Рубрикатор

Демография Кедензэ зярдояк а нолдтни
Кедензэ зярдояк а нолдтни

 

А стяко кортыть, эрямсто эрьвась канды эсь канстонзо. Паро, зярдо те канстось аволь стака, ды ломанесь эрямонь кияванзо моли шождасто. Эрси лиякскак, Инешки пазось максы ломанентень истямо канст, конань кандомсто арсемскак стака. Ломанесь жо кедензэ а нолдтни ды, кода машты, сонзэ цидярды.

 

Те аволь сэрей, ёлганя од ломанесь – Фёдор Тятюшкин. Варштамскак лангозонзо ве ёндо, лиятнеде мейсэяк а явови, ансяк раужо сулика марто сельмукштне максыть цёрантень кодамо-бути лиятнень ёнов а молиця лув. А эдь од ломанесь овсе а неи пертьпельксэнть. Чачсь 1986 иестэ Кочкуровань райононь Семилей велесэ. Чачсь а неицякс. Васенце классоскак цёрынесь тусь аволь эсест велень общеобразовательной школав, Нижней Новгородонь анеицятнень туртов школав-интернатов. Тонавтнема лувось тесэ овсе лия. Букварень таркас тесэнь тонавтницятненень ульнесь Брайлень азбукась. Ансяк сонзэ изнямодо мейле эйкакштненень кармить толковамо тонавтнемань уроктнень, тематнень. Лиякс а кода. Нижней Новгородонь интернатсо Фёдорнэнь савсь тонавтнемс сисем иеть. Зяро вий тенень савсь путомс, соды ансяк сонсь. Кода илязо уле, цёранть тонавтнемань мелезэ эзь колаво. Сон парсте чарькодсь, тонавтнеманть эряви поладомс. Истя арсезь, 2006 иестэ сась тонавтнеме Н.П.Огарёвонь лемсэ МГУ-нь юридической факультетэнь заочной отделенияс. Тесэнь студенттнэнень вешематне ульнесть вейкеть весенень. Цёрантень савсь топавтомс весе сень, мезе тейсть неицятне. Видестэ кортыть: кинть изнясы ютыцясь. Истя арсиль Фёдор Тятюшкингак. Ды вана университетсэ тонавтнемаськак изнязель. Ней цёранть ули юристэнь дипломозо.

Эрямосо Фёдор Тятюшкинэнь улить вечкевикс тевензэ. Сон аволь истят ломантнестэ, кить вечкить тарка лангсо кеверькшнеме. Цёрась вечксы спортонть, сехте пек армрестлингенть. Кевкстемам лангс: «Мекс вечкевсь армрестлингесь?» – Фёдор макссь каршо валт, келя, анеицятненень пек кочкамс а мейстэ. Армрестлингесь – истямо спорт, конасонть, эсь вийденть башка, мезеяк а эряви. Васенце тренерэзэ ульнесь Евгений ялаксозо. Юткошкасто кундыть кавонест виень варчнеме. Тонась аламодо эйстэнзэ седе вишкине, ялатеке пря а максыль. Шкань ютазь варчинзе виензэ районсонть ютавтовиця турниртнэсэ ды, меремс, а беряньстэ. 2014 иестэ Кочкуровань райононь армрестлингень первенствасонть Фёдор Тятюшкин сайсь васенце тарка. Мейле истя ульнесь колмо иень перть. Тешкстасынек, турнирэсь мольсь шумбра эйкакштнень ютксо.

Овсе аволь умок Саранскоень Октябрьской райононь физкультурань-шумбрачинь витемань комплекссэ «Прометей» инвалидэнь спортонь клубось ютавтсь инвалидтнэнь ютксо спортонь первенства. Участниктне сакшность республикань весе районтнэстэ. Кочкуровань райононь армрестлингень командасонть участвовась Фёдор Тятюшкингак. Эште пелькстамотнеде икеле кевкстекшния изнямос снартнемадонзо. Каршонь мерсь нурькинестэ: «Медальтеме а туян». Истя лисськак. Ёвтазь турнирстэнть кудов цёрась тусь бронзань медаль марто.

