев, тосо Красный Кут станциясо ульнесь Катченской воздушно-авиационной училища, – ледстни Николай Григорьевич. – Пачкодинь тов поезд прясо, ярмакон билетс арасельть. Те ульнесь 1944 иень августонь 3-це чи. Нейгак кирдян мельсэнь, кодамо покш мель марто молинь училищантень. Тосо кармавтымизь медкомиссиянь ютамо. Сталмом ульнесь 40 килограммат, сэрем – метра ды пель. Кие истямо невтевкс марто сайтянзат лётчикекс?! Совинь училищань прявтонтень, генерал-майоронтень Семёновнень. Вадрясто мартонзо кортынек, ды августонь 4-це чистэнть уш карминь солдатокс. Мон кандынь службам запасной авиационной ветеце полксонть, минек взводось ванстсь Куйбышевань областень секретной авиазаводонть, косо кирдевсть боеприпаст.

Н.Г.Никитин ледстни се тевенть, кода заводонть велькска ливтнесь ятонь самолётось, ансяк солдаттнэ сонзэ куроксто редизь ды эзизь нолда боеприпастнэс. Тень кисэ Николай Григорьевич казезь «За отвагу» медальсэ.

Войнанть прядовомадонзо мейле Николай Григорьевич велявтсь тиринь велев. Сон вейкеяк чи эзь аште тевтеме, сеске мольсь важодеме колхозов. Се шкастонть топавтовсь пертьпельксэнь вадрялгавтомань коряс Сталинэнь планось – эрьва кува озавтнесть чувтот, куракшт, тейнесть сёлтт. Н.Г.Никитин сайсь мель тонавтнемс агролесмелиораторокс. Прядызе Ицялонь училищанть. Тонавтнесь покш мельсэ, кавто иеть важодсь те специальностенть коряс. Кузыменть маласо озавтозь малав весе чувтотне – те сонзэ вийсэ. Теде мейле Н.Г.Никитин Орданьбуесэ тонавтнесь комбайнерокс. Важодсь эсест районсо, истя жо Саранскоенть маласо колхозтнэсэ: Монастырскойсэ, Макаровкасо, Зыковасо, Блохинасо, Берсеневкасо ды лиясо. Сюронь пурныцятнень ютксо ютавтозь пелькстамотнесэ зярыя иень перть сайнесь васенце ды омбоце таркат.

– Школасо прядынь ансяк кото класст. Покш мельсэ роботынь комбайнерокс, ансяк ульнесь покш мелем поладомс тонавтнеманть. Ды 25 иесэ молинь тонавтнеме Мокшалеень средней школав, кавксоце классос. Велестэнть сыргинек ветенек, ютксост сехте покшолинь. Школасо тонавтнемстэ весе чийнесть минек классос, теке идем ракша лангс вансть лангозон, – пейдезь ледстни од шканть Николай Григорьевич.

Пенсияс лисемс Николай Григорьевич важодсь школасо тонавтыцякс, сонзэ пек ламо эрьва кодамо казнензэ, алкуксокс топавтсь эсь тевензэ. Сень лангс апак вано, малав весе пингензэ перть сон эри Дягилёвкасо, содасызь сонзэ Мордовиянть томбалеяк. Содавиксчинть кандызе тензэ карень кодамось. Зярдо-бути картне ульнесть велень эрицятнень пильгс вейкине карсемапелекс, неень шкане жо сынь вастневить пек чуросто, аламо кадовсть карень кодамо маштыцятнеде. Дягилёвка велень мастерэсь те тевенть топавты покш вечкема марто, путы тенень весе шкинеманзо-ёрокчинзэ. Н.Г.Никитинэнь картне содавикст масторонь келес. Ветеранось казинзе эсензэ карензэ содавикс спортсментнэнень ды политиктненень.

– Мон казинь карть боксонь коряс мирэнь чемпиононтень Олег Маскаевнень, – ёвтнесь Николай Григорьевич. – Монень пек вечкеви те спортсменэсь. Зярдо сон изнизе чемпиононь карксонть, мон Мордовиянь делегациянть марто якинь Московов, «сэрединь» кисэнзэ. Истя жо чувтонь конькат казинь фигурной кирякстнемань коряс ине тренерэнтень Тамара Москвинанень. Маринь, сон кирди сынст неявикс таркасо. Те монень пек мельспаро. Зярыя иеде икеле Дягилёвкав сакшнось минек республикань икелень Прявтось Николай Меркушкин. Минек велень весе эрицятнень пельде истя жо казинь тензэ карть. Сынь сонензэ пек мельс тукшность, ансяк теде мейле куроксто тусь Самарав, – пейди ветеранось. – Мон истя жо кодынь карть минек Президентэнть В.В.Путинэнь туртов, сынь косо-бути музейсэ ванстовить.

