Рубрикатор

Их знает вся Россия Героенть подвигезэ, эрямозо ды уцясказо
Героенть подвигезэ, эрямозо ды уцясказо

 Минек ёнкссо чачозенть, Советской Союзонь Героенть Михаил Петрович Девятаевень лемезэ сырнень буквасо тешкстазь отечественной ды масторлангонь историянтень. М.П.Девятаевень «Побег из ада» книгазо кармась аволь ансяк войнань шкань публицистикань пек редявикс картинакс, истя жо од ломантнень туртов эрямос тонавтыця учебникекс.

Тиринь енксонтень вечкемась, эрямонтень бажамось, эрьва чинь важодемась, видечинтень кемемась М.П.Девятаевень туртов ульнесть нравственной прявт нежедьксэкс. Весе оймензэ, весе седеензэ марто М.П.Девятаев свал сюлмазель Мордовиянть – тиринь енксонть марто, примась участия республикань общественной эрямосонть, сеедьстэ вастневкшнесь важодицятнень марто, кортась школасо тонавтницятнень ды студенттнэнь икеле. Сонензэ васенцетнень ютксо максозель Мордовиянь почетной гражданин лемесь, конань кувалма сон кирдсь покш каштанчи.

Михаил Петрович чачсь 1917 иень июлень 8-це чистэ Торбеевасо. Семиясонть ульнесь кемголмовоце эйкакшокс. Авазо, Акулина Дмитриевна, Балашкинтнэнь мокшонь покш семиясто, од шкане Варжеляй велесэнть лововсь сехте мазыекс. Тетязо, Петр Тимофеевич Девятайкин (шкань ютазь Михаил Петрович кармась Девятаевекс сень кувалма, капшазь тензэ макссть справка, косо фамилиясонзо нолдазель ильведевкс), од шкасто саезь важодсь сюпавонь кедьсэ. Тетянзо Михаил Петрович мельсэ а кирди, ансяк евтнесть, сон ульнесь важодеме вечкицякс.

Михаил Петрович кассь пек эряза эйкакшокс. 1923 иень сентябрянь 1-це чистэ, аванзо апак кевксте, мольсь школав, сень лангс апак вано, оршамс ульнесь а мейсэ. Штанатне варявт, пильгтне кепеть. Васенце ды омбоце классо Миша тонавтнесь а мельсэ. Теде башка мешась тонавтыцянтень ветямс урокт, переменасто севнось лия эйкакштнень марто, тюрсь. 1924 иень январьстэ прянзо беряньстэ ветямонть кисэ сонзэ панизь школасто. Аванзо кежей кортамодонть мейле, зярыя чинь ютазь велявтсь школав, невтизе обуцянзо паро ендо, нолдавтызе чумонзо классонть икеле, ды макссь вал парсте тонавтнемс. Вишкинестэ ловнось книгат гражданской войнадонть. Сонзэ героекс ульнесть: Чапаев, Буденный, Пархоменко.

Девятаевтнень семияст васенцетнень ютксоль, кить совасть колхозс. Кизна Миша аванзо марто важодсь паксясо, чокшне ланга вансь алашат. Ветеце классо сонзэ аравтызь старостакс. Лангозонзо путозь кемеманть редязь, сон кармась тонавтнеме седеяк парсте. Куроксто сась шкась, зярдо эрявсь кочкамс сы шкань профессиянть. Теньсэ лездась апак учонь тевесь. Торбееванть велькска ливтясь самолет, сон тейсь круг, омбоце ды озась паксяс. Церакайтне, конатнень ютксо ульнесь Михаил Петрович, прянь полдань синдезь чийсть самолетонть ваксс. Кабинастонть лиссь летчикесь. Кедень пальтосо, прясонзо – шлем, конясонзо покштояк покш сельмукшт. Эйкакштне кургонь автезь ванность ливтниця машинанть. Летчикесь кортась эйкакштнень марто, кевкстнесь, кода сынь тонавтнить. Тесэ Михаил Девятаев кевкстизе: «Кода кармамс летчикекс?» Тонась мерсь: «Эряви вадрясто тонавтнемс, явомс мель спортонтень, улемс а пелицякс». Куроксто самолетось кепедевсь менельс. Михаил Девятаев куватьс вансь мельганзо ды арсесь сень ланга, што летчикень профессиядонть седе вадря ды мельстуиця масторсонть арась.

