Рубрикатор

Их знает вся Россия Ине октябрядонть ледстнезь
Ине октябрядонть ледстнезь

Маралянь удомасо удось Россиясь 1917 иень октябрянь 25-це чинть самс. Самай те чистэнть ульнесь Ине Октябрьской социалистической революциясь, властентень састь Ленинэнь прявтсо большевиктне. Феодально-буржуазной оппозициянть вийсэ ушодозь гражданской войнасонть изнямодо ды раськеютконь интервенциянть тапамодо мейле советской властесь ушодсь покштояк покш тевтеема масторонть ламо пингень кадовомастонть ливтеманзо коряс. Исторической нурька шкас теезель ине экономика, изнязель грамотань а содамось, совавтозель Европасо сехте вадря образованиянь системась, кементь миллионт сокицят-видицят ды робочейть теевсть паро специалистэкс – инженерэкс, врачокс, масторлангонь келес содавикс учёноекс, теезель се шканть коряс сехте паро медицина. Советской властесь эрьва ломаненть икелев панжсь ки творческой тевтеемантень. Сон весе ломантнень вейкендинзе, нардынзе классовой ды сословной явоматнень. Масторось эрясь «Весе ломаненть лемс, весе ломаненть лезэс!» девизэнть ало. Общественной эрямосонть ульнесь алкуксонь демократия. Решазель национальной кевкстемаськак. Рузтнэ, эрзятне-мокшотне, мариецтнэ, удмурттнэ, татартнэ, казахтне, украинецтнэ, белорустнэ ды лия раськетне марясть пряст вейкине советской народокс. Те народось изнизе 1941-1945 иетнестэ фашистской Германиянть ды идинзе Европань ды США-нь раськетнень нацистэнь урексчиденть.

 

Советской ломантнень творческой ёрокчидест кортыть истят факттнэ: Ине Отечественной войнань иетнестэ зярыя недляс эли ковс теевсть вооружениянь од модельть – самолётт, танкт, пушкат, ведьга ды ведь алга укшныця кораблят, конат ульнесть седе виевть ятонь оружиядонть. Советской ломантнень вийсэ зярыя иень перть стявтозель допрок калавтозь масторось. 1950-60 иетнестэ СССР-сь лиссь лидерэкс космосонть тонавтнеманть, атомной оружиянть ды атомной энергетиканть виевгавтомань коряс. Неть иетнестэ жо пек вадрялгадсь ломантнень эрямост, виевгадсь социалистической демократиясь, пек кепедевсь масторонть авторитетэзэ. Советской ломанесь, Ю.А.Гагарин, васенцекс ливтясь космосов, теньсэ невтизе: СССР-сь ловови лидерэкс научно-технической ды социально-экономической виевгадомасо.

Советэнь масторонь эрямонь демократической лувось ливтсь истят ломанть, конат шнасть чивалгома ёнксонь мастортнэнь эрямо лувонть ды сялдсть советскоенть. Неть ломантне а видестэ чарькодсть эрямонь лувонть кода минсенек масторсо, истя жо сонзэ томбалеяк. Невтсть пряст советской системань асатыкстнэнь каршо бороцицякс. Сынь эзть чарькоде, мезе теить. Истят ломантне анокольть служамс тиринь масторонь яттнэнень.

Омбоце мировой войнадонть мейле Советской Союзось пурнась научной, экономической, военной ды социальной покш вий ды кармась сэтьмечинь ды стабильностень гарантокс Европасо ды Америкасо. Англиясь, Франциясь, Германиясь, Италиясь, Испаниясь, Даниясь ды европань зярыя лия мастортнэ СССР-нть каршо изнямга вейсэндявсть Евросоюзс ды НАТО-с. Истя самай сэтьмелгавтозельть аладямотне Германиянть ды Франциянть, Германиянть ды Англиянть, Германиянть ды Польшанть, Франциянть ды Англиянть ютксо. Советской ломантнень эрямост паролгадомась ды социалистической демократиянть паро шкась кармавтызе Западонть эсь мастортнэсэ вадрялгавтомс ломантнень эрямонь лувонть, чевтелгавтомс экономической ды социальной сталмонть, келейгавтомс тосонь ломантнень демократической праваст. Виев ды кеме Советской Союзтомонть Европанть бу сезневлизь войнатне, ломантне эрявольть арасьчисэ ды прававтомо.

