Рубрикатор

Демография Кода эри Эрьмезёнка велесь
Кода эри Эрьмезёнка велесь

 

Чаунза ёнксонь Покш Эрьмезенка эрзянь велесь пек кезэрень, тензэ малав 400 иеть. Улить ламо мельть-арсемат, косто саевсь те веленть лемесь. Веенст кортыть, сон моли умонь эрзянь цёрань лемстэнть – Эрьменза, омбонст, келя, кезэрень шкане неть таркатнесэ ульнесть ламо ривезть, ды маласо эрицятне лемдизь сонзэ «ривезень ки». Шкань ютазь, те валрисьмесь, нама, полавтовсь ды теевсь Эрьмезенкакс.

 

Велесь эсь историянзо перть печтясь кода паро, истя берянь шкаткак. Сон а пек явови истят жо эрзянь велетнеде. Ютазь пингень 30-це иетнестэ тесэ эрясть тёжадо ламо ломанть, мейле састь войнань шкатне, 200 ламо цёрат чавовсть тюремань паксятнесэ. Войнадо мейле Эрьмезенкань эрицятне кепедсть колхоз, строясть школа, Культурань кудо, медпункт, ветясть велентень газ. Ансяк вана од ломантне а пек капшасть кадовомс тиринь велентень, эдь Саранскоесь а пек васоло ды тосо улить важодема таркат. Эрьмезенкась кармась вишкалгадомо. Неень шкане, кода тенек ёвтнесь велень администрациянь прявтось Владимир Петрович Куторкин, тосо эрить 464 ломанть. Юткстост ламотне, кода лия велетнесэяк, сыре покштят-бабат. Маласо Саранскоесь од порасто манинзе сынст тов важодеме, ней жо, пенсияв лисемадо мейле, ламот эйстэст бажить велявтомс тиринь велезэст мекев. Аволь питней моданть од кудонь строямс рамсить од ломантнеяк, ансяк тей сынь сакшныть оймсема читнестэ, кизна.

Велентень пачтиця кись тедеде витнезель. Паро, федеральной бюджетстэ тенень явозельть покш ярмакт. Киланготне неень шкане пек питнейстэ стить. Лиякс аштить тевтне велень ульцятнесэ. Нама, тезэнь асфальтось а рамави. Ялатеке, кода ёвтни Куторкин, администрациясь бажи кодаяк витемс мелявксонть: китнень лангс кайсить кевть, опока, гравий. Паро, маней шкане ардоват, теяк вадря. Велень эрицятне умок уш учить паро ки калмолангов. «Сонсензэ те таркантькак, пирявксонтькак пароль бу витнемс», – кортыть Эрьмезенкасо. Пароль бу веть ульцятненьгак валдомгавтомс. Кемголмово лампочкат, келя, путозельть ульцянь палмантнева, ялатеке а сатыть. Тельня рана сундерьгады ды чоподава молемс берянь.

Администрациясо кемевтить, китнень велеванть кодаяк ды витнесынек, ансяк бу эрявикс программас понгомс. Зярдо те карми, кие соды?

Велень мелявкстнэнь лангс апак вано, тесэ эрямось ялатеке састыне моли. Эрицятнестэ седе одтнэ важодить «Ремезенское» СХПК-сонть, недлязонзо кавксть-колмоксть Саранскойстэ сакшны частной «газель». Велесэнть зярс роботы медпунктось. Тосо ламо иеть важодить М.Т.Наумкина ды Л.П.Прокина. Ули пожаронь мадстема машинаяк, свал анок лездамс сонзэ ветницясь В.В.Чаиркин. Весть недлязонзо панжтневи банконь отделениясь, роботыть кавто лавкат, почта, витнемадо мейле маласо шкастонть панжови клубось.

Велень Культурань кудодонть эряви ёвтнемс башка. Минь арсетяно, неень шкане велетнень эрямосо сон саи башка тарка, лиякс меремс, ловови ломанень вейс пурнавома, кенярксчинь, оймсема чинь тешкстамонь курокс. Евгения Фёдоровна Молдакова, Культурань кудонть культорганизаторось, ёвтни, келя, сынь бажить тешкстамс весе покшчитнень, ютавтнить клубсонть торжественной мероприятият, бал-маскарадт, вастовомат, чайде симемат ды пачалкседе ярсамот, а стувтневить сыре ломантнеяк, сыненст кудова кандтневить казнеть. Ансяк вана  мекс-бути ломантнень мелест арась тей сакшномс, весе аштить эсест «пизэваст», чуросто таргавить телевизорост икельде. Паряк, тевесь сеньсэ, сыретнеде пек ламо? Паряк, а пачкодить эрьва кудос тердематне? Сеедьстэ савкшны кенярксчитнень ютавтнемс, кода мерить, «теине кругсо»: велень администрациясо важодицятнень, школасо тонавтыцятнень ды тонавтницятнень марто.

Истямо жо а покш курынесэ сынь ютавтнить «Мордовочка» ансамблянь репетициятнень. Кото ломанть ней тосо морсить. Репертуарось эрьва кодамо, эйсэнзэ кода эрзянь, истя рузонь мороткак. Сеедьстэ сынь яксить райононь мероприятиятнева, морсить велесэ кенярксчитнень тешкстамсто. Ансяк вана оршамопельтне таштомсть ды сынст одкстомтомс ярмакт арасть.

