Четверг, марта 28, 2024
Важное

Ламот марсизь Орданьбуень Чукало велень батюшканть Евгениень (Самаркинэнь) моронзо велень ломанде: «Велень ломанть валскень зорят стить, велень ломанть панить шумбра кшить, велень ломанть Пазнэнь озныть веть, велень ломанть-важодиця кедть». Кодат видеть валтнэ, велень ломантне оймсемат а содыть, седеяк кизна, зярдо велень хозяйствань предприятиятнесэ ушодови сюронь урядамонь шкась.

 

Аволь умок (августонь 5-це чистэ) минь сакшнынек инжекс Отяжелень райононь «Сабанчеевское» ООО-в, косо вастовинек предприятиянь важодицятнень марто. Сынь весе ульнесть паксясо ды ток лангсо, прявтонть Д. Н. Игушкинстэ саезь комбайнёртнэнь-трактористтнэнь, водительтнень, механиктнень пес. «Псить» читне тинге лангсо. Пуль, чипай, машинань гайтть ды сынст ютксо вейке мизолдыця ава. Те – «Сабанчеевское» ООО-нь растениеводствань коряс прявтонь полавтыцясь, прявт агрономось Вера Сергеевна Кочурина. Авась ней чоп паксясо, сонсь ардтни «Нивасо», конась весенень содавикс «Z» букванть коряс. Чарькодтяно, сонензэ овсе аютко, ялатеке эрьванть эсензэ тевезэ, минекесь – саемс интервью, секскак минь лоткатано сонзэ ваксс.

Вера Сергеевна тешксты, сюронь урядамось ушодовсь хозяйствасонть июлень меельце читнестэ. Течинь чис тосо уш прядовсь товзюронь пивсэмась ды весе тусть розень ды шужонь паксятнес. «Урожаесь тедеде пек вадря. Сюрось коське, эчке. Пек кенярдовтымизь «Льговская-2», «Скипетр» ды «Цефей» сорттнэ. Товзюронть урожайностесь 50 ды седе ламо центнерт гектарсто, кой-кона таркатнесэ 60 седеяк ламо. Чизэнзэ пивсэвить малав  1000 тоннат. Сюрось сеске ускови ванськавтовомо механизированной ток лангс ды мейле каяви складтнэва коськеме. Тедеде пек покш лезкс ток лангсо тенек максыть Сабанцелень школань тонавтыцятне, ули мелем ёвтамс тень кисэ покш сюкпря! – ёвтни агрономось. – Теке шкасто анокстатано модатнень озимоень видемантень, пештинек сыця иентень товзюронь видьмекст. Кадовозь олгось прессовави тюкс ды ускови МТФ-с тельня скалтнэнь ды вазтнэнь андомс».

Вера Сергеевнань валонзо коряс, тевтнеде эштё ламо кадовсть: эряви пурнамс шужонть, яровой товзюронть, кукурузанть, кснавонть, рапсонть. Весемезэ саема урожай 5600 гектарсто. Тевтне, нама, а маштыть позда сёксес, секскак покш кемема ней комбайнёртнэнь лангс. Тедеде паксятнесэ важодить кода  эсь тевень парсте содыця комбайнёртнэ, истя жо одтнэяк. Неть: Алексей Аньчков, Иван Кочурин, Виктор Пшеничников, Александр Маскаев, Николай Кажаев, Виталий Учеваткин ды лиятне. Весемезэ кемгавтово комбайнёрт. Сынст перька мекев-васов чарыть-велить 19 машинат. Сисемтне эсест, 12 – сиведезь. Сехте эрязатне юткстост Михаил Михайлович Палькин, Владимир Геннадьевич Саврушкин. Паксянть чиресэ свал ашти ведь марто тракторось, конань ней вети Сергей Иванович Фадеев. Зярс сонзэ «Джон Дирэзэ» витневи-петневи, цёрась пштистэ ваны псисэ гайниця техниканть мельга.

