Рубрикатор

Демография Кода эри Судосевась?
Кода эри Судосевась?

Покш Березникбуень Судосева велесь васенцеде ледстяви «Список населённых мест Симбирской губернии» 1604 иень актонь документтнэсэ. 1913 иень сёрмадстоманть коряс, тесэ эрясть ниле тёжадо ламо ломанть. Ульнесть кавто церьковат, часовня, церковно-приходской школа. Те веленть марто эсь эрямонзо сюлмакшнызе рузавась Валентина Семёновна Серова.  

Сон – композиторонть ды музыкань критикенть А.Н.Серовонь низэ ды содавикс художникенть-реалистэнть В.А.Серовонь авазо. Те ломанесь ламо лездась Судосевань эрицятненень, конат сэредсть ды кулсесть вачочиденть. Эсензэ ды ялганзо ярмактнень лангс рамсесь медикаментт, почтт ды лия мезть. Лецясь покштнень ды эйкакштнень. 1892 иестэ панжсь Судосевасо урозонь кудо (велень эрицятне сонзэ лемдясть питомникекс). Тесэ уроз эйкакштнень ды кажовсто эрицятнень эйдест андсть ды тонавтсть ловномо, сёрмадомо. Серова терявтнесь путнемс музыкань пьесат, пурнась велень театра. Сон топавтсь ламо паро тевть. Мейле шкатне полавтовсть, сонзэ лангс кармасть кайсевеме черносотенецтнэ. Авантень савсь туемс.

Кода неень шкане эри Судосевась? Теде миненек ёвтни Судосева велень поселениянь прявтонь полавтыцясь Тамара Николаевна Потапкина.

– Минек велентень совавтозь Гарт шабра велесь. Судосевасо эрить 387 ломанть, Гартсо – 113. Кудотнень эйстэ ламот – дачань. Седеяк ламо сындест Гартсо. Ули основной школанок. Тонавтнить Судосевань, Кузымень, Дегилевкань, Гартонь эйкакштне. Ды весемезэ ниле велетнень эйстэ пурнавсть ансяк 30 ломанть. Минек велесэ улить ламо эйкакшонь триця кавто семият. Курдюшкинтнэнь вейксэ эйкакшост, Пантелейкинтнэнь – сисем. Меельце семиясь кирди крестьянонь-фермерэнь хозяйства.

Велесэнек 23 скалт, те, ловтано, ламо. Кой-кить кирдить кавтонь-кавтонь скалт. Ловсонть микшнить эсенек велева, колмо литрань банканть питнезэ 100 целковойть. Гартсо 5 скалт. Скалонть кирдемс-трямс, содазь, аволь шожда, эрявить ламо вийть.

Од ломантне важодить Атемаронь нармунень фабрикасо, эйсэст тов усксить. Колхоз умок уш арась. Улить кавто лавкат, фельдшерэнь-акушерэнь пункт, библиотека, культурань кудо, церькова.

Судосевась пелезэ рузонь, пелезэ – эрзянь. Ней уш, нама, весе човорявсть. Эрзякс кортыть ансяк сыре ломантне.

Судосевасо эрьва ие келейстэ тешкстыть сёксня сыре ломанень ковонть. Пурнавить ветерантнэ, сыре ломантне, пенсионертнэ. Те кенярксчинтень сакшныть райононь прявттнэ. Истямо вастовомасонть ванновить талновтыця кевкстематне, энялдоматне. Нама, невтеви седеень эждиця концерт. Сонзэ анокстыть школасо тонавтницятне ды райононь культурань кудонь артисттнэ. Мейле весе тердевить столь экшс. Атятне-бабатне пек учить те кенярксчинть. Ютазь те покшчисэнть казизь велень ветеранонь советэнь председателенть Агаткин Иван Михайловичень. Сонензэ макссть «Дети войны» медаль.

Велень эрицятне вечксызь Авань чинть. Кенярксчинтень тердевить ламо эйкакшонь триця аватне. Сынст туртов ютавтыть конкурст, каванить чайде.

