Отяжелень райононь «Сабанчеевское» ООО-сь – минек республикань велень хозяйствань прявт предприятиятнестэ вейкесь. Свалшкане тесэ важодсть сюротнень, ламбамо якстерькаень кастоманть ды сюракшов ракшатнень трямонть коряс ды тевс нолдасть неень шкань агротехнологиятнень.
Ней «Сабанчеевское» ООО-нть юрс совить Сабанцелень, Дюрькинань, Таразбуень, Аловелень ды Алашеевкань отделениятне. Предприятиянть прявтсо уш комсте ламо иеть ашти превей ломанесь, покш опыт марто аграрникесь, Мордовия Республикань велень хозяйствань заслуженной важодицясь, Россиянь Агропромышленной комплексэнь почётной роботникесь, Славань III-це степенень Орденсэ казезесь Дмитрий Николаевич ИГУШКИН. Сон тейсь ды теи пек ламо кода предприятиянть, истя тиринь ёнксонть туртовгак. Теке марто Дмитрий Николаевич тешксты, эрьва тевсэнть сехте покш путовксост хозяйствасонть важодицятнень, конатнеде течинь чине лововить малав 250 ломанть. Эрьвась эйстэст – предприятиянть нежезэ, хозяйстванть вандынь чизэ.
Ды те алкукс истя. Зяроксть савкшнось улемс тесэнь хозяйствасонть, свал сельмс каяви, кода эсь тевест топавтыть важодицятне. Сынь путыть оймест ды весементь теить, кода кортыть, ве кедь лангс. Ды свал кемекстыть эсь прявтост валонзо: модась а вечки мельде-валдонь тев, мартонзо эряви важодемс превейстэ, мелень путозь. Паряк, тень кувалма тевесткак молить ламонь коряс седе парсте.
Тундонь видемась
Тундонь видемась «Сабанчеевское» ООО-нь паксятнесэ ушодовсь апрелень 22-це чистэ. Яровой сюротне весе видевсть, кадовсь аламошка ламбамо якстерькай, кукуруза, рапс ды ликша. Кода мерсь хозяйствань растениеводствань коряс прявтонь полавтыцясь Вера Сергеевна Кочурина, бути аволь пиземетне, тевтне весе уш прядовольть.
– Нама, меельце шкастонть сеедьстэ ютыця пиземетне аламодо таргсить видемань тевтнень, мезеяк а теят, кода кортыть, пертьпельксэсь берянекс а эрси. Арсеви, курок манейгады ды лембенди, – корты Вера Кочурина. – Сюронть алов те иестэ минь саинек 5600 гектарт. Истя, озимой шуждонть видезь 2000 гектарт, яровой сюротнеде – 3600 гектарт. Тень ютксо, 2600 гектарт – шуж, 800 гектарт – яровой товзюро, 200 гектарт – сюрокс кукуруза, 500 гектарт хозяйствасонть максозь силосокс кукурузанть алов. Ламбамо якстерькайденть те иестэ видеви 2100 гектарт. Рапстонть васня арсекшнинек видемс 150 гектарт. Ней кемекстынек кавксть седе ламо – 300 гектарт. Истя теевсь сень коряс, ракшатнень андоманть туртов коромось питней, а тесэ эсенек анокставт карми. Рапсонть макссынек переработкас, миненек жо тень кисэ ускить жмых. Истя жо 450 гектарт видевить веиень тикшетнеде, икеле видезь ламо иенсетнеде – 1600 гектарт. Те иестэ арсеви видемс 50 гектарт ликша. Ликшань видьметне рамавсть импортозамещениянь программанть коряс. Ламо иеде икеле те культурась тесэ видневсь, меельце шкастонть жо лоткакшнынек.
Видьметнень уличинть коряс кортамсто Вера Сергеевна тешкстызе, тесэ кодаткак мелявкст арасть.
