Рубрикатор

Их знает вся Россия Проект Отяжеле ёнксонь геройтнеде
Проект Отяжеле ёнксонь геройтнеде

 

«Защитники Отечества, уроженцы Атяшевской земли» – истя лемдеви научно-исследовательской проектэсь, конань аноксты краеведэсь, профессорось, историянь наукань докторось Олег Иванович Марискин. Аволь умок минь вастовинек сонзэ марто ды энялдынек ёвтнемс те арсевкстэнть седе келейстэ.

 

– Неень шкань государстванть политикасо ули пек паро ёнкс – те патриотизмань меленть-арсеманть кепедемась, Россиянь войнань историянть, икелень шканть тонавтнемась, тиринь ёнксонь изницятнень ланга содамочитнень кастомась. Ялатеке сеедьстэ учёнойтне ёвтнить тенек сеть изницятнеде, конатне ульнесть личностекс, покш ломанекс, ды стувтнить ледстямс «вишка» участниктнень – солдаттнэнь, офицертнэнь. Сындест темась те шкас ваннозь а пек келейстэ. Секскак Отяжелень райононь Администрациясь ды Отяжелень райононь Социальной касомань-кемекстамонь фондось арсесть «Защитники Отечества, уроженцы Атяшевской земли» научно-исследовательской покш проект. Сонзэ смустезэ – лангс таргамс XVII пингестэ саезь XX пингес весе историянть, косо ды зярдо Отяжеле ёнксонь эрицятне тюрсть тиринь масторост кисэ, кодамо войнасо сынь ульнесть, косо невтизь пряст героекс. Те проектэнть вийсэ кастови эрицятнень патриотизмась ды эсь ёнксонть кисэ каштанчись.

Отяжеле ёнксось пек сюпав тиринь масторонтень изницятнень кастомасо. Теде кортыть археологтнень муевкстнэ, тюрицятнень калмазыртне. Иван Грозноень шкасто минек воинтнэ 1552 иестэ якасть Казанень саеме. Ливононь войнастонть (1558-1583) Иван Грозный пурнакшнось специальной отрядт эрзятнень ютксто – тозонь совакшность бортниктне ды мурзатне.

XVI пингень омбоце пельксстэнть ды XVII пингенть ушодовомсто тиринь масторонь государственной границянть ванстомо, конась сестэ ютась Отяжеле ёнксканть, тердезельть казакт, ледницят, пушкарть рузонь ломантнень ютксто; мурзатне, станичниктне ды воротниктне (ортань ванстыцятне) пурназельть тосконь эрицятнень ютксто. 1612 иестэ эрзянь князесь Баюш Розгильдеев куроксто пурнась эстензэ Алатырень мурзат, эрзят, ды мейле сынь изнизь ногайтнень, конатне кайсевсть Арзамасонь ды Алатырень ёнкстнэс. Сестэ полонсто олякстомтозельть 7 тёжат ломанть. Розгильдеев войсканзо марто идинзе Мининэнь ды Пожарскоень раськень ополчениянь тылтнэнь, лездась олякстомтомс Московонть интервенттнэнь эйстэ.

XVIII пингестэ рузонь бояртнэ ды дворянтнэ войнань ды гражданской служамонть кисэ кармасть казевеме вотчинасо ды поместьясо Отяжелень ёнкстнэва. 1688 иестэ бояронтень ды воеводантень Алексей Семенович Шеиннэнь казезельть Покровское ды Будный Майдан (неень шкань Шейн-Майдан велесь). 1696 иестэ Петр I Шеинэнь, Азовонь крепостенть саемань кисэ, казизе генералиссимусонь лемсэ, васенцеде Россиянть историясо.

1705 иестэ истя жо Петр I армиянть ды флотонть пурнамс саиль служамо рекрутт. Россиясо 1874 иестэ саезь кармасть саеме служамо сокицятненьгак-видицятненьгак. Войнань шкасто пурнавильть формированият дворянтнэстэ, ошонь эрицятнестэ ды лия ломантнестэ.

Пек ламо ломанть тердевсть ополченияс 1812 иень Отечественной войнастонть. 1812 иестэ Алатырень ды Орданьбуень уездтнэнь эрицятнестэ (эйзэст сестэ совиль Отяжеле ёнксось) пурназель Симбирскоень ополчениянь васенце пехотань полкось. Сон тюрсь 1813-1814 иетнестэ аволь ансяк Россиясо – омбо масторсояк.

Симбирскоень лия ополчениясо минек земляктне тюрсть Севастополенть кисэ 1853-1856 иетнень Крымень войнанть шкасто. Регулярной войскатнень ютксо олякстомтсть Болгариянть Рузонь-туркань войнанть шкасто, идесть Порт-Артуронть, тюрсть Мукденэнть чиресэ ды Цусимасо Рузонь-япониянь 1904-1905 иетнень войнасонть.

