«Ромодановосахар» ООО-сь – сахаронь нолдыця сехте покш предприятия Равчиресэ, сови Россиянь кемень вадря заводтнэнь юткс. Теке марто те вейкине предприятия Мордовия Республикасо, конась важоди ламбамо якстерькаенть тевс нолдамонзо марто.
Важодемань кинзэ сон ушодызе ютазь пингень 1961 иестэ. Тедедень сёксня заводось тешксты 60 иень юбилеензэ. Сонзэ прявтсо малав комсь иеть ашти эсь тевень содыця ломанесь, эрзянь цёрась Александр Иванович Атласов.
Кодамокс ульнесть неть иетне предприятиянть туртов, производствасо од ёнкстнэде ды весенень истямо вечкевикс ламбамо ярсамопелень нолдамонь салавачитнеде минь кортынек «Ромодановосахар» ООО-нь сырьянь коряс прявтонь полавтыцянть Виктор Владимирович Захаркинэнь ды предприятиянь важодицятнень марто.
Од технологиятне шождалгавтыть
тевенть
Предприятиясо сахаронь теемань коряс важодемась ушодови эштё якстерькаень примамонь пунктстонть. Тезэнь ускови весе ламбамо якстерькаесь, кона кастови республикань велень хозяйствань предприятиятнень паксятнесэ.
– Эряви меремс, примамонь пунктсо весе важодемась автоматизированной. Ломаненть тевезэ тесэ пачтязь минимумс. Коронавирусонь кезовонь шкасто те пек эрявикс ёнкс, – корты Виктор Захаркин. – Истя, эрьва машинантень, конась важоди ламбамо якстерькаень усксемасонть, максови электронной накладной – пластикень карточка, косо кирдеви весе информациясь те машинанть коряс: тешкстазь номерэсь, усксицясь (организациясь эли ИП-сь), прицепень важодема лувось (самосвал, удалов каиця, бокав каиця эли борт марто). Те эряви сень туртов, штобу автоматикась сонсь вановоль машинанть кинзэ ды кучоволь эрявикс таркав. Зярдо машинась паксясо пештяви якстерькайде, тосо ули терминал, конань вельде водителенть карточкас тешкстави весе эрявиксэсь: кодамо паксясто саезь продукциясь, сонзэ номерэзэ, косо ашти, кодамо хозяйствань. Ды зярдо сон сы заводов, машинась онкстави вес лангсо ды кучови эрявикс буртоукладчик лангс (тесэ ваннови, кодамо прицепесь), конась чамды ламбамо якстерькаенть. Буртоукладчикень механизаторонть истя жо ули терминалозо, конанть вельде тешкстави, машинась чамдозь. Теде мейле сон таго арды онкстамотнень лангс, ваннови сталмозо чавосто ды уш мейле автоматической лувсо водителентень нолдави товаро-транспортной накладной.
Теде башка, кода мерсь Виктор Захаркин, бути эряви, машинась кучови лабораторияв. Тесэ уш лаборанттнэ ваныть, лиясто эрьва колмоце машинанть, лиясто эрьва кеменценть.
Кода ёвтнесь сырьевой лабораториянь важодицясь – Betalayser системань операторось Надежда Евгеньевна Маньченкова, лабораториянть юрсо ули пробоотборник, конась машинань кузовсто саи якстерькаенть ды максы лабораторияв. Тосо уш ваннови рудазовчись ды сахаронь ламочись.
– Лаборанттнэ якстерькаенть шлить, ванськавтыть ды сон юты монень, – корты Надежда Маньченкова. – Мон уш ванан сонзэ сахаронь дигестиянть. Бути неть максоматне покшт, якстерькаень технологической невтематне седе вадрят ды сахароськак эйстэнзэ лиси седе ламо.
Зярдо минь ульнинек якстерькаень примамо пунктсо, рединек, кода ламо тесэ продукциядонть. Виктор Владимирович тень толковизе истя:
– Якстерькаень примамо пунктсо ускозь продукциядонть теевить производственной кагатт, лиякс меремс, ламбамо якстерькаень буртт. Тесэ якстерькаесь карми аштеме зярыя чить. Тееви те сень туртов, эдь минь а содатано, кодамо карми пертьпельксэсь. Паряк, туить пиземеть, а заводонть важодеманзо уш а лоткавтсак. Секскак минь сонзэ пурнатано кагатс предприятиянть территориясо. Бути жо кортамс видестэ, 60-70 % ламбамо якстерькаенть эйстэ паксясто сеске юты производствас. Те минек туртов седе вадря. Васняяк, сахаронь ды сталмонь ёмавкстнэ седе вишкинеть, теке марто вадрячиськак седе паро. Секскак, ламбамо якстерькаесь, конась ванстови хозяйстватнень паксятнесэ, ламоксть седе сюпав сахарсо эсенек заводонь территориясо кувать ванстовицянть коряс.
