Рубрикатор

1000 лет вместе ДЕПУТАТОНЬ ЧИСЬ САРАНСКОЙСЭЛЬ
ДЕПУТАТОНЬ ЧИСЬ САРАНСКОЙСЭЛЬ

 

Декабрянь 1-це чистэ Саранскойсэ ютавтозель Депутатонь чи. Те чистэнть МР-нь Госсобраниянь депутаттнэ ютавтсть вастовомат республикань эрицятнень марто, кунсолость сынст кевкстемаст, талномаст. МР-нь Госсобраниянь Председателесь Владимир Васильевич Чибиркин васняяк ванкшнынзе Пушкинской кочкамонь округсонть аштиця зярыя объекттнэнь. Якась инжекс «Надежда» социальной приютонтень. Тов истя жо сакшность МР-нь Госсобраниянь депутаттнэ В.В.Брыков ды М.Е.Иоффе, Саранск ошонь округонь Пролетарской райононь прявтось М.М.Лунин.

Приютонь прявтось Т.В.Барашихина ёвтнесь, неень шкане тосо эрить 22 цёрынеть ды 25 тейтернеть, конат понгсть эрямонь стака лувс. Тешкстызе, ютазь иестэнть приютов понгонесь 261 эйкакш. Татьяна Васильевна мерсь, келя,  иезэнзэ приютонтень бюджетстэ явовить 25 миллионт целковойть, мелят благотворительной лезксэнть вельде пурназельть эштё 2 млн. целковойть.

«Надежда» приютонь прявтось Т.В.Барашихина ёвтась сюкпря МР-нь Госсобраниянь Председателентень В.В.Чибиркиннэнь, депутаттнэнень тенст явовиця меленть кисэ, эйкакштненень лезксэнь максоманть кисэ. Неень шкане приютсонть моли бассейнань витнемась, сон карми ладямо неень шкань весе вешематненень. Покш лезкс те тевентень явить Госсобраниянь депутаттнэ.

Приютсонть ули весемесь эйкакштнень тонавтнемаст ды оймсемаст туртов: медицинань кабинет, изостудия, библиотека, озномань нупальне ды ламо лия мезе.

– Течи республикань весе депутаттнэ вастневить кочкицятнень марто, кунсолыть сынст талновтыця кевкстемаст. Эдь те минек прявт важодеманок, – мерсь МР-нь Госсобраниянь Председателесь В.В.Чибиркин приютонь важодицятнень марто вастовомсто. – Мон кенярдан, кодамо питней ды, текень пингстэ, стака важодема тынь топавттадо – казтядо кеняркс эйкакштненень. Тейтядо весементь тиринь масторонь алкуксонь патриотонь кастомга, чарькодевлизь семиянь питнейчитнень ды весе вечкемаст казевлизь уш эсест эйдест туртов.

В.В.Чибиркин казсь эйкакштненень цела кептере конфеткат. Эйкакштне – эсест кедьсэ теевть казнеть ды мельстуиця концерт.

Седе тов депутаттнэ ванкшнызь 20№ эйдень кужонть. МР-нь Госсобраниянь Председателесь В.В.Чибиркин эйдень кужонь прявтонть марто кортамсто тешкстызе, сынст пельде сыця вейкеяк пшкадемась а кадови апак ванкшно. Мерсь, бути улить кодаткак кевкстемат ды стакачить – депутаттнэ анокт сынст кунсоломс ды явомс лезкс. Эряви ёвтамс, 20№ эйдень кужосонть ули музыкань покш нупаль, спортонь алкуксонь зал, бассейна, ветявить 12 эрьва кодат кужинеть. Весемезэ тов якить 280 эйкакшт.

Те чистэнть депутаттнэ истя жо ванкшнызь 29№ гимназиянть. Те иестэнть тосо панжовсь кадетэнь правовой васенце класс. Тов совиця кадеттнэ ёвтызь покш мелест понгомс Мордовиянь Госсобраниянь зданиянтень, ваномс, кода важодить депутаттнэ. В.В.Чибиркин покш мельсэ тердинзе эйкакштнень экскурсияв.

Тонавтыцятне ёвтасть депутаттнэнень покш сюкпря школань латонь витнеманть ды актовой залонь одкстомтоманть туртов явозь лезксэнть кисэ. Ёвтнесть, сынст гимназиясо тонавтовить омбомасторонь кавто кельть, важоди «Что? Где? Когда?» налксемань коряс семиянь клубось. Вастовоманть шкасто истя жо кепедезельть ЕГЭ-нть марто сюлмавозь кевкстематне.

Депутатонь чинть прядовомга Пролетарской администрациясонть В.В.Чибиркин ютавтсь эсензэ округонь эрицятнень марто вастовома, косо кунсолынзе сынст энялдомаст ды пеняцямост. Владимир Васильевич пшкадицятненень макссь превс путомат, саинзе кевкстематнень эсензэ вановт алов.

 

Т.Аксенова

 

Новости

Чувашиясто – казне марто

 

Мартонь 24-це чистэ И.Я.Яковлев лемсэ Чувашиянь государственной педагогической университетсэ ютась этнопедагогикань ды поликультурной образованиянь коряс студентэнь Весероссиянь олимпиада. Сон алтавсь РАО-нь академикенть Г.Н.Волковонь 90 иетненень.

Подробнее ...
 
Од ломанень ассамблея

 

Мордовия Республикасо теезь «Молодежная Ассамблея народов России «МЫ – РОССИЯНЕ» Общероссийской общественной движениянь региональной отделения. Республикасонть од ломанень движениянь теемась карми общероссийской гражданской идентичностень формированиянть коряс ушодкстнэнень, раськетнень ютксо ояксчинь кемекстамонтень ды  межкультурной вейсэнь важодеманть келейгавтомантень лездамонь площадкакс.

Подробнее ...
 
Диктантось – эрявикс тев

Те иень апрелень 8-це чистэ Саранскойсэ малав 400 ломантне кармить «Тотальной диктантонь» участникекс. Мероприятиянь ютавтомань меленть шнызе Мордовиянь Прявтось Владимир Волков.

Подробнее ...
 
Сценанть лангсо Ицялбуесь...

 

Неть оймсема читнестэ Республикань Культурань Кудосо ютасть «Шумбрат, Мордовия!» народной творчествань фестивалень меельце концерттнэ. Кадовсь ансяк Гала-концертэсь, кона карми декабрянь 11-це чистэ. Сценанть лангс лиснесть Ицялбуень, Ковылкина ёнксонь ды Саранск ошонь округонь артисттнэ.

Подробнее ...
 
Мамаева омбоце

 

Ноябрянь васенце пельксстэнть евтазельть Россиянь республикатнень государственной кельтнень коряс школасо тонавтницянь ды студентэнь Весероссиянь васенце олимпиадань итогтне.

Подробнее ...