Кочкурбуень Семилей велесэ улемстэ свал редятано мезеяк од, лиятнень ёнов а молиця ды ёжомарямонь кепедиця.
Ней, зярдо паксясо, ловт, весе тевтне прядовсть, «Норов» Аграрно-производственной фирмась весе вийтнень путы переработканть виевгавтомантень, од комплекстнэнь строямонтень, лезэв тевтнень ушодомантень. Республикасонок икеле молиця предприятиясонть, конань прявтсо Мордовия Республикань Государственной Собраниянь депутатось, Российской Федерациянь ды Мордовия Республикань велень хозяйствань заслуженной роботникесь Александр Ильич Поздняков, тееви весемесь важодема ды эрямо паро таркань улемга, покш зарплатань получамга, седейшкава оймсема шкань ютавтомга ды ёжомарямонь кепедемга!
Койсэнек, виде ули, бути Велень хозяйствань ды перерабатывающей промышленностень важодицянь чиденть икеле ледстясынек, кодамо казнесэ казезь Александр Ильич ламо иень перть виень, шумбрачинь ды шкань апак вансто тиринь моданть лангсо важодеманть, вечкевикс веленть ды (маласо уликстнэньгак) ванстомаст, одкстомтомаст ды мазылгавтомаст кисэ. Неть: Мордовия Республикань III ды II степенень Славань ордентнэ, «За вклад в развитие агропромышленного комплекса России» Российской Федерациянь Велень хозяйствань министерствань сырнень медалесь, РФ-нь Федеральной Собраниянь Федерациянь Советэнь Почётной грамотась, «Мордовия Республикань Государственной премиянь лауреат» почётонь лемесь. Сонензэ максозь Мордовия Республикань Прявтонь «Аграрная слава» почётонь призэсь ды ламо лият.
Тешкстасынек, «Норов» Аграрно-производственной фирмань административной зданияс совамсто кузтемаванть куземстэ эрьва сыцясь редясынзе ламодояк ламо Почётонь грамотатнень ды медальтнень, эрьванть кисэ савсь ламо тевть топавтомс, ламо ливезь валомс. Текенень поладсынек, «Норовсо» важодицятнень ули эсест предприятиясо кемекстазь казне – «Норов» Агрохолдингень Почётной роботник» лемесь, конань кисэ эрьва ковсто казезентень максовить башка ярмакт.
Ушодовсь сюронь
ванстомань ды тевс нолдамонь комплексэнть теемась
Те иень сёксня «Норов» Аграрно-производственной фирмась ушодсь тееме кавто покш объектт. Вейкесь эйстэст – сюронь ванстомань ды тевс нолдамонь комплексэсь. Сынст административной зданиянть эйстэ аволь васоло ашти элеваторось, сюронь костямонь, ванстомань складось. Самай те таркасонть арсезель теемс неень шкантень ладиця, сюронь ванстомань ды тевс нолдамонь складось, конань виезэ карми 45 тёжат тоннас. Сонзэ стявтомась карми ютамо колмо иень перть, васенце этапонть арсить прядомс 2022 иень июльстэ, омбоценть – иень ютазь. Весе стройматериалтнэ рамавить эсенек масторонь, теицятне – «Норовстроень» важодицятне. Кода мерсь Александр Ильич, течи сынст хозяйстватнесэ сатышка важодицят, кить маштыть топавтомо ламо тевть. Невтемакс, строителень кото бригадатнесэ важодить малав ведьгемень ломанть. Тесэ а вешнить важодицят маласо омбо мастортнэстэ, максыть тев ды зарплата эсест велень эрицятненень.
Те производствась пек шождалгавтсынзе кедьвийтнень, важодицятнеде весемезэ кармить 25 ломанть. Сынь истя жо пурнавить те ёнксонь эрицятнень ютксто, сехте ламотне «Норов» Аграрно-производственной фирмань важодицятнень ютксто. Виде, оборудованиясь карми улеме омбо масторонь, тень ловозь, важодицятне икелепелев эйсэнзэ кармить тонавтнеме.
Часозонзо – 10 тоннат кором
Истямо комбикоромонь заводонь тееме ушодсть Красномайской отделениянь территориясо, «Норовский» сывелень переработкань комплексэнть вакссо. Тосо карми нолдавомо гранулированной кором тувотнень ды куркатнень андомс. Кода мерсь тенек «Норов» Агрокомпаниянь группатнень прявтось Александр Ильич Поздняков, тосо часозонзо карми нолдавомо 10 тоннат паро кором. Те объектэнть питнезэ 250 миллионт целковойть. Пеледе ламотне, 150 миллионт целковойтне, эсест ярмактне, 100 млн целковойтне саевить кредитс. Сонзэ строямонзо истя жо ушодсть эсест ломантне, «Норовстроень» важодицятне. Малав весе стройматериалтнэ рамавить эсенек республикань, ансяк оборудованиясь карми улеме омбо масторонь.
