Рубрикатор

Их знает вся Россия Косо Жуков, тосо изнямо!
Косо Жуков, тосо изнямо!

 

Георгий Константинович Жуков СССР-нь военачальникесь, Маршалось, нилексть Советской Союзонь Героесь, «Изнямо» кавто орденэнь кавалерэсь чачсь 1896 иень декабрянь 1-це чистэнть Калужской губерниянь Стрелковка велесэ сокицянь-видицянь семиясо. Шнамонь  конёв марто церковно-приходской школанть прядомадонзо мейле максозель Московов скорняжной мастерскоень тонавтницякс, теке жо шкастонть прядынзе ошонь училищань кавто курстнэнь. 1915 иень августонь 7-це чистэнть Мало Ярославецсэ саезель армияв, кочказель кавалерияс. Унтер-офицерэкс тонавтнемадонзо мейле, 1916 иестэнть, понгсь Новгородонь драгунонь 10-це полконь Юго-Западонь фронтонтень. Немецень офицерэнть полонс саемадонзо мейле казезель 4-це степенень Георгиень крёстсо. Октябрясто получась покш контузия, конадонть мейле, аламошкадо лоткась марямодо, секскак кучозель кавалериянь полконь запасос. Бойсэ ранявоманзо кисэ тензэ максозель Георгиень омбоце крёстось, те разнэ 3-це степененсесь. Эскадрононть нолдамодонзо мейле, 1917 иестэнть, велявтсь Московов, седе тов велев тетянзо-аванзо туртов, косо пек куватьс сэредсь тифсэ. 1918 иестэнть совась Якстере Армиянтень, 1919 иестэнть кармась улеме РКП(б)-нь членэкс. Гражданской войнань шкастонть Георгий Жуков якстереармеецэсь тюрсь Востоконь, Западонь ды Югонь фронттнэсэ  казактнень каршо, Царицын ало – Деникинэнь ды Врангелень ушмотнень марто. 1919 иень майстэнть-июньстэнть Московонь кавалериянь 1-це дивизиянть юрсо сыргась Уралов, участвовась Шипово станциянть вакссо казактнень марто тюрематнесэ, июньстэ-августсто – Уральскоенть кис бойтнесэ. 1919 иень сентябрясто-октябрястонть тюрсь Царицынэнть кис, седе тов Средней Ахтубанть, неень Волжскоенть кис, косо ранязель гранатань сезевеманть эйстэ. Рязанень кавалериянь курсатнень прядомадост мейле аравтозель взводонь, мейле эскадрань ветиекс; 1920 иестэнть ды 1921 иень августстонть  лепштясь Тамбовонь крестьянинэнь восстаниянть, конань кисэ 1922 иестэнть казезель Якстере Знамянь орденсэнть.

1929 иестэнть Жуков прядынзе РККА-нь начальникень составонь высшей курсатнень. Седе тов Жуков служи Уборевичень прявт ало Белоруссиянь военной округсонть. 1939 иестэнть Жуковонь аравтызь Монголиянь Раськень Республикасонть советэнь ушмонь группань ветиекс. Теке жо иестэнть Жуков Халхин-Гол леенть лангсо тапинзе Комацубара япониянь генералонть ушмонзо. Неть тюрематнесэ Жуков васенцеде тевс нолдынзе танконь часттнень. Халхин-Голонь тюрематнесэ советэнь ушмотне ёмавтсть 23225 ломанть. Япониянсетне жо ёмавтсть 61 тыща ломанть, мезесь седе тов кармавтызе Япониянть а каявомс 1941 иестэнть Германиянть  марто вейсэ СССР-нть лангс. Те операциянть кисэ Жуков комкоронтень максозельть Советской Союзонь Героень лемесь ды  Монголиянь Якстере Знамянь орденэсь. 1940 иестэнть Жуков теевсь армиянь генералокс.

