Минек республикань районтнэва ардтнезь, свал сельмс каявить пижелдыця видезь паксятне. Сынь апак кадо, кода лия ёнкстнэсэ, лангсост а касы зыянов тикше. Тесэ важодить ломанть, конат эзть туе васоло таркава паро эрямонь вешнеме, муизь эсест тевест чачома масторсо. Важодить эсь вийтнес кемезь, киньгак апак покорда, апак сялдо. Паро, зярдо улить виев, кеме ломанть, конат цидярдсть стакачитнень, панжсть-пурнасть хозяйстват, макссть важодема лиятненень.
Истятнэнь ютксо Покш Игнатбуень Вармазейкасто МР-нь Госсобраниянь депутатось Владимир Юрьевич Кабаев, кона ламо иень перть уш кирди крестьянонь-фермерэнь хозяйства. Сонзэ марто вастовомсто кемезеват – минь а ёматано. Владимир Юрьевич сеске кучимизь сёрмадомо важодицятнеде, кить эзть туе велестэ, чинек-венек роботыть мода лангсо. Истя теинекак, ардынек паксяв. Тосо самай мольсь товзюронь видемась. Цёратне пештясть удобрения марто човорязь видьметнень тракторс.
Михаил Юрьевич Кабаев топавты тесэ агрономонь тевтнень. 2001 иестэ прядызе Н. П. Огарёв лемсэ МГУ-нь исторической факультетэнть. Истя лиссь, эрямонь тевезэ сюлмавсь велень хозяйстванть марто. Васня важодсь «Колос» крестьянонь-фермерэнь хозяйствасо, косо топавтовсть ансяк сокамонь-видемань тевть. Мейле сонзэ юрсо панжовсь ялаксонзо Владимирэнь крестьянонь-фермерэнь лия хозяйства. Эряви меремс, тесэ важодить колмонест ялакстнэ (Владимир, Михаил ды Вячеслав).
– Минек моданок весемезэ 2800 гектарт. 1500 гектартнэнь лангс видневить эрьва кодат культурат, кадовикстнэ ламо иень тикшенть алов. Видинек шуж, пинеме, розь, товзюро. Курок кундатано тикшень видеме. Видьметне кода эсенек, истя жо рамазьгак улить. Теде мейле карматано анокстамо ракшатненень тикше.
Тедеде паксятнень видеме лисинек шкадо мейле, тундось позда сась, якшамоль. Модатне вирь вакссо, кувать летькельть. Учинек, зярдо аламодо коськить. Ней вана кадовсь видемс аламошка товзюро ды кукуруза.
Техниканок паро. Мезе эряви – весе ули. Эрьва ие раматано мезеяк од. Сёксня, саемга, раминек «Кировец» трактор ды кормоуборочной комбайна. Важодицянок малав весе районсто сазь, улить Нижней ёнксоньгак. Весень усксетяно кудосто кудос. Нейгак эрявить тенек важодицят: ветврач, агроном. Зарплататне парт, – пачтясь М. Ю. Кабаев.
Седе тов ардынек лия паксяв. Тесэ кукуруза видсь Алексей Юрьевич Дергунов трактористэсь. Эрьва чи сисем чассто саезь сон уш важоди. Чизэнзэ види 30-33 гектарт кукуруза. Цёрась чачсь теске, Вармазейкасо. Школанть прядомадо мейле тонавтнесь Ростовонь морской колледжсэ. Служась армиясо. Тосто велявтомсто роботась Саранскойсэ. Ней уш ветеце ие важоди тесэ. Валонзо коряс, весемесь вечкеви. Ковгак васов ардтнемс а эряви, зарплата пандыть паро ды шкастонзо. Семиянек эрить Покш Игнатвелесэ, тосто ипотекас рамасть кудо. Аволь умок Дергуновтнень чачсь тейтернест. Ёвтатано тенст седейшкавань лембе валт!
Супонькин Сергей Викторович важоди К730 32 СТ од тракторсо, изы моданть. Сонгак аламос лоткась мартонок кортнеме.
– Чачинь Чукало велесэ. 9-це классто мейле тонавтнинь Покш Игнатовань средней школасо. Седе тов – Кемлянь аграрной колледжсэ. Теде мейле важодинь эрьва косо ды эрьва кодамо таркасо, меремс, Россиянть келес. Ней ойминь ве таркас, ниле иеть уш тесан. «Кировец» од тракторсо мельспаро важодемс! Сон кондиционер марто, сэтьме, тракторонь ды кодамояк лия шалт а маряви. Чизэнзэ культивирови 50 гектарт. Тельняяк а кадносынек тевтеме. Те покш тракторсонть велень ульцятнева лов урядатано, – ёвтнесь С. В. Супонькин.
Кодамо паро важодемс истямо тракторсо, варчизе минек газетань корреспондентэськак. Юлия Ерёмина озакшнось руль экшс. Тракторось, марят, кудошка. Эйсэнзэ уезь уят паксяванть.
КФХ-нь важодицятнень тесэ андытькак. Пидицякс-паницякс 2013 иестэ саезь важоди Наталья Владимировна Сонаева. Сон тонавтнесь Ицялонь педколледжсэ, ансяк специальностень коряс эзь саво важодемс.
– Кизна чизэнзэ андтано малав ведьгемень ломанть. Эрьва мезе пидетяно: ямт, кашат, борщ, томбазь модамарть, котлетат, беляшт, пачалксеть, компот, чай. Цёратне ламо важодить, сынст тантейстэ каванямат. Тельня ськамон. Ней кавтонек, омбоце ков тень лезды Ольга Ивановна Попова, мон тонавтан сонзэ пидемань-панемань тевтнес, – ёвтни Н. В. Сонаева.
Седе тов сыргинек конторав. Тосо важодсь Лидия Валерьевна Большакова. Сон – бухгалтер. Чачсь Од Чамзинасо. Тонавтнесь Темниковань велень хозяйствань техникумсо. Тей ардтни Покш Игнатовасто. Кемень иеть уш тесэ важоди.
Тензэ лезды ды эсь тевензэ топавты экономистэсь Галина Николаевна Виняйкина. Сон тонавтнесь Канашонь финансонь техникумсо, прядсь Московонь финансонь академия. Тесэ важоди аволь умок, ноябрясто саезь.
ИП «Кабаев В. Ю.» КФХ-со весемезэ важодить 85 ломанть (кизна малав 100). Неть: дояркат, ваз, скал, бука мельга якицят, зоотехник, механизаторт, трактористт ды седе тов. Сындест мельспаросо ёвтнетяно тенк сыця номертнэсэ.
Татьяна Маторкина
Фототне: Э. Ретунский