Летчикекс улемадо меленть марто сон прядынзе сисем класстнэнь. Кармась содамо, летчикекс тонавтнемс эряви Казаньсэ. Авазо мольсь каршо. Ансяк церась эзь пота те мельденть.

1930 иень кизна Бурмистров, Девятаев ды Паршин Торбеевань цератне озасть Харьков-Казань поездэнтень ды омбоце чистэнть уш ульнесть Татарстанонь прявтошсонть. Куроксто муизь авиационной училищанть. Примамонь комиссиясонть Девятаевень абунгавтызь, сонзэ документтнэнь ютксо арасель сисем классонь прядомадо свидетельствась, тень кувалма сонзэ эзизь нолда экзаментнэс. Ансяк церась эзь талакадо, совась речной техникумонь прявтонтень, толковизе лисезь тевенть. Истя сонзэ саизь тонавтнеме.

Речной техникумсонть тонавтнемадонть башка, сон покш мель явсь боксонтень, бороцямонтень ды сокстнэнень. Сёрмадстызе прянзо аэроклубс. Ды весе ютко шканзо алтась вечкевикс тевентень. Техникумонть прядомадо мейле мольсь важодеме волжской пароходс, ансяк седеезэ бажась коштонтень, сэнь менелентень. Мольсь военкоматов ды ёвтызе бажамонзо кармамс летчикекс. Куроксто сон кармась Оренбургонь (Чкаловской) авиациянь училищань курсантокс, конань прядызе 1939 иестэ. Кандсь службанзо Орёлсо, 1941 иень тунда ютавтызь Могилев ошонь Западно-военной округов. Войнадонть икеле авиачастесь ютавтозель Минскоев. Войнань васенце чистэнть ютавтовсь Девятаевень боевой ливтямось. 1941 иень июнень 23-це чистэ саезь сентябрянь 16-це чис М.П.Девятаев тейсь боевой 50 ливтямот, конатнесэ правтсь ятонь 9 самолётт. Тень кисэ сон казезь Якстере Знамянь орденсэ.

Куроксто истребителень полконть, косо служась Девятаев, ютавтызь Московонть ванстомо. 1941 иень сентябрянь 21-це чистэ Девятаевень кармавтызь пачтямс пек эрявикс пакет Юго-Западонь фронтонь окружной войскатнень штабонтень, конань прявтсоль И.С.Конев маршалось. Девятаев тевенть топавтызе стакачивтеме. Тов ливтямсто сон неизе, кода тиринь моданть ланга мольсть фашистэнь войскатне, Михаил Петрович апак кавтолдо каявсь тюремантень. Те тюремасонть Девятаевень ранязель вить пильгс, сон ёмавтсь ламо верь.

Девятаевень пачтизь Саратовав, тосо панжозель авиатортнэнь туртов госпиталь. Девятаевнень тейсть операция ды мейле кучизь шумбрачинь витемань батальонов, конась аштесь Казаньсэ. Те ошсонть сонзэ «кассть» сёлмонзо, тосо васенцеде кепедевсь коштонтень, тосо ютасть од шкань иензэ. Тосо эрясь ды кучнесь тензэ сёрмат Фаина вечкевикс тейтерезэ, конань марто сынь мейле налксесть свадьба.

Шумбрачинть витемадо мейле сонзэ кучизь тонавтнеме военной академияв. Девятаев тонавтнесь амельсэ, аволь весть пшкадекшнесь прявттнэнень: энялдсь кучомс сонзэ фронтов. Сонензэ отказасть. Анокстамонь курсатнень прядомадо мейле сонзэ аравтызь вень бомбардировщикекс. Кармась ливтнеме ПО-2-со. Фашисттнэнь бомбамодонть башка сынь топавтсть санитаронь авиациянь тевтнень, лездасть партизантнэнень, конат ульнесть немецень тылсэ, лездасть томбавозетненень, усксесть оружия, медикаментт, идесть куломадо ды полонс понгомадо Якстере Армиянь боецттнэнь. ПО-2 самолеттнэнь звенась, конанть прявтсо ульнесь М.П.Девятаев, ютавтсь ранявозтнень эвакуациянть коряс 284 ливтямот.

