Республикань велень хозяйствань предприятиятнесэ тевтне лаказь лакить – моли сюротнень видемась. Течинь чинтень роботатне ушодовсть уш весе хозяйстватнесэ. Сехте васенцекс паксятнес лиссть Отяжеле ёнксонь «МАПО «Восток» ООО-нь трудий ломантне. Тесэ тундонь видемантень кундасть апрелень 16-це чистэ ды, бути пертьпельксэсь карми вадря, неть читнестэ тевтнень прядсызь.
Отяжелень райононь «Мордовское агропромышленное объединение «Восток» ООО-сь – Мордовия Республикань велень хозяйствань прявт предприятиятнестэ вейкесь. Неень шкане сон важоди сюротнень, ламбамо якстерькаень ды тикшень кастомань, сюракшов ракшатнень трямонь ды ловсонь нолдамонь ёнкстнэсэ. Хозяйстванть прявтсо ашти превей, ёроков ды эсь тевентень чарькодиця аграрникесь Александр Владимирович ТРОШИН. Неть читнестэ минь ульнинек хозяйствасонть, кортнинек важодицятнень марто ды ванынек, кода молить тевтне. Кода мерсь Александр Трошин, весемесь тееви шкасто, видемась малав прядовома лангсо.
– Тундонь шкась велесэ шождакс а эрси ды, эряви меремс, велень хозяйствасо стакачитнеде ды тевтнеде сатныть куш кодамо шкасто, – корты «МАПО «Восток» ООО-нь прявтось Александр Трошин. – Техниканть, видьмекстнэнь, ГСМ-нть анокстама шкастонзо. Яровой сюронь культуратнень вадря урожаень саемань прявт ёнксокс ашти шкасто видемась. Тесэ мельсэ кирдема аволь ансяк моданть эрявикс летькечинзэ, истя жо вегетациянь шкань кувалмонтькак, орматнень ды зыянонь кандыця унжатнень каршо сюротнень кемечист. Вана бажитькак хозяйстватне видеманть прядомс шкасто. Эдь кода кортыть: «Тундонь чись ие анды».
Видеманть туртов анокставсь весемесь
Те иестэ «МАПО «Восток» ООО-со сюротнень алов явозь 11675 гектарт мода. Тень ютксо 2573 гектарт шуж, 2124 гектарт яровой товзюро, 320 гектарт ликша, малав 1600 гектарт кснав, 450 гектарт лияназ, 400 гектарт соя, 265 гектарт рапс, малав 400 гектарт силосокс кукуруза, 100 гектарт максозь зёрнакс кукурузанть алов. Видезь 5000 гектарт озимой сюрот. Ды истя жо 383 гектарт веиень тикшеть, малав 900 гектарт – ламо иень. Те иестэ малав 3000 гектарт максозь ламбамо якстерькаенть алов.
– Ламбамо якстерькаенть алов те иестэ модадонть явинек седе ламо. Те минек прявт культура ды прибылеськак эйстэнзэ седе покш, – тешксты Александр Трошин. – Бути жо кортамс озимой сюротнеде, сынь лиссть вадрясто, телентькак парсте ютавтызь. Сынст коряс кодаткак мелявкст арасть. Тундонь видемантеньгак анокстынек вадрясто. Арасть кодаткак стакачить видьмексэнь коряскак. Весементь анокстынек шкастонзо. Минь раминек эсенек масторонь видьмекст, улить омбо мастороньгак. Раминек весе эрявикс удобрениятненьгак.
Тундонь видематнесэ хозяйствасонть важодить 40 ламо ломанть: тевень содыця механизаторт ды вадря специалистт. Техникась предприятиясонть вадря, ламо мезе эрявикс рамазь меельце иетнестэ. Телень перть сонзэ витнизь-анокстызь ды ней важоди кода эряви.
– Течи сюротнень видемань тевтнесэ важодить кото агрегатт – неень шкантень ладиця вадря комплекст, – ёвтни «МАПО «Восток» ООО-нь прявт агрономось Николай Иванович СЛУГИН. – Ниле комплекстнэ видить товзюронть, эштё кавтотне важодить веиень тикшетнень видемасо. Эряви меремс, неть комплекстнэ пек парт, весе роботатнень топавтыть куроксто ды вадрясто.
Эрьва тевсэ – ёроков специалистт
Зярдо ульнинек Ламбаськесэ, хозяйствань весе паксятнесэ мольсь виев важодема. Ве паксясонть видсть товзюро. Николай Валентинович КЛИНОВ механизаторось роботы омбо масторонь «Джон Дир» тракторсонть. Техникась пек вадря ды эряза, секскак трактористэнть тевензэ молить парсте.