Паксясо кастозесь кенярдовты
Паксясо тевтне малав прядовсть, невтевкстнэ кенярдовтыть. Неень шкане поладовить ансяк теле лангс сокамотне. Истя, те фирмань 11 501 гектар модатнень лангсто тедеде саевсть 34 305,5 тоннат эрьва кодат тосо кастовиця культурат. Те иестэнть важодицятнень ды прявтонть сехте пек кенярдовтызь кснавось ды сурось. Истя, кснавось видезель 862 гектартнэнь лангсо, пурназь эйстэнзэ 2933,0 тоннат, эрьва гектарсто саезь 34,02 центнерт. Суро кастозель 52 гектартнэнь лангсо, валовой сборось эйстэнзэ 307 тоннат, урожайностесь – 59,03 центнерт эрьва гектарсто.
Тешкстасынек, «Норов» Агрофирмась республикасонок вейкине хозяйства, косо кастови чиньжарамо ды тееви эйстэнзэ тантей ды паро чиньжарамо ой, конась пек вечкеви республикань эрицятненень.
Сехте покш сюпавчист – ломантне
Течи «Норов» Аграрно-производственной фирмасонть весемезэ важодить малав 600 ломанть. Весе сынь трудонь вечкицят, эсь тевест парсте содыцят. Те сынст виест путоманть вельде велень хозяйствасонть парсте ваныть тиринь моданть мельга, кастови сюпав урожай, трявить-кастовить ракшат.
2021 иенть ушодовомсто октябрянь 1-це чинтень «Агрохолдинг «Норов» ООО-сь нолдась ды мись продукция 1560,4 миллионт целковоень питнес. Истя, «МПК» ООО-сь ды «Норовское молоко» ООО-сь тешкстазь аравтлувост топавтызь 121 %.
Ютазь иень теке жо шкантень невтевксэст ламолгавтызь сывельстэ, ловсосто продуктань нолдамонть коряс. Невтемакс, эрьва фуражной скалсто потявтсть 8.348,0 килограммат ловсо, сутказонзо потявтови 30,6 килограммат. Нать, а стяко тосо важодицятнень эрьва ковонь средней зарплатаст лисни 36 тёжат целковойде ламо.
Тешкстасынек, «Норовсо» важодицятне маштыть эрьва продукциянть видестэ ды лезэвстэ тевс нолдамо, сонзэ эйстэ теить тантей ярсамопель. Ловсосто – топо, сыра, велькс, мороженой, чапамо ловсо ды ламо лия мезе. Сывельстэ – эрьва кодамо колбаса, тесэ свал улить тантей пидевкст-паневкст.
«Норовонь» Красномайской отделениясо улемстэ теевинек содавиксэкс од специалистэнть, утилизациянь цехень операторонть Дмитрий Суяшов марто. Те эрзянь цёрась мельспаросо пачтясь паро куля: те иень сёксня, Велень хозяйствань ды перерабатывающей промышленностень важодицянь чиденть икеле, сонзэ семиянтень Семилей велесэ макссть кудо. Тешкстасынек, сынь нинзэ Татьяна Ивановна марто важодить те хозяйствасонть. Эйкакшост зярс вишкинеть, икеле эрясть Морд. Давыдовасо тетяст-аваст кедьсэ. Ней жо, зярдо «Норов» Агрофирмась макссь тенст од кудо, конань кисэ кармить састыне пандомо, мельспарост пек покш. Ней тетясь ды авась а мелявтыть эйкакшост кисэ, сынь якить од, вадря, ды мезесь сехте паро, кудост эйстэ аволь пек васоло, эйдень кужонтень. Мирденть ды нинть важодема таркаст истя жо овсе маласо.
Текенень поладсынек, сынь, кода маласо велень весе эрицятнеяк, рамить эсест кедьсэ теевть экологиянь коряс ванькс ды аволь пек питней продукция. Те ли аволь уцяска?!
«Норовсо» улемстэ прась уцяска теевемс содавиксэкс тосо важодиця эштё вейке семия марто. Неть – Альберт ды Оксана Бояркинтнэ. Альберт Владимировичень чачома тарказо теке ёнксонь Красномайский посёлкась. Школанть прядомадо мейле сон тонавтнесь Н. П. Огарёв лемсэ Мордовской государственной университетэнь экономической факультетсэ. Сонзэ прядомадо мейле ков молемс важодеме кавтолдомат арасельть. Эдь тетязо Владимир Иванович истя жо ламо иень перть важодсь «Норов» Агрофирмасо ветеринарной врачокс, авазо Красномайской посёлкань школасо ульнесь тонавтыцякс. Ней уш сынь пенсиясот, тевест поладыть цёраст Альберт Владимирович ды урьваст Оксана Викторовна. Урьваст – комбикоромонь теемань цехень прявт.
