Рубрикатор

Их знает вся Россия ЛЕМБЕ ВАЛТ ПРОФЕССОРОНТЕНЬ, ПОЭТЭНТЕНЬ ДЫ СЁРМАДЕЕНТЕНЬ
ЛЕМБЕ ВАЛТ ПРОФЕССОРОНТЕНЬ, ПОЭТЭНТЕНЬ ДЫ СЁРМАДЕЕНТЕНЬ

 

Июнень 22-це чистэ Национальной драмань театрасонть ютавтовсь мельстуиця вастовома. Тувталоськак кенярксоволь: тесэ тешкставсть Н.Ф.Мокшинэнь 80 иень юбилеезэ ды наукань-тонавтомань тевдееманзо 60 иетне. Николай Федорович – историянь наукань доктор, профессор, РСФСР-нь культурань заслуженной важодиця, МР-нь наукань заслуженной деятель. Научной важодевксэнзэ кисэ Николай Федоровичнень максозь МР-нь Государственной премиянь лауреатонь, кавксть – МР-нь Прявтонь премиянь лауреатонь лемтне ды лия казнетне. Н.Ф.Мокшин – рузонь Географиянь вейсэндявксонь Почетонь член, те вейсэндявксонь Старейшинань советэнь член.

Театрань мазый залонтень пурнавкшность республикань властень органонь важодицятне, профессоронть марто вейсэ важодицятне, тонавтницянзо, ялганзо, малавиксэнзэ-вечкевиксэнзэ. Кенярксчинь чокшненть ветясь Н.Ф.Мокшинэнь тейтерезэ, Н.П.Огарев лемсэ МГУ-нь юридической факультетэнь деканось – Ю.Н. Сушкова.

Пурнавозетненень васняяк невтезель аволь покш фильма, конасонть Николай Федорович ёвтнесь эйкакшпорадонзо, конась савсь войнань стака иетнес, Фёдор Захарович тетядонзо, конась 1942 иестэнть маштовсь Ленинградонть кисэ тюремасонть. Авазо, Елена Артемьевна, пингензэ перть важодсь Иванцева велесэ чачтома кудонь прявтокс, трясь-кастсь ниле эйкакшт. Фильмасонть невтезель ученоенть эрямонь ды важодемань кизэ.

Теде мейле поздоровонь лембе валонь ёвтамо Мордовиянь Прявтонть, МР-нь Госсобраниянть, Республикань Правительстванть, «Единая Россия» партиянь региононь отделениянть пельде сценанть лангс лиссь МР-нь Госсобраниянь председателесь В.В.Чибиркин. Владимир Васильевич ёвтызе, Николай Фёдорович ламо тейсь минек республикасо ды масторсо целанек науканть виевгавтомга. Сонзэ таликанзо вельде домкасто тонавтнезь финнэнь-угрань раськенть ундокстнэ: кода эрясть раськетне кезэрень шкатнестэ, войнань иетнестэ, мейсэ эри раськесь течи. Н.Ф.Мокшинэнь покш путовксозо эрзя-мокшонь раськенть Россиянь лия раськетнень марто вейсэндявомань 1000 иетнень тешкстамосонть. Сонзэ научной важодевксэнзэ содавикст аволь ансяк республикасонок ды масторсонок, истя жо весе масторлангонть келес.

Юбилеень тешкстыцянтень те чистэнть макссть покш казнеть: Славань II-це степенень орден, МР-нь Госсобраниянь ды Правительствань Почетонь Грамотат.

Теде мейле ловнозельть поздоровонь валтнэ, конатнень кучинзе Саранск ошонь округонь администрациянь прявтось П.Н.Тултаев. Арсесь чачома чинь тешкстыцянтень кеме шумбрачи, уцяскав эрямо ды виев важодема республиканть ды масторонть лезэс. Н.Ф.Мокшиннэнь казезь Саранск ошонь Администрациянь прявтонть Благодарностесь ды ледстнемань казне.

