Рубрикатор

Демография Н.Б.Миронова: «Прявт тевем – лездамс велень эрицятненень»
Н.Б.Миронова: «Прявт тевем – лездамс велень эрицятненень»

 

Чаунза ёнксонь Покш Маризь велентень тедеде топодсть 465 иеть. Уш седикелень шкатнестэ те велень эрицятне эзть майсе нужачиде, эзть печтя вачочи, эсест вийсэ андсть семияст: видсть сюро, кснав, анокстасть канстень ой ды истя седе тов. Нама, Покш Маризь велень эрицятненень савсь печтямс покш стакачитькак, ламо ризкст кандсь Ине Отечественной войнась. Ансяк эрзянь велень эрицятне зярдояк эзть нолдтне лавтовост ды весе вийтнень путозь печтясть уликс стакачитнень.

 

Аволь умок минь ульнинек Покш Маризь велесэнть. Эрзянь те веленть эрямодонзо, изнявкстонзо ды стакачитнеде ёвтнесь тенек велень администрациянь прявтось Н.Б.Миронова. Сонсь Надежда Борисовна чачсь-кассь шабра Покш Ремезёнка велесэ. 1977 иестэ прядызе Ицялонь педучилищанть ды сась важодеме Покш Маризь велень средней школав. Кемголмово иень перть ульнесь школань тонавтыцякс, теде мейле 20 иеть важодсь эйдень кужосо. 2008 иестэ Надежда Борисовнань аравтызь Покш Маризь велень администрациянь прявтокс. Топавты неть тевтнень омбоце тердема.

– Надежда Борисовна, зяро ломанть эрить велесэнк?

– Минек администрациянтень совить колмо велеть – Покш Маризесь, Огаревкась ды Сырятинась. Покш Маризь велесэ тешкстазь тёжадо ламо ломанть. Пек кенярдовты, тесэ улить од семияткак. Мельспаро кирдтяно сень коряс, университетэнь прядомадо мейле од ломантне сыть важодеме эсест велес. Ламот роботыть «Рассвет» ООО-сонть. Неть: Е.А.Тумайкин агрономось, С.Н.Мамайкин зоотехникесь, А.Н.Зотов прявт агрономось. Пек мельспаро сень коряс, омбоце ие Маризь велень средней школань прявтокс важоди Сергей Владимирович Терёшкин. Сон чачсь-кассь эсенек велесэ, вузонть прядомадо мейле велявтсь тиринь ёнксов ды важоди школань прявтокс. Эряви тешкстамс, роботантень кундась покш бажамо марто, каштанчи кирдтяно кисэнзэ. Неень шкане вети физкультурань урокт.

Кенярдовты сеяк, велес эрямо кадовить ламо од семият, стявтыть тезэнь кудот. Неть: Гранцовтне, ламо эйкакшонь триця-кастыця Новиковтнень семиясь, сынст колмо эйкакшост: кавто цёрат ды тейтерь. Истя жо ламо эйкакшонь кастыця Борисовтнень семиясь, сынь тедеде кармить совамо од кудос. «Устойчивое развитие сельских территорий» программанть коряс од кудо истя жо стявтсь Фокинтнэнь семиясь.

– Надежда Борисовна, косо роботыть велень эрицятне?

– Велесэнек ули «ООО «Рассвет»  велень хозяйствань предприятиясь. Тосо роботыть весемезэ 93 ломанть: механизаторт ды ракшатнень мельга якицят. Ламо важодицят тов сакшныть лия велетнестэяк. Невтемга, скалонь потявтыцятнеде тосо 11 ломань, ансяк кавтотне Маризь велестэ. Истя жо улить саразонь кирдемань площадкат. Вейкесь уш ушодызе тевдееманзо, эштё вейке строить Сырятинанть ваксс. Неень шкане Московов важодеме ардтнить велестэнть ансяк колмо ломанть. Меельцетне весе велявтсть тиринь ёнксов, эдь «Рассветсэяк» пандыть пек вадря зарплата, сехте аламось – те 20 тёжат целковойть.

– Ёвтнеде, инескеть, Покш Маризь велень инфраструктурадонть.

– Велесэнек ули средней школа. Тосо тонавтнить аволь ансяк эсенек велень эйкакштне, истя жо Пянгелеень, Мокшалеень ды Вишка Маризь велень. Весемезэ 54 тонавтницят. Тедеде школаст прядызь 4 эйкакшт, васенце классос мольсть 10, весе эсенек велень.