Сочисэ телень Олимпиададонть икеле ветеранось кодась ламо карть минек чемпионтнэнь туртов. Веенстнэ – сокссо кирякстнемань коряс олимпийской чемпиононтень Александр Легковнень, сонзэ туртов анокстакшнось чувтонь сокс марто карть.

Николай Григорьевич истя жо анокстась казне олимпийской чемпиононть Александр Овечкинэнь туртов. Тешкстызе, хоккеистэнть туртов кодась покш карть – цёраськак эдь аволь вишкине! Картнень вейсэндинзе чувтонь конькатнень марто. Пек мазыйть лиссть! Сынст эйсэ алкукс мереви кирякстнемс.

Николай Григорьевич топавтсь эштё вейке покш тев – ванкшнызе-тонавтнизе Никитинтнэнь раськень историянть, велесэ тенст мерить кудолемсэ – «Сегинькат».  Никитинэнь сюпав раськенть ютксо ламо ёроков ломанть, вейкесь эйстэст – Николай Григорьевич. Сон машты аволь ансяк карень кодамо, весе ёнкссонть шныть эйсэнзэ кода каштомонь пек вадрясто вачкицянть. Покш Березник ёнксонь малав эрьва кудосонть каштомотнень эсь шкастонзо вачкакшнынзе Н.Г.Никитин, те шкас сынь пек парсте аштить.

Дягилёвкасо Никитинтнэнь кудост – велень сехте мазый таркась. Сон ашти кавто этажсто, ушо ёндо мазылгавтозь артовкссо-керсевкссэ. Кудонть тарказояк пек вадря – леенть чиресэ. Эрить Николай Григорьевич нинзэ Надежда Михайловнань марто кавонест. Сеедьстэ инжекс тенст сакшныть нуцькаст-эйкакшост. Сынь свал лездыть эрьва мейсэ тетяст-аваст, покштяст-бабаст туртов: ускить ярсамопельть, надобият, ванськавтыть кудонть.

Изнямонь чинть кувалма ёвтатано Николай Григорьевичнень покш поздоровт. Арсетяно кеме шумбрачи ды ансяк вадря мельть-арсемат!

 

Т.Аксенова

 

Новости

Чувашиясто – казне марто

 

Мартонь 24-це чистэ И.Я.Яковлев лемсэ Чувашиянь государственной педагогической университетсэ ютась этнопедагогикань ды поликультурной образованиянь коряс студентэнь Весероссиянь олимпиада. Сон алтавсь РАО-нь академикенть Г.Н.Волковонь 90 иетненень.

Подробнее ...
 
Од ломанень ассамблея

 

Мордовия Республикасо теезь «Молодежная Ассамблея народов России «МЫ – РОССИЯНЕ» Общероссийской общественной движениянь региональной отделения. Республикасонть од ломанень движениянь теемась карми общероссийской гражданской идентичностень формированиянть коряс ушодкстнэнень, раськетнень ютксо ояксчинь кемекстамонтень ды  межкультурной вейсэнь важодеманть келейгавтомантень лездамонь площадкакс.

Подробнее ...
 
Диктантось – эрявикс тев

Те иень апрелень 8-це чистэ Саранскойсэ малав 400 ломантне кармить «Тотальной диктантонь» участникекс. Мероприятиянь ютавтомань меленть шнызе Мордовиянь Прявтось Владимир Волков.

Подробнее ...
 
Сценанть лангсо Ицялбуесь...

 

Неть оймсема читнестэ Республикань Культурань Кудосо ютасть «Шумбрат, Мордовия!» народной творчествань фестивалень меельце концерттнэ. Кадовсь ансяк Гала-концертэсь, кона карми декабрянь 11-це чистэ. Сценанть лангс лиснесть Ицялбуень, Ковылкина ёнксонь ды Саранск ошонь округонь артисттнэ.

Подробнее ...
 
Мамаева омбоце

 

Ноябрянь васенце пельксстэнть евтазельть Россиянь республикатнень государственной кельтнень коряс школасо тонавтницянь ды студентэнь Весероссиянь васенце олимпиадань итогтне.

Подробнее ...