Те кенярксов чистэнть залсонть ульнесть Николай Федоровичень тонавтницянзояк, конатне поладызь наукасо важодеманть, ламо теить тиринь раськенть тонавтнемга ды ванстомга. Сынст пельде юбиляронтень поздоровт ёвтась Эрзя-мокшонь раськень регионъютконь общественной вейсэндявксонь исполнительной комитетэнь председателесь, профессорось, историянь наукань докторось А.С.Лузгин. Тешкстызе, те чистэнть театрань сценанть лангсо чествовить республикань содавикс ломаненть.

–2010 иестэ, зярдо мольсть анокстамот эрзя-мокшонь раськенть Россиянь лия раськетнень марто вейсэндявомань 1000 иетнень тешкстамонтень, кемекстазель решения нолдамс «Эрзя-мокшонь раськень пародояк паро ломантне» книгань сериянть. Те тевентень апак кавтолдо кундась Николай Федорович Мокшин. Ды, ёвтаса, икелензэ путозь тевенть топавтызе пек парсте. Сон истя жо анокстась книгань серия «Мой край Мордовский» ды ламо-ламо лият, – ёвтнесь Александр Степанович. – А эряви сёпомс, содавикс учёноенть шкинемань кинзэ лангсо ульнесть аволь аламо пирявкст. Ансяк сонзэ виев обуцязо лездась шождасто печтямс весе стакачитнень.

Ламо лембе валт А.С.Лузгин ёвтась Николай Федоровичень семиядонзо. Александра Максимовна низэ – истя жо эрзява. Сон тейсь покш путовкс Мордовиянь науканть виевгавтомантень. Александра Максимовна  пек парсте содасы немецень келенть, неть содамочитнень лангс нежедезь, немецень кельстэнть сон ютавтсь пек эрявикс материалт минек раськеденть. Шнамонь валт ёвтазельть Елена Николаевна ды Юлия Николаевна тейтерензэ ланга, кавонест – наукань докторт.

Александр Степанович ёвтызе, Н.Ф.Мокшин марто пек мельспаро кортамс, сонзэ содамочинзэ дивавтыть эрьванть.

Видеопоздравленият Н.Ф.Мокшиннэнь кучсть Россиянь келес содавикс ученойтне.

Эряви тешкстамс, Николай Федорович Мокшинэнь трудонь книжкасонзо ансяк вейке сёрмадовкс – 1962 иестэнть саезь кармась важодеме Мордовиянь государственной университетсэнть. 45 иень перть сон топавты кафедрань прявтонь тевтнень. Сонзэ лекциянзо покш мельспаросо кунсолыть студенттнэ.

Университетэнь важодицятнень пельде поздоровт ёвтась Н.П.Огарев лемсэ МГУ-нь ректорось С.М.Вдовин.

– Течи тешкстави аволь ансяк семиянь, а весереспубликань ды мик весероссиянь кенярксчись, – ушодызе кортамонзо Сергей Михайлович. – Эдь Николай Федоровичень содасызь аволь ансяк эсенек республикань эрицятне, сонзэ томбалеяк. Сон весе эрямонзо максы тиринь раськентень, эрзятнень-мокшотнень ундоксост ванкшномантень-тонавтнемантень, од ломантнень тиринь масторонтень вечкеме тонавтомантень. Николай Федорович Мокшин 60 иеть алтась Мордовиянь госуниверситетэнтень. А онкстави сонзэ путовксозо республикань науканть виевгавтомантень.

Университетэнть пельде Н.Ф.Мокшиннэнь казсть «Пингень сюлгамо» картина ды цецянь мазый пусмо.

Кенярксчинтень пурнавозтненень эште весть ледстизь, 2012 иестэнть саезь Н.Ф.Мокшин сови Рузонь Географиянь вейсэндявксонь Старейшинань советэнтень, весемезэ тов совить весе Россиястонть ансяк 15 ломанть! Те вейсэндявксонть пельде поздоровт ёвтась РГО-нь Мордовиянь региононь отделениянь прявтось А.А.Ямашкин. Тешкстызе, маласо чистэнть Николай Федоровичнень пачтясызь Рузонь географиянь вейсэндявксонть пельде Почетонь Грамотанть, конань тешкстасы РФ-нь Оборонань министрась С.К.Шойгу.