Тесэ важодить ФАП, «Чипайне» эйдень кужо, ков якить 17 эйкакшт, колмо лавканок. Покш Маризь велесэ ули Культурань кудо, ансяк пек мелявттано сень коряс, лангозонок илязо пра. Зданиясь стявтозь пек умок. Революциядо икеле тосо ульнесь церькова. Минь аламодо эсенек вийсэ мазылгавтынек потмонть, ансяк савсь пекстамс сценанть, сон пек каладозь. Кочкамотнень ютавтомадо икеле ламоксть пшкадекшнынек РФ-нь Государственной Думань ды МР-нь Государственной Собраниянь депутатокс кандидаттнэнень. Вешинек строямс од помещения, алтасть совавтомс Культурань кудонь стявтомадо яволявтоманть сы иень программантень, пек кемтяно лезксэст лангс.

Велесэнек ули газ. Тедеде прядынек кудотнес ведень ветямонть. Ведень сетенть кувалмозо 11 вайгельбе 515 метрат. Колмо иеть топавтынек те а шожда тевенть. Теньсэ, нама, лездась «Устойчивое развитие сельских территорий» программась. Покш сюкпря республикань Правительствантень, энялдоманок ваннызь ды яволявтоманть совавтызь программантень. Тень туртов явовсть ярмакт федеральной, республикань, местной бюджеттнэстэ, истя жо нолдазь тевс эрицятнень пельде пурназь ярмактне. Ломантне эзть моле каршо, эрьва кудостонть пурнынек 3600 целковойть. Ломантне неизь, неть ярмактне нолдазь тевс. Ней эрьва кудосонть ули ванькс ведь. 

Кода ушодынь велень администрациянь прявтонь тевтнень топавтомо, те ульнесь прявт тевем – ветявтомс эрьва кудос ведь. Бути ледстямс 2010 иенть, пек стака тенек ульнесь, весе лисьманок коськекшнесть, симемскак мик арасель ведь. Сюкпря «Рассвет» ООО-нтень, ведь усксесть тенек.

– Надежда Борисовна, кодат стакачить течи талновтыть велень эрицятнень?

– Нама, велесэнть улить лия стакачить, ансяк весе сынь топавтовицят. Эряволь бу теемс од кить. Ансяк бюджетсэнть ярмактне тенень арасть. Вадря, лездась С.И. Сиушов, тейсь пек вадря ки велень куншка курованть, тосо истя жо теезь тротуарт. Истя жо лезксэнзэ вельде ацазь асфальтонь ки мик калмолангонть видьс. Истя жо калмолангонть перька эрицятнень лезксэст вельде теезь вадря пирявкс.

Пек ламо ярмакт ютавттано тельня китнень ванськавтомаст лангс. Эрьва ие тешкстатано контракт И.И.Мирькискин марто, сон Покш Маризь велень эриця, ули эсензэ тракторозо. Зярдо моли лов, сон ветькак ванськавты китнень, эдь илязо лисе кажо, ардовост толонь мадстиця, медицинань куроконь лезксэнь машинатне.

Велесэнть ладязь шукшонь пурнамонь контейнерт, недлянь ютазь эйсэст усксить. Кирдтяно администрациясо башка важодиця, конась велень куротнева ды калмолангсо пурны шукштнень, ваны ваньксчинть мельга.

Нама, стакачитне улить, ансяк сынь а тандавтыть. Минек прявт тевенек: лездамс велень эрицятненень, чарькодемс талномаст-мелявксост. Весе тевтнень топавтомс лезды вадря коллективенек – полавтыцям Т.В.Зотова, Культурань-досугонь куншкакуронь ды библиотекань важодицятне. Н.А.Беляева библиотекаресь роботы Сырятинасо. Эрьва чистэ ялго юты 5 вайгельбеть. Тосо эйсэнзэ пек учить, теке чинь лисеманть. Эдь велесэнть кадовсть седе ламо сыре ломанть. Кие кармавты кши, кие – надобият, сон весементь тенст пачти. Клубонь важодицятне – В.Н. Курганова ды Е.Г. Баранова, пек ёроковт, эйкакштнень марто маштыть роботамо, тонавтыть вишкинетнень морамо-киштеме. Покш Маризь велесэ пек вадрясто топавтыть тевест Культурно-досуговой куншкакуронь важодицятне. Анокстыть-ютавтыть велень эрицятнень туртов эрьва кодат покшчить: сёксня ютавтозельть Сыре ломанень кенярксчись, Велень хозяйствань важодицянь чись.  Иень перть бажатано весе кенярксчитнень тешкстамс: Велень авань чинть, Татьянатнень кенярксчинть, Од иенть, Мартонь 8-це чинть, Мастянть, Тундонь ильтямонть ды ламот лият. Кизна покш мероприятия ульнесь – велентень топодсть 465 иеть!