Вастовомсто кевкстния Фёдоронь: «Кодат мелензэ-арсеманзо спортонть коряс?» Ды од ломанесь ёвтынзе потмовалонзо, келя, сонтемензэ а кода. Спортось максы тензэ кемема эсь вийтнес, вандынь чинтень, максы шумбра эрямо лув.

Фёдор Тятюшкин, спорттонть башка, пек вечксы морамонть. Райононь ды Саранскоень сценатнесэ сон свалшкань морыця. Моры шансононь морот. Кода мерсь сонсь, те тевесь спортонть марто максыть тензэ эрямосонть ёжонь, мелень витема.

Вана истя. Зярдо кунсолат шумбра ломантнень пеняцямост эрямонь стакачитнень лангс, арсезеват, кой-кинь неть стакачитне ламодо седе покшт, ансяк сынь а пеняцить эрямонть лангс, чатьмонезь молить эсь кияваст ды бажить вечкевикс тевтнень вельде муемс од вийть.

Н.Евдокимов

 

Новости

«Маска» АРТ-кафесэнть – кулинаронь-футболонь матчт

 Мейсэ Мордовиясь карми андомо ды дивавтомо 2018 иень Футболонь коряс масторлангонь чемпионатонь инжетнень? Неть салавачитнень панжомга «Маска» АРТ-кафесь ютавты кулинаронь-футболонь матчт. Кафень инжетнень туртов тесэ пидевить-паневить чемпионатонь мастортнэнь-участницатнень раськень ярсамопельть. Сынст варчамодост мейле эряви максомс вайгель вечкевикс ярсамопеленть кисэ ды анокстамс-пурнамс 2018 иень Футболонь коряс масторлангонь чемпионатонь ваныцятнень ды эсенк туртов меню.

Подробнее ...
 
Инжетненень невтема национальной культуранть мазычинзэ

Мордовиянь Прявтось Владимир Волков неть читнестэ вастневсь «Ассоциация финно-угорских народов» общественной вейсэндявксонь председателенть, Саранск ошонь администрациянь прявтонть Пётр Тултаев, ды эрзя-мокшонь раськетнень регионъютконь общественной вейсэндявксонь исполкомонь председателенть Александр Лузгин марто.

Подробнее ...
 
Кулят Ошонь Администрациясто

Пондельникстэ, мартонь 26-це чистэ, ошонь Администрациясо ютась оперативной совещания, конань ветясь ошонь округонь прявтось Петр Тултаев. Промксось ушодовсь Кемерова ошсо чавовозтнень коряс чатьмонемань минутасто. Саранскоень мэрэсь тешкстызе: «Объекттнэнь эксплуатацияс совавтомга вешематнень эрявить полавтомс. Минек ошсояк, койсэнь, микшнемань ламо комплекстнэ кандыть зыян. Саемга, ульнинь «Киномакс-Победа» кинотеатрасо ды сеансто мейле дивазевинь, лисема таркась вейке! Бути мезеяк тееви, арседе тынсь, мезе карми! Икелень шкатнестэ тосо ульнесть совамонь-лисемань кавто таркат. Сестэ строительтне арсесть зыяндо ванстоманть коряс. Паряк эряви анокстамс законодательной инициатива, проектно-сметной документациясь ютаволь экспертиза безопасностень лувтнень коряс».

Подробнее ...
 
Шумбрачинь чи

Эйзюрковонь 3-це чистэ Саранскойсэ ютавтови ошонь Шумбрачинь чи. Ленинской ды Пролетарской райононь парктнесэ, Экопарксонть ды конькасо кирякстнема таркатнесэ (Коваленконь, Гожувской куротнесэ ды «Саранск» стадионсонть) 11.00 чассто ушодовить концерттнэ, 12.00 чассто – спортонь пелькстамотне. Ленинской районсо арсевить «Тетям, авам, мон – спортонь семия» стартось, эрьва кодат пелькстамот ды квестт.

Подробнее ...
 
Чемпионатонть шкасто транспортонть ды общественной таркатнень важодемадо

Ошонь мэрэнтень эрицятнень пельде сеедьстэ максовить кевкстемат, кода Футболонь коряс масторлангонь чемпионатонь шкастонть кармить важодеме общественной транспортось, рынкатне ды микшнемань лия таркатне.

Подробнее ...