1944 иень январень 14-це чистэ М.П.Девятаевнень мерезель эвакуировамс генералонть, конась стакасто ранязель. Передовоентень пачкодемстэ кармась содамо: генералонть озавтызь летучкас. М.П.Девятаев сайсь имель сасамс сынст. Икелест ятось бомбась чугункань кинь станциянть. Тень лангс апак вано, сон озась эшелононть ваксс ды саизе ранявозенть вагонсто, веть пачтизе госпиталев. Те ине тевенть кисэ Михаил Петрович казезь Якстере Знамянь омбоце орденсэ.

1944 иень тундонть ушодовомсто Михаил Петровичнень макссть направления истребителень полкс, конань прявтсо ульнесь Советской Союзонь колмоксть Героесь, генерал-лейтенантось А.И.Покрышкин. 1944 иень майстэ истребителень полконть кучизь Украинань 1-це полконтень, сон аштесь кемень километрадо фронтонь линиянть эйстэ. Тесэ анокставсь советской войскатнень виев каявомась. М.П.Девятаев гвардиянь старшей лейтенантось коштонь тюрематнесэ правтсь ятонь 9 самолётт.

1944 иень июлень 13-це чистэ Львов маласо коштонь тюремасонть М.П.Девятаевень самолётонзо ледизь, ды сон кирвазсь; летчикесь кирнявтсь парашют марто. Моданть лангс прась ёжовтомо, сонзэ саизь полонс. Пачтизь Абвер разветотделэнтень, мейле – Лодзинской лагерев, косто полонс саезь лия летчиктнень марто бажасть оргодемс, ансяк сынст кундызь ды пачтизь Заксенхаузен куломань легерентень. Тосо лагерень парикмахерэнть лезксэнзэ вельде сонензэ удалась полавтомс «смертник» статусонть «штрафникенть» лангс. Степан Никитенко лементь ало сон кучозель Узедем усиянтень.

1945 иень февралень 8-це чистэ советской 10 военнопленнойтне «Хейнкель-111» немецень бомбардировщиксэнть оргодсть концлагерьстэнть. Самолётонть ветясь М.П.Девятаев. Немецтне кучсть мельгаст истребитель, ансяк менельстэнть сынь эзть муеве. «Хейнкелесь» озась Голлин веленть ваксс (Польша), тосо аштесь 61-це армиянь артиллериянь частесь. М.П.Девятаев пачтясь командованиянтень Узедемсэ важодиця салавань куншкакуродонть, косо ютавтовсть рейхень ракетань оружиянь испытаниятне. Пачтязь кулятне ульнесть видеть.

М.П.Девятаев ды мартонзо оргодицятне пекстазельть фильтрациянь лагерьс. Кавто ковонь перть проверямонть, конань савсь тенст ютамс, сон ловизе «пек кувакакс ды покордыцякс». Сонзэ прядовомадонзо мейле поладызе службанзо Якстере Армиясонть. 1945 иень сентябрясто сонзэ муизе С.П.Королев, конась аравтозель немецень ракетань техникань тонавтнемань коряс советской программань руководителекс, ды тердизе Пенемюндев. Тесэ М.П.Девятаев невтинзе советской специалисттнэненень, косо теевсть ракетань сюлмотне ды косто сынь нолдавсть. Советской васенце ракетанть теемасо лездамонть кисэ Королев 1957 иестэ лездась максомс М.П.Девятаевнень Героень лементь. Михаил Петровичень подвигезэ лия енов а молиця ды вейкине аволь ансяк Ине Отечественной войнасонть, истя жо Мирэнь омбоце войнасонть.

1945 иень ноябрясто Девятаев тусь запасов. 1946 иестэ кармась Казанень речной портонь вокзалонь дежурноекс. 1946 иестэ – катерэнь капитанокс, мейле – суднань прявтокс. Меельце чис эрясь Казаньсэ. Калмазь 2002 иень ноябрянь 24-це чистэ Казанень Арской кезэрень калмазырентень.