Ине Отечественной войнань шкастонть Жуковонь аравтызь Генштабонь прявтокс, Прявт ветиень Ставкань членэкс. Германиянть каявомадонзо мейле Жуков анокстынзе 2 № Директиватнень, конатнесэ кортавсь немецень атакатнень кирдемадост. Западонь, Северэнь-Западонь, Юго-Западонь, Южной фронтонь ушмотненень эзь удала топавтомс неть Директиватнень. Июленть прядовомсто, зярдо Западонь ды Северо-Западонь ёнкстнэсэ, ледстямонь кисэ, зярдо советэнь ушмотне кадызь Смоленскоенть, Жуковонь каизь Генштабонь начальникень таркастонть ды аравтызь Резервань фронтонь ветиекс. Теке жо шкастонть 24-це армиянь вийтнесэ Жуков ютавтызе Ельнинэнь операциянть, конась кармась улеме советэнь ушмотненень васенце лезэв операциякс. Сентябрястонть Жуковонь аравтызь Ленинградонь фронтонь прявтокс. Икелензэ путозель задача – аволь ансяк кирдемс ошонть, истя жо деблокировамс сонзэ немецтнень эйстэ, ансяк теемс тень эзь удала. 1941 иень сентябрянь 28-це чистэнть Жуков сёрмадсь резолюция: «Весе семиятне, конат максызь пряст ятонтень, улить леднезь, полонсто велявтомадост мейле сынь  истя жо улить леднезь». Балтиянь флотонь политуправлениясь эзь кирде те резолюциянтень ды леднесь ансяк сетнень, кить ютыльть немецтнень ёнов. Ленинградонть ало фронтонть стабилизациядонзо мейле Жуковонь тердизь Московонть ёнов, косо Западонь, Резервань ды Брянской фронтонь вийтне саезельть пинксэс ды тапазельть немецтнень эйсэ. Октябрянь 13-це чистэнть немецтне саизь Калуганть, 15-це чистэнть – Калининэнть, 18-це чистэнть – Малоярославецэнть. Те шкастонть Жуковонь ало  Западонь фронтось кирдсь оборона ды анокстась контрнаступлениянтень.

1941 иень  декабрянь 6-це чистэнть Москов ало ушодовсь Клинэнь – Солнечногорскоень каявомань операциясь. Западонь фронтонь ушмотне лия фронттнэнь лезксэст вельде тапизь «Центр» армиянь группатнень, конатнень ветиекс ульнесь фон Бок фельдмаршалось.  Те тюремасонть  маштозельть 372 тёжат солдатт. Те бойденть мейле Московонтень  пелемс ульнесь а мезде, ятось ёртозель удалов 250 вайгельпес.  Вермахтонь ушмотне васенцеде  кандсть покштояк покш ёмавкст. Якстере Армиясь кармась молеме весе фронттнэнь эзга. Тень лангс апак вано, 1942 иень январь ковонтень минек армиянь икелев молемась кармась пупорькшнеме. Ржевень-Вязьмань операциядонть мейле советэнь ушмотне ёмавтсть 776888 ломанть. Ржевень-Сычёвонь операциядонть мейле ятось таго аштезевсь таркасонзо, минектне молевсть ансяк 40 вайгельпес. «Марс» операциянть истя жо, кода «Уранонтькак», Жуков эзь анокста. Сонзэ  васень ушодксонь анокстамстонзо Георгий Константинович ульнесь Сталинградонь ёнкссонть. Ансяк Западонь фронтонь (ветиесь Конев), Калининэнь фронтонь (ветиесь минек землякось, эрзянь цёрась Пуркаев) координацияст путозельть Жуковонь лавтовонзо лангс. Операциясь  велявтозель Вермахтонь паксянь 9-це армиянть тапамонзо лангс, ансяк теемс тень эзь удала. Теке марто те операциянть вельде удалась а нолдамс немецтнень Сталинградонь тюремантень.

1943 иенть перть Жуков координировась «Искра» операциянь фронттнэнь тевест, зярдо тонат сезизь Ленинградонь блокаданть. Теде мейле Жуков ютавтызе «Полярной теште» операциянть, конань вельде бажась тапамс немецень армиянь «Север» группанть ды теемс кеме неже Прибалтикав молемстэ. Операциясь эзь удала, советэнь ушмотне кандсть ламодояк ламо ёмавкст. 1943 иень январьстэнть Жуковнень максозель Советской Союзонь Маршалонь лемесь. Ватутинэнь куломадонзо мейле Сталин мерсь Жуковнень улемс Украинань васенце фронтонь прявтокс. 1944 иестэнть те фронтонть ушмонзо лиссть Карпатонь пандотнес. Теке иень апрельстэнть Жуковнень максозель 1 № ало  «Изнямо» орденэсь. Войнанть прядовомсто Жуковонь ды Коневень прявтсо ушмотне олякстомтызь Варшаванть. 1945 иень маень 8-це чистэнть Берлинэнь Карлсхорстсонть Жуков ды Вильгельм Кейтель гитлерэнь генерал-фельдмаршалось тешкстызь фашистэнь Германиянь ушмотнень кортамовтомо капитуляциянть. Теке иень июнень 24-це чистэнть Московсо Якстере площадьсэнть Жуков примизе Германиянть лангсо Изнямонь Парадонть. Теке иень сентябрянь 7-це чистэнть Берлинсэ Бранденбургонь ортатнень икеле ютавтозель союзонь ушмотнень Изнямонь Парадось, косо участвовасть Франциясь, СССР-сь, Великобританиясь ды США-сь, СССР-нть пельде Парадонть примась Георгий Жуков. Ине Отечественной войнань иетнестэ Георгий Константиновичте солдаттнэ кортыльть: «Косо Жуков, тосо Изнямо!».

