Рубрикатор

Их знает вся Россия Д.БОРИСОВ: «УЧАСТКОВОЕНТЬ ТЕВЕЗЭ – МУЕМС КЕЛЬ-ВАЛ»
Д.БОРИСОВ: «УЧАСТКОВОЕНТЬ ТЕВЕЗЭ – МУЕМС КЕЛЬ-ВАЛ»



«Торбеевский» Россиянь МВД-нь ММО-нь 15№ полициянь отделениянь участковоесь Дмитрий Борисов карми идеме Мордовиянть честензэ «Народный участковый-2017» Весероссиянь конкурсонь финалсонть. Полициянь капитанось лиссь изницякс региононь этапсонть онлайн-вайгелень максомань невтевкстнэнь коряс, пурнась 500 ламо вайгельть. Конкурсонь итогтнень ёвтасызь правань ванстомань органтнэсэ важодицятнень профессиональной кенярксчиденть икеле. 



Чачсь Дмитрий Борисов Атюрьева ёнксонь Новочадова велесэ, сон ашти кемень вайгельпеть райцентранть эйстэ. Семиясост кассть колмо эйкакшт, весе цёрынькат. Тетязо, Александр Иванович, эрямонзо перть топавтсь столяронь тевтнень. Авазо, Мария Степановна, важодсь колхозсо. Сынь кастызь эйкакшост алкуксонь ломанекс. Вишкинестэ саезь эрьвась эйстэст чарькодсь: малавикстнэнь, тиринь масторонь вечкемась максы эрямосо ламо вийть, содасть, ломантненень свал эряви кандомс лезэ. 

Секскак эштё школасо тонавтнемстэ Дмитрий эсензэ туртов арсизе: карми важодеме милициясо (се шкане эште полицейскойть арасельть). Цёрынентень марявсь, те тевсэнть важодицятне свал бажить лездамс ломантненень, свал муить эрявикс лисема куш кодамо стака тевстэ. Вечкевсь ловномс книгат, ваномс кинофильмат милициятнень ланга. Сонськак свал идиль вишкинетнень, эзь максне сынст покордамс. 
Истя, школань прядомадо мейле Дмитрий мольсь тонавтнеме Краснослободскоень техникумс юристэнь специальностенть коряс. Тонавтнемась, цёранть валонзо коряс, ютась шождасто. Сонзэ прядомадо мейле Дмитриень саизь армияв. Васенце кото ковтнестэ тонавтнема ютась Пермень областьсэ, мейле жо вейке ды пель ие служась Чечнянь республикасо, теде мейле контрактонь коряс кадовкшнось тов эштё иес. 

Армиясто велявтомадо мейле Дмитриень икеле стясь покш кевкстема: эрявсь кочкамс эрямонь тевенть. Ялганзо эйстэ ламотне тусть Московов, тосто мусть важодема таркат. Ансяк Дмитриень овсе арасель мелезэ туемс ве ёнов тиринь кудонть эйстэ, армиясо служамсто тошнакадсь седеезэ малавиксэнзэ кисэ, чачома моданть коряс, ды сон сайсь мель кадовомс тиринь ёнкссо. Мольсь важодеме милицияв. 

Внутренней тевень органтнэсэ эсь карьеранзо полицейскоесь ушодызе 13 иеде икеле. 2010 иестэ кармась Атюрьевань ёнкссо участковоекс, чинек-венек вансты тесэ закононть. Атюрьева ёнксонь эрицятне лемдить эсь участковоенть покш буквасто ломанекс, ды капшить тензэ эрьва кодамо кевкстема ды талнома марто. 

Дмитрий Борисов капитанонть важодемань чизэ ушодови рана валске. Нурькинестэ пачти прявттнэнень топавтозь тевтнеде ды сырги эрицятненень, конат учить пельдензэ лезкс. Участковоесь видькстась, те тевсэнть сон муизе эсензэ тарканзо ды вестькак эзь янксе кочказь профессиянть кувалма. 

Дмитрий Александровичень валонзо коряс, участковоень тевсэнть сехте прявтось – те ломантнень чарькодемась, кода пшкадят эрицятненень, кода мартост кортат, эряви маштомс муемс мартост кель-вал.

– Васенце тевенек – лездамс ломантненень, свал аштемс видечинть кисэ. Бути а ули вейке-вейкень чарькодема, важодемасонть мезеяк а лиси, – корты Дмитрий Александрович. – Вадрясто тевенть топавтомсто кенярдыть аволь ансяк ломантне, конатненень лездан, седе покш мельспаросан монсь. 

