Ламбамо якстерькаенть видемазо республикасонть ушодовсь апрелень 26-це чистэ. Неень шкане те культуранть видеманзо ды кастоманзо коряс важодить Ромодановань, Ицялонь, Лямбирень, Кочкуровань, Чаунзань, Отяжелень, Орданьбуень ды Покш Игнатовань районтнэнь велень хозяйствань предприятиятне.
Весе сынь совить ламбамо якстерькаень видемань коряс холдингентень, конась ашти «Ромодановосахар» ООО-нть юрсо. Сонзэ прявтсо тевензэ парсте содыця ломанесь, МР-нь Государственной Собраниянь депутатось Александр Иванович АТЛАСОВ.
Эряви меремс, неть районтнэ сахаронь заводонть панжомстонзо саезь уш кочказельть якстерькаень видема таркакс. Васняяк, тесэ пек вадрят модатне ды сынь аштить маласо заводонтень. Секскак неть буетне сырьевой зонакс кадовсть течияк. Кода ёвтнесь предприятиянь прявтось Александр Иванович, те иестэ арсеви видемс 22 760 гектарт ламбамо якстерькай, мезесь зярыяксть седе ламо ютазь иенть коряс. Васенцекс жо видемась ушодовсь Покш Игнатовань «8-ое Марта» ООО-со. Сонзэ валонзо коряс, тосо уш тееви васенце путовкстнэнь гербицидсэ валномаськак.
Кода молить видемань тевтне, улить-арасть мелявкст видьметнень коряс ды ламодо лиядо, миненек седе домкасто ёвтнесь «Ромодановосахар» ООО-нь сырьянь коряс прявтонь полавтыцясь Виктор Владимирович ЗАХАРКИН.
Ламбамо якстерькаенть видемазо – покш тев
Маень 17-це чинтень республикасонть видезель 15 376 гектарт ламбамо якстерькай. Те – 68 процентт весементь эйстэ. Теде башка, малав 60 проценттнэ видезь маень 11-це чинть самс. Те корты седе, видемась ушодозель шкадо икеле, ды, арсеви, неть паксятнестэ саеви а берянь урожай ды якстерькаенть карми вадря ламбамочизэ.
– Бути кортамс технической ёнкстнэде, минь анокт видемс эштёяк седе ламо, – тешксты Виктор Захаркин. – Ансяк меельце шкастонть тевтнень аламодо лоткавтыть сеедьстэ молиця пиземетне. Истя, покш пиземетне зярсыя видеманть овсе лоткавтокшнызь, ней жо тевтнень ветятано тосо, косо а пизи ды седе коське. Лиякс а кода, видеманть эряви прядомс. Сень коряс жо, 60 процентт ламбамо якстерькаень весе площаденть эйстэ видезель рана тунда, бути мезеяк а лиси, урожаесь учови ютазь иенть коряс седе покш. Сеть жо модатнестэ, конатне видевить ней ды маласо недлянть перть, якстерькаесь сёксня урядави меельцекс ды сон, арсематнень коряс, истя жо макссы а берянь урожай. Теке марто, эряви меремс, тундонь пиземесь – те овсе а берянь. Минь вана якстерькаенть видинек ды ютась пиземе, видьмекстнэнь туртов те пек паро. Течинь чинтень уш 30 процентт видезенть эйстэ макссть касовкст.
Нама, меельце шкастонть аволь ансяк пиземеть сеедьстэ молить, лиясто пракшныть валскень кельметькак. Кандыть-арась сынь зыян? Тень коряс Виктор Захаркин мерсь, бути кельмесь ашти валскень шкасто косояк кавтошка часонь перть ды 2-3 градуст, берянесь арась. Теке марто, бути сынь эштё модасто касовкст эзть максо. А вана бути вень перть якшамо ды нилешка градуст, видьмекстнэ кулыть.
Видьметне улить, техникась одкстомтови
Кода кемекстызе «Ромодановосахар» ООО-нь сырьянь коряс прявтонь полавтыцясь, масторлангсо тевтнень лангс апак вано, предприятиясь икелепелев анокстынзе весе видьметнень ды касовкстнэнь ванстоманть туртов эрявиксэнть.
