Неть читнестэ тешкстызе чачома чинзэ Россиянь светотехнической сехте покш компаниятнестэ вейкесь – «Ардатовский светотехнический завод» акционерной обществась. Сонензэ топодсть 70 иеть.
Кенярксчистэнть тосо важодицятне обед малав пурнавсть заводонь проходноентень ды тосто весе вейсэ сыргасть Орданьбуень Культурань кудонтень, косо ютавтовсь торжественной промксось. Мазылгавтозь залонтень пурнавсть те предприятиясонть важодицятне, трудонь ветерантнэ ды сынст инжетне. Те чистэнть поздоровонь ёвтамо сакшность РФ-нь Федерациянь Советэнь членэсь В.В.Литюшкин, Государственной Думань депутатось В.В.Воробьев, МР-нь Правительствань Председателень полавтыцясь – Промышленностень, наукань ды од технологиятнень министрась А.И.Седов, «АСТЗ» ОАО-нь Директоронь советэнь прявтось В.Д.Кудашкин, «АСТЗ» ОАО-нь генеральной директорось Г.В. Аверьянов, Ардатовань муниципальной райононь Администрациянь прявтось А.Н.Антипов, Тургенева ошонь поселениянь администрациянь прявтось М.В.Аверьянов, Ардатовань ды Атяшевань епископось Вениамин.
Те чистэнть ламот тосо важодицятненень максозельть Почётонь грамотат, Благодарностть ды питней казнеть. Башка мель явсть ветерантнэнень ды трудонь династиятненень. Кементь иеть тесэ важодсть истят трудонь династиятне, кода Князевтне, Слугинтнэ, Рябовтне, Леоновтне, Панинтнэ, Моторкинтнэ ды ламо лият, кить пингест алтызь вечкевикс тевенть топавтомантень.
Заводсо важодицятне а стувтнить тонавтыцяст, одсто превс путыцяст. Истя, АСТЗ-нь генеральной директорось Г.В.Аверьянов икельце валсонзо тешкстась, кодамо покш путовксозо васенце тонавтыцянзо, цехень прявтонть Иван Михайлович Слугинэнь. Сон те шкас эзинзе стувто сонзэ лезэв превс путоматнень.
Икелепелев эйкакштнень ютксо яволявтозель пелькстамо, конась лемдевсь «Заводось эйкакштнень сельмсэ». Школасо тонавтницятне невтизь ёрокчист сочинениянь ды артовксонь сёрмадомасо. Изницятненень максозельть казнеть.
Юбилеень кенярксчись прядовсь мельстуиця концертсэ, конань анокстызь те предприятиясонть важодицятне ды Тургенева велень од ломантне. Кемеви, паро койтне-кирдатне, конат таштавсть 70 иетнень перть, поладовить икелепелевгак.
Валентина Юдина