Рубрикатор

Их знает вся Россия Масторлангонь гений
Масторлангонь гений

 

Тедеде топодсть 140 иеть ине скульпторонть Степан (Нефедовонь) Эрьзянь  чачома чистэнзэ саезь, кона ловови эрзянь раськень каштанчикс. Эрзянь велесэ чачозь, сон эсь ёрокчинзэ вельде ютынзе эрямонь весе стакачитнень ды арась масторлангонь культурань представительтнень ваксс. Скульпторонть Эрьзянь эрямонь ды творчествань кидензэ минь кортынек  профессоронть Владимир Кузьмич Абрамовонь марто.

 

Владимир Кузьмич, ине скульпторонть омбоце тиринь ёнксокс ловови Аргентинась ды те шкадонть минь содатано ламо. Мезе содатадо эрзянь гениенть творческой кинзэ ушодовомадо?

– Тевесь сеньсэ, скульпторонть творчестванзо исследовательтне содылизь сонзэ уш аволь од ломанекс, алкуксонь художникекс. Эйкакшпоранзо ды тевтеемань васенце шканть домкасто ванкшнызе ансяк К.Г.Абрамов. Сон алтась Эрьзянь эйкакшпоранзо тонавтнемантень зярыя иеть: вастневсь малавиксэнзэ, Баева велень эрицятнень, пазавань артыцятнень марто, конат содылизь Эрьзянь. Сонзэ валонзо коряс, сы шкань скульпторось ушодсь рисовамо колмо иестэ саезь. Нама, конёвонзо ды карандашонзо арасельть. Рисовась лаз ланга эсксэ, порсо ды  уголиясо, мезе кедезэнзэ понгиль. Тонавтнесь Ардатовань уездэнь Алтышева велесэ. Эсь порань ялганзо ютксто Степан эзь явово а содамочинь, а тонавтнеме бажамонь коряс, ансяк вейкесэ сон явовсь – вечкиль ды маштыль рисовамо. Те меленть шнызе школасо тонавтыцязояк. Эште школасо тонавтнемстэ Нефедовнень энялдсть артомс пазава Алтышевань церькованть туртов. Школанть прядомадо мейле Степанонь ускизь Алатырев лелянстэнь, зярс- бути сон тонавтнесь пазавань артыцятнень пельде. 1893 иестэ Эрьзя тусь Казанев ды кармась тонавтнеме П.А.Ковалинскоень пазавань артыцянь мастерскойсэ. 1893-1897 иетнестэ сон артсь-мазылгавтсь ламо церькова потмот Равчирень оштнесэ ды велетнесэ, сон теевсь ёроков пазавань артыцякс. Ансяк церьковань артомась сонзэ мелензэ уш эзь вите, Степан тусь тонавтнеме Московов.

Степан Дмитриевичень туртов прявт ошсо эрямось ульнесь аволь шождынекс?

– Строгановской художественно-промышленной училищав тонавтнеме Нефедов иень коряс эзь понго, секс сон кармась якамо те училищань чокшнень курсатнес, теде мейле саизь тонавтнеме Московонь живописень, ваяниянь ды зодчествань училищав. Степан Дмитриевич секе шкастонть теевсь содавиксэкс пек паро фотографонть, итальянецэнть Даниэль Тинелли марто.

Натурань классонть прядомадо мейле сон ютась скульптурань классос ды, окойники, сась мельс: сонзэ призваниязо – скульптурась. Тонавтнема шкастонть важодсь фотоательесэ, васня – ретушерокс, мейле – фотографокс. Те зарплатанть лангс сон эрясь. 1906 иень тунда тусь фотоательестэнть ды панжсь эсензэ мастерской скульптурань портретэнь теемань коряс. Ансяк заказтнэде аламольть. Се шкастонть Московсо скульптортнэде ламольть, Нефедовонь лемесь жо сестэ эште а пек содавиксэль. Таго ушодовсь ярмаконь асатомась.

Секс скульпторось сась мельс кадомс Московонть ды туемс Миланов?