Ламбамо якстерькаень кастомадонть
Икеле минь тешкстынек, заводонть важодемазо ушодови ламбамо якстерькаень примамо пункстонть. Паряк, те аламодо а виде, сон ушодови эштё паксясто. Тешкстасынек, ламбамо якстерькаень кастомань тевесь пек а шожда. Сеть, кить теньсэ важодить, парсте чарькодить, неень шкане тень туртов эряви вадрядояк вадря техника, эрявить технологият ды ломанть, конат содыть важодемань весе лувонть. «Ромодановосахар» ООО-со тень парсте чарькодить, секскак явить мель аволь ансяк эсь производствантень, кеместэ важодить республикань велень хозяйствань предприятиятнень мартояк.
– Штобу ламбамо якстерькаень урожаесь улевель вадря, сонзэ видеманть алов паксятнень ушодома анокстамо кавто иеде икеле, – ёвтни Виктор Захаркин. – Якстерькаенть паро видемс сеть паксятнес, косо икеле кассь озимой товзюро, эли жо паксятне кадозельть, лангсост мезеяк эзь касо. Истя паксянь тикшеденть карми седе аламо. Нама, бути эряви, тевс нолдама гербицидтнэнь ды кандома эрявикс удобрениятнень. Теде башка, моданть вадрясто сокама, теема культивация, штобу паксясь улевель виде, теке столь. Те эряви сень туртов, штобу видемадо мейле якстерькаесь лисевель вешкасто ды покшолмань коряс весе улевельть вейкеть. Бути жо паксясь карми аволь виде, якстерькаесь ве таркасо карми покш, лиясо седе вишкине ды таргамсто сон керсеви. А те вети урожайностень вишкалгадомантень.
Истя жо ламбамо якстерькаень вадря урожаень кастомасо башка мель явови видьмекстнэнь кочкамонтеньгак. Кода тешкстызе В. В. Захаркин, заводонть марто важодиця вейке хозяйствасо 2007 иестэ саезь ули сортоиспытательной участка, косо ванновить видьмексэнь 60, лиясто 70 ды 80 гибридт, кода эсенек Россиянь селекциянь, истя омбо мастороньгак.
– Минь кочкатано сеть видьмекстнэнь-гибридтнэнь, конат ладить тесэнь пертьпельксэнть туртов. Рынкасо лововить малав 300 гибридт, миненек жо сынст ютксто кочкама кеменьшка. Ды кочкама сетнень, конат минек ёнкссо максыть покш урожай ды ламбамочинь коряс пек сюпавт. Тень туртов важодияк сортоиспытательной участкась, – кемексты заводонь сырьянь коряс прявтонь полавтыцясь.
Кода мерсь Виктор Захаркин, ламбамо якстерькайденть тедеде видезь 22 300 гектарт, урожайностесь учови 280-300 центнерт ды эряви пурнамс сонзэ ожоковонь 25-26-це читнес, сехте ламось – ожоковонть прядовомс.
– Бути ламбамо якстерькаенть урядасынек те шкастонть – те пек паро, – корты Виктор Владимирович. – Те шкасто якстерькаесь уш кенерсь, сахаронть пурнась эрявикс, переработкас сон моли вадрясто. Эйстэнзэ лиси ламо ды вадря сахар.
Важодицятне – предприятиянть
нежезэ
Паксятнень анокстызь, ламбамо якстерькаень эрявикс гибридэнь видьмекстнэнь видизь, кизэнь перть пштистэ ваныть культуранть касоманзо мельга ды сёксня, зярдо сон пурнасы эрявикс ламбамонть ды кенери, ушодови урядамозо. Эряви меремс, хозяйствань паксятнесэ якстерькаень таргиця весе техникась эсест, сахаронь заводонь. Ды весе сон вадря, неень шкань. Тесэ комбайнатнеяк, погрузчиктнеяк омбо масторонь. Сынь высокотехнологичнойть ды важодить малав ёмавкстомо.
Вейке истямо погрузчиксэ машинистэкс вана уш кемгавтово иеть важоди Александр Владимирович Шаляев. Эрзянь цёрась чачсь Ицяло ёнксонь Селища велесэ, икеле ламо иеть роботась колхозсо. Мейле сась мельс: эряви мезеяк полавтомс эрямосонть, ды кармась важодеме сахаронь теема заводсо.
– Минек лангсо ламо эрьва кодамо робота, – ёвтни Александр Шаляев. – Паксясо эсь техникасонть ламбамо якстерькаенть машинас пештнетяно, заводонь территориясо – известковой кевенть, кона юты производствас, ванськавттано китнень-янтнэнь рудазонть эйстэ ды седе тов.
Важодемась тесэ вечкеви. Васняяк, пек вадря коллективесь, прявтонок Александр Иванович Атласовсто саезь эрьва важодицянть самс. Вейке-вейкень марто весе эрятано ялгаксчисэ.
