Неть читнестэ минь пачколинек инжекс Отяжелень райононь Ламбаське велев. Тесэ важоди «МАПО «Восток» ООО-сь, конань прявтсо ламо иень перть роботы виев аграрникесь ды алкуксонь церась Александр Владимирович Трошин. Неень шкасто предприятиясонть, кода региононь ды целанек масторонь велень хозяйстватнесэяк, моли сехте пси шкась – норовонть урядамось. Зярс читне аштить манейть, сюронть капшама пурнамс.
Зярдо пачкодинек Ламбаське велев, абунгадынек, ульцятнева ардомсто каршонок эзь понгоне вейкеяк ломань. Мезть кортамс, нуемань шкасто эрьва ломанесь лаки тевсэ: кие важоди техникасо, кие тинге лангсо, кие пиди-пани столовойсэ – аноксты ярсамопельть пси шкань геройтненень – сюронь урядыцятненень.
Александр Владимирович Трошин, кода свал, вастымизь седейшкава. Эште кенкш лангсо евтызе мельспаронзояк – норовось тедеде пек сюпав. Сюронь урядамонть ушодызь июлень 12-це чистэ. Неень шкантень паксятнестэ 50 % кенерсть урядамо товзюронть ды шужонть. Товзюронь гектарстонть саевить малав 40–45 центнерт. Ней урядыть шужонть, гектарсто саить 50 центнерт.
– Тедеде озимой товзюрось видезель 5200 гектартнэнь лангсо, яровой товзюрось – 1000 га, шужось – 1400 га, кснавось – 2697 га, ликшась – 400 га, ламбамо якстерькаесь – 3162 га ды соясь – 500 гектартнэнь лангсо. Неень шкасто паксятнесэ трудить 16 комбайнат. Предприятиянть паксянзо сравтовсть Отяжелень ды Ицялонь районтнэва. Важодицятнеде весемезэ 225 ломанть. Минек кавто тингенек – Ламбаське ды Трокс Кужо велетнесэ. Сеть сюротне, конатне а костявить эсенек кедьсэ, усктано костямо Саранскоень Элеваторов. Паксятнесэ важодить Акрос-580, немецень Class ды Белоруссиянь «Полесье» комбайнатне. «Акроссо» важодицятнень ютксо сехте докат комбайнертнэ – Владимир Яковлевич Ютяев, Юрий Гурьянов, Руслан Чернышов, Сергей Чекашин; Class ды «Полесье» комбайнатнесэ: Александр Михайлович Киринкин, Евгений Эрзяйкин ды лиятне. Сюронь усксемань техникасонть эсенек предприятиясто важодить кемень ломанть, ламо улить ве ендо сазьгак. Сюкпря минек предприятиянь инженертнэнень-механиктненень – Сергей Шубиннэнь ды Максим Никоновнень, конатне тундонь перть витнесть техниканть. Зярс комбайнатнень марто зыянов тевть эзть лисне. Важодиця ломаненек сатыть, мелявкст тень кувалма а кирдтяно, – корты Александр Трошин.
«МАПО «Восток» ООО-сь истя жо максы лезкс велень эрицятнененьгак. Важодицянь командась прявтост марто вейсэ ютазь иетнень перть а весть кучнесть СВО-в гуманитарной лезкс марто посылкат, рамсесть боевой техникас эрявикс запчастть ды ламо лия мезе. Кода евтнесь Александр Владимирович, эсест пельде сынь теить весементь, мезес саты виест. Эзизе сепо сеньгак, неень шкасто СВО-со предприятиянь зярыя важодицятне. Аволь умок цератне сакшность отпусков ды совсесть инжекс важодема таркавгак. Евтасть покш сюкпря прявтонтень ды важодиця ялгатненень тенст лездамонть кис.
Истя жо «МАПО «Восток» ООО-сь свалшкань лездыця Ламбаське веленть туртовгак. Кода тешксты предприятиянь прявтось, ютазь иетнестэ хозяйстванть пельде максозель лезкс велень китнень теемантень-витнемантень.
Ансяк кортамосто – тевс! Хозяйствань прявтось тердимизь эсенек сельмесэ варштамс, кода молить нуематне, ды минь сыргинек вастовомо паксясо важодицятнень марто. Евтазь таркантень пачкодинек эрязасто. Те шкастонть паксятнесэ мольсь покш важодема. Сюронть пивсэсть зярыя комбайнат. Мельгаст эрязасто ардтнесть автомашинатне. Сындест башка паксясонть эйсэнек учось хозяйствань прявтонь полавтыцясь ды дока церась Владимир Трошин. Сон – Александр Владимировичень церазо ды важодема таркасо вить кедезэ. Прявтонь полавтыцякс церась важоди малав колмоце ие. Теде икеле зярыя иеть важодсь строительствань коряс инженерэкс.