– Италияв скульпторонть тердизе Тинелли. Сон мельспаросо вастызе Эрьзянь ды невтнинзе тензэ масторонь сехте паро музейтнень.  Зярыя шка сон эрясь Лавено ошсо Тинеллинь кедьсэ. Мейле тусь эсь олясо эрямо Миланов. Васень шкастонть пек стака тензэ ульнесь, эдь итальянской келенть а содылизе. Тесэ Эрьзя вастовсь Россиясо чачозь ломань марто, ды тона саизе сонзэ важодеме Миланонь вейке типографияв. Кармась получамо ярмакт, эрямоськак седе шождалгадсь, ды сон кундась скульптурань тееме. Весе стакачитнень цидярдомадо мейле васенце теевксэкс кармась «Тоска» автопортретэсь. Зярыя шкань ютазь сон теевсь содавиксэкс ломбардской художественной музейтнень инспекторонть Уго Неббиа марто. Эсь тевень содыця специалистэсь, искусствань кепедицясь васень варштавкссо редизе эмигрантонть лия ёнов а молиця ёрокчинзэ ды мерсь Эрьзянень невтемс важодевксэнзэ изобразительной искусствань выставкасо, кона ютавтовсь 1909 иестэ Милансо. Роботанзо пек тусть мельс. Ды сонзэ кармасть тердтнеме выставкав Римев, Флоренцияв, Парижев. «Равчирень вирень генийденть» славась пачкодсь Россиявгак.

Нама, Эрьзя кемсь, сонзэ изнявкстнэнень Россиясо путыть покш питне?

– Мезеяк истямо арасель. Ансяк 1914 иестэ сонензэ сась тердема Алатырень ошонь управасто «самс ды эстензэ ваномс зданиянть строямонзо мельга, козонь мейле кельгстявить сонзэ скульптуратне». Эрьзя кучсь  каршо вал – алтась самс. Тунда сыргась тиринь масторов. Самонзо редизь ансяк жандарматне, кавто недлят кирдизь уголовниктнень ютксо полицейской  каталажкасо. Арестовизь рузонь эмигранттнэнь пельде малавиксэст туртов сёрмань ускомань кис. Мейле ушодовсь Германиянть ды Австро-Венгриянть марто войнась ды Алатырьсэ музеень строямось лоткавтозель. Тесэ ушодовсь революциясь, мейле – Гражданской войнась. Вачо масторсонть искусствантень покш мель эзь явово. Неть иетнестэ Эрьзя эрясь Московсо, Екатеринбургсо, Новороссийскойсэ, Геленджиксэ, Батумисэ, Бакусо ды таго велявтсь Московов.

Курок мастерэсь таго тусь Россиясто. Мейсэ границянь томбале зярыя иень перть эрямонь тувталось – скульптуратнень туртов материалонь вешнемась?

– Московсо Эрьзя совась Рузонь скульпторонь обществантень ды участвовась выставкасонть, кона 1926 иень апрельстэ панжовкшнось Исторической музеень зданиясонть. Тесэ скульптуранзо неинзе просвещениянь наркомось А.В.Луначарский. Теде мейле сон тердизе скульпторонть эстензэ ды мерсь тензэ ардомс Францияв советской искусствань изнявкстнэнь невтеме. Парижде мейле Эрьзя эсь важодевксэнзэ марто пачкодсь Аргентинав, Буэнос-Айресэв. Тесэ самай муизе эсь скульптуратнень туртов материалонть – квебрахо ды альгарробо чувттнэнь, конат пек нардевть ды а наксадыть. Советской шкасто сермадсть, паряк, те материалонть кувалма Эрьзя кирдевськак Аргентинасо зярыя иес. Скульпторось сехте паро роботанзо зярдояк эзь микшне, свал бажась велявтомс кудов ды каземс скульптуранзо эсь раськенстэнь.

Тиринь масторов кись кувакаль?

– Эрьзя велявтсь Россияв ансяк 1950 иень сёксня 74 иесэ ды ускинзе мартонзо малав весе, мезе тейсь Аргентинасо. МАССР-нь Художникень союзонь председателенть В.Хрымовонь вельде сон пшкадсь Мордовиянь правительствантень энялдома марто – явомс тензэ эрямо тарка ды скульптуранзо невтнемань туртов тарка. Ансяк сестэнь правительствась эзизе маря энялдоманзо. Теке энялдоманть марто пшкалесь Чувашской АССР-нь Алатырь ошонь прявттнэнень, тонаткак мель тензэ эзть яво. Окойники, Московсо  Эрьзянень явсть эрямо тарка ды мастерской. Ансяк Сталинэнь куломадо мейле Эрьзянь талантонзо вечкицятнень лезксэст вельде 1954 иень июньстэ панжовсь сонзэ роботанзо васенце выставкась. Московсо скульпторонть официальной признаниядонть мейле, сонзэ аноколь примамс Мордовияськак. Эрьзя жо отказась. 1957 иестэ пшкадсь энялдома марто Ленинградсо Рузонь музеентень, штобу примавлизь ванстомс сонзэ важодевксэнзэ, те шкас тосо ванстовить сехте вадря произведениянзо. 1959 иень ноябрянь 23-24-це читнень ютксо вестэнть Степан Дмитриевич кулось.