Машинань ветицякс истя жо уш ламо иеть важоди Пётр Михайлович Зюзин. Ней, якстерькаень урядамо шкастонть, сон ускси комбайнёртнэнь валске марто важодема таркав – паксяв ды чокшне – мекев кудов.
Цёрась заводов сась 2007 иестэ ды те шканть перть эсь ёрокчинзэ невтинзе эрьва кодамо техникасо важодезь. Автобусонь ветницякскак ульнесь, погрузчиксэяк роботась, лия транспорткак варчнесь.
– Мон чачинь Оренбургонь областьсэ, тестэ жо, Ромодановань буень Трофимовщина велестэ, авам, – ёвтни Пётр Зюзин. – 1969-70 иетнестэ тетям служась Самара ёнкссо, ды сынст кучокшнызь тей ламбамо якстерькаень усксеме. Истя сынь авань марто теевсть содавиксэкс, ды заводось сюлмизе сынст эрямост. Мейле, зярдо монськак сынь Мордовияв эрямо, важодема таркакс кочкия «Ромодановосахар» ООО-нть.
Ды цёранть кондятнэде, конат заводонть марто сюлмизь эрямост, тесэ алкукс ламо. Весе сынь теить покш ды эрявикс тев. Ды эрьвась эйстэст – предприятиянть нежезэ.
Сахаронь нолдамось – тевесь а шожда
Ламбамо якстерькаенть паксясто ускизь примамонь пунктс, сырьевой лабораториясь ваннызе сонзэ вадрячинть ды теде мейле ушодови а шожда технологической тевесь – сахаронь-песоконь теемась.
Заводс якстерькаесь юты гидролитической транспортёрганть, косо насостнэнь вельде сон максови шлямо таркас, эйстэнзэ шляви весе модась. Шлязь якстерькаесь элеваторсо кепедеви автоматической онкстамотнес. Теде мейле онкстазь якстерькаесь юты керсематнес ды вишкалгавтови човавксос. Теде мейле неть човавкстнэ максовить диффузионной аппаратс, косо юты сахаронь ливтемась. Диффузионной аппаратсо ливтезь сокось тюсонь коряс раужо, секскак сон максови ванськавтомс, тесэ тевс нолдави известковой ловсось.
Кода тешксты предприятиянь прявт технологось Валентина Вячеславовна Бычкова, якстерькаень соконть валдомтомадо мейле ливтезь сиропстонть вакуум-аппараттнэсэ теить сахаронь кристаллизациянть ды ливтить утфеленть, те човорявкс, конась 50 % ашти сахаронь кристаллтнэстэ ды 50 % сахаронь растворстонть. Кристаллической сахаронть мейле костить ды ливтить сахаронть-песоконть, растворонть жо одс пидить вакуум-аппараттнэсэ эштё сахаронть ливтемга. Теде мейле эйстэнзэ лиси тюжа сахар, конась одс юты переработкас, ды меласса.
Весе те тевенть мельга, теке марто оборудованиянть важодеманзо мельга, пштистэ ваны Владимир Михайлович Смолькинэнь сменась. Сынст кабинетэсь моли компьютерэнь серверной ёнов – эрьва важодицянть икеле компьютер, конань вельде ваннови важодема лувось ды производствань технологиятне. Истямо важодеманть вельде кодаяк а лиси мезеяк менстямс.
Ансяк теезь сахарось-песокось юты упаковкань цехс, косо пештяви кескавга ды кучови анок продукциянь складс. Мейле жо сон юты микшнема таркатнес.
60 иеть – республиканть ды эрицятнень лезэс
– Тедеде минек заводось тешксты 60 иень юбилеензэ. Сон нолдазель 1961 иестэ истямо жо шкасто, сёксня. Весе те шканть перть заводось иезэнзэ среднейстэ нолдакшнось 150 тёжадо ламо тоннат сахар. Те иестэ, якстерькаень урожаенть аламолгадомга, арсеви теемс 90-100 тёжат тоннат, – ёвтни «Ромодановосахар» ООО-нь сырьянь коряс прявтонь полавтыцясь Виктор Захаркин. – Мон тесэ роботан 2003 иестэ саезь. Сестэ сутказонзо нолдавсь 1,5 тёжат тоннат сахар, ней неть невтематне кассть 7,5 тёжат тоннас. Производительностесь кассь малав котоксть. Ды те теезь производствань одкстомтоманть, производительностень кепетеманть, тесэнь важодицятнень путовксост вельде.
Течи «Ромодановосахар» ООО-со важодить 700 ламо ломанть. Эрьвась эйстэст теи пек покш тев аволь ансяк эсенек республиканть, весе масторонть лезэс. Александр Иванович Атласов прявтокс самодо мейле, 2005 иестэ, теизе весементь, штобу советской ташто заводонть таркас стявтомс ветексть седе покш неень шкань высокотехнологичной предприятия. Течи заводось сови Россиянь сахаронь нолдыця кемень сехте вадря заводтнэнь юткс!
Юлия Еремина
Фототне Эдуард Ретунскиень