– Мон хозяйствасонть важодян весемезэ кавто иеть. Роботась тесэ пек тукшны мелезэнь, – корты Николай Клинов. – Техникась пек вадря. Весементь, мерят, сонсь теи.
Ней вана видематне прядовить, механизаторось вейсэ лиятнень марто карми тееме гербицидтнэсэ ды эрявикс удобрениятнесэ подкормканть. Кизэнь перть важодить тикшетнень ды сюротнень урядамосо, сёксня анокстыть модатнень видемантень.
Лия паксясонть моданть анокстасть видемантень. Кода мерсь хозяйствань прявтось Александр Трошин, меельце иетнестэ тень коряс лувось аламодо седе шождалгавтовсь. Ней тунда паксятнень ансяк изыть ды сеске нолдыть видемань комплекстнэнь. Изамось летьке таркатненьгак пекстасынзе, паксяськак седе валакавтови.
Тесэ важодсь Сергей Иванович САЛМОВ механизаторось. Сон роботы уш умок, эсь тевенть содасы пек парсте. Васенцеде тракторонь, седе виде меремс, дизелень, руль экшс озась 8 класстнэнь прядомадо мейле ды те шкас важоди те тевсэнть.
– Мон весе эрямом перть велень хозяйствасо, – корты трактористэсь. – Школадо мейле тонавтнинь ДОСААФ-со водителень тевентень, мейле ульнинь армиясо. Тосто велявтозь, карминь роботамо колхозсо, те шкас истя. Ульнинь трактористэкскак, комбайнёрокскак. Савкшнось варчнемс лия техникаяк. Ней тракторонь руленть экшс озат покш мельсэ. Техникась од, вадря. Мелявкст мартонзо а лиснить. Тень кисэ покш сюкпря минек прявттнэнень, техникань парконть одкстомтыть. Икеле ладсо, зярдо тракторсонть зняро а роботылить, зяро савкшнось сонзэ витнемс, ней истямо арась.
Истя жо ламо иень перть велень хозяйствасо важоди Анатолий Николаевич ДЕВЯТКИН механизаторось. Сонсь цёрась шабра Ицялонь районсто, тесэ жо роботы вана уш сисем иеть.
– Школанть прядомадо мейле тонавтнинь СПТУ-со водителень тевентень, теде мейле ушодынь колхозсо роботамо, – ёвтни Анатолий Девяткин. – Техниканть варчнинь эрьва кодамо. Мезес илямак озавто, эрьванть марто муян кель-вал. Эсь тевенть пек вечкса. Кадык кортыть, велень хозяйствасо важодемась пек стака, монень жо сон мелень коряс.
А вана Мария Ивановна РАДАЙКИНАНЬ эйстэ ашти видьмекстнэнь ванстомась ды сынст вадрячинь кирдемась. Сон хозяйствасонть важоди утомонь ды тинге лангонь прявтокс. Неть тевтнень топавты 2008 иестэ саезь, кода теезель МАПО-сь. Теде икеле тескень колхозсо ульнесь бухгалтерэкс. Ды кода тешксты сонсь авась, велень хозяйстванть марто сюлмавозь весе эрямозо.
– Минь домкасто ваннотано сюронь видьмекстнэнь анокстамонть-ванстоманть мельга, – корты Мария Ивановна. – Кода ушодови сюротнень нуемась, сеске ушодови минек важодемаськак. Васняяк, сюрось вадрясто костяви, пштистэ ванови утомсо летькечинть мельга, штобу телень перть сюронть вадрячизэ ванстоволь. Тундо ёнов ушодтано анокстамо видьмекстнэнь: сюронть сортоватано, морятано эрявикс гербицидтнэсэ. Покш сюкпря минек прявтонтень Александр Владимировичнень, сон рамась эрявикс агрегат, конась лезды видьмекстнэнь пештнемс покш кескавс. Сон пек шождалгавты тевенть.
Теке шкасто покш сюкпря эсь важодицятнень лемс ёвты А. В. Трошингак. Сон тешксты, тесэнь важодицятне шканть стяко ёмавтнеме а вечкить, свал бажить теемс весементь шкастонзо, вадрясто ды, теде башка, ливтемс эсь хозяйстванть икеле молицятнень юткс.
Юлия Еремина
Фототне: Эдуард РЕТУНСКИЙ