1957 иень мартонь 23-це чистэ сонензэ максовсь Советской Союзонь Героень лемесь. Сон истя жо казезь Ленинэнь орденсэ, Якстере Знамянь кавто ордентнэсэ, Отечественной войнань I ды II степенень ордентнэсэ, медальсэ.

М.П.Девятаевень подвигезэ невтезь историянь учебниктнесэ, сонзэ ланга сермадозь повестть, очеркть, ледстнемат. Торбеевасо важоди М.П.Девятаевень лемсэ кудось-музеесь. Казаньсэ ули Девятаевень лемсэ ульця. Сонзэ лементь кандтни ракетань вишка кораблясь. Казаньсэ М.П.Девятаевень калмонзо лангсо путозь бюст. Саранскойсэ путозь «Девятаеву и его товарищам, осуществившим побег из Ада» обелиск. Германиясо сонензэ ды ялганзо туртов путозь кеврунго. Казанень речной техникумось кандтни Девятаевень лемензэ.

Фашистэнь самолетонть-бомбардировщикенть саламось ды немецень полонсто оргодемась – тиринь масторонть кисэ тюремасонть советской ломантнень сехте редявикс ды ине подвигесь.

 

А.М.Бибин,

историянь наукань докторось, профессорось, «НИИ при Правительстве Республики Мордовия»

МР-нь ГКУ-нь историянь отделэнь ведущий научной

сотрудник

 

Новости

Путин казизе Волковонь Александр Невскоень орденсэ

Россиянь Президентэсь Владимир Путин тешкстась Указ «О награждении государственными наградами Российской Федерации». Зярыя кементь фамилиятнень ютксо Мордовиянь Прявтось Владимир Волков. Государствань руководителенть Указонзо коряс сонензэ максови Александр Невскоень орденэсь.

Подробнее ...
 
Кулят мэриясто

Ошонь Администрациясо ютась промкс, кона ушодовсь коммунальной техниканть телентень анокстамодо кевкстематнестэ. РФ-нь МЧС-нь ГУ-нь МР-нь представительтне пачтясть, маласо читнестэ Саранскойсэ температурась валги -5 градусос, чить термометрась невти +1, +2 градуст. Карми прамо начко лов. Ошонь прявтось Пётр Тултаев тешкстызе, машинань ветницятне чарыст зярс эзизь полавто. ГИБДД-нь важодицятне мерсть, ветницятненень ютавтыть профилактической кортамот. «Чуваронь-салонь почодыця машинатне телень шкане улест весе зыянов таркатнесэ, сэдтнень вакссо, пандопряв молиця килангтнесэ. Ошонь хозяйствань департаментэнь важодицятне кадык стувтсызь оймсема читнень. Субутась тынк туртов – важодемань чи», – мерсь Пётр Тултаев.

Подробнее ...
 
Литературанть марто вейсэ

А.С.Пушкин лемсэ республикань Национальной библиотекасо ютась «Литература и природа – рука об руку» эрьва иень акциясь. Сон юты колмоцеде ды тедеде алтавсь Экологиянь иентень. Сонзэ ютавтыцятне – Ицялбуень куншкакуронь библиотекась, «Смольный» национальной паркось ды А.С. Пушкин лемсэ библиотекась.

Подробнее ...
 
Сюкпрянь валт

Мордовия Республикань Прявтонть Владимир Волковонь лемс сась благодарность Адмирал Ушаков эскадрань миноносецэнь командирэнть Игорь Никитинэнь пельде. Мордовия Республикань подшефной миноносецэнь экипажонь прявтось республикань руководителентень ёвтась сюкпрянь валт военной моряктнень эрямост ды бытэст коряс мелявтоманть кисэ.

Подробнее ...
 
Сайсть медальть

Аволь умок Московсо ютавтозель «Сырнень сёксь» 19-це весероссиянь агропромышленной выставкась. Тосо эсь продукцияст невтизь Мордовиянь комсте ламо велень хозяйствань предприятиятне. Вана «Хорошее дело» агрогруппась тов усксесь «Мечта» ды «Юбилейное» кавто предприятиятнень продукцияст.

Подробнее ...