– Сортонть одкстомтомга эрьва иестэ рамсетяно элитной видьметь кода озимой, истя яровой культуратнень. Ды истя жо тевс нолдатано эсенек васенце ды омбоце репродукциянь видьметнень. Нама, свал рамавить кукурузань ды ламбамо якстерькаень видьметь. Тедеде истя жо сортонь одкстомтоманть туртов раминек рапсонь видьмень элитной партия. Эряви тешкстамс, видьметнень коряс анокстамотне уш весе теезь сёксня. Секскак рамамонть ды сынст пачтямонть коряс мелявкст арасельть. Кодаткак стакачить арасельть удобрениятнень коряскак. Сынст рамсетяно «Ромодановосахар» ООО-нть вельде. Ней уш теинек яволявтома сёксень видемантеньгак, – кемексты Вера Кочурина.
Важодить оймень путозь
Кода уш ёвтавсь икеле, хозяйствасонть виевстэ тевс нолдыть неень шкань агротехнологиятнень. Тракторонь паркось малав эрьва ие ламолгавтови неень шкань техникасо. Нейгак рамазельть МТЗ-82 трактор, тикшень пурнамонть туртов кавто пресст, вецана удобрениятнень ды ведень-мезень усксемань туртов кассетат, маласо шкастонть учить сюронь пивсэманть туртов кавто од комбайнат.
– Неень шкань техникась пек «превей», бути маштат эйсэнзэ роботамо, кодаткак мелявкст ды стакачить а лисить, – корты хозяйствань механизаторось, МТЗ-1221 тракторонть азорозо Виктор Петрович Федотов. – Весе эрямон перть роботан колхозсо, механизаторонь тевсэнть 1979 иестэ саезь. Прядыя школам, тоско жо макссть тень прават, сестэ эдь водителень тевентень тонавтсть школасо, ды озынь руль экшс. Те шканть перть варчнинь эрьва кодамо техника. Нейгак ледстнян, макссть тень Дизель ДТ-54, конась нолдавсь 1976 иестэ. Сонзэ экшс озыньгак. Ней истямо Дизель ашти минек техникань парконтень совамсто. Аламонь-аламонь весементень тонавтнинь. Мейле жо, важодемань весе шканть перть, кодамо техникасо ансяк эзь савкшно важодемс. Тесэ К-700, «Беларус» трактортнэ, эсенек ды омбо масторонь комбайнатне. Весе варчнинь. Нама, неень шкань техникась вадря. Роботат эйсэнзэ мельспаросо ды тевеськак маряви седе шождакс. Покш сюкпря минек прявтонтень Дмитрий Николаевич Игушкиннэнь. Сон пштистэ ваны весе полавтоматнень мельга ды малав эрьва ие рамси од техника.
Истя жо ламо иень перть механизаторокс хозяйствасонть важоди Владимир Иванович Учеваткин. Кода 1982 иестэ озась тракторонь руль экшс, те шкас те тевсэнть. Механизаторось видемань тевтнесэяк важоди, тень туртов модантькак соки-изы, фермасояк яла лезды. Куш кодамо тевсэ дока.
– Трактористтнэ хозяйствасонть эрьва кодамо тевсэ эрявикст, – кемексты Владимир Иванович. – Тунда прявт тевесь – видемась, конань эряви ютавтомс шкастонзо ды вадрясто. Кизэнь перть тикшень анокстамосо-усксемасо котьмат, сёксня модатнень эрявить сокамс-изамс озимойтнень видеманть алов, телень перть жо фермасо лезкс эряви: мезеяк ускомс, ванськавтомс. Лиякс меремс, тевтеме а аштетяно.
А эрси важодемавтомо водителесь Владимир Геннадьевич Саврушкингак. Сонзэ КамАЗ-сь куроксто пачтясы куш кодамо сталмонть. Ней, тундонь видема шкастонть, ускси паксяв видьметнень ды удобрениянть.
– Машинам пек вадря, виензэ сатышкат ды арды паксянь куш кодамо киява. Мартонзо мелявкст а лиснить. А те пек паро, шкась а таргсеви, – тешксты цёрась. – Ней, видема шкастонть, роботамс эряви седе эрязасто. Ды, сюронь урядамстояк истя жо. Эдь бути шкастонзо тевенть тейсак, невтевкстнэяк вадрят кармить. Велень хозяйствасо те покш тев.
«Сабанчеевское» ООО-со истя важоди эрьвась. Свал бажить весементь теемс шкастонзо ды ливтемс эсь хозяйстванть икеле молицятнень юткс.
Юлия Еремина
Фототне: Эдуард РЕТУНСКИЙ