Минек ули пек вадря ансамблянок – «Килейне», тов сови 11 ломань, весе эсенек велень. Аватне морсить кода эрзянь, истя жо рузонь морот. Вейкеяк кенярксчи велесэнек а ютавтови моровтомост. Ансамблянь морсицятнень улить пек мазый эрзянь оршамост. Тедеде спонсортнэ стасть тенст од костюмт.

Кеме сюлмот кирдтяно велень школанть марто. Весемесэ лездыть тенек тесэнь эрицятне, покш мельсэ кирдить эрьва арсеманть. Весень вийсэ, арсян, топавттано эште ламо паро тевть ломантнень  лезэс.

Т.Аксенова

 

Новости

«Маска» АРТ-кафесэнть – кулинаронь-футболонь матчт

 Мейсэ Мордовиясь карми андомо ды дивавтомо 2018 иень Футболонь коряс масторлангонь чемпионатонь инжетнень? Неть салавачитнень панжомга «Маска» АРТ-кафесь ютавты кулинаронь-футболонь матчт. Кафень инжетнень туртов тесэ пидевить-паневить чемпионатонь мастортнэнь-участницатнень раськень ярсамопельть. Сынст варчамодост мейле эряви максомс вайгель вечкевикс ярсамопеленть кисэ ды анокстамс-пурнамс 2018 иень Футболонь коряс масторлангонь чемпионатонь ваныцятнень ды эсенк туртов меню.

Подробнее ...
 
Инжетненень невтема национальной культуранть мазычинзэ

Мордовиянь Прявтось Владимир Волков неть читнестэ вастневсь «Ассоциация финно-угорских народов» общественной вейсэндявксонь председателенть, Саранск ошонь администрациянь прявтонть Пётр Тултаев, ды эрзя-мокшонь раськетнень регионъютконь общественной вейсэндявксонь исполкомонь председателенть Александр Лузгин марто.

Подробнее ...
 
Кулят Ошонь Администрациясто

Пондельникстэ, мартонь 26-це чистэ, ошонь Администрациясо ютась оперативной совещания, конань ветясь ошонь округонь прявтось Петр Тултаев. Промксось ушодовсь Кемерова ошсо чавовозтнень коряс чатьмонемань минутасто. Саранскоень мэрэсь тешкстызе: «Объекттнэнь эксплуатацияс совавтомга вешематнень эрявить полавтомс. Минек ошсояк, койсэнь, микшнемань ламо комплекстнэ кандыть зыян. Саемга, ульнинь «Киномакс-Победа» кинотеатрасо ды сеансто мейле дивазевинь, лисема таркась вейке! Бути мезеяк тееви, арседе тынсь, мезе карми! Икелень шкатнестэ тосо ульнесть совамонь-лисемань кавто таркат. Сестэ строительтне арсесть зыяндо ванстоманть коряс. Паряк эряви анокстамс законодательной инициатива, проектно-сметной документациясь ютаволь экспертиза безопасностень лувтнень коряс».

Подробнее ...
 
Шумбрачинь чи

Эйзюрковонь 3-це чистэ Саранскойсэ ютавтови ошонь Шумбрачинь чи. Ленинской ды Пролетарской райононь парктнесэ, Экопарксонть ды конькасо кирякстнема таркатнесэ (Коваленконь, Гожувской куротнесэ ды «Саранск» стадионсонть) 11.00 чассто ушодовить концерттнэ, 12.00 чассто – спортонь пелькстамотне. Ленинской районсо арсевить «Тетям, авам, мон – спортонь семия» стартось, эрьва кодат пелькстамот ды квестт.

Подробнее ...
 
Чемпионатонть шкасто транспортонть ды общественной таркатнень важодемадо

Ошонь мэрэнтень эрицятнень пельде сеедьстэ максовить кевкстемат, кода Футболонь коряс масторлангонь чемпионатонь шкастонть кармить важодеме общественной транспортось, рынкатне ды микшнемань лия таркатне.

Подробнее ...