– Вишка пингестэ саезь лакан велень хозяйствань тевтнесэ. Ледстяса, кода эште пиже церынькакс покштянь марто ардтнинь комбайнасо. Сельмень икеле нейгак кадовсть сеть ташто якстере комбайнатне. Седе тов карминь ардтнеме тетянь марто. А уш университетэнть прядомадо мейле мелесь вейкель – велявтомс велев, лездамс хозяйствантень. Истя лисськак. Ды сюкпря, велявтынь а ськамон. Вечкевикс ним сась мартон. Ней ули мазыйка тейтерьканок, – евтни Владимир Трошин.
Шкань ютазь малазонок сась «МАПО «Восток» хозяйствань агрономось Валерий Григорьевич Баляйкин. Агрономокс хозяйствасонть роботы нилеце ие. Церась теке райононь – Сабанцелень. Эри Целпановасо. Эрьва чистэ ардтни важодеме Ламбаськев. Тевензэ туртов максы весе седейлембензэ. Церанть ули кудораськезэ. Виев специалисттэ башка, Валерий Григорьевич уцяскав ды вечкиця покштя.
Седе тов минек содавтымизь техниканть лангсо инязортнэнь марто. Васенцекс малазонок сась комбайнерось Эдуард Трофимов. Хозяйствасонть церась важоди ветеце ие. Тей роботамо сась Ицялонь райононь техникумонть прядомадо мейле. Эри Пардалесэ. Эрьва чистэ ардтни важодеме «Востоков».
– Лия важодема таркасо прям а неян. Мон эйкакш порасто саезь велень хозяйствасо. Куш кодамо техника марто муян кель-вал. Неень шкасто хозяйствасонть весе техникась од. Важодемс эйсэнзэ мельспаро, – корты комбайнерось.
Седе тов кортамонть поладынек Николай Михайлович Ефремов марто, кона вана уш 15 иеде ламо важоди те предприятиясонть. Сон – КамАзонь ветниця. Церась эри Ицялонь райононь Папулева велесэ.
– Армиядо мейле тонавтнинь Ицялонь райононь СПТУ-со, конань прядомадо мейле ушодынь важодеме велень хозяйствасо. Мон свал машинань руль экшсэ. Ней вана норовонть усксян тинге лангов, седе тов, кода пурнавить сюротне, карми улеме лия важодема. Велень хозяйствасо свал истя, прядови вейке стака тевесь, мельганзо ушодови лиясь, – евтни Николай Ефремов.
Те предприятиясонть важодить велесэ эриця ламо ломанть. Сынь а пелить стака роботадо. Эдь важодемантень вечкемась чачсь мартост. Ансяк улить Саранск ошсто сыцяткак, тесэнь зарплатась а берянтнестэ, сехте пек кизна.
Минь эште зярсыя аштинек паксясо, ванынек, кода важодить цератне. Нама, а сепсынек, сизинек ансяк сынст лангс ванозь. Зяро эйсэст вий ды вадря ежо! Важодить чинек-венек весе масторонть лезэс. Истят сынь – минек эрзянь цератне!
Седе тов минь ардтнинек инжекс столовоев. Тесэ мельспаросо вастымизь эряза эрзянь аватне – предприятиянь важодицятнень туртов ярсамопелень пидицятне-паницятне. Вейкесь эйстэст – Ольга Ильинична Манерова. Те таркасонть авась важоди сисемеце ие. Чачсь-кассь Ламбаськесэ. Ней эри Саранскойсэ, кизэнь шкасто жо сакшны важодеме столовоев.
– Свал кортан, пидемань-панемань кудов важодеме сыть ансяк сеть, кить а вечксызь эсь пряст, – пейди авась. – Кизэ, пси, чипаесь коштонть пултазь пулты. Ансяк цератненень паксясо седеяк стака, седеесь сэреди кисэст, бажатано лездамс тенст тантей пидевкссэ. Мельспаро тенек, зярдо сынь кортыть, кодамо тантей ямось, мерят, каштомонь. А кода лиякс, минь те ямонть кавто чить пидетяно, весе ойменек эйзэнзэ путтано. Мелявттано цератнень кисэ истя, мерят, эрьвась эйстэст эсенек, тиринь, – евтни Ольга Манерова.
Неть тевтнень лангс ванозь, чарькодеви, зяро бу иеть илязт юта, велень эрицятнень коест а полавтневить. Сынь свал кармить лездамо вейке-вейкенень, кие мейсэ машты. Истят ломантнень вийсэст эритькак велетне ды эйсэст важодиця хозяйстватне.
Алена Артемьева.
Фототне
Егор Горинэнь.