Четверг, апреля 02, 2020
Важное

 

2016 иестэ яволявтозель Мордовиясо 5% ипотекань программась. Сон пек эряви од ломантненень.

Те проектэнть вельде кавонзазь метрань собственникекс теевсть тёжат семият. 2020 иестэ республикасонть ипотекась кармась седеяк рамавиксэкс. Кортамось моли 3 %, лиясо-косо – 0,1 % ипотекадонть.

А мезть сёпомс, Мордовиясь ульнесь ды кадови аграрной регионокс. Сонзэ ламо районтнэ покш мель явить велень хозяйствань продукциянь нолдамонтень. Велетне ушодсть вельмеме. Эрямонь вадрялгавтомань од программатне те тевенть седеяк виевгавтыть. 2020 иень январьстэ Россиясо эрямос совавтозь «Комплексное развитие сельских территорий на 2020-2025 годы» государственной программась. Те программась лезды вадрялгавтомс велесэ ломантнень эрямост.

Льготань велень ипотекась  допрок лия, од ёнкс, конань РФ-нь Президентэнть В.В.Путинэнь пельде ёвтызе РФ-нь Велень хозяйствань министерствась. Республикань прявттнэ кундасть те задачанть топавтомо. МР-нь Прявтось В.Д.Волков покш мель яви веленть виевгавтомантень. Велень ипотекась кеместэ совась эрямос.

Республикань промкстнэстэ вейкесэнть МР-нь Прявтось В.Д.Волков тешкстызе: «Ломантне парсте эряст аволь ансяк ошсо, велесэяк. Тосо виевгавтови китнень, ФАП-тнень строямось. Те покш путовкс Мордовиянть вандынь чинтень».

Велень ипотекань условиятне шождынеть. Истят, кодат жилищной кредитэнть. Ипотекась максови сетненень, кить велесэ арсить путомс эли рамамс анок кудо. Эряви чарькодемс, льготной программанть примизе аволь кодамояк башка банк. Те государственной ушодкс.

Кинень максови велень ипотекась? Ёвтасынек, максови аволь  ансяк велесэ эрицятненень. «Велень кредиттнэ» максовить весенень, кить арсить молемс велев эрямо. Банкось ярмакт а максы 75 иесэтненень. Эряви ёвтамс, тон – РФ-нь гражданинат, сёрмадстозят се регионсонть, тосонь банконтень пшкади клиентэсь велень ипотеканть мельга.

Республикасонть улить районт, косо покш мель явить велень ипотекантень. Отяжелень районсо ушодовсь агроошкень строямось. Тетюши велесь райцентранть эйстэ ашти аволь васоло, косо-бути вейке вайгельбе. Госпрограммань ды велень ипотекань коряс кудонь строямс явозь 80 гектарт мода.

Тезэнь строявить 320 кудот, – ёвтни Отяжелень райононь Администрациянь прявтось В.Г.Прокин. – Кармить кото од ульцят. Уш тедеде тейсынек тосонь китнень. Тесэ карми централизованной канализация. Истямо зярс районсо косояк арась. 2019 иестэ те таркантень ушодовсь газонь ды ведень снабжениянь сетень строямось, тедеде инженерной коммуникациянь теемань коряс важодеманть прядсынек. Тезэнь истя жо строявить ФАП, эйдень кужо, стадион, бассейна.

Кецявты, тесэ улить уш кудонь путыцяткак. Вейке семиясь – ламо эйкакшонь трицятне мирдть-нить Дмитрий ды Юлия Ютяевтне кастыть ниле эйкакшт. Сынь эрить Каменка велесэ, кудонть рамизь авань капиталонь ярмактнень лангс. Уш тедеде сёксня арсить ютамс эрямо Тетюши велесэ од кудос.

Тешкстасынек, Ютяевтнень семиянтень государствась явсь 2,2 миллионт целковойть.

Тесэ а кода а ледстямс Краснослободской райононь Бобылевские Выселки веленть, косо виевстэ моли социальной объектэнь строямось. Явозь тарка, козонь государстванть лездамонзо вельде ды ипотекань льготань программанть коряс арсеви строямс 136 эрямо кудот, школа, эйдень кужо ды ней уш стявтови спортивной комплексэсь, конань питнезэ 439 миллиондо ламо целковойть. Тесэ кармить улеме кавто бассейнат (покшонь ды эйкакшонь), эень арена, фитнес-зал.

– Минь киненьгак а отказатано, кие пшкади лезкс мельга велесэ кудонь строямодо, – ёвтни Краснослободской райононь Администрациянь прявтось А.В.Буйнов. – Эрямонь условиятне, кодат тесэ теевить, вечкевить од специалисттнэнень ды сынь сыть ошсто велев эрямо.

Республикань покш промкстнэстэ вейкесэнть, кона алтазель агропромышленной комплексэнть виевгавтомантень, МР-нь Правительствань Председателень васенце полавтыцясь – Велень хозяйствань ды продовольствиянь министрась В.Н.Сидоров тешкстызе: «2020 иестэ велесэ комплексной эрямо кудонь строямонь программантень, Отяжелень, Краснослободскоень районтнэде башка, совасть Ромодановань, Чаунзань районтнэ».

Тешкстасынек, велень ипотекань коряс кудот путовить республикань весе территориятнесэ, ансяк а мереви Саранск ошонь округонь велетнесэ ды робочей посёлкатнесэ, истя жо Рузаевкасо. Тевесь  сеньсэ, неть оштнесэ эрить 30 тёжадо ламо ломанть, мезесь а лади программань вешематненень.

Кие кеместэ арсизе велень ипотекань саеманть, а соды мейстэ ушодомс, пшкадеде МР-нь Велень хозяйствань ды продовольствиянь министерстванть юрсо важодиця общественной приёмнойс, кона ванкшны «Комплексное развитие сельских территорий» федеральной Госпрограммасо граждантнэнь участвовамодо кевкстематнень.

 

Пётр Зиновьев

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».