Советской властень иетнень перть СССР-сэ теезель сехте паро экономической система, кона теевсь общественной собственностенть ды плановой управлениянть юрсо; сехте паро социальной система, кона эрьва ломаненть икеле панжсь певтеме возможностть виевгавтоманть туртов; сехте паро наука… Советской социально-экономической системанть тёкшокс ульнесь Ломанесь, кода ине учёной, инженер, врач, токарь, слесарь, колхозник, артист, писатель, поэт, воин, дипломат, конань мелензэ вансь весе масторлангось.

Советской властесь кастынзе гениальной Маяковскоень, Блоконь, Есенинэнь, Брюсовонь, Северянинэнь, Асеевень, Исаковскоень, Твардовскоень, Тихоновонь, Симоновонь, Сурковонь, Михалковонь, Горькоень, Шолоховонь, А.Толстоень, В.Боковонь, В.Чапаевень, М.Фрунзень, К.Ворошиловонь, С.Буденноень, Г.Жуковонь, А.Василевскоень, И.Коневень, Н.Хрущевонь, Л.Брежневень, С.Королевонь, Ю.Гагаринэнь, Г.Титовонь, А.Николаевень, И.Курчатовонь, М.Келдышень ды ламо лиятнень.

Советской властенть шкасто виевгадсть весе национальной республикатне: Украинась, Белоруссиясь, Азербайджанось, Грузиясь, Молдавиясь, Казахстанось, Узбекистанось ды лият.

1917 иень октябрянь 25-це чистэ ушодовсь Россиянть историясо Сырнень Пингень ловомась. Сон поладовсь 67 иеть, 1985 иенть самс. Советской Сырнень Пингесь невтизе масторлангонтень – сехте покш социально-культурной питнейчикс ловови Ломанесь, ды весе Обществась роботы культурань, эстетикань, художествань, наукань, образованиянь, медицинань, экономикань сферасо сонзэ гуманитарной содамочитнень топавтоманть туртов. Апак кавтолдо мертяно, масторлангось бажи эрямонь социалистической образонть вельмевтемантень, самай сестэ ломантнень учи войнавтомо, кажовтомо паро эрямо.

Ансяк социализманть пингстэ ёмить войнатне, нужачись, коррупциясь, экономической ды финансовой кризистнэ; ансяк социализманть шкасто ломанесь а карми улеме урекс, конань питнезэ онкстави долларсо ды евросо; ансяк социализманть шкасто ёми роботавтомочись ды вандынь чинть кис ломантнень пелемась; ансяк социализманть шкасто тееви алкуксонь демократия ломаненть туртов, неень «демократиянть» таркас; ансяк социализманть шкасто Россиясь тееви сехте виев, мазый, валдо масторокс; ансяк социализманть шкасто обществась ванськавтови салыцятнень ды бандиттнэнь эйстэ; ансяк социалистической эрямонь лувонть шкасто Россиясь а карми аштеме кумажа лангсо ялгатнень ды яттнэнь икеле; ансяк социализманть шкасто лоткавтови материальной сюпавчитнень ды финансонь ресурстнэнь НАТО-в ускомась, ды масторось карми важодеме  эсензэ ды эсь ломанензэ лангс.

1985-1991, 1991-1993 иетнестэ «стяконь ломантне» миизь ды истожизь Ине Россиянь тёжа иень достижениятнень, аволь ансяк Советской Властень.

СССР-сэ 1985-1991, 1991-1993 иетнестэ теезельть инедеяк ине зыянт, конат кандсть покштояк покш ёмавкс весе масторлангонть туртов; СССР-нть каладомадонзо мейле ушодовсь аволь ансяк Россиянть, истя жо чивалгомань цивилизациянть эсь прянь истожамось. Ней масторлангсонть виев СССР-тэменть моли хаос. Производствась, кона тееви прибылень кис, весе ломантнень – сюпавтненьгак, беднойтненьгак, теи урекс.

Научно-технической виевгадомань неень шкань уровенесь топавты ломантнень прявт вешематнень – материальнойтнень ды духовнойтнень. Ансяк тень туртов эряви социально-экономической эрямонь парсте арсезь теема: производствань средстватненень ды планонь экономикантень государствань ули-паронть совавтомась, козонь совить государствань предприятиятне, конат нолдыть обществанть туртов эрявикс продукция. Ансяк сестэ, зярдо обществась ды государствась бажить ломанентень служамо, сонзэ туртов паронь тееме, сы ломантнень туртов паро эрямось.

