Четверг, марта 28, 2024
Важное

Покш Игнатовань районсо «8-ое Марта» ООО-сь ловови велень хозяйствань прявт предприятиятнестэ вейкекс. Сон парсте содавикс весе республиканть келес. Неть читнестэ минь содавтынек те предприятиянть.

Кода республикань ды целанек масторонь велень хозяйствань лия предприятиятнесэ, тесэяк моли пси шка – сюротнень видемась. Роботась хозяйствасонть лаказь лаки, весе тевсэть. Кода тешкстызе «8-ое Марта» ООО-нь прявтось Николай Иванович Куманев, весемесь тееви шкастонзо, видемась прядовома лангсо.

Од техникасо Важодемаськак мельспаро

– Видеманть ушодынек чадыковонь 16-це чистэ. Ансяк а мезть сёпомс, меельце шкастонть пертьпельксэсь эйсэнек эзь кольневте. Секе-тев валсь пиземе. Те, нама, мода лангсо важодицятненень аволь мелень коряс. Эдь зярдо пек летьке модась, видеме а сыргат, а лисят. Тевтнень жо шкастонзо прядомс бажи эрьвась. Теке марто тундонь пиземеськак эряви. Сон модантькак седе вадрялгавтсы, видьмекстнэяк седе куроксто лисить, – тешксты Николай Иванович.

«8-ое Марта» велень хозяйствань предприятиясонть сюротнень алов явозь 7300 гектарт мода. Тень ютксо – 2350 гектарт шуж, 1150 гектарт яровой товзюро, 400 гектарт рапс, 500 гектарт силосокс кукуруза, 300 гектарт зёрнакс кукуруза. Видезь 1400 гектарт озимойть. Ды истя жо 500 гектарт веиень тикшеть, 100 гектарт – ламо иень. Те иестэ 2000 гектарт максозь ламбамо якстерькаенть алов.

– Озимойтне лиссть вадрясто, телентькак парсте ютавтызь. Ней уш теинек удобрениясо ды весе эрявикссэнть подкормкантькак, – ёвтни предприятиянь агрономось Валерий Евгеньевич Левщанов. – Тундонь видемантеньгак анокстынек вадрясто. Эзинек майсе видьмексэнь коряскак. Теньсэ, нама, покш таликазо «Ромодановосахар» предприятиянь прявтонть Александр Иванович Атласовонь. Сон весементь тейсь вадря ды сатышка видьмексэнь таштамга. Сюрокс кукурузань видьмекстнэнь раминек Германиясто. Сортось – «Пионер». Сонзэ уш видекшнынек икеле иетнестэ. Прянзо невтизе пек вадрясто, раминек нейгак.

Тундонь видематнесэ хозяйствасонть роботасть 40 ламо ломанть. Неть тевень содыця механизаторт ды од специалистт. Техникаськась предприятиясонть весе вадря, ламо мезе эрявикс рамазь меельце иетнестэ. Тедеде жо тракторонь паркось топавтовсь таго. Рамасть «Хорш» видемань комплекс, теке жо фирмань опрыскиватель, трактор РСМ-2375, удобрениятнень почодоманть туртов растворной узел РУКАС-300. Кода тешкстызе Валерий Левщанов, те узелэсь лезды пачтямс удобрениятнень вецанасто.

Зярдо ульнинек Ташто Чамзасо, хозяйствань весе паксятнесэ мольсь важодема. Ве паксясонть видсть ламбамо якстерькай. Механизатортнэ Евгений Александрович Мамаев ды Иван Васильевич Куманев роботыть омбо масторонь «ФЭНДТ» тракторсонть. Техникась пек вадря ды эряза, секскак трактористтнэнь тевест молить парсте.

Лия паксясонть прядсть яровой товзюронть видеманзо. Тесэ роботы Валерий Александрович Мамаев механизаторось. Сонзэяк техниказо од, вадря. «Джон Дир» тракторось рамазь зярыя иеде икеле, а вана «Хорш» видемань комплексэсь – тедедень. Валерий Мамаев шабра Андрелень. Хозяйствасонть жо роботы вана уш котошка иеть.

– Мон весе эрямон перть велень хозяйствасо, – корты трактористэсь. – Школадо мейле тонавтнинь СПТУ-со механизаторонь тевентень, мейле ульнинь армиясо. Тосто велявтомадо мейле, кода карминь колхозсо роботамо, те шкас истя. Ульнинь трактористэкскак, комбайнёрокскак. Савкшнось варчнемс лия техникаяк. Ней тракторонь руленть экшс озат покш мельсэ. Техникась од, вадря. Мелявкст мартонзо а лиснить. Тень кисэ покш сюкпря минек прявттнэнень – техникань парконть одкстомтыть. Икеле ладсо, зярдо тракторонть седе кувать савкшнось витнемс, куш эйсэнзэ роботамс, майсемс а савкшны.

Шабра паксясонть истя жо яровой товзюро видиль Николай Александрович Дорофеев. Сонзэ тракторось «ФЭНДТ», видемань комплексэсь жо эйзэнзэ понгавтозь истя жо од – «Амазоне». Сон ашти колмо сеялкасто, мезесь пек седе шождалгавты ды капшавты тевенть.
Эштё вейке паксясонть видсть сюрокс кукуруза. Александр Владимирович Гульгин важоди тесэ ськамонзо. Стамбарнэ, апак капша ды тевень содазь механизаторось топавты эрявикс тевенть. Александр Владимирович шабра Спасское велень. Ташто Чамзань велень хозяйствань предприятиясонть важоди весе эрямонзо перть.

– Школанть прядыя, ДОСААФ-со тонавтнинь водителень тевентень ды ушодынь колхозсо роботамо, – тешксты Александр Гульгин. – Техниканть варчнинь эрьва кодамо. Мезес илямак озавто, эрьванть марто муян кель-вал. Эсь тевенть пек вечкса. Кадык кортыть, велень хозяйствасо важодемась пек стака, монень жо сон мелень коряс.

Лия паксясонть трактористэсь Дмитрий Александрович Наумов видсь шуж. Тесэяк тевсэть «Хорш» видемань комплексэсь ды «Джон Дир» тракторось.

Кода тешкстызе агрономось Валерий Левщанов, неть паксятне ды эштё кавто-колмо, косо зярс летьке, видемс кадовсть малав меельцекс. Ушодовсть уш лия тевтнеяк: озимой касовкстнэнь андомась, гербицидсэ обработкась.

– Нама, тевтнень шкасто прядомасо од техникась пек лезды. Меельце шкастонть техникань парконть одкстомтынек вадрясто, – корты В.Е. Левщанов. – Нама, улить эштё ташто агрегатонокак. Ансяк, карматано кемеме, сынсткак маласо шкастонть полавтсынек. Эдь эрямось моли икелев, эрязасто совавтовить неень шкань од технологиятне. Велень хозяйствасо тентеме истя жо ковгак а туят. А бути техникась од ды вадря, велень трудий ломантненьгак тевест карми молеме ков седе шождасто. Ды видеманть лангскак шкась карми ютавтовомо седе аламо.


Юлия Еремина
Фототне Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».