Кода, тынк койсэ, неень шкасто кандовить Степан Дмитриевич Эрьзянень?

– Эрзя-мокшонь весе деятельтнень ютксо С.Д.Эрьзя теевсь, паряк, сехте содавиксэкс кода омбо масторсо, истя жо Россиясояк. Сонензэ алтавсь литературной памятникесь – К.Г.Абрамовонь художественной трилогиясь, кона аволь весть нолдавкшнось покш тиражсо. Скульптордонть документальной книгат ды статьят сёрмадсть: У.Неббиа, А.Кан, Л.Орсети, Б.Н.Полевой, Г.О. ды В.Г.Сутеевтне. Ю.К.Ефремов, Н.С.Сазанов, Н.И.Шибаков ды лият. Эрьзянь портретэнзэ артызе Н.Н.Жуков, скульптуранзо теизе С.Т.Коненков. Весе те корты вейкеде, 1970-1980 иетнестэ Эрьзянь лемезэ масторсонть пек парсте содавиксэль. Мастерэнть 140 иетненень государствань ды республикань ярмакто витнезель сонзэ лемсэ музеесь. Нама, те весе паро. Ансяк меельце иетнестэ сеедьстэ вастневить истят тевть, зярдо од ломантне а содасызь кие те Эрьзя. Невтемакс, кавтошка иеде икеле ютавтовсь «Россиянь содавикс финно-угорской деятельтне» акциясь. Кевкстнезь эрзя-мокшонь од ломантне Степан Дмитриевичень эзизь ёвта. Те пек апаркстомты ойме ежонть. Истят ломантеде ледстнематнень эряви ёвтнемс поколениясто поколенияс.

Светлана Пивкина

 

Новости

Путин казизе Волковонь Александр Невскоень орденсэ

Россиянь Президентэсь Владимир Путин тешкстась Указ «О награждении государственными наградами Российской Федерации». Зярыя кементь фамилиятнень ютксо Мордовиянь Прявтось Владимир Волков. Государствань руководителенть Указонзо коряс сонензэ максови Александр Невскоень орденэсь.

Подробнее ...
 
Кулят мэриясто

Ошонь Администрациясо ютась промкс, кона ушодовсь коммунальной техниканть телентень анокстамодо кевкстематнестэ. РФ-нь МЧС-нь ГУ-нь МР-нь представительтне пачтясть, маласо читнестэ Саранскойсэ температурась валги -5 градусос, чить термометрась невти +1, +2 градуст. Карми прамо начко лов. Ошонь прявтось Пётр Тултаев тешкстызе, машинань ветницятне чарыст зярс эзизь полавто. ГИБДД-нь важодицятне мерсть, ветницятненень ютавтыть профилактической кортамот. «Чуваронь-салонь почодыця машинатне телень шкане улест весе зыянов таркатнесэ, сэдтнень вакссо, пандопряв молиця килангтнесэ. Ошонь хозяйствань департаментэнь важодицятне кадык стувтсызь оймсема читнень. Субутась тынк туртов – важодемань чи», – мерсь Пётр Тултаев.

Подробнее ...
 
Литературанть марто вейсэ

А.С.Пушкин лемсэ республикань Национальной библиотекасо ютась «Литература и природа – рука об руку» эрьва иень акциясь. Сон юты колмоцеде ды тедеде алтавсь Экологиянь иентень. Сонзэ ютавтыцятне – Ицялбуень куншкакуронь библиотекась, «Смольный» национальной паркось ды А.С. Пушкин лемсэ библиотекась.

Подробнее ...
 
Сюкпрянь валт

Мордовия Республикань Прявтонть Владимир Волковонь лемс сась благодарность Адмирал Ушаков эскадрань миноносецэнь командирэнть Игорь Никитинэнь пельде. Мордовия Республикань подшефной миноносецэнь экипажонь прявтось республикань руководителентень ёвтась сюкпрянь валт военной моряктнень эрямост ды бытэст коряс мелявтоманть кисэ.

Подробнее ...
 
Сайсть медальть

Аволь умок Московсо ютавтозель «Сырнень сёксь» 19-це весероссиянь агропромышленной выставкась. Тосо эсь продукцияст невтизь Мордовиянь комсте ламо велень хозяйствань предприятиятне. Вана «Хорошее дело» агрогруппась тов усксесь «Мечта» ды «Юбилейное» кавто предприятиятнень продукцияст.

Подробнее ...