Россиянь вишка эйкакш марто аватненень арсеви меремс мелень коряс кочкамс кудосо аштема шканть. Истямо мель ёвтась масторонь Правительстванть юрсо экспертэнь советэнь социальной политикань коряс робочей группань прявтось Сергей Рыбальченко. Эсь мелень коряс декретэнь отпусконь кочкамось ды ярмаконь лезксэнь покшолманть полавтомась лезды кирдемс роботыця аванть мелензэ.
Невтемга, течинь иенть ды кото ковтнень ды зарплатасто 40 % таркас мереви саемс отпуск вейксэ ковс ды кавксть седе ламо получамс пособиянть.
Те меленть явовтыця ёнксокс ашти се, пособиянть лангс явовиця ярмактнень покшолмась а полавтови. Мертяно, бути аванть зарплатазо ульнесь 40 тёжат целковойть ковозонзо, течинь правилатнень коряс чачтомадо мейле сон омбоце пель иенть перть карми получамо 16 тёжат целковойть. Весемезэ тензэ пандовить 288 тёжат.
Сергей Рыбальченконь мелензэ коряс, отпусконь шканть полавтомга полавтови эрьва ковонь пандоматнень покшолмаськак. Мертяно, бути авась отпуск саи ансяк иес (зарплатась истя жо 40 тёжат), эрьва ков сонензэ кармить пандовомо 24 тёжат целковойть, бути ансяк вейксэ ковс – 32 тёжат, бути жо декретэнь отпускось таргави колмо иес – 8 тёжат целковойть.
Целанек пандоматнень покшолмась карми истямо жо, мезесь паро кода важодиця таркань максыцянть, истя социальной страхованиянь Фондонть туртовгак.
–Те од лувонть минь зярс а арсетяно нолдамс сеть аватнень коряс, конат чачтомадо икеле косояк эзть робота, – тешкстызе Сергей Рыбальченко.
Истя жо ёвтави, што гибкой отпусконть совавтоманзо коряс мелест кевкстеви сышкань аватнень-тетятнень ды власттнень. Паряк, те мелесь совавтови вейсэ социальной контракт марто, конасонть тешкстави важодема таркань максыцятнень ды образованиянь органтнэнь тевест яслятнесэ таркань максоманть коряс.
Гибкой отпусконь лувось, паряк, туи мельс пандовиця таркасо роботыця аватнененьгак, конатнень чачтомадо мейле пек прыть доходост ды сетнененьгак, кинь арась возможностест максомс эйкакшонть эйдень кужов колмо иетнень топодемадо икеле. Кортамотнень ды кевкстнематнень ютавтомадо мейле, арсемась кучови Минтрудов ды совавтови Президентэнтень анокставиця докладс.
Статистикась невти, течи Россиясо васенце эйкакшонть чачтыть седе ламо иесэ. Масторонть келес 2000 иестэнть саезь авакс кармицятнень средней иетне печтясть 28 иетнень трокс. Теке марто, покш оштнесэ неть иетне уш 30 ламо.
– Прявт тувталось, мекс аватне васенце эйкакшонть чачтыть уш 30 ды седе ламо иесэ, кекшезь ярмактнесэ, – корты Сергей Рыбальченко. – Сынь бажить теемс карьера, а уш мейле чачтамс. Бути минь макстано декретэнь отпусконь шкасто ванстомс тенст доходонть (сонзэ шканть киртямосонть), лездатано явомс эйкакшонтень тарка яслясо, те карми мелявксонь изнямокс.
Гибкой отпусконь коряс мелесь, паряк, вадря, ансяк тесэ улить берянь ёнксткак. Истя арси Национальной авань-тетянь комитетэнь председателесь Ирина Волынец.
– Бути авась бажи эйкакшонть марто отпусксо аштемс колмо иеть, карми получамо ансяк 20 % икелень зарплатанть эйстэ. А неть ярмактне эрямонть туртов а сатыть, – тешксты экспертэсь.
Секскак сонзэ арсеманзо коряс, васняяк эряви изнямс яслятнесэ таркатнень аразьчинь коряс кевкстеманть, штобу аватне сынсь кочкавольть отпусксто шкадо икеле лисемань седе вадря ёнкс.
– Эли жо совавтомс ярмаконь лезксэнь максомань од ёнкс. Мертяно, бути эйкакшонтень арась тарка яслясо, авантень пандома лезкс, кадык куш МРОТ-нь покшолмасо. Сестэ сон эйкакшонть макссы частной ясляс, – тешксты Ирина Волынец.
Юлия Еремина