Россиянтень, кона арси паро эрямодо, васняяк эряви велявтомс весе Россиянь ярмактнень границянь томбальде ды сынст лангс рамамс Западсто ды Востоксто заводт ды фабрикат сехте од ды паро технология марто, кепедемс-строямс масторонть, теемс паро кить, ломантненень максомс эрямо таркат; ломантнень пельде рамамс евротнень ды доллартнэнь; целковоень курсонть вейкендямс долларонь ды евронь курсонтень; лоткавтомс экономиканть калавтыця инфляциянть, омбо масторонь валютанть тевс нолдамс ансяк лия мастортнэнь марто экономикань отношениятнень шкасто. Частной собственностенть а токшемс, кадык сон пельксты государствань собственностенть марто. Явомс сатышка ярмакт наукантень ды культурантень. Лоткавтомс стяконь лезксэнть икелень союзной республикатненень, те сынст тонавты лиянь вийсэ эрямо. Кадык эрить эсь превтнень ды кедтнень лангс кемезь. Лоткавтомс НАТО-нь мастортнэнь экономикантень лездамонть.

Капитализмантень ютамодо мейле ютасть 26 иеть, иеде иес яла седеяк пек кемезеват: аволь се киванть мольтяно. Те кинть поладомась карми кандомо Россиянтень седеяк ламо мелявкст. А машты Ине масторось эрямо Превтеме, лиякс меремс, государствавтомо, кона бу ветяволь сонзэ эрямонь весе ёнкстнэнь «Весе ломаненть лемс, весе ломаненть лезэс!» девизэнть ало.

А.Шаронов,

филологиянь наукань доктор, профессор,

В.Корчеганов,

СССР-нь ды Россиянь Писателень союзонь член, МР-нь Заслуженной поэт.

 

Новости

Путин казизе Волковонь Александр Невскоень орденсэ

Россиянь Президентэсь Владимир Путин тешкстась Указ «О награждении государственными наградами Российской Федерации». Зярыя кементь фамилиятнень ютксо Мордовиянь Прявтось Владимир Волков. Государствань руководителенть Указонзо коряс сонензэ максови Александр Невскоень орденэсь.

Подробнее ...
 
Кулят мэриясто

Ошонь Администрациясо ютась промкс, кона ушодовсь коммунальной техниканть телентень анокстамодо кевкстематнестэ. РФ-нь МЧС-нь ГУ-нь МР-нь представительтне пачтясть, маласо читнестэ Саранскойсэ температурась валги -5 градусос, чить термометрась невти +1, +2 градуст. Карми прамо начко лов. Ошонь прявтось Пётр Тултаев тешкстызе, машинань ветницятне чарыст зярс эзизь полавто. ГИБДД-нь важодицятне мерсть, ветницятненень ютавтыть профилактической кортамот. «Чуваронь-салонь почодыця машинатне телень шкане улест весе зыянов таркатнесэ, сэдтнень вакссо, пандопряв молиця килангтнесэ. Ошонь хозяйствань департаментэнь важодицятне кадык стувтсызь оймсема читнень. Субутась тынк туртов – важодемань чи», – мерсь Пётр Тултаев.

Подробнее ...
 
Литературанть марто вейсэ

А.С.Пушкин лемсэ республикань Национальной библиотекасо ютась «Литература и природа – рука об руку» эрьва иень акциясь. Сон юты колмоцеде ды тедеде алтавсь Экологиянь иентень. Сонзэ ютавтыцятне – Ицялбуень куншкакуронь библиотекась, «Смольный» национальной паркось ды А.С. Пушкин лемсэ библиотекась.

Подробнее ...
 
Сюкпрянь валт

Мордовия Республикань Прявтонть Владимир Волковонь лемс сась благодарность Адмирал Ушаков эскадрань миноносецэнь командирэнть Игорь Никитинэнь пельде. Мордовия Республикань подшефной миноносецэнь экипажонь прявтось республикань руководителентень ёвтась сюкпрянь валт военной моряктнень эрямост ды бытэст коряс мелявтоманть кисэ.

Подробнее ...
 
Сайсть медальть

Аволь умок Московсо ютавтозель «Сырнень сёксь» 19-це весероссиянь агропромышленной выставкась. Тосо эсь продукцияст невтизь Мордовиянь комсте ламо велень хозяйствань предприятиятне. Вана «Хорошее дело» агрогруппась тов усксесь «Мечта» ды «Юбилейное» кавто предприятиятнень продукцияст.

Подробнее ...