Рубрикатор

Демография ПРОЕКТЭСЬ АЛТАЗЬ СЫРЕТНЕНЕНЬ
ПРОЕКТЭСЬ АЛТАЗЬ СЫРЕТНЕНЕНЬ

Равчирень финнэнь-угрань раськень культурань куншкакурось полады ютавтомо «Живое общение» сыре ломантнень туртов культурно-просветительской проектэнть. Мелят сон ютась эйдень кудотнева, тедеде – сыре ломанень. Вана ней вастовома мольсь Чаунзабуень Комсомольскоень войнань ды трудонь ветерантнэнь пансионатсо. Равчирень куншкакуронь важодицясь О.О.Кулаева домкасто ёвтнесь те проектэнть эйстэ. Инжетне: Эрзя-мокшонь раськень музеень научной важодицясь М.И.Сурина пачтясь някатнеде, панжсь выставка, И.Д.Воронинэнь лемсэ краеведениянь музеень важодицясь Н.Н.Носарева ёвтнесь Михаил Девятаевде. «Келу» ансамблянь морыцятне, МР-нь Заслуженной артисткатне Анна Атласова ды Любовь Князькова невтсть алкуксонь концерт. Л.Князькова  седясь баянсо, морась нурька морот. Кой-кона ваныцятне морасть мартост, лиятнень жо эзть кирдеве сельведест. Сынь аштесть мельспаросо, састь варштамост ламо инжеть, тердсть эйсэнек нупалезэст.

Чаунзабуень Комсомольскоень трудонь ды войнань ветерантнэнь пансионатось панжозель 1994 иестэ. Тесэ сыре ломантнень  туртов улить 40 таркат. Неень шкане пансионатсонть эрить 34 ломанть.  Эрьванть эсензэ уцясказо, эрямозо. Кинь-бути арась кудозо, малавиксэнзэ, кинь-бути улить эйкакшост, ансяк сынь васолот. Мезть сёпомс, улить истяткак ломанть, конатнень кадызь тетяст-аваст. Пансионатось пурнынзе сыре ломантнень весень вейс. Тесэ мельгаст якить 23 ломанть. Ули врач, медсестрат.

– Минек учреждениясь – стационарной. Милосердиянь отделения арась. А якицятнеде 5 ломанть. Эрьва чи пансионатонь важодицятне ваныть сыретнень мельга. Эйсэст шлить, оршневтить, ваныть шумбрачист мельга.  Сехте сыре эрицянок – Е.Е.Абросимова, сонензэ 89 иеть, Е.С.Ключагинанень – 87 ды Е.И.Лизунованень – 88. Бути кие туи эрямосто – пачтятано малавикстнэнь туртов. Сеедьстэ калматано минсь эсенек калмолангс.

Эрьва кенярксчистэ – Роштуванень, февралень 23-це чинтень, мартонь 8-це чинтень, маень 9-це чинтень (ды лия покшчистэ) – кедьсэнек инжеть: волонтёрт, эйдень кужонь эйкакшт, школань тонавтницят. Сынь аволь ансяк невтить концерт, истя жо тукшныть мартост эсест кедьсэ теезь казнеть.

Эрицятнень эрьва нупальсэнть ули телевизор, нусманячис а пракшныть. Мереви тенст лиснемс ушов, ковгак молемс, ансяк ёвтазь шкантень велявтома мекев. Андтано эйсэст чизэнзэ нилексть. Улить ваннат ды баня, – ёвтнесь пансионатонь прявтось Людмила Евгеньевна Волкова. Пансионатсонть сон важоди 2014 иестэ саезь. Тесэнь эрицятнень валост коряс, прявтост – сырнень ломань.

Марина Николаевна Беляева пансионатсонть важоди медсестракс. Вете иеть сон топавты эсь тевензэ. Чачомань коряс Дубёнка ёнксонь. Тонавтнесь Саранскоень медицинань училищасо.

– Важодемам вадря, мелезэнь тукшны. Тесэ минь лездатано сыре ломантненень: лецятано, вантано шумбрачист мельга. Нама, сыре ломантнень марто эряви седейшкава кортнемс, ёвтамс тенст лембе валт. Сынь кой-зярдо мейскак покордавить, эрьва ломаненть эсензэ обуцязо. Тесэ ули эсенек пиренек, козо путтано модамарть, пурькат, чурькат, капстат, куярт, помидорт. Эрзятнень марто, нама, кортатано тиринь кельсэ, – ёвтни медсестрась М.Н.Беляева. Сондензэ башка тесэ медсестракс важодить О.П.Первушкина ды  Е.С.Душанина.

Кода а кортамс тесэнь эрицятнень марто? Вана вейке покш нупальсэнть эрить 5 бабинеть. Сынь а яксить. Кавтотнень а неить сельмест.

Татьяна Ивановна Сабайкина чачсь Отяжбуень Аловелесэ.  Сонензэ 83 иеть. Вана мезе ёвтнесь эрямодонзо.