Мезе монь кенярдовтымим Покш Эрьмезенкасо, те – школась. Паро, сон важоди. Зярс важоди. Пекстамодонзо кортамотне молить умок. «Покш Маризь велев кармить эйкакштнень усксеме. Ансяк зярс районось эзь муе сынст усксемс школань автобус», – ёвтни сонзэ директорось В.Г.Ерофеев. Школантень кадовсть ансяк 12 тонавтницят. Мелят тосто тусть 11 классонь зярыя тонавтницят, ды сон ней ловови основнойкс – тонавтыть ней эйкакштнень 9-це классос. Тонавтыцятне улить весе предметтнэнь коряс, школасонть роботы паникудо, эмежтнень кастыть сынсь важодицятне эйкакштнень марто вейсэ. Тонавтницятне тесэ явовить класска ансяк уроксто, лия шкасто сынь теке вейке семия. Кода тенек ёвтнесь О.В.Фетхуллова тонавтыцясь, тесэ эрьва эйкакшонть чачома чинзэ тешкстыть школанек. Тонавтыцятне бажить тешкстамс весе кенярксчитнень, сынсь тонавтницятнень марто анокстыть конкурст, умонь коень коряс анокстыть спортонь пелькстамот, морот-киштемат, сценкат. Зярдо соват школантень, тесэ а марявить пижнемат, гайтев вайгельть, арасть прянь-полдань синдезь чийнемат. Тесэнь сэтьмечись нусмакавты. Зяро истят школат минек республикасо учить эсест меельце чист? Ламо. Арсян, Покш Эрьмезенкансентень эште зярскак а рамить автобус, ды сон карми важодеме, эдь эйкакшт велесэнть эште улить. Администрациянть ловоманзо коряс, эште 16 вишка эйкакшкеть маласо иетнестэ молить Эрьмезенкань школав.

Те кезэрень эрзянь велестэнть туемстэ арсезевинь – кода ды мейсэ лездамс истят велетненень а ёмамс масторонть лангсто? Мелезэнь ледсь эсень Отяжеле ёнксонь Сабанцеле тиринь велем, конась зярыя иеде теде икеле печтясь пек стака шкат. Бути аволь уле велень кеме предприятиясь, конась панжсь тозонь важодема таркат од ломантнень туртов, лездась ды лезды велень администрациянтень витнемс-петнемс зданиятнень, ютавтнемс кенярксчить, истямо лувсо вейсэндямс тосонь ды лия ёно эрицятнень – чарькодян, мезе бу мартонзо лисевель.  Теке марто тешкстаса минек Сабанцелень эрицятнень тиринь ёнксонь вечкеманть, вейкень-вейкень туртов лездамонть, тиринь веленть кувалма каштанчисэ аштеманть. Неть ёнкстнэнь покш таликаст тиринь ёнксонть ванстомасо.

М.Девятова 

 

Новости

«Маска» АРТ-кафесэнть – кулинаронь-футболонь матчт

 Мейсэ Мордовиясь карми андомо ды дивавтомо 2018 иень Футболонь коряс масторлангонь чемпионатонь инжетнень? Неть салавачитнень панжомга «Маска» АРТ-кафесь ютавты кулинаронь-футболонь матчт. Кафень инжетнень туртов тесэ пидевить-паневить чемпионатонь мастортнэнь-участницатнень раськень ярсамопельть. Сынст варчамодост мейле эряви максомс вайгель вечкевикс ярсамопеленть кисэ ды анокстамс-пурнамс 2018 иень Футболонь коряс масторлангонь чемпионатонь ваныцятнень ды эсенк туртов меню.

Подробнее ...
 
Инжетненень невтема национальной культуранть мазычинзэ

Мордовиянь Прявтось Владимир Волков неть читнестэ вастневсь «Ассоциация финно-угорских народов» общественной вейсэндявксонь председателенть, Саранск ошонь администрациянь прявтонть Пётр Тултаев, ды эрзя-мокшонь раськетнень регионъютконь общественной вейсэндявксонь исполкомонь председателенть Александр Лузгин марто.

Подробнее ...
 
Кулят Ошонь Администрациясто

Пондельникстэ, мартонь 26-це чистэ, ошонь Администрациясо ютась оперативной совещания, конань ветясь ошонь округонь прявтось Петр Тултаев. Промксось ушодовсь Кемерова ошсо чавовозтнень коряс чатьмонемань минутасто. Саранскоень мэрэсь тешкстызе: «Объекттнэнь эксплуатацияс совавтомга вешематнень эрявить полавтомс. Минек ошсояк, койсэнь, микшнемань ламо комплекстнэ кандыть зыян. Саемга, ульнинь «Киномакс-Победа» кинотеатрасо ды сеансто мейле дивазевинь, лисема таркась вейке! Бути мезеяк тееви, арседе тынсь, мезе карми! Икелень шкатнестэ тосо ульнесть совамонь-лисемань кавто таркат. Сестэ строительтне арсесть зыяндо ванстоманть коряс. Паряк эряви анокстамс законодательной инициатива, проектно-сметной документациясь ютаволь экспертиза безопасностень лувтнень коряс».

Подробнее ...
 
Шумбрачинь чи

Эйзюрковонь 3-це чистэ Саранскойсэ ютавтови ошонь Шумбрачинь чи. Ленинской ды Пролетарской райононь парктнесэ, Экопарксонть ды конькасо кирякстнема таркатнесэ (Коваленконь, Гожувской куротнесэ ды «Саранск» стадионсонть) 11.00 чассто ушодовить концерттнэ, 12.00 чассто – спортонь пелькстамотне. Ленинской районсо арсевить «Тетям, авам, мон – спортонь семия» стартось, эрьва кодат пелькстамот ды квестт.

Подробнее ...
 
Чемпионатонть шкасто транспортонть ды общественной таркатнень важодемадо

Ошонь мэрэнтень эрицятнень пельде сеедьстэ максовить кевкстемат, кода Футболонь коряс масторлангонь чемпионатонь шкастонть кармить важодеме общественной транспортось, рынкатне ды микшнемань лия таркатне.

Подробнее ...