Отяжелень райононь администрациянь Велень хозяйствань управлениянь прявтонть А.М.Степушкин марто сеедьстэ вастневтяно промкстнэсэ, конатнень ютавтни республикань Велень хозяйствань ды продовольствиянь министерствась. Алексей Михайлович сеть ломантнестэ, конат эрямост алтызь агропромышленной комплексэнтень. Сон парсте содасынзе райононь модатнень, косо кастыть ламо ламбамо якстерькай, зёрнакс кукуруза, рапс, сюро. Нучк-пачк содасынзе велень хозяйствань предприятиятнень, крестьянонь-фермерэнь хозяйствань азортнэнь, сынст виест.
Вейке вастовомастонть Алексей Михайлович Степушкин мерсь сёрмадомс «МАПО «Восток» велень хозяйствань предприятиядонть, конань прявтсо Александр Владимирович Трошин. Хозяйствась иестэ иес виензы, саи ламо ламбамо якстерькай, сюро. Эрьва скалсто иезэнзэ потявтови вете тёжадо ламо килограммат ловсо.
Алкукскак, мекс а сёрмадомс?! Эсь сельмсэ несынек сень, кода путови юрось урожаенть алов, кода молить тевтне паксятнесэ. Текенень, Ламбаське велесь, косо ашти «МАПО «Восток» велень хозяйствань предприятиясь, эрзянь.
… Ды вана минь Отяжеле райононь Ламбаське эрзянь велесэнть. Сон вастымизь лембестэ. Ушосо чись алкуксонь кизэнь. Чипаесь калясь вадрясто. Пертьпельксэсь мазыйдеяк мазый. Коштось ванькс. Тешкстасынек, тей сынек весе эпидемиологиянь вешематнень топавтозь: маскасо ды кедьлангакс марто.
Велесь аволь вишкинетнестэ. Тесэ ули средней школа, Культурань кудо...
«МАПО «Восток» велень хозяйствань предприятиянть прявтсо омбоце ие Александр Владимирович Трошин. Агропромышленной комплексэнтень Александр Владимирович алтызе весе эрямонзо. Теде икеле велень хозяйствань прявтокс зярыя иеть важодсь Чаунзань районсо, лиясо.
– «МАПО «Восток» велень хозяйствань предприятиясь теевсь 2007 иестэ, – ёвтни хозяйствань прявтось А.В.Трошин. – Эйзэнзэ совить Отяжелень райононь Ламбаське, Трокскужо, Целпанова, Пенькозавод, Тазале, Низовка, Ицялонь райононь Тарханова, Резоватова, Пардале, Инелей, Лада, Ведя, Калиновка, Вечкезьвеле, Маркина, Береговые Сыреси велетнень модатне. Весемезэ мельганок кемекстазь 19 тёжат 500 гектарт мода. Лангсонзо кастнетяно 10500 тёжат гектарт сюро, 2200 гектарт ламбамо якстерькай, 300 гектарт силосокс кукуруза, 100 гектарт зёрнакс кукуруза, 300 гектарт кснав, 200 гектарт рапс, ламо иень тикше. Хозяйствасонть важодить малав кавтосядт ломанть. Сынь пек вечксызь эсь тевест. Мартост эрьва мезесь топавтови вадрясто. Велень хозяйствань предприятиясонть мельде-валдо важодицят арасть. Тень кувалма виевстэ важодинек мелят. Истя, эрьва гектарсто саинек 522,7 центнерт ламбамо якстерькай. Весемезэ – 114 тёжат 994 тоннат. Озимой товзюро видекшнинек 1402 гектарт, эрьва гектарсто саинек 47,1 центнер сюро, весемезэ – 6603 тоннат. Яровой товзюро видекшнинек 1520 гектарт, эрьвасто саинек 523 центнерт сюро, весемезэ 7 тёжат 949 тоннат.