Атюрьевань эрицятненень Дмитрий Борисов вечкеви видечинть ды мелень явоманть кис. Сынь содыть, бути эряви кодамояк лезкс, участковоесь свал тень чарькодьсы ды лезды. Ды, эсест пельде, мелень явозь кунсолыть сонзэ превспутоматнень. 

А мезть кортамс, участковоень тевесь пек стака. Сонзэ участкасонть эрить 2776 ломанть. Малав эрьванть эйстэст улить кевкстеманзо, талноманзо, конатнень марто сынь чиить участковоентень. Дмитрий Александрович эрьванть эйстэст кунсолосы, муи чарькодема ды лезды, тень пингстэ киньгак а покорды. Дмитрий Борисовонь валонзо коряс, седе сеедьстэ пшкалить мирдтне-нитне, зярдо сынст ютксо лисить кодаткак аладямот. Сеедьстэ нитне пеняцить мирдест лангс, тонат симить, колыть эсест эрямост ды тандавтнить-покордыть малавиксэст. Нитнень арась мелест явомс, калавтомс семиянть, энялдыть кортамс мирдест марто, кармавтомс чарькодемс, кодамо зыян сынь кандыть малавиксэст туртов. Участковоентень лезкс мельга эрицятне пшкалить ветькак, зярдо редить сэтьмечинь коламо. Дмитрий Александрович видькстась, эрсить саламоткак. 

Борисов участковоесь покш мель яви эрицятнень марто профилактикань тевтеемантень. Те тевесь топавтови велень поселениянь администрациянть, тонавтомань учреждениятнень марто вейсэ ды, кода тешкстызе участковоесь, канды лезэ. Дмитрий Александрович свалшкане касты эсензэ содамочинзэ-ёрокчинзэ, шкастонзо тонавтни законодательствасо весе полавтоматнень. 

Вадрясто важодеманть кис Д.А.Борисов казезь МР-со Внутренней тевень министранть пельде кавто Благодарностьсэ, ведомствань ламо лия казнетнесэ. Теде башка, Дмитрий Борисов ванстсь сэтьмечинть Сочисэ Олимпиадань телень налксематнень ютавтоманть шкасто. Тень кисэ сон казезь Россиянь Президентэнть В.В.Путинэнь пельде ледстнемань медальсэ. Истя жо Дмитрий Александрович казезь медальсэ, кода Чечнясо контртеррористической операциянь участник ды боевой действиянь ветеран. 

Нама, важодемадонть башка пракшныть оймсема читькак. Сынь пек эрявить стакачиде пешксе эрямосонть. Дмитрий Александрович неть шкатнень, куш пракшнытькак сынь аволь истя сеедьстэ, кода бу эряволь, ютавты вечкевикс семиянзо марто, малавиксэнзэ вакссо. Нинзэ, Александра Фёдоровна, марто сынь кастыть колмо эйкакшт. Сехте покшось, Алина, яки 5 классос, Кирилл – 1 классос, сехте вишкинентень, Даниилнэнь, ансяк колмо ковт. 

Т.АКСЕНОВА

 

Новости

Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...
 
Мордовиянь сехте вадря сувенирт

Декабрянь 22-це чистэ яволявтозельть «Мордовия Республикань туристической сувенир» конкурсонь изницятнень лемест. Истямо пелькстамонть ютавтсть МР-нь Культурань, национальной политикань, туризмань ды архивень тевень министерствась, Туристэнь-информациянь куншкакурось. Конкурсонть вельде эрявсть муемс сувенирэнь сехте вадря продукциянть, тешкстамс производительтнень, кочкамс лия ёнов а молиця сувениртнэнь ды невтемс сынст FIFA-нь болельщикень фестивальсэ.

Подробнее ...
 
Чемпионатонть анокстамга

Мордовиянь Прявтось Владимир Волков декабрянь 16-це чистэ ютавтсь 2018 иень масторлангонь Футболонь чемпионатонтень анокстамга оргкомитетэнь промкс, конасонть важодсть МР-нь Госсобраниянь Председателесь Владимир Чибиркин, Правительствань Председателесь Владимир Сушков, Мордовиясо Главной федеральной инспекторось Михаил Сезганов, Саранск ошонь Администрациянь прявтось Пётр Тултаев, «Оргкомитет Россия – 2018» АНО-нь операционной директорось Дмитрий Годунов.

Подробнее ...
 
Прявтось Московсоль

Мордовиянь Прявтось Владимир Волков декабрянь 18-це чистэ Московсо важодемань коряс вастовкшнось Россиянь Финансонь министрань полавтыцянть Леонид Горнинэнь марто.

Подробнее ...