Пятница, октября 23, 2020
Важное

Республикасонть ламолгадыть крестьянонь-фермерэнь, башка азоронь подсобной хозяйстватне. Сынь кастыть сюро, ламбамо якстерькай, якить ракша мельга ды истя седе тов. Сынст покш таликаст районтнэнь социально-экономической виевгавтомасо.

Малав ие предпринимателень тевсэ важоди Алексей Иванович Зубков. Сон эсь хозяйстванзо кемекстызе госагыр (Косогоры) эрзянь велесэ, кона ашти Покш Березникень районсо. Уш кенерсь невтемс эсь прянть паро азорокс ды ламо тевень топавтыцякс.

Течи А.И. Зубков предпринимателесь минек инженек.
– Алексей Иванович, васняяк ёвтнеде зярыя валт эседенк. Косо чачиде-касыде, косто ушодовсть эскелькстнэ покш эрямонтень?
– Мон чачинь Чаунзань райононь Комсомольской робочей посёлкасонть. Тосо средней школанть прядомадо мейле тонавтнеманть поладыя Алексеевкань индустриальной техникумсо. Тень лангс эзинь ойма. Бажинь улемс инженерэкс-энергетикекс. Прядыя Н.П. Огарёв лемсэ МГУ-нь Механикань ды энергетикань институтонть.
Истя уш лиссь, специальностень коряс важодемс тень эзь саво. Меельце иетнестэ ламо кортави туризмадонть. То тосо, то тесэ панжовить туристической агентстват. Монгак арсинь-теинь ды Чаунзасо панжинь туристической агентства.

– Кода понгиде Госагыр велев?
– Те велесь – тетянь, Иван Борисовичень (ней сон ютксонок арась), ды авань, Антонина Ивановнань, тиринь ёнксост. Тесэ ютась монь эйкакшпорам, нучк-пачк содасынь Госагыр велень мазый таркатнень. Ды мелезэнь сась арсемась: мекс а теемс тезэнь парк, косо бу лезэвстэ оймсевельть велень эрицятне, велень инжетне? Таркась сеске муевсь – веленть эйстэ аволь васоло, виренть вакссо.
Мон, тарканть теемга, рамия тесэнь моданть. Тевтне вейке-омбоце мельга тусть. Васня ванськавтыя ды домкалгавтыя сёлтонть, ды лиссь пек паро, мельстуиця эрьке. Теинь эрькентень совамо ды лисема таркат, зярыя вайгельбень тарка ванськавтыя коське тарадтнэде ды наксадо чувтотнеде виренть. А мезть кортамс, ламо вийть савсь путомс. Неть весе тевтнень теинь эсень ярмак лангс.
Те аволь весе. Стясь кевкстема: косто саемс симемс ведь? Те асатыксэськак витезель: чувинек скважина.

– Неть ды лия тевтнень топавтомс киньгак сиведекшниде?
– Эно кода. Нама, сиведекшнинь. Тень пек лездасть сазоронь мирдезэ, малавиксэнь, оян. Сыненст покш сюкпря. Течи ютындерят оймсемань паркканть, ойметь витеви.
Эрькеденть, аллеятнеде башка, строязь колмо кудынеть, косо кармить оймсеме туристтнэ, сетне, кинь ули мелест тонавтнемс, ваномс Госагыр велень мазыйдеяк мазый таркатнень.

– Алексей Иванович, тынь пертьпельксэнь парконь проектэнть лангсо важодемстэ арсиде кудонь ракша марто мини-фермань теемадо. Алкукс-аволь?
– Алкукс истя. Мон тарка-эзем эзинь мукшно. Арсинь яла: кода те меленть топавтомс. Туризмань бизнесэнть поладомакс кармась ракшань фермань строямось. Раминь эштё 25 гектарт модань пайть. Эйстэнзэ кодамо-бути пельксэсь тусь туризмань бизнесэнтень, кадовиксэсь – агробизнесэнтень, конань карминек виевгавтомо Валерия козяйкам марто. Весе модатне, конатне ней кемекстазь монь мельга, – велень хозяйствань, секскак, сынст а эряви чавосто кирдемс. Лангсост зыянов тикшень а нолдамга, нолдамат тевс. Арсинь ракшат кирдемс.
Карминь содамо, Россиясо ютавтови «Агростартап» конкурс. Сынь лездыть теемс васенце эскелькст сетненень, кить бажить теемс фермерэнь хозяйства.
Парсте топавтынь «Агростартапонь» условиятнень ды анокстынь эрявикс документт, кучинь сынст ков эряви.
– Ды тедеде тынк семиянк кармась «Агростартап» программань коряс изницякс…
– Виде, сывелекс скалонь трямга макссть тенек 2 миллионт 400 тёжат целковойть. Неть ярмактне варма мельга эзть туе. Истя, малав 1 миллион ютавтынек фермань строямс. Те тевенть топавтомо тердтнинь строителень бригада Чаунзань районсто. Сынь куроксто теизь эсь тевест.
Шкань апак таргсе раминек герефордской породань 25 скалт, конатнень Мордовиясо касты Покш Игнатовань райононь «Воля» велень хозяйствань предприятиясь. Неть ракшатне якшамодо а пелить. Эйстэст саеви элитной сортонь сывель – мраморной. Сон ловови деликатеснойкс, пек эряви ресторанонь бизнессэ.
– Агротуризманть ветямс эрявить тракторт, лия техника. Тынк ули кодамояк тракторонк?
– Зярс арась. Маласо шкасто арсян рамамс «МТЗ-82» трактор. Те аволь весе. Кеме сюлмот кирдян Чувашия Республикань Карамышевань рыбсовхозонть марто. Арсян тедеде тосто рамамс вишка калнэть ды сынст нолдасынь эрькентень. Нурькинестэ, ушодан калонь кирдемеяк. Мекс? Сыть тенек парков оймсеме туристт, вансызь минек хозяйстванть, мезе кирдтяно. Карми мелест калонь кундсемс? Инескеть, эрькесь рядсек.
– Теле лангс ракшатненень анокстыде кором-арась?
– Анокстынь. Сон сатны. 2 тоннадо ламо раминек тикше Покш Березникень, Дубенкань районтнэнь велень хозяйствань предприятиятнестэ.
– Алексей Иванович, зяро панжиде важодема таркат?
– Кода уш икеле меринь, малавикстнэде башка, панжинь кавто важодема таркат. Кавто ломантне ваныть ракшатнень мельга.
Истя жо ракшатнень ваны электропастухось, конань теинек эсенек вийсэ.
– Кода эрятадо-аштетядо Госагыр велень администрациянть марто?
– Эрятано кеме ояксчисэ. Прявтонть Наталья Николаевна Бистяйкина марто кодаткак ачарькодемат а эрсить. Мекевлангт, вастневиця асатыкстнэнь изнятано вейсэ.
Видькстан, важодемань васень шкастонть тень эрьва мейсэ лездась Покш Березникень райононь Администрациянь прявтось Иван Иванович Игоновгак.
– Алексей Иванович, сюкпря ёвтнеманк кисэ. Муиде шка минек марто вастовомс.

Пётр Зиновьев.
Покш Березникень район
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».