Четверг, марта 28, 2024
Важное


Аволь умок РФ-нь Велень хозяйствань министрань полавтыцянть М.И.Увайдовонь прявтсо Мордовиясо ютавтозель промкс, ков сакшность Равчирень федеральной округонь субъекттнэнь Правительствань Председателень полавтыцятне, кинь мельга кемекстазь агропромышленной комплексэнь кевкстематне, исполнительной властень ветеринариянь органонь областьсэ уполномоченной прявттнэ, истя жо Россельхознадзоронь территориальной управлениянь прявттнэ.


Промкссонть ванкшнозель «Эпизоотическое благополучие территории РФ и реализация экспортного потенциала АПК» темась, истя жо кортазель ветеринарной службанть виевгавтомадо.
Важодемань васенце чистэнть промксось ушодовсь Саранск ошонь рынкасо, косо участниктне теевсть содавиксэкс важодеманзо марто, седе, кода тесэ микшневиця продукциянтень тееви ветсанэкспертизась, кода ладяви «Меркурий» системанть важодемась.

Сыре Шайговань районсо промксонь участниктне ульнесть «Новотроицкая» агрофирмань ракшань фермасо. Сынст велень хозяйствань предприятиянть изнявксонзо марто содавиксэкс теинзе холдингень прявтось В.В.Руженков. «Новотроицкая» агрофирмась теезель 2004 иестэ.

– Меленек ульнесь вельмевтемс велесэ эрямонть. Од семиятне авольть кадо тиринь ёнксост, – ёвтни Владимир Викторович. – Покш мель явинек животноводствантень. Течи хозяйствасонть 3700 ракшат, эйстэст 1200 – потявтовиця скалт.
В.В.Руженковонь валонзо коряс, скалсто иезэнзэ васня потявтовсь 3 тёжат килограммат ловсо. Течи тевтне допрок лиякс аштить. 2019 иестэ эрьва скалсто потявтозь 8 тёжадо ламо килограммат ловсо. Агрофирманть ули эсензэ перерабатывающей комплексэзэ. Истя, чистэ переработка тееви 50 тоннат ловсонтень.

2019 иестэ «Новотроицкая» велень хозяйствань предприятиясо важодицятне сайсть 13 тёжат тоннат сюро, мезесь манынь коряс седе ламо. Эрьва иестэ агрофирмась велень хозяйствань продукция мии 280 миллиононь питне. Течи хозяйствасо важодицятнень зарплатаст – 27 тёжадо ламо целковойть. Новотроицк велесэ ули эйдень кужо. Сонзэ эсь ярмак лангс строизе агрофирмась. Тов якить колоньгемень эйкакшт.
«Новотроицкая» агрофирмань прявтонть В.В.Руженковонь ёвтнеманзо поладызе ракшань орматнень каршо бороцямонь коряс республикань станциянь прявт ветеринарной врачось Е.А.Рунков. Евгений Анатольевич кортась «Цифровизация в животноводстве: организация работы по маркированию животных эмиссионными номерами и внесение в единую информационную систему» теманть коряс.
Мейле инжетне ульнесть велень социальной куншкакуросонть, кона строязь «Устойчивое развитие сельских территорий» федеральной программанть коряс.

Сыре Шайговань райононь Новотроицк велестэ инжетнень кист прась Краснослободскоень районов. Бобылевские Выселки велесэ ванкшнызь строявиця вейсэнь спортивной комплексэнть. Краснослободскоень райононь Администрациянь прявтонть А.В.Буйновонь валонзо коряс, спортивной комплексэнть строямось ушодовсь 2019 иень апрельстэ, строямось прядови 2021 иень октябрясто.
– Комплексэнть строи «Анелия» ООО-сь, – полады Алексей Владимирович. – Тесэ кармить эень арена, фитнесэнь зал, кавто бассейнат – покшонь ды эйкакшонь. Те спортивной комплексэсь строяви велень территориянь комплексной виевгавтомань программанть коряс.
– Минь весементь тейсынек велень эрицятнень туртов спортивной комплексэнть шкастонзо строямга, – ёвтни «Анелия» строительной фирмань прорабось Д.А.Еремин. – Стройматериалонть коряс кодаткак стакачить а вастневить.
Тешкстасынек, спортивной комплексэнть питнезэ – 439 миллиондо ламо целковойть.

…Краснослободской райононь Администрациянть вакссо площадесь. Тесэ невтневи МР-нь ветеринарной службань техникась, конань тевс нолдыть республикань ветеринарной службасо важодицятне, ветеринарной врачтне.
Краснослободскоень Культурань кудонь фойесэ теезель Мордовиянь перерабатывающей предприятиянь ды агропромышленной комплексэнь предприятиянь продукциянь выставка. Весемеде пек явовсть «Талина» группась, «Хорошее дело», «Октябрьская» агрофирматне, «Ламзурь» ОАО-сь, «Сыродельный комбинат «Ичалковский», «Сыроваренный завод «Сармич» предприятиятне…
Промкссонть пурнавозтненень поздоровт ёвтась ды арсесь лезэв важодема МР-нь Правительствань Председателесь В.Ф.Сушков. Сон истя жо ёвтнесь республикань агропромышленной комплексэнть течинь тевтнеде ды изнявкстнэде.

2019 иестэ республикань АПК-сь велень хозяйствань продукция мись 73 миллиардт целковойс. Республикась зани васень тарка масторсонок ды Равчиресэ алонь саемань коряс, Россиясо омбоце тарка ды Равчиресэ васенце – ловсонь саемань коряс, Россиясо сисемеце тарка ды Равчиресэ омбоце – сывелень саемань коряс. Неень шкасто Мордовиянь кемгавтово предприятиятне АПК-нь продукциянть миить 24 мастортнэс, конатнень ютксо США-сь, Китаесь, Германиясь, Япониясь. 2019 иестэ омбо масторов экспортось лиссь малав 14 миллионт долларт, вете иес экспортось карми 50-60 миллионт долларт.
Промкссонть толковавиця кевкстеманть коряс кортась РФ-нь Велень хозяйствань министрань полавтыцясь М.И.Увайдов. Сон тешкстызе, экологической ваньксчись – россиянь ракшань продукциянь омбо масторов экспортонь ламолгавтомасо сехте эрявикс фактортнэстэ вейке. РФ-нь Велень хозяйствань министрань полавтыцясь М.И.Увайдов шнызе важодеманть, кона ветяви те тевсэнть Мордовия Республикасо, ды тердсь промксонтень пурнавозтнень тонавтнемс республиканть пельде.

Эсь мелензэ-арсеманзо ёвтызе РФ-нь Велень хозяйствань министерствань Ветеринариянь департаментэнь прявтось Мария Новикова, лиятне.
Промксонь омбоце чистэнть Мордовиянь инжетне ульнесть Чаунзань райононь «Хорошее дело» агрофирмасо ды Отяжелень райононь «Атяшевский» перерабатывающей комплекссэ. Тонавтнизь сень, кода таштавить предприятиятнесэ изнявкстнэ.

Пётр ЗИНОВЬЕВ.
Саранск – Сыре Шайгова – Краснослободск
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».