Учить те велесэнть Маень 9-це чинть. Эрьванть, кинь ули мелезэ, юты вейсэнь парадсо. Паро коекс теевсь «Бессмертный полк» портрет марто ютамонь акциясь.

Теде башка, Судосевась эрси Покш Березникбуень Райононь чисэнть. Эрьва велесь аноксты выставкат, невтить раськень ярсамопельть. Судосевасто усксить прякат, пачалксеть, позань салведь. Сехте неявикс таркас ладясызь топо марто рестазь прякинетнень. Те велесэнть сынст пек вечксызь.

Эрьва ие «Шумбрат, Мордовия!» раськень творчествань республикань фестивальсэ эсь прянзо невтни культурань кудонь прявтось Николай Фёдорович Чудайкин. Сон – содавикс гармонист.

Велень библиотекань прявтокс аволь умок кармась важодеме Ольга Ивановна Серова. Валонзо коряс, книга мельга сакшныть школань тонавтницятне ды сыре ломантне. Эйдетне сайнить классиканть, а вана седе покштне вечкить ловномо детективть ды военной тематикань коряс книгат. Библиотекаресь свал лезды муемс эрявикс книганть. Ней библиотекатнес а пачколить од книгат. Секскак кой-кить тукшныть эсест книгаст ды кадныть, казить эйсэст.

Судосевасо престольной кенярксчись – Покровось. 2008 иестэ тесэ панжозель Покровонь церьковась. Тей сакшность ламо покш инжеть. Сонзэ стявтомс лездась содавикс землякось В.И.Гришин. В.И.Гришин – политической ды экономической деятель, Г.В.Плеханов лемсэ Россиянь экономической университетэнь ректор. Сондензэ башка, Судосевасо чачсть велень хозяйствань наукань докторось, профессорось, РАЕН-нь академикесь А.И.Бальцанов, учёноесь Е.И.Гусева-Першина, дипломатось В.К.Руненков ды лият.

Велесэнек ули газ, водопровод. Улить весе условиятне. Пек кемтяно, сыть тенек эрицят. Велень ёмамось а ёвтавияк, кода ризнэвти.

Кортамонть сермадызе

Т.Маторкина

 

Новости

Чувашиясто – казне марто

 

Мартонь 24-це чистэ И.Я.Яковлев лемсэ Чувашиянь государственной педагогической университетсэ ютась этнопедагогикань ды поликультурной образованиянь коряс студентэнь Весероссиянь олимпиада. Сон алтавсь РАО-нь академикенть Г.Н.Волковонь 90 иетненень.

Подробнее ...
 
Од ломанень ассамблея

 

Мордовия Республикасо теезь «Молодежная Ассамблея народов России «МЫ – РОССИЯНЕ» Общероссийской общественной движениянь региональной отделения. Республикасонть од ломанень движениянь теемась карми общероссийской гражданской идентичностень формированиянть коряс ушодкстнэнень, раськетнень ютксо ояксчинь кемекстамонтень ды  межкультурной вейсэнь важодеманть келейгавтомантень лездамонь площадкакс.

Подробнее ...
 
Диктантось – эрявикс тев

Те иень апрелень 8-це чистэ Саранскойсэ малав 400 ломантне кармить «Тотальной диктантонь» участникекс. Мероприятиянь ютавтомань меленть шнызе Мордовиянь Прявтось Владимир Волков.

Подробнее ...
 
Сценанть лангсо Ицялбуесь...

 

Неть оймсема читнестэ Республикань Культурань Кудосо ютасть «Шумбрат, Мордовия!» народной творчествань фестивалень меельце концерттнэ. Кадовсь ансяк Гала-концертэсь, кона карми декабрянь 11-це чистэ. Сценанть лангс лиснесть Ицялбуень, Ковылкина ёнксонь ды Саранск ошонь округонь артисттнэ.

Подробнее ...
 
Мамаева омбоце

 

Ноябрянь васенце пельксстэнть евтазельть Россиянь республикатнень государственной кельтнень коряс школасо тонавтницянь ды студентэнь Весероссиянь васенце олимпиадань итогтне.

Подробнее ...