1914 иестэ Россиясь совась масторонь Васенце войнас.1914 иестэ саезь 1917 иес Орданьбуень ды Алатырень уездтнэстэ саезельть цёратнестэ 50%. Отяжеле ёнксонь эрицятнестэ ламотне невтизь пряст виев изницякс ды казезельть орденсэ ды медальсэ. Истя, Аловань унтер-офицерэсь А.Т. Сорокин казезель ниле степенень Георгиень крестсо ды 4-це степенень «За храбрость» медальсэ.

Стака шкакс кармась Россиянь раськетнень туртов 1941-1945 иетнень Ине Отечественной войнась. Те шкастонть Отяжелень ды Козловкань районтнэстэ саезельть 15 тёжат 587 ломанть, ламо од цёрат ды тейтерть тукшность войнав эсь олясо. Минек земляктне тюрсть Московонть, Сталинградонть ало, Крымсэ, Кавказсо, Ленинградсо, олякстомтсть Белоруссиянть, Украинанть, Прибалтиканть, Европанть, сайсть Берлинэнть.

Героизмаст кисэ  Отяжеле ёнксонь 5 тёжадо ламо эрицятнестэ казезельть орденсэ ды медальсэ, 11-тненень максозельть Советской Союзонь Героень лемть. Покш питне пандсть Отяжелень эрицятне Изнямонть кисэ. Немецтнень каршо тюремстэ чавовсть ды ёмасть 8 тёжат 453 ломанть. Эйстэст кулявтомо ёмасть 3 тёжат 464 эрицят, кулось госпитальсэ ранатнеде 431 ломань. Войнань паксятнес чавовсть 4558 солдатт ды офицерт. Ламотне фронтсто велявтсть инвалидэкс.

Ансяк войнатне теде мейле эзть прядово. Покш войнатнеде мейле ушодовсть «вишкинетне». Отяжеле ёнксонь 129 солдатт ильтязельть Афганистанов, 18-тне эйстэст казезельть орденсэ ды медальсэ, 5-тне – куломадост мейле.

«Защитники Отечества, уроженцы Атяшевской земли» проектэнть юрсо карми ветявомо покш робота региононь ды лия ошонь архивтнесэ. Сынст даннойтнень коряс анокстави информациянь банк, козонь совить кулятне весе войнатнень Отяжелень велетнестэ участниктнеде. Седе тов те информациясь карми саевеме Отяжелень посёлкасо Ине Изнямонь 40 иетнень площадень реконструкциянть ютавтома шкасто. Проектэнть анокстамсто истя жо арсеви нолдамс «Защитники Отечества, уроженцы Атяшевской земли» коллективной монография, козонь совить весе даннойтне войнань участниктнеде.

Отяжелень райононь Социальной касомань-кемекстамонь фондось ды теке райононь Администрациясь энялдыть весенень а ютамс вакска ды лездамс те проектэнть топавтомасо, кучомс тенек эсенк роднянь-раськень, тиринь масторонь изницятнень лемест-фамилияст ды сындест ёвтнемат. Биографиятнень, казнетнеде документтнэнь, фотографиятнень, инескеть, кучодо почта эли электронной почта вельде.

Почтань адресэсь: 431823, Мордовия Республика, Отяжеле посёлка, Центральной ульця, 6-це кудо. МР-нь Отяжелень райононь Социальной касомань-кемекстамонь фондось.

Электронной почтась: Этот e-mail адрес защищен от спам-ботов, для его просмотра у Вас должен быть включен Javascript – проектэнть научной прявтось Олег Иванович Марискин; Этот e-mail адрес защищен от спам-ботов, для его просмотра у Вас должен быть включен Javascript – фондонть Советэнь прявтось Елена Владимировна Маринина.

Истя жо «Защитники Отечества, уроженцы Атяшевской земли» проектэнть анокстыцятне энялдыть максомс ярмаконь лезкс сонзэ куроксто топавтомга.

М.Девятова

 

Новости

«СЯТКО» ДЫ «МОКША» журналтнэнень – 90!

Неть читнестэ МР-нь Пресс-центрасо ютась промкс, кона алтавсь «Сятко» ды «Мокша» журналтнэнь 90 иень топодемантень. Мокшонь кельсэ «Валда ян» журналось лиссь Пензасо, эрзянь «Сяткось» – Самарасо. Самай неть изданиятнесэ лиснесть минек ушодыця поэттнэнь ды писательтнень произведенияст.

Подробнее ...
 
Инжетне содавтовить эрзятнень эрямо коест марто

Мордовия Республикасо Эрзянь культурань ды ремеслань куншкакуронь теемань коряс дизайнерэнь арсемань объектэкс кармась Отяжелесэ пичень чочксто чапозь сокицянь-видицянь семиянь кудось. Сонзэ вакссо анок уш баняськак, кона уштови «раужосто», тунда путневить эмеж марто пандяткак.

Подробнее ...
 
Саранскойсэ панжови приют

Саранскойсэ панжови приют азортомо ракшатнень туртов. Кода пачтясть ошонь администрациясто, ней уш ули тень туртов таркаяк. Панжома шкась – те иень июнь ковс.  Приютонтень кармить кельгеме 100 каткат ды 300 кискат.

Подробнее ...
 
Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...