Бояркинтнэнь семиясо касыть кавто эйкакшт, тонавтнить школасо ды якить эрьва кодамо кружокс, конат улить Семилеень Культурной-оймсемань центрасо.
Текенень поладсынек, сыненст эсь шкасто «Норов» Агрофирмась льготань ипотекань коряс истя жо макссь од кудо, конань питнезэ уш пандовсь. Самай истя, предприятиянь прявтонть ёндо алкуксонь мелявксонть вельде, ванстовить велетне, покшолгадыть семиятне, ламолгадыть тетянь-авань тевень поладыцятне. Кадык сындест «Норовсо» седе товгак кармить седе ламо!
Карнаесь – мелень витема тарка
Неень шкане ламо кортави таркатнесэ туризманть виевгавтомадо, аволь ансяк минек республикань эрицятненень, истя жо ве ёндо тенек сыцятненень оймсема таркань теемадо. Веенстнэ мазыйстэ теде кортыть, снартыть муемс косто-бути ярмакт, ансяк тевтне кодаяк а сыргавтовить. Улить истят ломанть, кить домкасто, педе-пев арсезь, ламонь апак корта, ушодыть паро тев, конась канды лезэ кода ломантненень, истя пертьпельксэнтень. Истятнэнь ютксо, койсэнек, Александр Ильич Поздняков.
Тиринь газетань лопатнесэ те иень сёксня минь пачтинек ловныцятненень Кочкурбуень Семилей веленть эйстэ аволь васоло «Карнай» оймсема тарканть панжомадо, конань тееме ушодсь «Норов» Аграрно-производственной фирмась. Минек ялгатне те кизэнь опаня, пси читнестэ якасть тов оймсеме, экшелямо ды мазый таркатнень ванкшномо. Мелезэст пек тусь, кода эйсэст тосо вастсть-каванясть.
Тоско, «Карнай» сёлтонть чиресэ, ульнесь весемесь, мезесь витизе мелест ды кепедизе ёжомарямост. Пси чистэнть рамсесть мороженой, кудов туемстэ жо рамасть сывель, колбасат, ловсо ды топо. Мелезэст пек тусь весе ярсамопелесь, эдь сон ульнесь свежа ды пек тантей. Аволь косто-бути ве ёндо ускозель, теезель тоско, «Норовсо»!
Те таркасонть весемесь теезь ломаненть лезэс: улить венчть, катамарант… Калонь кундыцятненень, штюрьбадо ярсыцятненень истя жо теезь весе условиятне. Куш сёлт чиресэ аштек ульма марто, бути шкат арась, тонь тарказот тейсызь тосо важодицятне.
А стяко ломантне кортыть, вейке тев, кода тонеть теде ёвтнить ялгат, омбоце – кода эсеть сельмесэ тень весе несак. Вана те арсеманть мельс саезь, минь сыргинек «Карнай» оймсема тарканть варштамо.
Тешкстасынек, кись тов паро. Калгодо вельтявксонть эсь шкастонзо теизе «Норов» Аграрнопроизводственной фирмась. Весе тов сыцятнень васты оймсема таркань прявтось Дмитрий Ильич Поздняков. Сон невтизе тенек весе территориянть, косо неень шкане ютавтовить сонзэ мазылгавтомань ды паролгавтомань тевтне. Стявтовить кудынеть, путови баня, озавтовить чувтот. Од пичинетне неть сёксень читнестэ бажить седе курок кенеремс касомо телень якшамо читнень самодо икеле.
Тешкстасынек, те таркасонть республикань эрицятнень ды сонзэ томбальде сыцятнень маласо шкасто кармить вастомо иень перть. Кода мерсь Дмитрий Ильич, Карнай сёлтонтень каязь сатышка эрьва кодат калт.
Видеть валонзо «Норов» Агрофирма компаниянь группатнень прявтонть Александр Ильич Поздняковонь: – Се ломанесь карми парсте важодеме, кие яви мель эрямонь шумбра лувонтень, машты аволь ансяк парсте роботамо, истя жо оймсемеяк. Кемтяно, «Карнаесь» тееви вечкевикс оймсема таркакс аволь ансяк «Норов» велень хозяйствань фирмасонть важодицятненень, истя жо Кочкурбуень райононь ды весе республикань ломантненень.
Валентина Юдина