– Эрявикс средстванок сатышкат, – тешксты Виктор Захаркин. – Минь икелепелев весементь раминек, ускинек ды явшинек хозяйстватненень. Тень коряс кодаткак мелявкст арасть. Арсеви, седе товгак тевтне ладявить парсте. Эдь эсенек масторсояк видьметнень нолдамонть коряс ветяви покш робота. Истя, меельце иетнень перть те ёнкссонть покш робота вети «СоюзСемСвекла» предприятиясь. Минек эсенекак ули сортоучастканок, косо 2007 иестэ саезь ванкшнотано якстерькаень эрьва кодамо сортонь видьметнень касоманть. Тень коряс содатано, кодат видьметне минек региононть туртов вадрят, конат жо, мекевлангт, овсе а ладить. Невтемакс, кой-кона содавикс сорттнэ Краснодарсо максыть вадря урожай, ансяк вана тесэ сынь мезеяк а максыть. Эрси истяяк, косо-бути те сортось невтизе прянзо беряньстэ, минек жо тесэ тусь. Апак варча тесэ, содамо а кармат. Секскак видтяно ансяк содазь видьметнень, конат эсь пряст уш невтизь.
Теке марто меельце иетнестэ сатышка рамазь якстерькаень видеманть-таргамонть туртов техникадонтькак. Тесэяк мелявкст арасть.
Виктор Владимирович ёвтнесь, тедеде рамасть кавто од культиваторт. Сон сынст лемди «превей» культиваторокс. Агрегатсонть ули датчик, зярдо юты паксяванть, сон неи якстерькаень весе ряднэтнень ды эрьва касовксонть. Ды бути тракторось мекскак туеви ве ёнов, культиваторось кадови таркасонзо ды а кери вейкеяк якстерькай. Истя жо теке культиваторонть вийсэнзэ «андомс» касовкстнэнь вецана удобрениятнесэяк.
– Минь а аштетяно ве таркасо, кастано-виевгадтано. Истя, невтемга, Покш Игнатовань «8-ое Марта» хозяйствасонть удобрениятнень ней каятано аволь коськестэ, пургсетяно ведь ладсо. Те ламоксть седе вадря. Эдь коськестэ селитранть эли калиенть каямсто модасонть улезэ эрявикс летьке. Вецана удобрениятне жо тень туртов теезь станциясонть анокставить кода эряви ды пургсевить паксятнева. Тень коряс сынст вадрячись касы. Те иестэ варчасынек удобрениятнень каямонь истямо лувонть ды вансынек, кода важодить од культиватортнэ, – ёвтни Виктор Владимирович.
Виктор Захаркин тешксты, ней уш эсенек предприятиятнеяк аламонь-аламонь тонадсть важодеме омбо масторонь технологиятнень коряс. Санкциятнень кодаяк печтясынек. Тесэ кортамось моли велень хозяйстванть туртов техникадонть. Эдь хозяйстватнесэ аволь аламо тракторт ды эрьва кодат агрегатт, конат рамазь лия мастортнэстэ. Сынь каладокшныть, эрявкшныть полавтомапельтькак. Цёранть валонзо коряс, сынст туртов комплектующейтне рамавить тескеяк. Импортозамещениянь ёнксонть коряс вейке истямо предприятия важоди Саранск ошсо. Те – «Франц Кляйне» компаниясь. Сынст марто ламбамо якстерькаень кастомань коряс холдингесь важоди уш аволь вейке ие ды поладсы те тевенть седе товгак.
Сахардонть
республикасонть сатышка
Монь койсэ, весе те шкас ледстнить лавкатнестэ сахаронь ёмамонь ды питнень кепедемань коряс аволь умок лисезь тевенть. Неень шкане мелявксось решавсь. А вана кода тень коряс карми седе тов? «Ромодановосахар» ООО-со оймавтымизь. Ламбамо ярсамопелесь ули сатышка. Теке марто те иестэ сахардонть нолдамс арсеви седе ламо ютазь иенть коряс. Зярыя иес эсь прянть пештясынек.
– Те продуктась саты аволь ансяк Мордовиянь эрицятненень, шабра регионтнэненьгак, косо сахаронь теема предприятият арасть. Тень коряс кодаткак мелявкст иляст уле, – кемекстызе Виктор Захаркин.
Юлия Еремина
Фототне: Эдуард РЕТУНСКИЙ