Войнадонть мейле Жуков понгсь опалас. Маршалонть чумондызь трофеень саемань кисэ, «бонапартизмасонть». 1946 иестэнть ушодозель «трофеень тевесь». Те тевенть коряс Жуков, келя, усксь Германиясто эсензэ туртов мебель, картинат ды лия эрьва кодамо ули-паро. Тень кисэ Жуковонь валгстызь сухопутной ушмонь Главкомонь таркастонть, каизь ЦК ВКП(б)-нь кандидатонь членстэ, 1948 иестэнть маршалонть кучизь Уралонь военной округонтень. Сталинэнь куломадонзо мейле Георгий Константиновичень Бериянь ходатайстванзо кувалт (конань седе тов «паронь пандозь» Жуков арестовизе) мекев аравтызь СССР-нь Оборонань министрань васенце полавтыцякс.

 

1973 иень ноябрянь 13-це чистэнть рактонть кулось Жуковонь омбоце официальной козяйказо, конась одоль эйстэнзэ 30 иеде. Галина Александровнань куломадонзо мейле маршалонть марто лиссь инфаркт. 1974 иень майстэнть Жуков прась комас, 1974 иень июньстэнть сон кулось. Уловонзо марто урнась калмазь Кремлянь стенантень.

 

Новости

Премьера!

Декабрянь 8-це чистэ 17:00 чассто Эрзянь ды мокшонь национальной драматической театрасо ваныцятнень учи премьера. Тесэ невтить М.Камолеттинь «Играем в дружную семью, или гарнир по-французски» од путовкс. Спектаклясь алтави МР-нь заслуженной артисткатнень Марина Аверкинань ды Галина Самаркинань юбилеень тешкстамонтень. Режиссёрось-путыцясь МР-нь заслуженной артисткась Л.Шахова.

 
Ардоманть кис питнетне яла касыть

Саранск ошонь общественной транспортонь частной предприятиятне бажить кепедемс ардоманть кис питнетнень декабрянь 25-це чистэ саезь. Теде сынь пачтясть ошонь администрацияв. 2, 5, 10, 15, 16, 18, 19, 21, 22, 24, 25, 28, 32, 35, 36, 37, 38, 40, 41, 44 ды 45№ маршурттнэсэ питнесь карми 25 целковойть (ней – 20). 23, 34 ды 66№ – 23 целковойть. Мэриясо пачтясть: неень шкане Саранскойсэ важодить кавто ООО-т («Сигнал С» ды «ПАТП»), конат усксить ломанть, истя жо индивидуальной кавксо предпринимательть. Частной усксицятнеде 35%.

Подробнее ...
 
Важоди Якшаматянь почта

Мордовиянь Главпочтамтсо декабрянть прядовомс карми важодеме Якшаматянь Почтась. Сёрмадомс ды нолдамс почтань ящикс телень прявт волшебникентень пачтямо мереви эрьвантень, иетнень лангс апак вано.

Подробнее ...
 
Партийцы ждут от Съезда конструктивных дискуссий

  - Именно в первый день  XVIII  Съезда Партии, который пройдет  7-8 декабря в Москве, состоится работа трех дискуссионных площадок «Обновление», «Открытость», «Партия и выборы», на которых мы сможем обсудить свои предложения и принять  решения, действительно позволяющие   наладить более эффективную и открытую работу партийных структур», -  сказал секретарь  Регионального отделения  «Единой России», Председатель Государственного Собрания республики Владимир Чибиркин.

Подробнее ...
 
В рамках приема граждан Председатель ЕР поддержал социально значимые инициативы

Ряд социально значимых поручений дал Председатель «Единой России», премьер-министр Дмитрий Медведев в ответ на обращения, поступившие в рамках прима граждан, который прошел 30 ноября в Центральной общественной приемной Партии.

Подробнее ...