– Чачинь покш семиясо, косо ульнесть кото эйкакшт. Тетям ниле иеть ульнесь войнасо. Тыненк ней а чарькодеви, кодамо вачочи ды нужачи минь кирдинек. Ярсынек марчонь ды пекше лопань кшиде. Лиясто истямоськак арасель. Авам кучсь тетянень фронтов сёрма, косо ёвтнесь вачочиденть. Тетям пек покордавсь кисэнек. Теде мейле натой кудозонок сакшнось проверка. Мон 27 иес важодинь эсенек колхозсо. 1961 иестэ туинь Кабардино-Балкарияв, тосо эрясь патям ды ялгам. Карминь эрямо Прохладный ошсо ды важодеме винсовхозсо. Тосо 500 гектаронь мода лангсо кастынек виноградонь 150 сортт! Сестэ кодаткак машинат-мезть арасельть, весементь теинек кедьвийсэ. Пек стакаль! Ансяк ков туят? Виноградонь чувтотнень вельтясынек, тунда панжсынек, лопатне касыть – керсесынек… Ламо мартост эрявсь озямс. Тосо эрясть-важодсть эрзянь 25 семият. Монгак лиснинь мирденень ансяк явинек, ней ськамон печтян пингем. Стажом малав 50 иеть! Пек важодинь, ульнинь шумбра, виень ламольть, сельме удалга ды сельмс мерсть тень «Бульдозер». Ней те винсовхозось уш арась, прявтось полавтовсь ды весемесь ёмавтозь. 9 иеде икеле Прохладный ошсо кудом миия, тей сынь. Истя вана лиссь, сазором манимим. Кадовинь кудовтомо ды ярмактомо. 2 иеть нарьгась лангсон, чавсь эйсэнь… Киненьгак а эряван. Эринь Козловкань ды Поводелень сыре ломанень кудотнесэ, ней тесан. Пильгеньгак а ютыть, прынь, томбавинь пек.

Пансионатсонть эрямонок паро. Мельганок якить, шлить,  андыть. Ней эрямось паро, кшись столь лангсо – ашо ды раужо, андыть сывель ямдо. Кода чачинь, кияк паро, лембе вал тень эзь ёвтакшно, эзь жалякшно, аштинек вачо, якинек карьсэ, ледстнемскак теде арась мель.

Сюкпря, ули истямо кудо, козонь минек пурнымизь, косо ваныть мельганок. Сюкпря прявттнэнень, кить стявтызь те кудонть! – сельведень нардтнезь ёвтнесь Т.И.Сабайкина.

А якицятнень нупальстэ кияк эзь саво концертэнь ваномо. Секскак артисткатне сынсь совсесть тенст ды морасть морот. Сырькайтне авардсть. Ансяк неть сельведтне ульнесть кенярксонь ды сынст марто ойместэнть лиссь весе апарось.

 

Т.Маторкина

 

Новости

Чувашиясто – казне марто

 

Мартонь 24-це чистэ И.Я.Яковлев лемсэ Чувашиянь государственной педагогической университетсэ ютась этнопедагогикань ды поликультурной образованиянь коряс студентэнь Весероссиянь олимпиада. Сон алтавсь РАО-нь академикенть Г.Н.Волковонь 90 иетненень.

Подробнее ...
 
Од ломанень ассамблея

 

Мордовия Республикасо теезь «Молодежная Ассамблея народов России «МЫ – РОССИЯНЕ» Общероссийской общественной движениянь региональной отделения. Республикасонть од ломанень движениянь теемась карми общероссийской гражданской идентичностень формированиянть коряс ушодкстнэнень, раськетнень ютксо ояксчинь кемекстамонтень ды  межкультурной вейсэнь важодеманть келейгавтомантень лездамонь площадкакс.

Подробнее ...
 
Диктантось – эрявикс тев

Те иень апрелень 8-це чистэ Саранскойсэ малав 400 ломантне кармить «Тотальной диктантонь» участникекс. Мероприятиянь ютавтомань меленть шнызе Мордовиянь Прявтось Владимир Волков.

Подробнее ...
 
Сценанть лангсо Ицялбуесь...

 

Неть оймсема читнестэ Республикань Культурань Кудосо ютасть «Шумбрат, Мордовия!» народной творчествань фестивалень меельце концерттнэ. Кадовсь ансяк Гала-концертэсь, кона карми декабрянь 11-це чистэ. Сценанть лангс лиснесть Ицялбуень, Ковылкина ёнксонь ды Саранск ошонь округонь артисттнэ.

Подробнее ...
 
Мамаева омбоце

 

Ноябрянь васенце пельксстэнть евтазельть Россиянь республикатнень государственной кельтнень коряс школасо тонавтницянь ды студентэнь Весероссиянь васенце олимпиадань итогтне.

Подробнее ...