Кода тенек ёвтнесь хозяйстванть прявтонь полавтыцясь Борис Николаевич Игушкин, од комбайнатнень сынь бажить явомс тевень содыця, опытной комбайнёртнэнь туртов, конатне сюронтькак пурнасызь седе  ваньксстэ ды комбайнантькак ветить апак капша, ванстозь, штобу витнемс-петнемс а саволь. Истятнэнь ютксо Николай Дмитриевич Кажаев, кона уш вейксэ иеть васенцетнень ютксо, ды Алексей Юрьевич Аньчков. Те комбайнёрось сась аволь умок, кавто иеде теде икеле, ансяк уш пек парсте невтизе прянзо. Алексей роботы кизна комбайнёрокс, тельня – механикекс. Сонзэ высшей образованиязо, тонавтнесь программистэкс, ансяк ней тензэ седе вечкеви аволь компьютерэнь «чеерненть» ветсемс, а «Акрос 595+» комбайнанть руленть. Теке шкане сон вейсэ од лездыцянзо марто роботы кормоуборочной комбайнасояк. Валске рана тейсынзе тосо тевтнень, кучсазо ялганть фермав скалтнэнь андомо, сонсь жо сы паксяв сюронь нуеме ды пивсэме.

Тедеде велень хозяйствань предприятиясь рамась «Брянсксельмашонь» «Палессе» од комбайна, ды сонзэ максызь сехте од комбайнёронтень – 20 иесэ Виталий Петрович Учеваткиннэнь. Кода истя лиссь? – кевкстнетяно минь Борис Николаевич Игушкинэнь. Тона толкови: Виталий эйкакшпорасто важодсь комбайнёронь лездыцякс, 10 иестэ саезь нуема шкасто яксесь комбайнёронть Александр Слугинэнь лездыцякс ды тетянзо Пётр Иванович Учеваткин марто. Уш армиядо икелеяк Виталий нусь ды пивсэсь «Донсо», ней велявтсь службасто тиринь велев, кармась важодеме трактористэкс. А кизна тензэ максозель од комбайнась. «Сабанчеевское» ООО-нь прявтонть Дмитрий Николаевич Игушкинэнь сонзэ лангс ламо кемемат. Цёрась, келя, кунсолыця, превс-мельс содамочинь пурныця, тевенть вечксазо.  Учеваткинтнэнь ней цела династия тесэ роботы. Тетянзо марто комбайнёронь лездыцякс важоди Сергей ялаксозо. Ялатеке од ломантне хозяйствасонть пек эрявикст. Тесэ а сатыть агрономт, ветврачт, зоотехникть, механикть. Секскак, кинь ули мелезэ самс эрзянь мазыйдеяк мазый велев ды получамс аволь берянь зарплатат, инескеть, сюлмаводо тесэнь администрациянть марто. Келя, эрямо таркаяк сеске максыть ды государстваськак ней лезды од специалисттнэнень субсидиясояк.

…Паксянь тевтнень ваннозь, сыргинек ток лангов, косо тевтне истя жо лаказь лакить. КамАЗ-тнэ мекев-васов ускить сюро, чамдыть эйсэнзэ. Сонзэ летькечинзэ онкстасы Татьяна Васильевна Слугина ды мейле ушоды эсь тевензэ автопогрузчикень ветицясь Дмитрий Анатольевич Дудин. Сон мекев-васов кепеди-валгсты сюронть, конась мейле туи костямо-ванстома складтнэс.

Маласо аштиця столовойстэнть те шкане качады тантей ямонь чине. Шкась обед. Столовоень пидицятне – Ирина Федотова, Елена Бухаркина ды Нина Степушкина – капшить пештямс пси ямонть, кашанть, чаенть ды лия пидевкстнэнь-паневкстнэнь термостнэс. Эрьва ярсыцянть эсензэ термосозо, сынст курок ильтясызь паксяв. Андыть важодицятнень кавксть чизэнзэ – обедстэ ды чокшне ёнов.

Истя ютыть читне малав эрьва велесэ, косо улить кеме хозяйстват, ды минь эштё а весть тейтяно репортажт республиканть паксятнестэ. Кадык весе содыть, кодамо стака кшикочомонть питнезэ, зярошка труд эйзэнзэ путови…

…Вера Сергеевна Кочурина капшазь ильти минек веле песэ ды видьксты, кода арси сон од, неень шкань программадо, конанть коряс квадрокоптерэнть вельде паксятне кармить неявомо компьютерсэ. Козонь зняро удобрения каямс, косо сюрось кенерсь, косо эзь. Эдь пек стака чизэнзэ ардомс сядодо ламо вайгельбеть, штобу а менстямс кодаткак мелявкстнэнь-тамашатнень певтеме паксятнесэ. Содатано, истямо программась уш анок ды зярс ютыть сонзэ тестовой ванноматне. Кадык Вера Сергеевнань мелензэ-арсеманзо топавтовить ды сонзэ роботазо аламодо седе шождалгады!   

Марина Девятова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».