Рубрикатор

1000 лет вместе ПАРТИЯСЬ ПУТСЬ УШОДКС КОЧКАМОТНЕНЕНЬ
ПАРТИЯСЬ ПУТСЬ УШОДКС КОЧКАМОТНЕНЕНЬ

2016 иень февралень 5-   6-це читнестэ Московсо ульнесь «Единая Россия» партиянь IV промксонь васенце пельксэсь. Тосо сехте покш мелесь явовсь сенень, кода карми ютавтовомо Государственной Думас депутатокс кандидаттнэнь лемест ёвтамонь кандидатурань общефедеральной партиянть кисэ шкадо икеле (предварительной) вайгелень максомась.

Минек республиканть пельде промксов якасть 13 делегатт. Сынст ютксо: Партиянь Мордовиянь региононь отделениянь Секретаресь, МР-нь Госсобраниянь Председателесь В.В.Чибиркин, Партиянь МР-нь Секретарень полавтыцясь, региононь исполнительной комитетэнь прявтось С.В.Борисов, Партиянь Председателень региононь общественной приёмноень прявтось В.В.Алёхин, партиянть кисэ аштицятнень региононь Координационной советэнь прявтось В.В.Кадакин, партиянь первичной отделениянь секретартне.

Седе, кода ютась промксось, журналисттнэнень ёвтнесть форумонь делегаттнэ. Вастовоманть ушодовомсто Партиянь МРО-нь Секретаресь В.В.Чибиркин тешкстызе, промксонть важодемась ютавтовсь кемень темас явозь таркава, косо ульнесть экспертт. Кортамось мольсь здравоохранениясо, образованиясо, наукасо, бюджетэнь  ды налогонь политикасо тевтнеде, велень хозяйстванть виевгавтомадо, велень ломантнень эрямост паролгавтомадо, предпринимательтнень ушодксост шнамодо ды течи талновтыця ламо лия кевкстематнеде.

Промксонь васенце чистэнть башка мель явовсь икелепелень вайгелень максомадо Положениянть кемекстамонтень. Форумонть ютавтомадо икеле сондензэ мольсть кортамот регионтнэсэ ютавтовиця промкстнэсэ. Эдь од лувсо предварительной кочкамотнень ютавтомась партиянтень лезды ливтемс лангс седе виевтнень, тень вельде сыть ламо ломанть. Истя лиси сестэ, зярдо видестэ кармить ветявомо икелепелень вайгелень максомась, оргкомитетэнь ды ловиця (счётной) комиссиянть тевень содазь важодемась.

Промксонть важодемстэ Партиянь Председателесь Д.А.Медведев весень тердинзе икелепелень вайгелень максомантень явомс покш мель секс, мекс неть истят жо кочкамот, ансяк предварительнойть.

Тешкстазель, «Единой Россиясь» васенцекс эсь важодемасо тевс нолдызе партиянь икелепелень вайгелень максоманть.

2016 иестэ Государственной Думас Весероссиянь икелепелень вайгелень максомась масторсонок ютавтови маень 22-це чистэ. Кода мерсь В.В.Чибиркин, «Единая Россия» партиянь кандидаттнэнень вешематне икелень коряс кармить седе казямот. Эрьва кандидатонть улезэ РФ-нь гражданствазо, илязт уле счётонзо ды лия питнейчинзэ омбомасторонь банктнесэ, конат аштить РФ-нь территориянть томбале, а мереви тевс нолдамс омбомасторонь финансонь инструменттнэнь. Теде башка, а мереви улемс кандидатокс сетненень, кинь ули эли ульнесь судимостезэ.

Икелепелень вайгелень максомань кандидатокс мереви улемс партияс совицятненень, партиянть кисэ аштицятненень, истя жо сетненень, кить а совить партияс, сынсь эсь пряст ёвтасызь. Кандидатокс лемень ёвтамонь шкась карми 2016 иень февралень 15-це чистэ саезь апрелень 10-це чинть самс.

«Единая Россия» партиянь промкссонть совавтозельть полавтомат Партиянть Уставс, теевсь ротация «Единой Россиянь» высшей руководящей органтнэсэ. Ней Мордовиянть пельде Партиянь Генеральной Советсэ кармить кавто ломанть: Саранск ошонь округонь Ленинской райононь 544 № первичной отделениянь Секретаресь Ю.Г.Коннов ды Партиянь Октябрьской  местной отделениянь Секретаресь С.Н.Кульков.

Меельцекс делегаттнэ тешкстызь, кодамо покш важодема учи эрьва ломаненть, кие яволявтсы прянзо кандидатокс. Сехте покш мелесь карми явовомо ломантнень эрямост паролгавтомантень, питнетнень а кастомантень, медицинасо паро лезксэнь максомантень, кажос понгозь ломантненень лезксэнь явомантень ды истя седе тов.

В.ЮДИНА

 

Новости

Чувашиясто – казне марто

 

Мартонь 24-це чистэ И.Я.Яковлев лемсэ Чувашиянь государственной педагогической университетсэ ютась этнопедагогикань ды поликультурной образованиянь коряс студентэнь Весероссиянь олимпиада. Сон алтавсь РАО-нь академикенть Г.Н.Волковонь 90 иетненень.

Подробнее ...
 
Од ломанень ассамблея

 

Мордовия Республикасо теезь «Молодежная Ассамблея народов России «МЫ – РОССИЯНЕ» Общероссийской общественной движениянь региональной отделения. Республикасонть од ломанень движениянь теемась карми общероссийской гражданской идентичностень формированиянть коряс ушодкстнэнень, раськетнень ютксо ояксчинь кемекстамонтень ды  межкультурной вейсэнь важодеманть келейгавтомантень лездамонь площадкакс.

Подробнее ...
 
Диктантось – эрявикс тев

Те иень апрелень 8-це чистэ Саранскойсэ малав 400 ломантне кармить «Тотальной диктантонь» участникекс. Мероприятиянь ютавтомань меленть шнызе Мордовиянь Прявтось Владимир Волков.

Подробнее ...
 
Сценанть лангсо Ицялбуесь...

 

Неть оймсема читнестэ Республикань Культурань Кудосо ютасть «Шумбрат, Мордовия!» народной творчествань фестивалень меельце концерттнэ. Кадовсь ансяк Гала-концертэсь, кона карми декабрянь 11-це чистэ. Сценанть лангс лиснесть Ицялбуень, Ковылкина ёнксонь ды Саранск ошонь округонь артисттнэ.

Подробнее ...
 
Мамаева омбоце

 

Ноябрянь васенце пельксстэнть евтазельть Россиянь республикатнень государственной кельтнень коряс школасо тонавтницянь ды студентэнь Весероссиянь васенце олимпиадань итогтне.

Подробнее ...