Александр Владимировичень валонзо коряс, хозяйствасонть эрямос совавтови велень хозяйствасо одось. Мелят предприятиясь рамась кавто од сеялкат – «Монопол» ды «Амазони». Сынь покшт – 24 рядонь ды 18 рядонь. Видемстэ эйсэст усксесть виев «ДжонДир» тракторт. Ве шкасто модась сокави ды видеви. Эйсэст видезельть ламбамо якстерькаень паксятне. Тесэ, «МАПО «Восток» велень хозяйствань предприятиянь правлениясо, вастовинек прявт агрономонть Н.И.Слугин марто. Сон ёвтнесь:
– Тедеде паксяв видеме лисинек апрелень 4-це чистэ. Чись вадряль. Те чистэнть видинек 3 тёжат гектарт: 2000 гектарт шуж, 1000 гектарт товзюро. Трактористтнэ Анатолий Кижаев, Михаил Сошников эсь «ДжонДир» трактортнэсэ чистэ нормаст топавтнесть велькска.
Эйстэст васов эзь кадново видицянь лия агрегатось, конань ветнесть трактористтнэ Николай Инчин, Анатолий Девяткин.
Прявт агрономось Н.И.Слугин шнынзе трактористтнэнь Сергей Пугачевонь, Виктор Макаровонь, конат истя жо важодсть видемстэ.
– Кодат видьмексэнк ульнесть? – кевкстинек Н.И.Слугинэнь.
– Сюро видинек «Заозерский-85» «Скипетр», «Радуга», «Гранни», «Уралосибирская» сортонь. Элитной видьмекст рамсинек «1 Мая» опытно-производственной хозяйствасто ды «Калиновская» ООО-сто, – ёвтнесть Николай Иванович. – А мезть сёпомс, – тедеде видемась а шождатнестэль. Сеедьстэ мольсть пиземеть. Сон тенек паро ладсо важодемс эзь максо. Тень кувалма видемась таргавсь.
Н.И.Слугинэнь валонзо коряс, 2600 гектартнэнь таркас ламбамо якстерькай видезь 1714 гектарт. 948 гектартнэ пиземетнень кувалма эзть видеве. Видицятне: Сергей Инчин, Юрий Гурьянов, Вячеслав Волков.
– Нама кадовозь модась чаво а кадови, – ёвтни Николай Иванович. – Лангозонзо мутано мезе видемс. Кадовсь видемс 40 гектарт рапс, силосокс кукуруза ды зёрнакс кукуруза.
Эряви тешкстамс, «МАПО «Восток» велень хозяйствань предприятиясо весе тевтне ладязь велувсо. Важодицятненень видьстэ паксяв усксеви ярсамопель. Сонзэ пек тантейстэ пидить Раиса Ивлеева, Наталья Тимошкина, Валентина Евдокимова, Анна Калинкина. Сынст прявтсо О.И.Манёрова.
– Мон икеле эринь Саранскойсэ, ней уш омбоце ие хозяйствань важодицятненень пидян ярсамопель, – видькстась Ольга Ильинична. – Тевем вечкса.
… Минь Пардале веленть вакссо паксясонть. Тесэ видезь 80 гектарт яровой товзюро. Вастовинек агрономонть Андрей Слугин ды трактористэнть Иван Кильдюшкин марто.
– Арсетяно пурксемс паксянть зыянов тикшетнеде, – ёвтни агрономось Андрей Слугин. Хозяйствасонть важодян аволь умок. Тей сынь минек университетэнь Агроинститутонь бакалавранть прядомадо мейле, ней тонавтнеманть поладан магистратурасо, конань прядса сы иестэ. Весемесэ тень лезды тетям, Николай Иванович Слугин.
– Монь агрегатонь баконтень кельги 3 тоннат гербицид, – полады агрономонть ёвтнеманзо трактористэсь Иван Кильдюшкин. – Эйсэнзэ валнови 20 гектарт касовкст. Карминдеряй сатышка ведь ды гербицид чизэнзэ валнан 180 гектарт касовкст.
Иван Кильдюшкин тескень, Ламбаськень. Трактористэнь тевенть тонавтнизе Отяжелень техникумсо (икеле ульнесь 13 № СПТУ), конань прядомадо мейле служась армиясо. Теде мейле косо ансяк эзь важоде: паксят виднесь Ромодановань райононь «Комсомолец» велень хозяйствань предприятиясо, Чаунзань райононь «Мордовский бекон» предприятиясо, лиясо. Ансяк уцясканзо муизе тиринь велесэ.
… Ютыть зярыя чить, «МАПО «Восток» велень хозяйствань предприятиясо важодицятне кундыть ракшатненень теле лангс коромонь анокстамо. Тень туртов тесэ весемесь анок.
Петр ЗИНОВЬЕВ
Фототне Э.Ретунскоень