Ламо лембе валт юбиляронтень ёвтасть мартонзо важодицятне – Н.П.Огарёв лемсэ МГУ-нь Историко-социологиянь институтонь деканось Н.М.Арсентьев, Россиянь историянь кафедрань важодицятне. Поздоровонь лембе валт ёвтасть Эрзя-мокшонь раськень регионъютконь общественной организациянь председателесь, Н.П.Огарёв лемсэ МГУ-нь профессорось Ю.А.Мишанин, Раськень культурань институтонь прявтось Т.Н.Сидоркина, «Эрзянь правда» ды «Мокшень правда» газетатнень прявт редактортнэ Н.И.Петрушкин ды И.С.Лушкин. Паро мельсэ тешкстасынек, Н.Ф.Мокшин сеедьстэ сакшны инжекс раськень кельтнесэ лисниця газетатнень редакциятнес, свал анок максомс толковамот раськень культуранть, койтнень-кирдатнень, историянть марто сюлмавозь кевкстематнень коряс.

Кенярксчинть тешкстамо сакшность инжеть Николай Федоровичень чачома ёнкстонзояк – Нижегородской ёнксонь Лукояновань райононь Иванцева велестэ. Усксть мартост казнеть чачома таркатнестэ.

Николай Федоровичень республикасонок ды сонзэ томбале ламот содасызь кода ученоенть, сон – содавикс историк ды этнограф, зярыя научной обществань член, ламо книгань автор. Ансяк, паряк, аволь весе содасызь Н.Ф.Мокшинэнь кода поэтэнть. Кенярксчинь чокшнестэнть Николай Федоровичень нуцьканзо, Вероника ды Ольга, ловность эрзянь стихть, конатнень сёрмадынзе сынст покштяст. Неявсь, Николай Федорович кадовсь покш мельспаросо.

Ёвтасынек, Н.Ф.Мокшинэнь стихензэ лангс сёрмадозь моронь кавто дискт. Неть моротнень содасызь аволь ансяк Мордовиянь эрицятне, истя жо томбаленсетнеяк. Весе моротне вадрят, мазыйть, седейс токицят. Сынь вечкевить весенень, кить явить мель эрзя-мокшонь раськень культурантень ды вечксызь музыкально-поэтической творчестванть. Николай Федоровичень стихензэ лангс сёрмадозь моротне сеедьстэ гайгить покш кенярксчитнестэ. Ламо стихензэ алтавить велень темантень, тиринь раськентень, эрзятнень-мокшотнень кезэрень койтненень-кирдатненень. Кенярксчинть поладызе концертэсь, косо гайгсть Н.Ф.Мокшинэнь стихензэ лангс сёрмадозь мазый моротне.

 

Т.Аксенова

 

Новости

«СЯТКО» ДЫ «МОКША» журналтнэнень – 90!

Неть читнестэ МР-нь Пресс-центрасо ютась промкс, кона алтавсь «Сятко» ды «Мокша» журналтнэнь 90 иень топодемантень. Мокшонь кельсэ «Валда ян» журналось лиссь Пензасо, эрзянь «Сяткось» – Самарасо. Самай неть изданиятнесэ лиснесть минек ушодыця поэттнэнь ды писательтнень произведенияст.

Подробнее ...
 
Инжетне содавтовить эрзятнень эрямо коест марто

Мордовия Республикасо Эрзянь культурань ды ремеслань куншкакуронь теемань коряс дизайнерэнь арсемань объектэкс кармась Отяжелесэ пичень чочксто чапозь сокицянь-видицянь семиянь кудось. Сонзэ вакссо анок уш баняськак, кона уштови «раужосто», тунда путневить эмеж марто пандяткак.

Подробнее ...
 
Саранскойсэ панжови приют

Саранскойсэ панжови приют азортомо ракшатнень туртов. Кода пачтясть ошонь администрациясто, ней уш ули тень туртов таркаяк. Панжома шкась – те иень июнь ковс.  Приютонтень кармить кельгеме 100 каткат ды 300 кискат.

Подробнее ...
 
Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...